21
Quê ha côjkwa tuw me pjê tuw kam ampo pej pit
2 Petrô 3.8-13
Ne pea ite côjkwa tuw me, pjê tuw te amji to ipipẽ na hõmpun. Ne mamcôjkwa ata me, pjê ata me, côxwa mea mã hamre ne hamre tu. Wa pea ite Krĩpinkrên pejti tuwti ata pupun, mã Pahpãm pĩn ahpar mãmõ, ata pê ihhêj rũm jũm cuprỳ te impjên me hikwa xàcaxuw, me ajpẽn cajpar to me mõr. Wa pea ite ihkrĩ xà ata pĩn jũm jõkre tỳjti jũjarẽn xà te hajỹrata na impar, mã cute hũjarẽn to:
— Ita caxuw me hũmre cahi na Pahpãm krĩ xà. Ne Pahpãm ita quê ha me cahi na ihkrĩ, ne taaamji to me Hũm Cati. Quê ha hanea ne amji to mehkwỳ neamji cahi na amehkrĩ, quê ha Pahpãm ata amji to me hõ Pahpãm. Ne taa mehcunea mã mehkuc na mento cacô incrà. Quê ha pea hipêr jũ caxuw mehtyc xà nare, ne nee me cumã amji kĩn nare nare, ne nee hipêramencwỳr xà hamreare, ne nee hipêr amehkàj xànõ me cumã hamreare. Ampo na? Maramã mam ampo wej itajê cunea ma tẽ, ne ramã ampo tuw cator xàa kam — hajỹr.
Ne por hỹr xà kam jỹ ata te ri me cumã harkwa to:
— Wa ha ita caxuw ampo tuw ton partu — hajỹr. Ne cute imã harkwa to:
— Atỳj amji mã ijarkwa itajê to hane, nãmri wa ha itỳj ihcunea ton pa, na ca ha ahna ihhôc partu.
— Ne ramã ampo atajê cunea te amji jipêj partu. Ne ipê pjê kat me hihôt jõ Pahhiti, ne ipê cumã kat kam ampo cunea jõ Pahhiti, ne ipê hicu xàakam ampo itajê cunea jõ Pahhiti. Ne por jũm mã kôr ata, wa ha cama cumã mehtĩr rohnỳtti mã xà jõ cô ata kwỳ, quê ha to ikõ, ne nee hipêrcumã kôr nare, ne nee hipêr ihtyc xà nare, ne nee quê ha hahpan xà na imã hàmjõr nare. Ne por quê ha me ampo kên cunea tohjê atajê, to wa ha amji kra, ne pa amji to me Hũm Cati. Ne por amji mã ame ampo cupa to me ipa atajê me, mehkwỳ ihkên mã meirẽn to me ipa atajê me, ampeaj kam amji mã me ito Pahpãm nare atajê me, mehkwỳ curan to me ipa atajê me, ahti na me pyjê caxun atajê me, me hũxy xi catêjê atajê me, cute amji mã ame hũm cahàc carõ kên kĩn to ipacatêjê me, mehhêj xi catêjê cunea, krĩ xà ri cuhy te amji to kwa, ne kam kẽn te me to caxàr xà cacrohti ata, quê ha hipêr amehcura — hajỹr.
Pahpãm na mehkwỳ impej pê Krĩpinkrên tuw pejti pyràc
Carati 4.26
Mã pea Pahpãm mã memprar catêjê te xet atajê nõ te hapua na cratti pê Pahpãm cryc jaxwỳr ata ajpên iwỳr mõ, ne cute imã hũjarẽn to:
— Ajpên ikôt mõ, wa amã Caràcahàcre Kra me hĩxi jikwa tuw xà jahkre, ca hõmpu — hajỹr.
10 Mã Pahpãm Carõ Pejti ata te imã amji jõr, mã macumã imprar catê te ijaprôr ne ito mõ, ne pea cutehahkà jakôtti nõ kàa to ihkà ata naixãm. Ne cute imã Krĩpinkrên pejti tuwti ata jahkre, wa ite hõmpun, mã Pahpãm pĩn côjkwapĩn ajpên iwrỳc to mõ. 11 Ne ampeaj kam Pahpãm pejti jàhcujrohti ata te to ihpràa to, to ihprà. Pê krĩ ita prà pê ihhêj rũm kẽn prà tetetti ata. 12 Ne ampeaj kam intête kwỳc ata ihkà, ne harkwa jàhtô na cute tôxi, nehamãr xà na Pahpãm mã memprar catêjê te tôxi ne ahna amehcuhhê. Ne harkwa atajê kam Ixaher kra te tôxi japrỳ na ihhôc. 13 Ne pê harkwa itajê amji jĩkjê na ahpỹanre na incrê pa, ne pyt japôjxà rũm incrê, ne hanea ne pyt cjêj xà rũm incrê, ne hanea ne ita rũmitajê incrê, ne hanea ne hĩkjê rũm itajê incrê. 14 Ne krĩ tête kwỳc ata pê kẽnte tôxi atajê jipy me to kwỳc, ne kamCaràcahàcre Kra jarkwa na memprar catêjê japrỳ te tôxi ne hikwa.
