Susuraꞌ fee lahenda
Ibrani
fo besaꞌ ko ramahere Yesus Kristus
ma foa ela sira bei-baꞌi nara agama na
1
Manetualain fee Ria Anan fo riꞌ kahereꞌ lena neme mana nesimata fai ulu nara
1 Fai a ulu na, Manetualain pake Ria mana nesimata nara, fo dedea ro ita bei-baꞌin lahenda Ibrani ra.*a: Dedea Ibrani ia, nana lahenda nusa Yahudi nade feken. Lahenda Yahudi fo ramahere Yesus Kristus, nana lahenda rae, “lahenda Sarani Ibrani”, nana huu sira fekeꞌ reme toranoo lahenda Yahudi fo bei homu rahere atoran agama Yahudi paraaꞌ. Ana pake eno rupaꞌ ara, fo dedea lai dodouꞌ no si.†b: Manetualain nafada Ria hehelu nara, pake eno rupaꞌ ara. Natutuduꞌ leo-leoꞌ: Ana nafada neuꞌ Abraham pake hehelu-barataaꞌ, neuꞌ Musa pake atoran agama, neuꞌ Daud pake sosoda iꞌio-oꞌoa, neuꞌ Yeremia pake nasasamaꞌ.
2 Tehuu besaꞌ ia, Ria fee Ana Na mai fo dedea mataꞌ no ita.
Neme masososa na mai, Manetualain here na Anan ia,
fo pareta sama-sama no Ni.
Tepoꞌ fo Ana adu lalai no dae-bafoꞌ a, ro basa oe-isi nara,
Ria Ana na boe adu sama-sama no Ni.
3 Ramatuaꞌ a Ana na, natudu Ria Papa Na kaheren,
sama leoꞌ ledo a haa na bukaꞌ neme tiroao a mai.
Huu fo Ria rupa-lolen sama leoꞌ Papa Na.
Ma neme Ria Dedea-nafada kahere Na mai,
Ana nalalaꞌo basa-basan fo rai lalai no dae-bafoꞌ a.
Ana soi enoꞌ,
fo sae-safe heni lahenda ra sala-sikon,
ela ara dadi malalao-malalafuꞌ.
Basa boe ma Ana fali leo nusatetu-ikutemaꞌ a neu,
de natuuꞌ nai Manetualain boboa ona Na,
nai mamanaꞌ fo riꞌ marela-masaꞌa nan seli.
Manetualain Ana na kahereꞌ nan seli, lena neme eilaꞌo-limalope rai nusatetu-ikutemaꞌ a
4 Manetualain eilaꞌo-limalopen reme nusatetu-ikutemaꞌ a, tebe kahereꞌ. Tehuu Ria Ana Na kahereꞌ nan seli, lena neme sira basa mai. Manetualain pangkat na, nai lain nan seli. Ma Ana fee pangkat na neuꞌ Ana Na so. Huu ria na, de Ana Na, lena neme Ria eilaꞌo-limalopen fo rai nusatetu-ikutemaꞌ a.
5 Manetualain parnaa nafada neuꞌ Ana Na nae,
“Faiꞌ ia, Au soꞌu O, fo homu pareta.”✡Sosoda Iꞌio-oꞌoaꞌ ara 2:7
Manetualain boe nafada nae,
“Au nana, Ria Aman.
Ma Ria nana, Au Ana Ki.”✡2 Samuel 7:14; 1 Israel no Yahuda Tutui na 17:13
Manetualain dedea memaꞌ nae leoꞌ na laꞌeneuꞌ Ria Ana Na, tehuu Ana ta parnaa dedea leo naꞌ laꞌeneuꞌ Ria eilaꞌo-limalopen rai nusatetu-ikutemaꞌ a.
6 Tepoꞌ fo Manetualain fee Ana kahere Na mai, Ria boe pareta eilaꞌo-limalpen rai nusatetu-ikutemaꞌ a nae,
“Ae! Eilaꞌo-limalope emin!
Emi muste meu fee hada-horomata,
ma doꞌo-tabe neuꞌ Au Ana Ka dei!”✡Tui Seluꞌ Laꞌe Neuꞌ Eno Sodaꞌ a 32:43; Lukas 2:13-14
7 Manetualain boe dedea laꞌeneuꞌ Ria eilaꞌo-limalopen rai nusatetu-ikutemaꞌ a nae,
“Au tao eilaꞌo-limalope Kara rai nusateu-ikutemaꞌ a,
dadi sama leoꞌ ani a.
