1 Soda-moleꞌ neme au, Paulus. Au duiꞌ susuraꞌ ia, fee emi basa fo dadi meuꞌ Yesus Kristus lahendan, nai kota Efesus,*Duduiꞌ dedea Yunani ruma ta duiꞌ “nai kota Efesus”. Huu ria na, lahenda malelaꞌ ruma, afi rae susuraꞌ ia, neme Paulus mai fee lahenda kamahereꞌ nai basa mamana ara. ma ranenete rasoda lalao-lalafuꞌ, tuka Ria hihii-nanaun. Ria riꞌ nadenu au, sama leoꞌ Manetualain hihii-nanaun.✡Lahenda Nadedenuꞌ ara Tutuin 18:19-21; 19:1

2 Manetualain nana, ita Aman. Ma Yesus Kristus nana, ita Ramatuan. Au hule fo Ara ratudu dale malole nara ela emi masoda no tetu-temaꞌ, mole-dame, ma tesatei-tamadaleꞌ.

3 Io-oa Manetualain! Ria nana, ita Ramatuan Yesus Kristus Aman. Manetualain fee ita ua-naleꞌ dodouinaꞌ neme nusatetu-ikutemaꞌ a mai, nana huu ita dadi teuꞌ Yesus Kristus lahendan so.

4 Tepoꞌ fo dae-bafo-batupoiꞌ a bei taꞌa, Manetualain sue ma here memaꞌ ita, fo ela dadi teuꞌ Kristus lahendan. Ana nau ita tasoda nai lalao-lalafuꞌ losaꞌ lahenda ta bisa sale ita fa. 5 Neme fai a ulu na mai Ana naetuꞌ memaꞌ so, de pake Yesus Kristus ela tao na ita dadi teuꞌ Ria anan. Ia riꞌ tao na Ria dale Na namahoꞌo. 6 Huu ria na, de ita io-oa Ni. Ana natudu dale malole ina Na neuꞌ ita, ela ita bisa tasoda nanahekeꞌ too Ria Ana susue Na.

7 Leo mae maulu na ita ta lalao-lalafuꞌ nai Manetualain eno masoda na, tehuu Ana natudu dale malole ina Na, ma fee Ana Na mai, de daa Na faa losaꞌ maten. No ria na, Ria Ana Na soi-tefa na ita teme sala-sikoꞌ ara mai.✡Kolose 1:14 8 Huu no Ana sue na ita seli, de Ana fee makaledoꞌ nai ita dalen, ela ita bisa talelaꞌ Ria dale hihii na. 9 Fai a ulu na, Manetualain bei ta nafada lahenda dae-bafoꞌ a Ria dale hihii na katemaꞌ fa. Tehuu besaꞌ ia, tuka Ria hihii na, Ana tao na ita bubuluꞌ tae, neme fai a ulu na mai Ana naetuꞌ nau pake Yesus Kristus, ela tao na lahenda ra mole-dame roo Manetualain. 10 Ma neuꞌ ko losa ledo-fai na, Yesus Kristus boe dadi Malaka, de ator basa-basan fo nai dae-bafoꞌ a ma nai nusatetu-ikutemaꞌ a.

11-12 Huu no ita nanahekeꞌ too Kristus, de ita boe sipo posakaꞌ neme Manetualain mai. Neme masososa na mai, Ana here na ami lehenda Yahudi ra, ela dadi meuꞌ Ria lahenda nara. Dale hihii na sona Ana nau pake ami, fo soi enoꞌ fee lahenda nusa fekeꞌ a, fo ela basa lehenda ra bisa ramahere Kristus. Basa ia ra dadi tuka hata, fo Ana naetuꞌ memaꞌ so. No ria na, ita bisa soꞌu nadedema Manetualain nade kahere Na.

13 De, emi lahenda nusa fekeꞌ a boe, bisa dadi meuꞌ Kristus lahenda nara, nana huu emi mamahere Ria Tutui Malole roo-tetu Na. Huu fo Tutui Malole ria neni fee emi soda-moleꞌ.