Krĩpinkrên tuw ata kam ihtỳj me hàhtôa ne mehkrĩ xà
15 Ne pom pê Pahpãm mã imprar catê imã ihcakôc ata jũhkra kam pê cumã wakỳre pràti pê ôr te pĩhhêre ata. Pê cupy ne to xa, cute to krĩ me, intête kwỳc me, harkwa to ipipẽn xà caxuw. 16 Pê krĩ ata hakep pejti itajêa apu ihkrã, ne ajpẽn pit. Ihcahpa na ihpo me, ihcajpuw ihpo me, hĩpê na ihpo me, kàj mã ihpo me, ihcunea ajpẽn pit, nenee ihnõ te ajpẽn jĩkjê nare. Mã pea cute hõ pĩ cajrer ata to to ipipẽn, mã ihpo te quirom te mir pijakrut ne ihkôt xẽj pijakrut. 17 Ne hanea ne cute ipu na kwỳc ata tic to ipipẽn. Mã ihtic na pajara capô te xĩncwẽnta.
Krĩpinkrên tuw ata peaj to impej
18 Ne krĩ pu na kwỳcata, pê kẽn pràti japôc mã apẽ tetetti ata pitintête kwỳc. Ne krĩ ata, pê ôr te wakỳre prà tepti ata to pit mã me krĩata xãm, ne pê ihprà pê ihhêj rũm irĩt xà prà. 19 Ne krĩ mã cuhhê xàkat ata pê ahpỹanre na ajpẽn jipy, kẽn prà pihhopejti itajê to pit mã me to he. Ne mam ita pê ihprà jakati, ne incwỳrpê ita pê ihprà ihkukũmti, ne ihnõ ita pê ihprà irãrã ahhoti, ne ihnõ ita pê ihprà ihkukũm tycti. 20 Ne ihnõ ita pê ihprà ihtatapti, ne ihnõ ita pê ihprà intep rãrãti, ne ihnõ ita pê ihprà ihkukũm tatapti, ne ihnõ ita pê ihpràihkukũm jiprore, ne ihnõ ita pê ihprà ihkukũm tatapre, ne ihnõ ita pê ihprà ihkukũm jakati, ne ihnõ ita pê ihprà ihkukũm jiwrỳincoti, ne ihnõ ita pê ihprà ihkukũm jiwrỳ jiproti. 21 Ne pê kẽn prà jaka jajoti te tôxi atajê kam, ahpỹanre na harkwa partu. Ne krĩ jõ krĩ cape ata, pêwakỳre pràti pê ôr japôc mã apẽhti pê wit pyràc ata to pit mã mehkrĩ cape ata to.
22 Ne pê wa tee krĩ ata kam Pahpãm to me amji kam me hapac xà jũrkwa japê, ne nee ihnõ pupun nare. Ampo na? Me pajõ Pahhiti pê Pahpãm mehirôa pê carôt tỳj ata me, ikra pê Caràcahàcre Kra ata pê ri krĩata cunea kam me Pahpãm to amji kam hapac xà.
Pahpãm jàhcujrohti te Krĩpinkrên tuw cujro
23 Mã nee krĩ ata amji cujro xà caxuw pyt me putwrỳ na prãm nare. Ampo na? Nee mã ampo na nare, Pahpãm pejti jàhcujro xà ata ri ihcujro, neCaràcahàcre Kra ata pê ri hanea ne hàhcujro xà. 24 Quê ha pjê kam mehcunea hàhcujrohti ata kam ame ipa. Quê ha pea pjê kam me cupê pahhi catêjê cunea hỹrmã me pra, me hakràj me, me hàmkrã catêjê me. 25 Ne krĩ jõ harkwa ata, quê ha hihê mẽnata na ihcuhhê. Ampo na? He curi caxwa xà nare na, na quê ha nee jũ caxuw me to hihê nare. 26 Quê ha krĩxàre jàmkrã cati catêjê me, me hakràj cati catêjê me, ihtỳj krĩ ata wỳr me hakràj itajê cunea to me ipa.
Nee curi mehkên ton catêjê cjêj xà hamreare
27 Ne nee krĩ ata mã mehcunea incjêj xà nare. Ampo na? Por krĩ ata mã nee cute me amji kam hapac xà tũmti atajê incjêj xà nare. Ne hanea ne, por cute ame ampo ton xà kam me pahpahàmti atajê incjêj xà nare. Ne hanea ne, nee mehhêj xi catêjê incjêj xà nare. Ne por Caràcahàcre Kra jõ kàhhôc kam hacpỹa mã mehtĩr xà kam me haprỳ hikwa atajê ri ihtỳj mencjêj xà.