1 Shu puncha kuti achka runa Jesusta katisa munturinakurka. Mikuna illapi Jesus pay yachachiskata katikamakunata kayasa nirka:

2 —Kay runakunamanta llakirinimi. Ña kinsa punchata ñukawa kanakun. Paykunapa mikuna ña tukuripi mikuna illami kanakun. 3 Maykankuna karumanta shamunakurka. Paykunata mana karasa mantapika wasima rina ñampipi sampayasa dismayanakunka.—

4 Ranti pay yachachiskata katikamakuna payta rimanakurka:

—Kay runa illa pampapi imasnata mikunata tuparinka kay tukuy runakunata karankapa. Mana raypachu.—

5 Chasna rimanakupi Jesus tapurka:

—Masna pankunata charinkichi.—

—Kanchislla— rimanakurka.

6 Chayta uyasa Jesus runakunata rimarka:

—Allpapi tiyarichi— nisa.

Chaywasha chay kanchis pankunata hapisa Diosta pakrachurka. Chay pankunata paki paki rasa pay yachachiskata katikamakunama kurka runakunata karankapa. Paykuna tukuy chay runakunata karakrinakurka. 7 Chasnallata ansa challwatapas charinakurka. —Kay challwa mikuskashtuwa runakuna sinchikunakuchu— nisa Jesus challwakunata pay yachachiskata katikamakunama kurka:

—Runakunata karaychi— nisa.

8 Chasna karay tukusa runakuna saksakta mikunakurka. Jesus yachachiskata katikamakuna puchuskata muntuchisa kanchis ashankata huntachinakurka. 9 Chay mikuska runakunaka chusku warankashi kanakurka. Ña mikuskawasha Jesus paykunata —samashu— nisa wasima mantarka. 10 Chaywasha pay yachachiskata katikamakunaynti botipi yaykusa Dalmanuta niska partima rinakurka.

11 Jesus Dalmanuta niska partima paktapi fariseo bulamanta runakuna paypama shamunakurka. Paywa piñarisa rimarinkapa kallarinakurka. Chasnapi payta kamasa rimanakurka:

—Hatun ushaywa shuk ruranata rikuchi ñukanchi kan Dios mantamuska kaskata yachankapa— nisa.

12 Chay runakuna mana paywa sinchikunayapi Jesus samay pitikta llakirisa rimarka:

—Imapata kay mana Dioswa sinchiku runakuna hatun ushaywa shuk ruranata mañawanakun. Alita uyawaychi. Hatun ushaywa shuk ruranata manami rikuchi tukunakunkachu.—

13 Chasnapi Jesus chay fariseokunata chayllapi sakisa kutillata pay yachachiskata katikamakunawa botipi yaykusa chimpankapa kallarirka.

14 Jesus yachachiskata katikamakuna mikunata mana apanakuska karka. Chasna Jesuswa Galilea kuchata chimparanakuskapi shuk panllata botipi charinakurka. 15 Rihuskapi Jesus paykunata nirka:

—Yuyankichi. Fariseo bulamanta runakunapa pan punkichinamanta kuyrarisa kawsaychi, apu Herodespa pan punkichinamantapas.—

16 Chasna nipi pay yachachiskata katikamakuna paykunapura rimarinakurka:

—Ñukanchi mana panta apamuskarayku chasna riman.—

17 Jesus payllata shunkupi yachasa nirka:

—Imaraykuta panta mana apamuskarayku rimarinkichi. Chayra manachu yachakuskankichi. Mana yuyarinata usha kankichi. 18 Ñawiyu kasallata manachu rikunkichi. Nikriyu kasallata manachu uyankichi. Ñachu kunkariskankichi. 19 Ñuka pichka panllawa pichka waranka runakunata karaska uras, masna ashankata puchuskawa huntachirkankichi.—

Paykuna kutipanakurka:

—Chunka ishkay ashankata.—

20 Jesus kuti tapurka:

—Chay kanchis panwa ñuka chusku waranka runakunata karaskapika masna ashankata puchuskawa huntachirkankichi.—

—Kanchis ashankata— nisa kutipanakurka.

