10
Ta jàhkrihkrit te xet jarẽn xà, Jowãw te ihhôc xà nare
Wa pea ite côjkwa pĩn Pahpãm mã memprar catê nõ tỳjti ata pupun, mã ajpên ahpar mã iwrỳc to mõ. Ne ihkà ita pê ihhêj rũm ahcakrã, ne ihkrãkam ta jõxwỳn xa, mã to mõ. Ne ihkuc prà ita pê pyt prà. Ne ihte pê cuhy ne kam xa. Ne hũhkra kam ihkàhhôc nõ ita crire ne ihpahe hiahpuro mã to tẽ. Ne cute cô kam awpôc rũm ihpar ita xãm, ne pjê kam cute awke xãm. Ne kỳj cati pêa mã caràr, ne caràr ita pê ihhêj rũm rop cahàcti jõkre hôhtijõkre. Caràr jirô pê mã côjkwa pĩn me hõkre jàhkrihkrit te xet pêta jàhkrihkrit pyràcti ita to cute catia. Ne cormã cumã mehcakôc kwỳa kam, wa ajmãr ite ahna ihhôc, ne ramã ahna ihhôc xàa caxuw apu amji mã ahcuprõ, mã côjkwa pĩn jũm jõkre ita te imã:
— Aracri acaxwãm pê amji mã me hũjarẽn xà itajê nõ, ne nee ahna ihhôc nare — hajỹr. Wa ite impar, ne nee ahna ihhôc nare.
Pê Jowãw mã cute ihkrẽr xà caxuw ihkàhhôc crire gõ
Wa pea ite pjê me cô kam Pahpãm mã memprar catê ata pupun, mã cute côjkwa wỳr awpôc rũm hũhkra pẽr, ne ihcakôc. Por Pahpãm ihtĩar ihkrĩ ne cute côjkwa me, pjê me, cô kam ampo cunea ton ata jarkwa na hũjarẽn te hajỹr he:
— Quê ha nee hipêr amji to amcro nõ mẽn nare! Quê ha Pahpãm mã imprar catê te ihkwỳ to xet ita hõhhi cakô. Quê haPahpãm, pom pê ramã cumã me hàpên catêjê pê harkwa to me cumã ihcakôc catêjê mã, amji kam hapac xà na amji jarẽ ata to hàpên kam tẽ — hajỹr.
Mã hipêr côjkwa pĩn jũm te imã ihcakôc ata te hipêr imã ihcakôc ne imã:
— Tẽ ne Pahpãm mã memprar catê nõ, cô me pjê kam xa ata jũhkra kam ihkàhhôc nõ curor hiahpuro ata, cupê apy — hajỹr.
Wa ma tẽ ne ite ihkàhhôc ita na ihwỳr. Mã cute imã hũjarẽn to:
— Ihkàhhôc ita py ne krẽ, quê ha garkwa kam inxô pê pen xô, ne gõxà kam quê ha wa xỳ — hajỹr.
10 Wa ite cupê ihkàhhôc ita pyr, ne ite ihkrẽr. Mã ijarkwa kam inxô pê pen xô, wa ite ihkrẽr jirô pê mã ri ijõxà kam, wa xỳa to hỳ. 11 Mã cute imã hũjarẽn to:
— Ỹhỹ Jowãw, hipêr amã ate ampo kra me, krĩxàre me, pjê kwỳ me, me harkwa pihho catêjê kwỳ me, pahhi kwỳ mã Pahpãm jarkwa kwỳ jarẽn xà — hajỹr.