1 Toranoo susue kara! Ia nana au fee emi susuraꞌ kadua a. Nai susuraꞌ ia ra dua, au afarereneꞌ fee emi, ela emi bisa duꞌa-afi laꞌeneuꞌ hihii-nanauꞌ roo-tetuꞌ ara. 2 Mafarene fai a ulu na, Ramatuaꞌ a mana nesimata nara dedea-nafadan. Mafarene Yesus lahenda nadedenu nara boe. Afi matalolole laꞌeneuꞌ hata fo riꞌ ita Ramatua na pareta si, ela rafada emi a. Huu fo Ria riꞌ soi-tefa na emi meme sala-siko mara mai! 3 Mafarene leo iaꞌ dei: leo mae dae-bafoꞌ a bei ta noe fa, tehuu lahenda mamumulu-mamamaeꞌ ara tao tuka sira hihii-nanau ao-paa tadalu nara. Ara dedea ramumulu nonoi-tatao roo-tetuꞌ a.✡Yudas 1:18 4 Ara dedea rae, “Yesus helu nae, Ana sakaꞌ natafali mai hete? Kalu leoꞌ na, sona Ana nai bea? Huu fo mulai neme ita bei-baꞌi nara mate, losaꞌ besaꞌ ia ta hapu esa nararali boeꞌ. Mulai neme Manetualain adu lalai no dae-bafoꞌ a, basa-basan bei ratetu.”

5-7 Tehuu lahenda mapuputaꞌ sira, rafarene heni hihii-nanauꞌ esa. Riꞌ neme masososa na mai Manetualain noi dedeaꞌ a boe, lalai dadi memaꞌ. Manetualain adu na oe boe. Boe ma Ana tada bati oe a neme madaꞌ a mai, ma tao na madaꞌ a toda neme oe a mai. Manetualain dedea nae leoꞌ bea, sona ria nahere.✡Tutui Masososaꞌ 1:6-9 Nai mabui, boe ma Manetualain pake faa ina, de namate basa lahenda dae-bafoꞌ fo riꞌ rasoda nai Noh tepo-lelen.✡Tutui Masososaꞌ 7:11 Tehuu besaꞌ ia, Manetualain nafada memaꞌ, Ana sakaꞌ tao hata ubeaꞌ soaneuꞌ lalai no dae-bafoꞌ a. Besaꞌ ia Ana bei nahani, tehuu neuꞌ ko naraa laꞌe ledo-fain, te Ana nau hotu heni si. Neuꞌ ko Manetualain fee huhukuꞌ, ela tao nalulutuꞌ lahenda fo ta nau tao daleꞌ neuꞌ Ana. Leo mae leoꞌ na, tehuu lahenda mapuputaꞌ sira ta nau rafarene rae, tantu Manetualain tao tuka hata fo Ana dedea a.

8 Toranoo susue kara! Bosoꞌ mafarene heni hihii-nanauꞌ ia. Ita Ramatua na ta reke ledo-fai sama leoꞌ ita. Tuka Ria, sona faiꞌ esa bisa sama leoꞌ teuꞌ rifun esa. Ma teuꞌ rifun esa, sama leoꞌ noi faiꞌ esaꞌ a boe.✡Sosoda Iꞌio-oꞌoaꞌ ara 90:5 9 Maneniko ita Ramatua na helu sakaꞌ tao hihii-nanauꞌ esa, sona Ana taon naraa laꞌe ledo-fain, ma ta nahani fa. Lahenda ruma afi rae Ana noi-tao nababakoꞌ. Sekona te, taꞌa! Ana nanenete, nahani ledo-fain. Ita Ramatua na nau basa lahenda ra saledale-tuꞌetei nara, ma ratafali mai tuka Ni. Huu fo Ana ta nau lahenda ra bika-bati roo Ni losaꞌ dodoon.