Emi mamahere leoꞌ na, sona emi boe sipo Manetualain Dula-dale Malalao-malalafun fo Ana helu so a. Dula-dale Malalao-malalafuꞌ a, sama leoꞌ eꞌee-dededeꞌ de dadi tanda nae, emi dadi meuꞌ Ria nuu-ena tean so. 14 Manetualain fee Dula-dale Malalao-malalafun fo riꞌ ita bubuluꞌ tae, neuꞌ ko Ana tao natetuꞌ basa hata fo Ana helu a, losaꞌ soi-tefa na ita, ela dadi teuꞌ Ria lahendan. Huu ria na, ita io-oa neuꞌ Ana.

15 Au amanene dodouꞌ, laꞌeneuꞌ emi namahere ma neuꞌ ita Ramatuan Yesus Kristus, ma emi susue ma neuꞌ lahenda kamahereꞌ ara so. Huu ria na, 16 au ta hahae hule makasi neuꞌ Manetualain fa. 17 Au hule-haradoi ae, “Papa Bokiꞌ! Papa nana au Ramatua ki Yesus Kristus Manetualain na. Ma Amaꞌ a, nana kahereꞌ nan seli. Au hule fo Amaꞌ a fee Dula-dale ma neuꞌ lahenda Efesus ara, ela bisa ralelaꞌ hata roo-tetuꞌ, ma bisa ralelaꞌ matetuꞌ Amaꞌ a. 18 Au hule fo Amaꞌ Manetualain soi sira duduꞌa-aafi nara, ma tao makaledo sira dale nara, fo ela ara bisa bubuluꞌ basa hata fo Amaꞌ a helu nau fee si a. Au boe ahiiꞌ ara bisa bubuluꞌ posakaꞌ fo Amaꞌ a helu nau fee si a. Huu fo posakaꞌ ria, kahereꞌ nan seli! 19 Au hule Amaꞌ a, fo tulu-fali si, ela ara bisa bubuluꞌ ratalolole Amaꞌ a kuasa kahere na. Amaꞌ a pake kuasa ria, ela tulu-fali neniꞌ lahenda kamahere nara. 20 Manetualain kuasa Na kahereꞌ nan seli! Ana pake kuasa ria, fo fee Yesus nasoda seluꞌ neme mamate na mai. Boe ma Manetualain naaeꞌ Kristus leo nusatetu-ikutemaꞌ a neu, ma fee Ni natuuꞌ neuꞌ mamana hada-horomata nan seli, nai Manetualain boboa ona Na.✡Sosoda Iꞌio-oꞌoaꞌ ara 110:1 21 Ana dema lena basa-basan, fo nai dae-bafoꞌ a ma nusatetu-ikutemaꞌ a. Ana dema lena basa kuasa, ma basa mana homu pareta ra. Ana homu kuasa kahere Ni ria, ta noi besaꞌ ia fa, te Ana homu naroo losa doo na neu. 22 Manetualain riꞌ tao na basa-basan doꞌo-tabe neuꞌ Kristus. Ma Ria riꞌ soꞌu Kristus dadi Malaka, ela ator basa-basan fo nanahekeꞌ noo lahenda kamahereꞌ ara.✡Sosoda Iꞌio-oꞌoaꞌ ara 8:6 23 De, maneniko Ria dadi Malaka, sona ita lahenda kamahereꞌ ara dadi sama leoꞌ ao-ina Na. Neuꞌ ko ita toi-tao tabasa nonoiꞌ fo riꞌ nalalaꞌon, tepoꞌ fo Ana nai dae-bafoꞌ a. Ana nanuu kuasa ela tao na basan dadi, tuka Manetualain dale hihii na.”✡Kolose 1:18

Au huhule-haradoi fee emi a tebe leo naꞌ.”