Paulus susura na
fee lahenda kamahereꞌ rai kota
Kolose
1
Paulus mulai duiꞌ susura na
1 Soda-moleꞌ neme au mai, Paulus. Manetualain riꞌ here na au fo dadi uꞌ Yesus Kristus lahenda nadedenun. Ita toranoon Timotius nai ia, ana haitua haraoe soda-moleꞌ fee emi boe.
2 Au duiꞌ susuraꞌ ia fee emi, Manetualain lahendan rai kota Kolose, fo riꞌ tao tuka Yesus Kristus eno masoda Na laꞌo naroo.
Ami hule fo ita Aman Manetualain, natudu dale malole Na neuꞌ emi, fo ela emi bisa masoda no tetu-temaꞌ, mole-dame, ma tesatei-tamadaleꞌ.
Paulus hule-haradoi fee lahenda kamahereꞌ rai Kolose
3 Maneniko ami nai ia hule-haradoi fee emi, sona ami hule makasi neuꞌ Manetualain, ita Ramatuan Yesus Kristus Aman. 4 Ami mamanene hata dodouꞌ laꞌeneuꞌ emi mamahere Yesus Kristus, ma laꞌeneuꞌ emi dale susue-lalaim, ma dale malole mara soaneuꞌ basa lahenda kamahereꞌ ara. 5 Emi tao leo naꞌ, nana huu emi malelaꞌ soda-moleꞌ fo nanapedaꞌ soaneuꞌ emi nai nusatetu-ikutemaꞌ a. Parnaa emi mamanene soda-moleꞌ ia neme dedea-nafada matetuꞌ a, riꞌ Ramatuaꞌ a Tutui Malolen, 6 fo lahenda reu rafadan neuꞌ emi neme uluꞌ mai so. Tutui Malole ria nanatui-nanabekaꞌ nai basa mamanaꞌ nai dae-bafoꞌ ia, ma hapu buna-boa malole, nana huu tao na lahenda masoda na natafali dadi malole. Emi masoda ma boe natafali dadi malole leo naꞌ, mulai neme masososa na emi mamanene Tutui Malole ria, ma bubuluꞌ matetuꞌ Manetualain dale malole Na.
7 Emi manori hata ia ra neme aꞌa Epafras, fo ami tia-lai mana noi susuem. Ana makate nalalaꞌo naroo Kristus nonoi-tataon nai emi talada.✡Kolose 4:12; Filemon 23 8 Ana tui ami nai ia, laꞌeneuꞌ emi susue-lalaim fo Manetualain Dula-dale Na fee emi so a.
9 Huu ria na, mulai neme masososa na, ami mamanene laꞌeneuꞌ emi, ami hule-haradoi fee emi laꞌo naroo. Ami hule neuꞌ Menetualain, ela emi bisa malelaꞌ matetuꞌ Ria hihii-nanaun, ma emi bisa bubuluꞌ hata dodouꞌ, tuka hata fo Ramatuaꞌ a Dula-dale Na nanori-nafadan neuꞌ emi. 10 No ria na, emi bisa masoda raadale-toꞌeteiꞌ, ma meni Manetualain nade malole Na. Ma emi boe bisa tao ma Ramatuaꞌ a dale Na namahoꞌo nai basa hata a. Maneniko emi matudu dale malole neuꞌ lahenda, neuꞌko emi maboa boa malole laꞌo naroo. No ria na, emi bisa boe-boe malelaꞌ Ramatuaꞌ a.
11-13 Ami boe hule-haradoi neuꞌ Manetualain, fo fee Ria kuasa kahere Na, ela emi bisa lepa-masaa ma basa hata sira no dale naneneteꞌ. Ami hule fo emi dale ma bisa henuꞌ no namahoꞌo, ela emi hule makasi maroo neuꞌ Amaꞌ Manetualain. Ana soi enoꞌ, ela emi bisa sipo babatiꞌ neme posakaꞌ nai nusatetu-ikutemaꞌ a. Ana fee posaka ria neuꞌ basa lahenda fo ramahere Yesus Kristus. Ana poꞌi-tata na ita teme kuasa maiu-mahatuꞌ a mai so, boe ma fee ita dadi teuꞌ Yesus Kristus lahendan, fo leo nai makaledoꞌ a daleꞌ. Ana soꞌu na Yesus Kristus, dadi neuꞌ ita Mane na. Yesus nana Manetualain Ana susuen. 14 Manetualain fee heni Ana Na, ela soi-tefa na ita, ma sae-safe heni ita sala-siko nara.✡Efesus 1:7
Kristus, dema lena basa-basan
15 Kristus, rupa-loleꞌ esa no Manetualain,
lahenda dae-bafoꞌ a ta bisa ritan.
Ria riꞌ uluꞌ, neme basa-basan,
ma Ana dadi Ramatua neuꞌ basa-basan fo Manetualain adu naa so a.
16 Manetualain pake Ni
fo adu lalai ma dae-bafoꞌ a no basa oe-isin.
Ana adu-tao basa-basan fo lahenda dae-bafoꞌ a bisa ritan,
ma lahenda dae-bafoꞌ a ta bisa ritan.
Natutuduꞌ leo-leoꞌ, mana pareta ra, sira siꞌ homu kuasa,
maneꞌ ara, ma malaka ra.
Basa-basan fo Manetualain adu-tao a,
Ana adu-tao soaneuꞌ Yesus Kristus,
ma Yesus boe noi-tao basa sira.
