2
Maria boki Ramatua Yesus
(Mateos 1:18-25)
1-2 Tepoꞌ fo Korenius dadi malaka nai nusa Siria, laiꞌ esa de mane bauinaꞌ, nade Agustus, ana kalua pareta nae, “Basa lahenda fo rai mana pareta Roma a kuasa na daeꞌ, muste fali leo koro nara reu ela duiꞌ asa!” Ria nana besaꞌ ko masososa na mana pareta Roma reke anaraun ara. 3 De, basa lahenda ra fali leo koro nara reu fo duiꞌ asa.
4-5 Tepoꞌ ria Yusuf leo nai koro Nasaret nai propinsi Galilea. Ana nahiiꞌ ana feto anaꞌ esa nade Maria, fo nairu so. Yusuf nana mane Daud a tititi-nonosin, de ana muste fali leo Daud kota Betlehem na neu, nai propinsi Yudea, ela duiꞌ asa.
Huu ria na de, dua si leo kota Betlehem reu. 6 Tepoꞌ fo rai na, boe ma naraa no ledo-fai fo Maria noi boki. 7 Tehuu nai na ara ta hapu kama nai uma ofu a fa. Huu ria na de, ara masoꞌ leo bibi oka daleꞌ reu. Boe ma ana boki ana ulu na, ana touꞌ, raluse Ni reniꞌ taisaiꞌ, ma rapeuꞌ Ana neuꞌ haꞌo banda daleꞌ.
Manetualain nafada mana foo ra
8 Hatun ria, mana foo hida ranea bibi nara rai moꞌ nai kota a deaꞌ.
9 Kekeneu te, ara rita Manetualain eilaꞌo-limalopen neme nusatetu-ikutemaꞌ a mai. Boe ma Manetualain makaledo Na nahaa rule-feo na si, de ara biiꞌ raan seli. 10 Tehuu eilaꞌo-limalope ria nafada si nae,
“Emi bosoꞌ bii! Nenene matalolole dei! Huu fo au mai afada emi tutui malole esa. Basa-basan fo ramanene tutuiꞌ ia, tantu ramahoꞌo.
11 Tutui malole ia isi na leo iaꞌ:
Faiꞌ ia boki Kristus so, nai Betlehem fo mane Daud a kota na.
Kristus nana Lahenda fo Manetualain helu memaꞌ neme uluꞌ mai.
Manetualain fee Ni mai, nana ela soi-tefa na lehenda reme sala-siko nara mai!
Neuꞌ ko lahenda raloo Ni sona rae, ‘Ramatuaꞌ’!
12 Neuꞌ ko emi malelaꞌ Ana leo iaꞌ: emi maneta mo Ana boki beuꞌ esa nananaluseꞌ neniꞌ taisaiꞌ. Ana napeuꞌ nai haꞌo banda daleꞌ.”
13 Ana dedea basa, boe ma kekeneu te, Manetualain eilaꞌo-limalopen dodouꞌ asa reme nusatetu-ikutemaꞌ a mai de rabua ro ni. Boe ma ara io-oa Manetualain ma soda rae,
14 “Ami io-oa Manetualain nade Na!
Ana natuuꞌ pareta nai lalai madema.
Manetualain nau fee mole-dame neuꞌ lahenda nai dae-bafoꞌ a,
fo tao ra dale Na namahoꞌo!”
15 Basa de, Manetualain eilaꞌo-limalope nara fali leo nustetu-ikutemaꞌ a reu. Boe ma mana foo sira rafafada aoꞌ rae, “Ae! Mai ita leo Betlehem teu dama Anaꞌ ria dei! Huu fo Manetualain haitua fee ita tutuiꞌ ria so.”
16 Boe ma ara ralale de leo Betlehem reu. Ara raneta ro Maria no Yusuf. Sira boe rita Ana bokibeuꞌ, fo napeuꞌ nai haꞌo banda daleꞌ a.
17 Ara rita Anaꞌ ria, boe ma tui basa-basan rae, “Bisinaꞌ a Manetualain eilaꞌo-limalope nara reme nusatetu-ikutemaꞌ a mai rafada ami laꞌeneuꞌ Anaꞌ ia so!”
18 Basa lahenda ra ramanene mana foo sira tutui nara, roi ramakokoaꞌ a. 19 Tehuu Maria napeda basa mana dadiꞌ sira, neuꞌ dale na. Ma ana dodoo neuꞌ dale na fo nau bubuluꞌ ria sosoa na nae ubeaꞌ. 20 Basa boe ma mana foo sira fali seluꞌ reu dama bibi nara. Ara io-oa Manetualain nade Na. Ma ara hule makasi neuꞌ Ana, nana huu hihii-nanauꞌ fo ramanene ma rita ni a, natetu no Manetualain eilaꞌo-limalope nara nafafadan.
