150
Tayta Diosta llapan alabananpaj cashan
¡Aleluya! ¡Tayta Diosga alabasha cachun!
 
Tayta Diosta alabay-llapa rispitädu wasincho.
Alabay-llapa janaj pachacho caycaj Tayta Diosta.
Alabay-llapa munayninwan rurashanpita.
Alabay-llapa fiyupa munayniyoj cashanpita.
Alabay-llapa trompëtata tucashpayqui.
Alabay-llapa arpata, arpano salteriota tucashpayqui.
Alabay-llapa panderëtata tucapallapa dansashpayqui.
Alabay-llapa cuerdayojcunata, pincullucunata tucashpayqui.
Alabay-llapa jatusaj latillucunata tacashpayqui.
Alabay-llapa tacsha latillucunata tacashpayqui.
¡Llapan cawaj cäga Tayta Diosta alabachun!
 
¡Aleluya! ¡Tayta Diosga alabasha cachun!