21 Chasna kutipanakupi Jesus nirka:

—Chayra manachu yachakunkichi.—

22 Jesus pay yachachiskata katikunaynti Betsaida niska llaktama paktanakuskapi runakuna shu ñawsa runata Jesuspama pushamunakurka, —payta llankapay— nisa. 23 Jesus ñawsa runapa makita hapisa aysasa llakta kanchama pusharka. Paypa ñawikunata tyuka yakuwa hukuchisa, paypa hawapi makita churasa, tapurka:

24 —Shuk imatapas rikunkichu.—

Ñawsa runa ansata rikunkapa kallarisa nirka:

—Runakunata purira yurakunashinata rikurani.—

25 Chasna nipi Jesus kutillata makita paypa ñawi hawapi churarka. Chasna rapi ñawsa runaka ña alita rikurka. Paypa ñawikuna hampiriska sakirirka, ña karumanta tukuyta pasakta rikurka. 26 Chasna tukupi Jesus payta wasima mantarka:

—Wasima risa ama llakta ukuta pasankichu— nisa.

27 Betsaida llaktamanta llukshisa Jesus pay yachachiskata katikamakunaynti Cesarea de Filipo niska allpapi tiya llaktakunama rinakurka. Ñampita rirasa pay yachachiskata katikamakunata tapurka:

—Pi ñuka kaskata runakuna rimanakun.—

28 Paykuna kutipanakurka:

—Maykankuna —Bawtisa Juanmi— nisa rimanakun. Maykankunaka —ñupa uras kawsa Elias, Dios rimaskata kwinta runami— ninakun. Shukunaka —Dios rimaskata kwinta ñupa uras kawsa runakunamanta shukmi— ninakun.—

29 Chasna ninakupi tapurka:

—Kankunaka pi ñuka kaskata yuyarinkichi.—

Pedro kutiparka:

—Kan ñukanchi chapaska Dios mantamuska kishpichi runami kanki.—

30 Jesus paykunata rimarka:

—Chayta mana pitapas kwintankichichu— nisa.

31 Chasnapi paykunata yachachinkapa kallarirka pay kikin pasana kaskata:

—Dios mantamuska runa*8.31 Chay runamanta ñupa uras kawsa Dios rimaskata rima runa Daniel killkarka. Rikuy Daniel killkaskapi 10.16 ñakachiska tukunami kani. Ñukanchi Israel runakunapa kamachi rukukuna, pakrikunapa apukuna, Dios ñupa uras killkachiska killkata kutillata killkakamakunapas ñukawa piñarinakunka, ñukata wañuchiwanakunka. Chasna kapipas kinsa punchapi kawsarishami— nisa pay kikinmanta rimarka.

32 Chasna pay pasanamanta kuskata rimarka. Chayta uyasa Pedro Jesusta mayama pushasa —ama sakinkichu chasna pasankapa— nisa payta rimankapa kallarirka. 33 Jesus muyurisa shuk yachachiskata katikamakunama rikusa Pedrota piñarka:

—Ñukamanta anchuri, supay. Kanpa yuyayka mana Diospachu, runapa yuyaymi kan.—

34 Tukuy chaypi kaska runakunata pay yachachiskata katikamakunatapas kayasa Jesus rimarka:

—Maykan runapas ñuka yachachiskata katikama tukunata munan pay kikin kawsankapa yuyarisa kawsanata sakichu. —Dios munaskallata rasa kawsanayani— nisa kawsachu. Runakuna kankunata ñakachinakusapas, wañuchinayanakupipas ñukawa sinchikusa katinkichilla. 35 Maykan runapas pay kikinlla kawsankapa yuyarisalla kawsan Dioswa chikapa kawsayta mana charinkachu. —Wañuchiwanakupipas katishami— nisa ñukawa sinchiku runa, ñukamanta kushi shimiwapas sinchiku ranti Dioswa chikapa kawsayta charinkami. 36 Shuk runa tukuy kay pachapi tiyaskata chari tukunma pay ranti chikapa ñakarina kaskama rina kapi imapata balinka. Mana balinmachu. 37 Masna kullkitapas paganayasaka manami ushankachu Dioswa chikapa kawsayta rantinkapa. 38 Maykan runa kay mana ñukata yuya runakuna ñupapi, huchata rasa kawsakuna ñupapi ñukamanta pinkarinkachari, kushi shimita ñukamanta rimankapapas pinkarinkachari. Chasna pinkari runamanta ñukapas Dios mantamuska runa kuti shamuna punchapi pinkarishami. Chay uras Diosparayku kawsa anhelkuna chupipi shamusa ñuka Yayapa hatun ushaywa hawapachamanta punchaklla rikurimusa rikuchisha.