Ara foi Ana bokibeuꞌ ria, nade Yesus
21 Boki basa faiꞌ falu, boe ma ara sunat Ana bokibeuꞌ ria, tuka baꞌi Musa atoran a. Boe ma ina-ama nara feen nade, ‘Yesus’. Nadeꞌ ria nana, tepoꞌ fo mama na bei ta nairu Ni fa, te eilaꞌo-limalope neme nusatetu-ikutemaꞌ a mai, nafada memaꞌ nadeꞌ ria so.✡Lukas 1:31; Malaka Agama ra Atoran 12:3
Ara roo Yesus Ana bokibeuꞌ ria leo Uma Mamaso Ina a neu
22 Hapu baꞌi Musa atoran esa nae, inaꞌ fo boki basa faiꞌ haa hulu, sona muste reu tao tuka hadas makamoi aoꞌ a nai Uma Mamaso Ina. No ria na, ara bisa masoꞌ leo uma mamasoꞌ daleꞌ reu sama leoꞌ bale-bale. Huu ria na Yusuf no Maria leo kota Yerusalem reu, ela tao tuka hadas ria. De ara roo sira Ana bokibeun ria leo Uma Mamaso Ina daleꞌ neuꞌ, fo fee henin dadi neuꞌ Manetualain nun.✡Malaka Agama ra Atoran 12:1-8 23 Sira boe tuka Manetualain atoran a nae, “Basa inaꞌ fo boki na ana uluꞌ a, kalu touꞌ, sona muste fee heni anaꞌ ria ela dadi neuꞌ Manetualain nuun.”✡Kalua reme Masir 13:2, 12 24 Tuka Manetualain atoran na, kalu fee heni anaꞌ ria leo Manetualain neu, sona ina-ama nara muste fee tutunu-hohotuꞌ manupui kateu pasang esa, do kalasi anatenaꞌ dua. Huu ria de Yusuf no Maria tao tuka atoran ria boe.✡Malaka Agama ra Atoran 12:6-8
Tou lasi Simeon a nae Ana bokibeuꞌ Yesus, nana riꞌ Kristus fo Manetualain helu basa so
25-26 Tepoꞌ ria, hapu tou lasiꞌ esa, nade Simeon, leo nai kota Yerusalem. Ria nana lahenda dale roo-tetuꞌ, ma nahiiꞌ na Manetualain seli. Manetualain Dula-dale Malalao-malalafu Na nafada ni so nae, neuꞌ ko ana nita Kristus dei, besaꞌ ko mate ni. Kristus nana manasoi-manatefa lahenda Israel ara.
27 Tepoꞌ ria, Manetualain Dula-dale Na noo Simeon leo Uma Mamaso Ina a neu. Laꞌe fai ria boe, Yesus ina-ama nara roo Ni leo naꞌ neu, fo fee henin dadi neuꞌ Manetualain nuun. 28 Tou lasi Simeon a nita Anaꞌ ria, de oꞌo nan, boe ma ana io-oa neuꞌ Manetualain nae,
29 “Io-oa Manetualain!
Manetualain tao tuka hehelu Na neuꞌ au so.
De besaꞌ ia, Ana bisa poꞌi na au so,
fo ela au mate no tesatei-tamadaleꞌ,
30 nana huu au ita Lahenda fo Manetualain feen mai so,
ela soi-tefa na ami meme sala-sikoꞌ a mai!
31 Manetualain nau pake Anaꞌ ia
fo fee basa nusaꞌ a sodaꞌ.
32 Ria neuꞌ ko sama leoꞌ makaledoꞌ a,
fo neni hada-horomata fee Manetualain lahenda Israel nara.
Ria sama leoꞌ makaledoꞌ a boe,
fo natudu Manetualain eno na
fee basa nusa fekeꞌ ara.”✡Yesaya 42:6; 49:6; 52:10
33 Yusuf no Maria, ramanene tou lasi Simeon a dedea nae leoꞌ na laꞌeneuꞌ sira Ana na, boe ma roi ramakokoaꞌ a. 34 Basa boe ma, Simeon dedea fee si ua-naleꞌ. Ana nafada Maria nae, “Yesus maman, ee! Neuꞌ ko lahenda dodouꞌ rai Israel tipa heni Anam ia. Tehuu sira nonoi-tatao nara neuꞌ Ana, neuꞌ ko natuda seluꞌ asa. Anam ia, boe tao na lahenda dodouꞌ dale nara ramahoꞌo-ratadale. 35 No ria na, neuꞌ ko Manetualain buka lahenda ra dale nara reu loan. Tehuu Maria, o neuꞌ ko hapu doidoso mabera a, sama leoꞌ tafaꞌ a pau losa ate-baa mi.”
