2
Cristupa willacuyninta cäsucunapag tantiyachingan
1 Chaynuy caycaptinga Cristupa willacuynin mayanganchita mas cäsucushun chay willacuynin ninganpita mana yargunanchipag. 2 Tayta Diosninchi willacuyninta angilcunawan musyachinganga cumplinanpag leymi caran.* 2.2 Chay leycunaga caycan Moisés escribingan leycunam. Angilcuna cayninpa chay leycuna Israel runacunaman entregasha caran. Chaypita musyanayquipag liyinqui Hechos 7.53; Gálatas 3.19. Mana cäsucog runacuna y juchäcog runacuna castigasha cananpag cangannuymi castigasha caran. 3 Chauraga ¿imanuyparag gueshpishun castïgupita Diospa salvaciunninta mana cäsuparga? Chay salvaciunta puntata quiquin Señor Jesucristum willacuran. Payta mayagcunanam chay willacuy rasunpa canganta musyachimaranchi. 4 Chaynuypis Tayta Diosninchim rasunpa canganta musyachimaranchi milagrucunata y munayninwan tucuy nirag ruraycunata rurar. Chaynuypis Santu Espirituta cachramuran Tayta Dios munangannuy ima ruraytapis yachrayta gonanpag.
Jesús runacunanuy cangan
5 Tayta Dios manam angilcunapa munayninmanchu chruranga shamunanpag pachapita rimaycanganchita. 6 Chaypa truquinga Dios escribichinganchru juc partichru jucnin niran:
“¿Imatag runa yarparänayquipag? ¿Imanirtag paypita yarpachracunqui?
7 Walca tiempulam angilcunanuy mana cananpag chrurashcanqui.
Alabasha respitasha cananpag chrurashcanqui.
8 Paypa munayninmanmi lapanta chrurashcanqui”.✡ 2.8 Salmo 8.4-6
Paypa munayninman lapanta chrurar imatapis mana jaguiypam Dios chrurasha. Ichanga munayninman chrurasha captinpis manarämi munayninchru canganta ricanchirächu. 9 Ichanga musyanchi Jesusta walca tiempula angilcunanuy mana cananpag chruranganta. Paymi nacar wañuyninpa alabasha respitasha cananpag chrurasha caycan. Tayta Diosninchi cuyacog carmi lapan runacuna raycu wañunanta munaran.
10 Lapan imaycapis Tayta Diospäga caycanmi y paymi lapanta camaran. Paymi munaran achcag wamrancuna paypa ñaupagninman aywananta. Chaymi nacar-rag Jesús ali cayman chrayasha paycunata salvaciunman pushananpag. 11 Lapanpis juc Taytalapitam, perdunasha cagcunapis y perdunagpis. Chaymi Tayta Diospa Wamranpis “wauguïcuna panïcuna” niyta mana pengacunchu. 12 Pay niycan:
“Gampita wauguïcunata panïcunata willapäshämi.
Lapanpa ñaupagninchrümi alabanzacunata gampag cantashag”.✡ 2.12 Salmo 22.22
13 Chaynuypis nin:
“Tayta Diosmanmi yäracushag”.
Mastapis nin:
“Caychrümi caycä Tayta Dios gomangan wamracunawan”.✡ 2.13 Isaías 8.17-18
14 Chay wamracuna aycha y yawar cangannuymi Jesuspis aycha y yawar runanuy caran. Chaynuy caran wañur wañuypag munayniyogta vincinanpämi. Chay caycan Satanasmi. 15 Chaynuypis wañuyta manchacur esclävunuy imaypis cawaycanganpita jorgusha.
16 Rasunpaga angilcunata yanapänanpächu manam shamuran. Sinöga shamuran Abrahampita miragnincunata yanapänanpämi. 17 Chaymi wauguincunanuy panincunanuy iwal canan caran cuyapäcog yäracuypag cüracunapa mas mandagnin cananpag y Tayta Diosninchi mandanganta rurananpag. Chaynuypa wañuyninwan runapa juchancunata Dios perdunänanpag. 18 Quiquin nacasha y Satanaspis juchäcachiyta munasha carmi juchäcachiyta munasha runacunatapis yanapayta puedin.