10 Tehuu maneniko ita Ramatua na natafali mai, ta hapu lahenda esa bubuluꞌ boeꞌ. Huu fo Ria mamai na noi nakekeꞌ a, sama leoꞌ naꞌo a masoꞌ nala uma daleꞌ. Neuꞌ ledo-fai ria, te basa hata a lalaꞌen rai lalai nanahotu heniꞌ, leo-leoꞌ ledo a, bulaꞌ a, ma ruuꞌ ara. Basa-basan sapu-lalo! Leoꞌ na boe, dae-bafoꞌ a noo basa oe-isin. Putu heni si!✡Mateos 24:43; Lukas 12:39; 1 Tesalonika 5:2; Daebafo Rupa-lole Bebeuꞌ a 16:15

11 De, neuꞌ ko basa-basan nanahotu heniꞌ, sona emi dadi lahenda rupa leo beaꞌ? Emi muste sadia leo-laꞌo tuka Ramatuaꞌ a hihii-nanaun. Emi boe muste masoda lalao-lalafuꞌ! 12 Ma emi muste mahani Ramatuaꞌ a mamai na. De, emi muste sadia fo tao ma fai ria mai lai-lai. Neuꞌ ledo-fai ria, te lalai nanahotu heniꞌ boe. Ma basa hata a lalaꞌen rai lalai nanahotuꞌ de noe heni si.

13 Tehuu neuꞌ ko hapu lalai rupa-lole bebeuꞌ, ma dae-bafo rupa-lole bebeuꞌ. Manetualain helu nae leoꞌ na, ria riꞌ ita tahani. Nai naa hapu noi lahenda roo-tetuꞌ ara.✡Yesaya 65:17; 66:22; Daebafo Rupa-lole Bebeuꞌ a 21:1

14 De, toranoo susue kara! Fai fo emi bei mahani hihii-nanauꞌ ia ra, emi muste sadia dadi meuꞌ lahenda malole, tuka Ramatuaꞌ a uuku-susudin. No ria na, ta hapu lahenda esa bisa sale emi. Sadia fo masoda mole-dame boe.

15a Huu fo ita Ramatua na nanenete, fo ela Ana bisa soi-tefa na emi meme sala-siko mara mai.

15b Sama na leoꞌ ita toranoon Paulus duiꞌ fee emi, laꞌeneuꞌ hihii-nanauꞌ dodouꞌ so, hete? Ramatuaꞌ a riꞌ fee ni duduꞌa-aafi tandeꞌ leo naꞌ, huu ria na de ana duiꞌ leo naꞌ boe. 16 Fai bea ma Paulus duiꞌ susuraꞌ, sona ana dedea hihii-nanauꞌ ia ra boe. Neme ria susura nara mai, memaꞌ hapu hihii-nanauꞌ ruma ita ta tala sosoa-raraan fa. Lahenda ruma tao rapuputaꞌ Paulus dale hihii na. Ara tao raputaꞌ hihii-nanauꞌ fekeꞌ ara rai Ramatuaꞌ a Susura Makamoi Na daleꞌ boe. Sira siꞌ, lahenda ao-mataꞌ ara, ma lahenda fo ta ramahere tebe-tebe fa. Lahenda rupa leo naꞌ ara, neuꞌ ko ralulutuꞌ.

17 Toranoo susue kara! Emi bubuluꞌ mesen mapuputaꞌ sira eno masoda nara so. De, besa-besa oo! Huu fo ara ta nau ramanene atoran esa boeꞌ. Ara soba-soba rapuputaꞌ emi, fo ela emi heo meme eno roo-tetuꞌ a mai. Tehuu bosoꞌ mataaꞌ asa raseki emi. Emi muste manenete mahere. 18 Malole lenaꞌ, emi namahere ma namatua-namanaru naroo. Huu fo emi bubuluꞌ, ita Ramatuan Yesus Kristus Manasoi-manatefa ita sala-sikon. Ana nau natudu dale malole Na neuꞌ emi. Ma Ana nau emi boe-boe malelaꞌ Ana.

Au nau basa lahenda ra soꞌu radedema Ni, neme besaꞌ ia mai losa doo na neu!*Duduiꞌ dedea Yunani ruma tamba “Amin!” nai ia.