46
Iaakob i waan urong Aaigipto
Io, Israael i waan ungaai ma ra nuna kum utnaa raap, ma baa i waan paat irong Ber-Sebaa i tun wetabaar karom a God anun tamaana Aaisaak. Ma u ra marum God i pirpir karom Israael u ra binabo lenbi, “Iaakob! Iaakob!” Iaakob i baalui, “Mi ut iaau.” God i piri naa, “Iaau God, a God anun tamaam. Koku u burut kupi un waan urong Aaigipto, maa iaau ang wangaala anum wuna taara, ma diat a waan paat a ngaala na wuna taara marong. Iaau ang waan ungaai ma ui urong Aaigipto, ma iaau ut ang ben talili ui balet. Ma Iosep ut in paam doko pa ui.”
Ma Iaakob baa raa iaana kaai Israael, i waan kon Ber-Sebaa. Ma a kum natnatuna diat wakaa paa tamaandiat, anundiat kum taulaa ma ra kum natnatundiat u ra kum kiki na winawaan baa Paraao i taar wai kupi din wakaa diat uni. Aap 7:15Diat ben paa kaai anundiat kum wewagua ma ra kum utnaa raap baa diat kalei irong Kaanaan. Io, Iaakob ma diat raap baa i wangaala diat, diat waan urong Aaigipto. I ben a kum natnatuna a kum muaana ma a kum tabuan, ma ra kum taptabuna a kum muaana ma a kum tabuan ma diat raap baa i wangaala diat.
Bi ia a iaa ra kum natnatun Israael, baa raa iaana kaai Iaakob, baa diat waan urong Aaigipto:
 
Ruben a mugaana naat muaana anun Iaakob.
Bi diat a iaa ra kum natnatun Ruben a kum naat muaana:
Aanok, Paalu, Esron ma Kaarmi.
10 Bi diat a iaa ra kum natnatun Simion a kum naat muaana:
Iemuel, Iaamin, Oaad, Iaakin, Soaar ma Saul. Saul a natu ra tabuan Kaanaan.
11 Bi ditul a iaa ra tula natnatun Lewi a tula naat muaana:
Gerson, Koaat ma Meraari.
12 Bi diat a iaa ra kum natnatun Iuda a kum naat muaana:
Er, Onaan, Selaa, Peres ma Seraa. Iaku Er ma Onaan diaar maat utbaai irong u ra pia Kaanaan.
A ru natnatun Peres a ru naat muaana:
Esron ma Aamul.
13 Bi diat a iaa ra kum natnatun Isaakaar a kum naat muaana:
Tolaa, Puaa, Iaasub ma Simron.
14 Bi ditul a iaa ra tula natnatun Sebulon a tula naat muaana:
Sered, Elon, ma Iaalel.
15 Bi diat a kum naat muaana baa Leaa i buta ta diat un Iaakob irong Mesopotaamia, ma ra kum taptabuna. Ma raa natuna a tabuan a iaana Dina. Ain tabuan ma ra in muaana raap 33 diat.
 
16 Bi diat a iaa ra kum natnatun Gaad a kum naat muaana:
Sepon, Aagi, Suni, Esbon, Eri, Aarodi ma Aareli.
17 Bi diat a iaa ra kum natnatun Aaser a kum naat muaana:
Imnaa, Iswaa, Iswi ma Beriaa.
Ma a teindiat a tabuan a iaana Sera.
Bi diaar a iaa ra ru natnatun Beriaa a ru naat muaana:
Eber ma Maalkiel.
18 Bi diaar a ru natun Silpaa a ru naat muaana baa i buta ta diaar un Iaakob, ma ra kum taptabuna. Silpaa a tultul na tabuan baa Lebaan i taar taai karom natuna Leaa. Diat raap 16 diat.
 
19 Bi diaar a iaa ra ru naat muaana a ru natun Raakel a taulaa anun Iaakob:
Iosep ma Beniaamin.
20 Tur 41:50-52Irong Aaigipto, Aasenaat, a natun Potiperaa a tena tuntun wetabaar taangirong On, i buta taa a ru naat un Iosep, a ru naat muaana. A iaandiaar Maanaase ma Eparaaim.
21 Bi diata iaa ra kum natnatun Beniaamin, a kum naat muaana:
Belaa, Beker, Aasbel, Geraa, Naamaan, Eki, Ros, Mupim, Upim ma Aared.
22 Bi diaar a ru natnatun Raakel baa i buta ta diaar un Iaakob, ma ra kum taptabuna. Diat raap 14 diat.
 
23 Raa natun Daan a naat muaana a iaana Usim.
24 Bi diat a iaa ra kum natnatun Naaptaali a kum naat muaana:
Iaasiel, Guni, Ieser ma Silem.
25 Bi diaar a ru natnatun Bilaa a ru naat muaana baa i buta ta diaar un Iaakob, ma ra kum taptabuna. Bilaa a tultul na tabuan baa Lebaan i taar taai karom natuna Raakel. Diat raap 7 diat.
 
26 Io, a niluluk raap i ra wuna taara anun Iaakob baa diat waan urong Aaigipto i welaar ma 66 diat. A kum tabuan anu ra kum natnatun Iaakob pa te i luk diat u ra niluluk bi. 27 Aap 7:14Irong Aaigipto kaai Iosep ma ru natnatuna, a nilulukindiat raap a wuna taara anun Iaakob irong Aaigipto i welaar ma 70.
Iaakob ma ra nuna taara diat ki irong Aaigipto
28 Iaakob i tula muga wa Iuda karom Iosep kupi in waiaa taai u ra aakapi urong Gosaan. Baa diat waan paat irong Gosaan, 29 Iosep i waninaar paa nuna kiki na winawaan ma i waan urong kupi in babo tamaana Israael. Baa i babo paa tamaana, i raat paai ma i luani a ngaala na iwan. 30 Ma Israael i piri taana lenbi, “Iaau ut, iaau aa babo taa a mataam ma iaau nunurai naa kuri utbaai u lalaaun. Io, i koina ku baa ang maat.”
31 Iosep i pirpir karom a kum tateina ma a taara baa diat weur ma tamaana lenbi, “Iaau ang waan ma ang wapua taa Paraao naa, ‘A kum tateng liklik ma ra taara baa diat weur ma tamaang diat aa waan taangirong Kaanaan ma kuri ma diat naang. 32 A kum muaana mi diat a kum tena baboura sip ma ra kum bulumakaau. Ma a kum utnaa raap anundiat, diat lo raapi ut urin, a kum sip, a kum bulumakaau ma raa kum utnaa utkaai.’ 33 Baa Paraao in wataa pa muaat ma in tiri muaat naa, ‘Aawa maa anumuaat pinapaam?’ 34 muaat a baalui lenbi, ‘Miaat anum kum tultul, miaat laana baboura a kum wewagua turpaai ko ra kum kilaala baa miaat naat utbaai, lenutmaa a kum tamtamaamiaat kaai diat laana paami.’ Io, din mulaaot pa muaat kupi muaat a lalaaun u ra papaar Gosaan. In welwelik ko ra taara Aaigipto, maa diat milikuaana a kum tena baboura wewagua.”

46:6: Aap 7:15

46:20: Tur 41:50-52

46:27: Aap 7:14