7
Jesus yachachin Diosma mayayankapa imami runata harkaskamanta
(Mt. 15.1-20)
Shu puncha Jerusalen llaktamanta fariseo bulamanta runakuna Dios ñupa uras killkachiska killkata kutillata mayka killkakamakunaynti Jesuspama paktanakurka. 2-4 Chayma paktaska runakuna Jesus yachachiskata katikamakunamanta maykankuna makita mana mayllasa mikuranakuskata rikunakurka. Ñupa uras kawsa rukukuna yachachiskashina ñukanchi Israel runakuna mana mikunchichu imana maki mayllana kaskata mana mayllaskawa. Chasnallata rantichina tampukunamanta kuti wasima risa ñukanchi yachachi tukuskashina mayllarisalla miku kanchi. Yali achka yachachiskakunatapas paktachisa kawsanchi: Wishinakunata, kallanakunata, mankakunata, pilchikunatapas imasna mayllana kaskata. Chay fariseo bulapi wankuriska runakuna tukuy runakunamanta yali chaykunata paktachisa kawsakuna kanakurka. Chasna kasa fariseokuna chay killkakamakunaynti Jesusta tapunakurka:
—Imaraykuta kan yachachiskata katikamakuna ñukanchipa ñupa uras kawsa rukukuna yachachiskata mana ranakun. Paktachinarantimanta makita mana mayllasa miku kanakun.—
Chasna tapunakupi Jesus kutiparka:
—Yanka shutipashina rikuchikama runakuna kankichi. Dios rimaskata kwinta ñupa uras kawsa runa Isaias alita rimasa killka karka. Kankunashina runakunamanta killkarka, yanka ali runashina tuku runakunamanta. Dios rimaskata kasna killkarka:
Kay runakuna rimasalla ñukata balichinakun
ranti paykunapa kikin shunku ukumanta mana balichiwanakunchu.
—Diosta kushiyachishu— nisa paykuna ruraskakuna nima imapa mana balinchu.
Paykuna yachachiskaka runapa yuyaymanta surkuska paktachinakunallami kanakun nisa Isaias kankuna laya runakunamanta yuyachisami Dios rimaskata killkarka.
Kankunaka Isaias killkaska shutipa kaskata alipacha rikuchinkichi. Dios runa paktachinkapa rimaskata kasunaranti ñupa uras kawsa rukukuna yachachiskata kasunkichi.
Jesus paykunata rimasa katirka:
—Kankuna yapa yuyaysapa kankichi yuyarinkapa imasna rasa Dios runa paktachinkapa rimaskata mana kasunata ushaypa kanma. Ñupa urasmanta yachachi tukuskata katinata ushankapa kankuna Dios rimaskata hichunkichi. 10 Moises ñupa uras Dios runa paktachinkapa rimaskata killkaskawa kankunata yuyachisha. Kasna Dios runa paktachinkapa rimaskata killkarka:
Kanpa yayata, kanpa mamata balichisa uyana kanki nisa.
Chasnallata killkarka:
Mayka runa paypa yayata mamata piñasa hirusta rimasaka wañuchi tukuna kan nisa Moises killkarka.
11 Kankuna ranti yachachinkichi:
—Shu runa paypa yayata, mamatapas rimama: —Ñuka kankunama kuyana kaskata Diosma kuyarkani. Chayrayku kankunata yanapankapa mana ña tiyawanchu— nisa. 12 Chasna rima runa yayata mamata ña mana yanapana kanchu— nisa yachachinkichi.
