Susuraꞌ neme
Yudas mai
1
Soda-moleꞌ
1 Soda-moleꞌ neme au mai, Yudas. Au ia nana, ita Ramatuan Yesus Kristus lahenda nadedenun. Au boe, Yakobis fadi na.
Au duiꞌ susuraꞌ ia fee basa lahenda fo Amaꞌ Manetualain here naa si, Ana sue-lai, ma Yesus Kristus nanea nahere si losaꞌ Ana natafali mai.✡Mateos 13:55; Markus 6:3 2 Au hule fo Manetualain natudu Ria dale kasian Na, ma fee susue-lalai kadodou Na neuꞌ emi, fo ela emi bisa masoda no tetu-temaꞌ, mole-dame, ma tesatei-tamadaleꞌ.
Yudas nafarereneꞌ fee lahenda kamahereꞌ ara laꞌeneuꞌ lahenda fo nanori-nafada sala
3 Toranoo susue kara emin! Maulu na au ahiiꞌ an seli nau duiꞌ fee emi, basa-basan laꞌeneuꞌ Manetualain soi-tefa na ita. Tehuu besaꞌ ia nanori-nafada masalaꞌ a toda mai, de nau ta nau fa oo au duiꞌ fekeꞌ. Manetualain fee ita eno soda roo-tetuꞌ a so. Ana fee eno sodaꞌ ria noi laiꞌ esaꞌ a, ma Ana ta naralin fa. Ana fee eno sodaꞌ a neuꞌ Ria lahenda kamahere nara. De, besaꞌ ia au hule fo emi moi-tao mela-maku ela lahenda bosoꞌ soba-soba rarali eno sodaꞌ fo riꞌ neme Ramatuaꞌ a mai.
4 Huu fo, lahenda hida masoꞌ rafufuniꞌ nai emi talada so. Sira nana, ta tuka Manetualain eno soda roo-tetu Na, tehuu ara tuka noi hihii-nanau ao-paa nara. Ara rae Ramatuaꞌ a dale malole Na soi enoꞌ, de sira bole tao rafararaꞌu leo naꞌ. Dedea fufudiꞌ ria so! Sira nana, lahenda masarole-masaraliꞌ! Ara nau fo ita bosoꞌ tamanene neuꞌ ita Mane na, ma ita Ramatuan Yesus Kristus. Tehuu emi mafarereneꞌ, huu fo manaduiꞌ nai Susura Makamoiꞌ a nae, Ramatuaꞌ a riꞌ ator memaꞌ sira huhuku na neme uluꞌ mai so.
Ramatuaꞌ a huku lahenda fo nanori ta matetuꞌ, sama leoꞌ fai a ulu na Ana huku eilaꞌo-limalope rai nusatetu-ikutemaꞌ a, ma lahenda tadaluꞌ ara
5 Hata dodouꞌ emi bubuluꞌ asa so, tehuu au afarereneꞌ seluꞌ fee emi, ela emi muste besa-besa.
Mafarene tepo-lele uluꞌ, tutuiꞌ fo lahenda Israel ara kalua reme Masir mai. Leo mae Ramatuaꞌ a fee sodaꞌ neuꞌ lahenda nusaꞌ esa katemaꞌ, tehuu fai mabuiꞌ a sira bea fo riꞌ ta ramahere Ni fa, Ana tao nalulutuꞌ katemaꞌ asa.✡Kalua reme Masir 12:51; Susura Dudui Nadeꞌ a 14:29-30
6 Natutudu fekeꞌ, laꞌeneuꞌ Ramatuaꞌ a eilaꞌo-limalopen nai nusatetu-ikutemaꞌ a. Manetualain fee si kuasa, tehuu nanuu too-lane boe. Tehuu sira ruma ta doaꞌ nai na fa, de ara tao lena neme sira hak na mai. Tehuu Ramatuaꞌ a heke si pake rante, de ta bisa poꞌi rala ao nara, ma ena si rai mamana maiu-mahatuꞌ, ela rahani Fai fo riꞌ Ramatuaꞌ a nau naetuꞌ basa lahenda ra dedea nara.