Au tao ata Kara,
dadi sama leoꞌ aipilaꞌ.”✡Sosoda Iꞌio-oꞌoaꞌ ara 104:4
Manetualain dedea nae leoꞌ na, huu fo sira nana adaꞌ noi Ria lahenda nadedenun.
8 Tehuu Ana dedea fekeꞌ laꞌeneuꞌ Ana boki Na bali nae,
“O nana, Manetualain.
Neuꞌ ko O matuuꞌ nai kadera pareta a, losa doo na neu.
Neuꞌ ko O homu kuasa fo pareta no dale roo-tetuꞌ.
9 O dale Ma namahoꞌo mita lahenda fo riꞌ nasoda roo-tetuꞌ.
Tehuu O dale Ma susa, mita lahenda fo riꞌ nasoda napuputaꞌ.
O dale Ma namahoꞌo,
Huu fo Au poꞌa mina neuꞌ O laka Ma,
fo soꞌu O dadi Maneꞌ lena neme fekeꞌ ara mai.”✡Sosoda Iꞌio-oꞌoaꞌ ara 45:7-8
10 Manetualain boe dedea neuꞌ Ana Na nae,
“Ana Ki, on!
O ia nana, Ramatuaꞌ fo riꞌ pareta memaꞌ neme uluꞌ mai so.
O riꞌ madenu fo lalai dadi memaꞌ.
O riꞌ pareta fo dae-bafoꞌ a dadi memaꞌ.
11-12 Neuꞌ ko lalai no dae-bafoꞌ a noe heni si.
Neuꞌ ko lalai no dae-bafoꞌ a mopo si.
Tehuu O riꞌ masoda maroo.
Neuꞌ ko O tuꞌu heni lalai no dae-bafoꞌ a,
sama leoꞌ lahenda tuꞌu heni kakao-papake saiꞌ ara.
Neuꞌ ko O kati lalai no dae-bafoꞌ a,
sama leoꞌ lahenda kati kakao-papake bebeuꞌ.
Tehuu O ta leo naꞌ fa.
Nana huu O masoda losa doo na neu.”✡Sosoda Iꞌio-oꞌoaꞌ ara 102:26-28
13 Manetualain boe dedea neuꞌ Ana Na nae,
“Ana Ki, on!
Mai matuuꞌ nai ia, nai mamana marela-masaꞌa nan seli,
nai Au boboa ona Ka.
Neuꞌ ko Au tao a O musunoo mara,
losaꞌ ara roi raeꞌ O.”✡Sosoda Iꞌio-oꞌoaꞌ ara 110:1
Manetualain dedea memaꞌ leoꞌ na laꞌeneuꞌ Ana Na, tehuu Ana ta parnaa dedea leo naꞌ laꞌeneuꞌ eilaꞌo-limalopen rai nusatetu-ikutemaꞌ a. 14 Ria eilaꞌo-limalope nara nana tebe penting. Huu fo Ana nadenu si, fo reu urus basa Ria lahendan fo riꞌ Ana soi-tefa naa si reme sala-siko nara mai. Leo mae leoꞌ na, tehuu Manetualain Ana Na, bei lena neme sira basa mai.
*1:1 a: Dedea Ibrani ia, nana lahenda nusa Yahudi nade feken. Lahenda Yahudi fo ramahere Yesus Kristus, nana lahenda rae, “lahenda Sarani Ibrani”, nana huu sira fekeꞌ reme toranoo lahenda Yahudi fo bei homu rahere atoran agama Yahudi paraaꞌ.
†1:1 b: Manetualain nafada Ria hehelu nara, pake eno rupaꞌ ara. Natutuduꞌ leo-leoꞌ: Ana nafada neuꞌ Abraham pake hehelu-barataaꞌ, neuꞌ Musa pake atoran agama, neuꞌ Daud pake sosoda iꞌio-oꞌoa, neuꞌ Yeremia pake nasasamaꞌ.
✡1:5 Sosoda Iꞌio-oꞌoaꞌ ara 2:7
✡1:5 2 Samuel 7:14; 1 Israel no Yahuda Tutui na 17:13
✡1:6 Tui Seluꞌ Laꞌe Neuꞌ Eno Sodaꞌ a 32:43; Lukas 2:13-14
✡1:7 Sosoda Iꞌio-oꞌoaꞌ ara 104:4
✡1:9 Sosoda Iꞌio-oꞌoaꞌ ara 45:7-8
✡1:11-12 Sosoda Iꞌio-oꞌoaꞌ ara 102:26-28
✡1:13 Sosoda Iꞌio-oꞌoaꞌ ara 110:1