3
Ri Jesús are nim na u banic chuwäch ri ka mam Moisés
1 Je c'u ri', kachalal, ix ri' ix rech ri Dios, ix jun chquixol ri e siq'uim rumal ri Dios. Kas chixchoman ba' chrij ri Cristo Jesús ri kas apóstol, ri kas qui nimal sacerdotes re ri cojonic ri cäkatzijoj. 2 Ri Cristo Jesús, Are' kas jicom ranima' cho ri Dios, ri xcojow che we patäninic ri'. Je' c'u xuban ri ka mam Moisés xukuje', are' kas jicom ranima' xpatänin cho ri Dios chquixol ri alc'ualaxelab rech ri Dios. 3 Ya'tal c'u che ri Jesús chi cänimarisax na u k'ij chuwäch ri ka mam Moisés je' jas jun yacal ja ya'talic chi cäyi' na u k'ij chuwäch ri ja ri xuyaco. 4 Ronojel ja rajwaxic cäban na rumal jun winak. Are c'u ri banowinak ronojel ri c'olic are ri Dios. 5 Kas tzij c'ut, ri ka mam Moisés kas jicom ranima' xpatänin che ri Dios pa ronojel chquixol ri alc'ualaxelab rech ri Dios. Ri patäninic ri xubano are u k'alajisaxic ri cuban na ri Dios. 6 Are c'u ri Cristo kas jicom ranima' je' jas jun alc'ualaxel ri kas c'o u takanic pa qui wi' ri rachalaxic ri Dios. Uj c'u ri' ri achalaxic ri' rech ri Dios, we cäkatakej ri cojonic che ri Cristo, man cuban tä c'u quieb ka c'ux c'ä cäq'uis na ronojel. Je ri' we kas cujquicot amak'el ruc' ri cu'l wi ka c'ux.
Waral cäkil wi chi cäquirik na uxlanem ru winakil ri Dios
7 Rumal c'u ri' je' jas ri cubij ri Lok'alaj Espíritu chupam ru Lok' Pixab ri Dios ri Tz'ibtalic:
Cämic, we quita ri cubij ri Dios,
8 miban ba' che ri iwanima'
chi xa cabajaric
jas ri xca'n ri winak
ri xquiwalijisaj quib chrij ri Dios,
xquiyac c'u royowal ri Are'
pa ri juyub ri cätz'inowic.
9 Chila', pa ri juyub ri cätz'inowic
ri i nan tat ojer xa xquiyac woyowal,
pune cawinak junab
xquil ronojel tak ri xinbano,
xukuje' tak ri cajmabal,
—cächa ri Dios.
10 Rumal ri' xyactaj woyowal chquij
ri winak ri',
xinbij c'ut: “We winak ri'
xak cuban quieb qui c'ux,
man cäcaj tä c'ut queniman
chque tak ri nu takanic,”
—xincha pa wanima'.
11 Rumal ri' xyactaj woyowal chquij,
xinban c'u juramento, xinbij:
“We winak ri' man cäquirik tä na
que ri uxlanem wuc' in,”
—xincha ri'.
12 Chichajij ba' iwib, kachalal, c'o jun chiwe mäq'uiy etzelal pa ranima', ri xa cutas can rib chrij ri c'aslic Dios, ri mat cäcojon chi che ri Are'. 13 Xane chiwalijisaj ri iwanima' chbil tak iwib ronojel k'ij, cämic ri' ri c'ä c'o na ri k'ij. Je ri' rech c'o jun chiwe mäsubtaj rumal ri mac, cuwalijisaj ta c'u rib chrij ri Dios. 14 We cäkatakej ri ka cojonic chrij ri cu'l wi ka c'ux petinak lok, c'ä cäq'uis na ronojel, cäkarik na ke ronojel u wäch tewchibal junam ruc' ri Cristo.
15 Je ri' cubij ru Lok' Pixab ri Dios:
Cämic ri' we quita ri cubij ri Dios,
miban ba' chi ri iwanima'
xa cabajaric
je' jas ri xca'n ri winak
ri xquiwalijisaj quib chrij ri Dios,
—cächa ri'. 16 ¿Jachin c'u tak ri' ri winak ri xquita ru ch'abal ri Dios, te c'u ri' xa xquiwalijisaj quib chrij? E are' conojel ri winak ri xebel lok pa Egipto ri xc'am qui be rumal ri ka mam Moisés. 17 ¿Jachin tak chquij xyactaj wi royowal ri Dios cawinak junab? Chquij conojel ri xemacunic. Xecäm c'u can ri e are' pa ri juyub ri cätz'inowic. 18 ¿Jachin tak chquij xuban wi juramento ri Dios chi man cäquirik tä na que ri uxlanem ruc'? Chquij ri winak ri man xeniman taj. 19 Cäkilo chi man xecowin taj xquirik que ri uxlanem rumal chi man xecojon taj.