7 Ma bosoꞌ mafarene heni kota Sodom no Gomora, ma koro fekeꞌ fo raneneaꞌ rai naa. Lahenda nara rahiiꞌ hohoke rupaꞌ ara. Sira boe rahiiꞌ tao sasaoꞌ ta tuka matetu na fa, riꞌ, touꞌ sao touꞌ, ma inaꞌ sao inaꞌ. Tehuu Ramatuaꞌ a tao nalulutuꞌ katemaꞌ asa neniꞌ aipilaꞌ. Tutuiꞌ ia, fee nafarereneꞌ neuꞌ ita, neuꞌ ko Ramatuaꞌ a pake aipila naraka mana mate taaꞌ a, fo huku basa tadaluꞌ ara.✡Tutui Masososaꞌ 19:1-24
8 Leo mae leoꞌ na boe, tehuu lahenda manori-mafada peko-pakiꞌ ara masoꞌ rai emi talada. Sira pake mei-afes nara fo dadi neteꞌ ela tao rakekeo-rakakanu ao-ina nara, ma ralena laka rafararaꞌu neuꞌ lahenda mana homu kuasa, ma radadae kuasa malole nai nusatetu-ikutamaꞌ a. 9 Tehuu Mikael ta tao sama leoꞌ sira fa. Ria nana, Ramatuaꞌ a eilaꞌo-limalopen rai nusatetu-ikutemaꞌ a mandor na. Tepoꞌ fo Musa maten, Mikael nareresiꞌ no nitu ra malaka bau-ina na, laꞌeneuꞌ Musa popora na. Tehuu Mikael ta sale ni, do nadadaen fa. Ana noi nafadaꞌ a nae, “Neuꞌ ko Ramatuaꞌ a riꞌ ator o, besaꞌ ko o mameda mitan!”✡Daniel 10:13, 21; 12:1; Daebafo Rupa-lole Bebeuꞌ a 12:7; Tui Seluꞌ Laꞌe Neuꞌ Eno Sodaꞌ a 34:6; Sakaria 3:2
10 Tehuu lahenda ia ra, ta leo naꞌ. Ara radadae ma ramumulu basa hata fo ara ta bubuluꞌ. Ara tuka adaꞌ noi sira hihii-nanau mafararaꞌu nara, sama leoꞌ banda ra. Huu ria na, de ara tao ralulutuꞌ ao-ina heheli nara.
11 Besa-besa! Neuꞌ ko ara hapu ra nuu babati nara. Sira makaresi nara leo Kaen. Ara tao tuka leoꞌ Balaam, fo riꞌ nau tao sudi laꞌe ubeaꞌ, sadi hapu doiꞌ. Ara tao tuka leoꞌ Kora boe, de nalulutuꞌ nana huu ana nalena laka neuꞌ Ramatuaꞌ a. Huu no sira tadalu na, de neuꞌ ko lahenda ia ra bika-bati dooꞌ a reme Ramatuaꞌ a mai.✡Tutui Masososaꞌ 4:3-8; Susura Dudui Nadeꞌ a 22:1-35; 16:1-35
12 Maneniko lahenda ia ra rabua roo emi fo mia-minu mafarene Ramatuaꞌ a susue-lalain, sona sira maoro nara seli, ara ta maeꞌ fa. De, emi muste besa-besa. Sira sama leoꞌ batu kusi nai tasiꞌ a, de bisa tao nalulutuꞌ ofaai.*Dedea Yunani nai ia bisa hapu sosoa-raraaꞌ dua. Esa sona nae, Paulus nararaaꞌ lahenda tadaluꞌ ara ro “batu kusi”. Esa bali nae, ana nararaaꞌ asa ro “makekeo-makakanuꞌ”. Sira sama leoꞌ oa keoinaꞌ a, ana ta natuda soba uda titiꞌ esa neuꞌ dae tuuꞌ a lain boeꞌ. Ara dedea adaꞌ noi bauinaꞌ a, tehuu ta tao hata malole esa boeꞌ. Ara rorooꞌ leo ai-huuꞌ, fo ta nanuu sosoa-raraaꞌ hata esa boeꞌ. Maneniko ledo-fai nabuna-naboa nara, ta reni buna-boaꞌ esa boeꞌ; nana huu sira nanafaꞌu heniꞌ losa oka nara so. 13 Sira nonoi-tataon noi riꞌ ramamaeꞌ ita. Sira sama leoꞌ nafa bauinaꞌ a, foa ela tetereꞌ ara tuka-tuka tasiꞌ a suu na. Sira sama leoꞌ ruuꞌ fo reu-mai rai lalai, ara hapu huhukuꞌ de Ramatuaꞌ a tao si reuꞌ mamana maiuꞌ, boe ma mopoꞌ asa reuꞌ naa.
14 Henok nana, tititi-nonosi kahitu, reken mulai neme Adam mai. Ana nafada memaꞌ laꞌeneuꞌ lahenda rupa leo iaꞌ a. Ana nae,
“Soba emi mete.
Ita Ramatua na no eilaꞌo-limalope malalao-malalafu nara, reme nusatetu-ikutema a mai.
Sira dodouꞌ ran seli, losaꞌ reke doaꞌ asa.✡Tutui Masososaꞌ 5:18, 21-24
15 Ana mai fo sakaꞌ naetuꞌ basa lehenda ra dedea nara.
Neuꞌ ko Ana natudu lahenda sala-sikon katemaꞌ,
ma lufa poꞌiraoꞌ hata fo ta matetuꞌ ara.
Ana huku lahenda tadaluꞌ ara,
nana huu ara dedea ta malole neuꞌ Ana.”
16 Lahenda fo masoꞌ rai emi talada a, ralelaꞌ noi namuu-nadauꞌ a, ta pake babasaꞌ fa. Ara neo lahenda laꞌo naroo. Ara ta tao daleꞌ neuꞌ Ramatuaꞌ a hihii-nanaun, ma ara tuka adaꞌ noi hihii-nanau ao-paa nara. Ara dedea adaꞌ noi nadedema aoꞌ a. Ara rahiiꞌ rasosoro poo, ma hai lahenda dalen, fo ela ara hapu balasan tuka sira hihii-nanaun.
