HEBREOS
Jesucristuman hebreo yäracogcunaman cartata apachingan
Manam pipis musyanchu cay libruta pï escribingantapis. Waquin runacuna yarpan Bernabé escribinganta (Hechos 4.36; 13.1-4); waquin yarpan Apolos escribinganta (Hechos 18.24; 1 Corintios 1.12; 3.4—6.22). Waquincuna yarpäpäcun pipis juc cay libruta escribinganta. Maygan carpis cay libruta escribiran Jesucristuman yäracog Israel runacunapämi.
1. Cay libruta liyir musyashun angilcunapita Jesucristo mas munayniyog canganta (1.5—2.18), Moisespita mas munayniyog canganta (3.1—4.13) y cüracunapa mas mandagninpitapis mas munayniyog canganta (4.14—5.10; 7.1-28).
2. Musyashun Tayta Diosninchi runacunata salvananpag mushog conträtuta ruranganta (8.1-13).
3. Musyashun runacuna uywacunata altarchru rupachinanpa truquinga Jesucristuman yäracuptin Tayta Diosninchi perdunänanpag canganta (9.1—10.18).
4. Musyashun Jesucristuman yäracurna payta mana jaguirinanpag canganta (5.11—6.20; 10.19-39).
5. Musyashun imanuy nacarpis Tayta Diosman imaypis yäracunanpag canganta (11.1—12.29). Mas yachrachicuycunapis cay libruchru escribiraycanmi (13.1-25).
1
Lapanpitapis mas munayniyog Cristo cangan
1 Unay wichan ayllunchicunata Tayta Diosninchi achca cutim willacognincunawan tucuynuypa willacachiran. 2 Cay tiempo ushanan wichanna Tayta Diosninchi Wamranwanmi willachimashcanchi. Paywanmi cay pachata y cielutapis camapäcuran. Nircurmi payta chrurasha chay lapantapis munayninchru chararänanpag. 3 Wamranmi musyacächin Tayta Dios munayniyog canganta. Paymi quiquin Tayta Dios niraycan. Paymi munayniyog mandag cayninwan chararan lapan imaycatapis camangancunata. Runapa juchancuna perdunasha cananpag wañurcurmi cieluchru caycag munayniyog Diospa derëchacag lädunman jamacuran. 4 Pay angilcunapitapis mas munayniyog cayman chrayasha. Chaynuypis herenciatanuy mas alicag jutita chrasquisha.
Cristo angilcunapitapis mas munayniyog cangan
5 Manam maygan angiltapis Tayta Diosninchi niranchu:
“Gam Wamrämi caycanqui.
Canan noga Taytayqui cangäta nishcä”.✡1.5 Salmo 2.7
Chaynuy maygan angilpäpis manam niranchu:
“Nogam paypa Taytan cashag,
y paynam nogapa Wamrä canga”.✡1.5 2 Samuel 7.14
6 Guechpa Wamranta cay pachaman cachramur niran:
“Tayta Diospa lapan angilnincuna payta adorächun”.
7 Angilcunapäna niycan:
“Angilnincunata wayranuy cananpag ticrachin.
Pay mandanganta ruragnincunatanam ninanuy cananpag ticrachin”.✡1.7 Salmo 104.4
8 Wamranpäna ichanga niycan:
“Gam, Dios, imaycamapis mandagmi caycanqui.
Mandar imaycatapis alilata ruragmi caycanqui.
9 Gam ali cagta cuyashcanqui y mana ali cagta chriquishcanqui.
Chaymi Tayta Dios, Diosniqui, gamta acrashushcanqui y
waquincunata cushicuyta gonganpita gamta mas cushicuyta goshushcanqui”.✡1.9 Salmo 45.6-7
10 Chaynuypis nin:
“Señor, galarinanchru gam quiquiquim cay pachata y cielutapis camarayqui.
11 Chay lapan ushacaglam. Gam ichanga imaypis caycanquipag.
Chay lapan röpanuymi ushacanga.
12 Röpata doblagnuymi doblarinqui y trucarichinqui.
Gam ichanga chaynuyla caycanquipag.
Imaypis manam ushacanquipächu”.✡1.12 Salmo 102.25-27
13 Manam maygan angilcunatapis Tayta Diosninchi nishachu:
“Cay derëchacag lädüman jamacuy
contrayqui cagcunata munayniquiman chruramungäcama”.✡1.13 Salmo 110.1
14 Lapan angilcuna Tayta Diosninchi mandanganta rurananpämi carcan. Paycunatam Tayta Diosninchi cachramun salvaciunta chrasquinanpag cagcunata cuydananpag.