17 Tepoꞌ fo basa fekeꞌ ara bei taꞌa,
tehuu hapu Ni memaꞌ so.
Basa-basan nanahekeꞌ roo Ni,
ma Ria riꞌ ator asa.
18 Ria riꞌ dadi Malaka fee basa lahenda kamahereꞌ ara,
ma lahenda kamahereꞌ ara dadi sama leoꞌ Ria ao-ina Na.
Ria riꞌ nalalaꞌo basa-basan.
Neme basa mana mateꞌ fo riꞌ ara rasoda seluꞌ a,
Ria riꞌ penting lena,
fo ela Ria riꞌ madema nan seli lena neme basa-basan.✡Efesus 1:22-23
19 Basa-basan fo rai Manetualain Ao-inan daleꞌ a,
rai Kristus Ao-inan daleꞌ boe,
ria riꞌ tao na Ramatuaꞌ a namahoꞌo.
20 Manetualain pake Yesus Kristus,
ela basa-basan fo riꞌ Ana adu-tao a mole-dame roo Ni.
Ria fee Ana Na,
de daa Na faa dadi neuꞌ tutunu-hohotuꞌ,
ma mate nai ai kake a,
fo ela basa-basan rai lalai,
ma basa-basan rai dae-bafoꞌ a,
bisa ramole-radameao seluꞌ roo Manetualain.✡Efesus 2:16
21 Fai a ulu na, emi masoda nai deaꞌ, dooꞌ a meme Manetualain mai. Emi musu moo Ni, boe ma bika-bati memeꞌ Ana mai, nana huu emi dale tadalu mara, ma nonoi tadalu ma riꞌ nalena laka neuꞌ Ana laꞌo naroo. 22 Leo mae leoꞌ na, tehuu besaꞌ ia Ria riꞌ soi enoꞌ, de ita bisa mole-dame seluꞌ too Ni. Ria riꞌ nadenu Ana Na fo dadi lahenda dae-bafoꞌ. Ria riꞌ nadenu Ana Na mai dadi lahenda dae-bafoꞌ, ela mate Ni nai ai kake a dadi neuꞌ tutunu-hohotuꞌ, fo ita bisa mole-dame seluꞌ too Ni. Yesus Kristus tao leo naꞌ, ela Ana noo ita teu tapadeiꞌ nai Manetualain mata Na boe oo, ita lalao-lalafuꞌ, dale roos, ma sala-siko taꞌa. 23 Sadi emi muste manenete maroo nai emi namahere ma. Mamahere tebe-tebe, bosoꞌ keke-boiꞌ! Bosoꞌ heoꞌ memeꞌ Tutui Malole, fo riꞌ emi sipon tepoꞌ fo mamanenen masososa a. Emi bisa mamahena-mabani meuꞌ Tutui Malole a. Lahenda reu tui-beka Tutui Malole a nai basa mamanaꞌ ara nai dae-bafoꞌ ia so. Ma Ramatuaꞌ a nadenu au, Paulus, fo u tui-beka Tutui Malole a boe.
Paulus noi-tao nalalau Ramatuaꞌ a lahenda nara
24 Tepoꞌ fo Kristus nasoda nai dae-bafoꞌ ia, Ana hapu doidoso dodouꞌ. Ma besaꞌ ia au lepa-asaa doidoso rupaꞌ ara. Leo mae leoꞌ na, tehuu au dale ka namahoꞌo naroo. Maneniko lehenda hapu doidoso, sona ela au riꞌ lepa-asaa kati si, sama leoꞌ Kristus lepa-nasaa na doidoso sira kati lahenda nara. Ria lahenda nara, dadi sama leoꞌ Ria ao-ina Na. 25 Manetualain fee au nonoi lakaꞌ, fo alalau Ria lahenda nara. Huu ria na, de au anori-afada alulutuꞌ Ria Dedea-nafadan soaneuꞌ emi. 26-27 Neme masososa na mai, lahenda ramanene Manetualain Dedea-nafada nara. Tehuu ara bei ta bubuluꞌ Dedea-nafadaꞌ matetuꞌ ria dale hihii na, nana huu ria bei nafuniꞌ. Tehuu besaꞌ ia, Ramatuaꞌ a naetu, fo buka dale hihiiꞌ ria fee Ria lahenda nara. Ma Ria dale hihii na, nana tutuiꞌ kahereꞌ soaneuꞌ basa leo ra rai dae-bafoꞌ ia. Tutuiꞌ kahereꞌ a nana riꞌ:
Kristus nasoda nai emi dale mara!
Ria riꞌ tao na emi mamahere maroo mae,
neuꞌ ko Ana fee posakaꞌ malole ina soaneuꞌ emi nai nusatetu-ikutemaꞌ a.
Ia riꞌ ita lahenda dae-bafoꞌ a tahanin neme fai a ulu na mai.
28 De, ami mafada basa lahenda laꞌeneuꞌ Kristus. Ami manori-mafada basa lahenda ra, ma mafarereneꞌ fee si, pake basa duduꞌa-aafiꞌ fo Manetualain feen neuꞌ ami a. Ami tao leo naꞌ, ela matetea basa lahenda fo tuka Kristus, de neuꞌ ko sira bisa rapadei nai Ria mata Na, ma ta maeꞌ fa, nana huu masoda nara roos a naroo. 29 Huu ria na, de au oi-tao sota an seli fee emi. Au bisa anenete oi-tao sota leoꞌ na, nana huu Kristus kuasa Na riꞌ tao natetea au. Ma Ria kuasa Na, kahereꞌ nan seli!