13 Chasna kankuna yachachipi Dios runa paktachinkapa rimaskata mana balichinkichichu kankunapa rukukuna yachachiskata paktachinkapa. Yali achka chasna laya ruranakunata rankichimi.—
14 Chasnapi Jesus chaypi munturiska runakunata kayasa rimarka:
—¡Tukuy kankuna uyawaychi! Kayta yachakuychi: 15 Imapas kanchamanta yaykun runa ukupi chayka mana payta harkanchu Diosma mayayankapa. Ranti imapas runamanta llukshin, chay mana ali rimanakuna, chay shuti runata harkan Diosma mayayankapa. 16 Kankuna shutipa uyanata munasaka yachaychi imatami rimanayani.—
17 Chasna nisa Jesus tapunkapa shamuska runakunata sakisa pay yachachiskata katikamakunawa paktana wasima rinakurka. Yaykupi pay yachachiskata katikamakuna payta tapunakurka:
—Kan chasna yuyachina kwintuwa imatata yachachinayanki.—
18 Jesus paykunata kutiparka:
—Kankunapas yuyay tapariskachu kankichi. Manachu yachankichi imapas kanchamanta yaykun runa ukupi chayka mana payta harkanchu Diosma mayayankapa. 19 Imapas kanchamanta runapi yaykun chayka mana shunkupi yaykunchu, astawa wiksapimi yaykun, chaywasha ismapi hichurin.—
Jesus chasna nisa tukuy laya mikuna ali kaskata yuyachisa yachachirka. 20 Washa rimasa katirka:
—Imapas runa shunku ukumanta llukshin chay shuti runata harkan Diosma mayayankapa. 21 Runapa shunku ukumanta mana ali yuyaykuna llukshinakun. Chay yuyaykunata paktachisa runa tukuy laya hiruskunata rasa kawsan. Maykanwapas kawsan. Shuwan. Runata wañuchin. 22 Shukpa warmita hapin. Tukuy uras yalikta charinata munan. Mana alita ran. Shukunata llullachin. Mana pinkarisa kawsan. Shukpa chariskata munasa kawsan. Amu mana uyaskapi paymanta mana alita riman. —Tukuymanta yali balimi kani— nisa kawsan. Mana yuyarisa alichu manachu nisa imatapas rurasa kawsan. 23 Tukuy chay mana alikunata rurachi yuyaykuna runa shunku ukumanta llukshinakun. Chasna yuyaykuna shuti runata harkan Diosta mayayankapa— nisa Jesus rimarka.
Mana Israel bulamanta warmi Jesuswa sinchikuskamanta
(Mt. 15.21-28)
24 Shuk puncha Jesus Israel allpamanta llukshisa Tiro llakta maya partima rirka. Paktasa shu wasima yaykurka —mana pi ñuka kaypi kahuskata yachachu— nisa. Ranti mana usharkachu chaypi kunkaylla samasalla kankapa. 25-26 Shu warmi Jesus paktamuskata yachasa paypama rirka paypa ushushi supay amuyaska tukuskarayku. Chay warmi mana Israel bulamanta warmichu karka. Siria allpapi Fenicia niska partimanta warmimi karka. Jesuspa ñupapi kunkurisa paypa ushushimanta mañarka:
—Supayta ñuka ushushimanta hichupay— nisa.
27 Chay warmi mañarallapita Jesus Israel runakunamalla Dios payta mantaskata yuyarisa chay warmita rimarka:
—Wawakuna ñupakta mikunakuchu. Wawakunapa mikunata kichusa allkushitukunama shitana mana alichu.—
28 Chasna rimapi chay warmi nirka:
—Alita rimanki, chasnami kan, Señor. Chasna kapipas wawakuna mikuskamanta urmaskata allkushitukuna mesa ukupi miku kanakun.—
29 Jesus rimarka:
—Rilla, kan chasna alita rimawaskarayku kanpa ushushi ña aliyarka. Supay ña paymanta llukshiskami.—
30 Chay warmi wasima rirka. Paypa ushushi puñunapi ganas siriraskata tuparka. Supay llukshiska karka.
Shu runa upa nikri, harka harka kwintata Jesus aliyachiskamanta
31 Tiro llakta maya partimanta llukshisa Sidon llaktata muyukrisa pasasa Jesus kuti Galilea kuchama rirka. Kucha mayapi Chunka Llaktakuna niskama paktarka. 32 Chaypi upa nikri harka harka kwinta runata Jesuspama pushamunakurka:
—Kanpa makiwa llankasa kay unku runapa hawapi churapay— nisa mañanakurka.
33 Jesus chay runata shuk partima pushasa rirka. Sapalla kaskapi paypa maki diduta chay runapa nikri ukupi satirka. Chaywasha tyuka yakuwa paypa kallupi tupachirka. 34 Chasnapi hawama rikusa samay pitikta aburisa —Efata— nisa rimarka. Chay rimanayan “paskariska kay”.
35 Chasnapi chay runapa nikri paskarirka. Paypa kallu aliyasa alita rimankapa kallarirka.
36 Chay runawa kuti runakunapama paktasa Jesus chay runakunata rimarka:
—Ama pitapas kwintankichichu kay runata ñuka aliyachiskata— nisa.
Jesus runakunata astawa astawan rimapi mana kwintankapa, chay runakuna astawa tukuykunama kwintanakurka. 37 Chay runa aliyaskata riku runakuna yapa mancharinakurka. Ñupa urasmanta Dios mantana kishpichi runamanta killkariska kaskata yuyarinakurka. —Kay runa chay kishpichi runachu— nisa yapa mancharisa rimanakurka:
—Tukuyta alita ruran. Upa nikriyukunata uyakunata ran. Mana kwinta runakunata pasakta kwintata ran.—