Besaꞌ Hana hule makasi neuꞌ Manetualain, nana huu Yesus
36-37 Nai Uma Mamaso Ina a boe hapu ina lasiꞌ esa, nade Hana. Teu ni falu hulu haa so. Papa na nade Fanuel, neme Aser leo na mai. Ana sao teuꞌ hitu, boe ma saotou na mate ni de mesaꞌ ana. Besaꞌ Hana nana Manetualain mana nesi matan. Nonoi na, riꞌ hule-haradoi ma puasa nai Uma Mamaso Ina a, fo hatu-leledon doꞌo-tabe neuꞌ Manetualain.
38 Fai fo Simeon dedea no Yusuf ma Maria, besaꞌ Hana naneneaꞌ leo mata neu, de namanene si. Boe ma ana io-oa neuꞌ Manetualain. Ana nafada neuꞌ lahenda kadodouꞌ fo rahani Kristus mamai Na. Ana nae, Ana ria nana Kristus, Maneꞌ fo riꞌ Manetualain helu basa neuꞌ ko poꞌi-tata na lahenda Israel ara.
Ina-ama a roo Ana na fali leo koro Nasaret a reu
39 Tepoꞌ fo Yusuf no Maria tao ratetu baꞌi Musa atoran ara katemaꞌ nai kota Yerusalem, boe ma ara fali leo sira koro Nasaret na reu, nai propinsi Galilea.✡Mateos 2:23 40 Yesus nambau-ina, boe ma Ana tamba mapii-baraꞌaiꞌ, malelaꞌ, ma bubuluꞌ hihii-nanauꞌ dodouꞌ. Huu fo Manetualain natudu dale malole Na neuꞌ Ana.
Yesus ana murianaꞌ a nai Uma Mamaso Ina
41 Tuka-tuka teuꞌ, Yusuf no Maria leo kota Yerusalem reu, fo raa feta Paska nai na.✡Kalua reme Masir 12:1-27; Tui Seluꞌ Laꞌe Neuꞌ Eno Sodaꞌ a 16:1-8 42 Tepoꞌ fo Yesus teun sanahulu dua, faiꞌ esa boe ma ara leo Yerusalem reu belaꞌ a, fo raa feta sama leoꞌ bale-bale. 43-44 Fai Paska a basa ni, boe ma Yusuf no Maria fali Nasaret reu sama-sama ro lahenda kadodou inaꞌ fo nau fali leo Galilea reu a. Tehuu ara ta bubuluꞌ, rae foa ela Yesus nai Yerusalem. Ara raendobuko Ana laꞌo sama-sama no tia-lai nara. Tehuu losa ledo leodae na, ara ta rita Ni fa. Boe ma ara mulai saka Ni reu-mai nai kileoboboki a ma tia-lai nara. 45 Huu no ta raneta roon fa, boe ma ara ratafali reu saka Ni nai Yerusalem.
46 Ara saka Ni nai na losa faiꞌ telu, besaꞌ ko raneta roon nai Uma Mamaso Ina daleꞌ. Ana natuuꞌ natatane aoꞌ no mesen agama Yahudi ra. 47 Basa lahenda fo ramanene Ni a roi ramakokoaꞌ a, huu fo Ana bubuluꞌ matetuꞌ Susura Makamoiꞌ a isi na, ma Ana bisa nataa sira natatane nara no malole. 48 Ina-ama nara rita leoꞌ na, boe ma roi ramakokoaꞌ a. Boe ma mama Na nae, “Yesus! Ubeaꞌ taon de O tao masususaꞌ ami leoꞌ ia? Au oo papa ma laka mara dile meu-mai saka O!”
49 Tehuu Yesus nataa si nae, “Ubeaꞌ taon de mama ka mo papa ka sota maan seli saka Au? Mama ka mo papa ka ta bubuluꞌ fa? Au aparasa nai Au Amak Uman daleꞌ.” 50 Tehuu ara ta bubuluꞌ matetuꞌ Ria dedea Na sosoa-raraan fa.
51 Boe ma basa si fali Nasaret reu. Yesus tuka ina-ama nara pareta na. Ma mama Na napeda basa hihii-nanauꞌ sira reuꞌ dale na. 52 Yesus boe-boe nambau-ina, ma tamba rolu-malelaꞌ. Manetualain ma lahenda dae-bafoꞌ a boe sue Ni.✡1 Samuel 2:26; Dedea Lasiꞌ a 3:4