Mafoa masoda mara neuꞌ namahere roo-tetuꞌ
17-18 Toranoo susue kara emin! Bosoꞌ mafarene heni heheluꞌ, fo ita Ramatuan Yesus Kristus lehenda nadedenu nara rafada memaꞌ emi rae, maneniko dae-bafoꞌ a sakaꞌ noe, sona mamumulu-mamamaeꞌ ara kalua mai. Ara rahiiꞌ radadae Ramatuaꞌ a hihii-nanaun, fo tuka noi sira hihii-nanau peko-paki nara.✡2 Petrus 3:3 19 Besaꞌ ia, hapu memaꞌ lahenda sira so. Sira siꞌ duduku-papauꞌ reu-mai, fo tao ra emi mabika-mabatiꞌ. Ara rasoda tuka adaꞌ noi lahenda dae-bafoꞌ a hihii-nanaun, Ramatuaꞌ a Dula-dale Malalao-malalafu Na ta nai sira dale nara fa.
20 Tehuu toranoo susue kara emin! Emi muste mafoa masoda mara neuꞌ batu bukuꞌ, riꞌ emi namahere malalao-malalafum. Ma kalu emi hule-haradoi, sona tuka hata fo Dula-dale Malalao-malalafuꞌ a natudu fee emi a. 21 Mafarereneꞌ, Manetualain sue na emi seli. De, emi manea ao-ina mara, fo ela leo mahere nai Ria susue-lalain daleꞌ. Ma emi muste manenete, mahani ita Ramatuan Yesus Kristus, natudu dale kasian Na neuꞌ emi, fo ela emi masoda maroo moo Manetualain.
22 Emi muste matudu dale kasian mara neuꞌ lahenda dale asapakaꞌ ara. 23 Emi muste tulu-fali basa lahenda fo parlu hapu sodaꞌ a, sama leoꞌ emi kalua ma lahenda reme aipilaꞌ daleꞌ mai. Hapu lahenda fekeꞌ, fo emi muste matudu dale malole mara neuꞌ asa. Tehuu besa-besa! Leo mae emi kasian neuꞌ asa, tehuu emi boe muste mahiaꞌ sira makekeo-makakanu nara, sama leoꞌ lahenda rahiaꞌ badu kekeoꞌ.†Dedea Yunani a nae, “Bosoꞌ mafaroe sira badu kekeo nara.” Ia nanaa, dedea-nafada lenaꞌ fo sosoa na nae, “Sira masoda tadalu na, ma nanori-nafada nara, bosoꞌ duduku-papauꞌ ralaꞌ emi.”
Yudas fee heni lahenda kamahereꞌ ara leo Ramatuaꞌ a neu ela nanea si
24 Besaꞌ ia ita io-oa neuꞌ Manetualain!
Huu fo Ria riꞌ bisa nanea emi,
ela emi bosoꞌ tuda.
Ma Ria riꞌ bisa napipipi-nalalaꞌo emi,
ela mapadeiꞌ nai Ramatua fo kahereꞌ nan seli mata Na,
Ria riꞌ tao lalao-lalafu emi,
ela bosoꞌ makekeo-makakanuꞌ bali.
De, emi mai no namahoꞌo-natadaleꞌ.
25 Adaꞌ noi Manetualain riꞌ,
Ramatua matetuꞌ.
Adaꞌ noi Ria riꞌ bisa fee ita sodaꞌ,
nesiꞌ ita Ramatuan Yesus Kristus!
De, basa-basan fee hada-horomata neuꞌ Ana.
Basa kahereꞌ a, nana Ria nuun.
Ria kuasa Na, bau na seli.
Ma Ana nanuu hak fo pareta,
neme uluꞌ mai,
ma besaꞌ ia,
losaꞌ ta etu-basan fa.
Tebe ria!
Neme au mai,
Yudas.
✡1:5 Kalua reme Masir 12:51; Susura Dudui Nadeꞌ a 14:29-30
✡1:9 Daniel 10:13, 21; 12:1; Daebafo Rupa-lole Bebeuꞌ a 12:7; Tui Seluꞌ Laꞌe Neuꞌ Eno Sodaꞌ a 34:6; Sakaria 3:2
✡1:11 Tutui Masososaꞌ 4:3-8; Susura Dudui Nadeꞌ a 22:1-35; 16:1-35
*1:12 Dedea Yunani nai ia bisa hapu sosoa-raraaꞌ dua. Esa sona nae, Paulus nararaaꞌ lahenda tadaluꞌ ara ro “batu kusi”. Esa bali nae, ana nararaaꞌ asa ro “makekeo-makakanuꞌ”.
✡1:14 Tutui Masososaꞌ 5:18, 21-24
†1:23 Dedea Yunani a nae, “Bosoꞌ mafaroe sira badu kekeo nara.” Ia nanaa, dedea-nafada lenaꞌ fo sosoa na nae, “Sira masoda tadalu na, ma nanori-nafada nara, bosoꞌ duduku-papauꞌ ralaꞌ emi.”