21
Yohanis nita lalai ma dae-bafo rupa bebeuꞌ
1 Basa de au ita lalai rupa bebeuꞌ ma dae-bafoꞌ rupa bebeuꞌ, huu fo lalai paraaꞌ ma dae-bafoꞌ paraaꞌ a mopo si so. Tasiꞌ a boe neꞌes ana so.✡Yesaya 65:17; 66:22; 2 Petrus 3:13 2 Boe ma au ita Manetualain kota malalao-malalafu Na, riꞌ Yerusalem Bebeuꞌ, onda neme nusatetu-ikutemaꞌ a mai. Kota ria nanasadia so, sama leoꞌ manakabi inaꞌ a sakaꞌ neu sipoꞌ saotou na.✡Yesaya 52:1; Daebafo Rupa-lole Bebeuꞌ a 3:12; Yesaya 61:10 3 Basa de au amanene haraoe bauinaꞌ esa neme kadera manapareta ria mai nae,
“Mete matalolole!
Mulai neme besaꞌ ia mai, Manetualain Uma Na nai lahenda dae-bafoꞌ a talada.
Mulai faiꞌ ia, Ramatuaꞌ a nasoda sama-sama noo Ria lahenda nara.
Huu fo Ana dadi neuꞌ sira Manetualain na.
Ma sira dadi reuꞌ Ria ana nara so.
Neuꞌ ko Ana no si naroo.
Ma Ana sama-sama noo si losa doo na neu.✡Yeskial 37:27; Malaka Agama ra Atoran 26:11, 12
4 Neuꞌ ko Ana oꞌoe-nanasi si,
de ara ta dola do ramatani soꞌ.
Huu fo nai naa ta hapu hedi-raus.
Ma nai naa ta hapu momopo-mamates soꞌ.
Basa mana tao susa neme fai a ulu na mai a, taꞌa soꞌ.
Basa mana tao doidoso neme fai a ulu na mai a, sapu-lalo so.”✡Yesaya 25:8; 35:10; 65:19
5 Boe ma Ria fo riꞌ natuu nai kadera manapareta ria dedea nae, “Mete matalolole, huu fo Au tao a basa-basan dadi reuꞌ bebeuꞌ so.” Basa de Ana dedea seluꞌ no au nae, “Duiꞌ leo! Basa lahenda ra bisa ramahere Au Dedea-nafada Ki ia, huu fo basa ia ra, memaꞌ tebe leoꞌ na so!”
6 Boe ma Ana nafada seluꞌ au nae,
“Basa hata fo Au helu neme fai a ulu na mai a, dadi so.
Huu fo Au ia,
Alfa losa Omega.
Ma Au ia,
A losa Z.
Basa-basan reme Au mai,
mulai neme masososa na losa babasan.
Basa lahenda fo mamada-metihedu,
neuꞌ ko Au fee si rinu pardeo,
neme oe mata masodaꞌ, fo neni fee lahenda soda matetuꞌ a.✡Yesaya 55:1
7 Basa lahenda fo ranenete tuka Au losaꞌ ana mate,
neuꞌ ko ara sipo raa basa ua-nale.
Neuꞌ ko Au dadi uuꞌ sira Manetualain na,
ma sira dadi reuꞌ Au ana Kara.✡2 Samuel 7:14; Sosoda Iꞌio-oꞌoaꞌ ara 89:26-27
8 Tehuu lahenda fo riꞌ nanatuꞌu heniꞌ,
leo tasi aipila balerang, manabasa taaꞌ a.
Leo-leoꞌ lahenda fo bii-namataꞌu manaku Ramatuaꞌ a,
lahenda fo hiru rasadea Yesus,
lahenda makekeo-makakanuꞌ,
lahenda mana hohoke,
kanisaꞌ lahendaꞌ,
manasoko-manataku,
manateiꞌ,
ma mapuputaꞌ ara.
Neuꞌ ko sira basa nanatuꞌu heniꞌ leo tasi aipilaꞌ daleꞌ reu,
fo riꞌ lahenda rae, ‘mamana mamates kadua.’ ”
Yohanis nita kota Yerusalem rupa bebeuꞌ
9 Boe ma au ita esa neme eilaꞌo-limalope kahituꞌ mana homu bokor fo riꞌ henuꞌ no Ramatuaꞌ a nasa-boliin. Ana mai naneta no au de dedea nae, “Maiꞌ ia dei! Huu fo, au sakaꞌ fee o mita baroit, fo nau sao Bibi-lopo Anaꞌ a.”
10 Basa de, Ramatuaꞌ a Dula-daleꞌ Na onda neuꞌ au, boe ma eilaꞌo-limalope esa neme nusatetu-ikutemaꞌ a mai, noo au leo lete madema esa uu. Nai naa ana natudu au kota Yerusalem, riꞌ Manetualain kota malalao-malalafu Na, onda neme Ramatuaꞌ a mai, nai nusatetu-ikutemaꞌ.✡Yeskial 40:2 11 Kota ria malole na seli! Makaledoꞌ a nahaa sama leoꞌ batu intan makadilaꞌ, kalua neme Manetualain marela-masaꞌa Na mai. Losaꞌ kota ria katemaꞌ ana makaleledon. 12 Hapu tembok bau-ina madema esa feo na kota ria, nanuu lelesu bafa bauinaꞌ sanahulu dua. Eilaꞌo-limalope sanahulu dua reme nusatetu-ikutemaꞌ a mai ranea rai lelesu sira. Nai lelesu bafaꞌ sira sanahulu duaꞌ, manaduiꞌ Israel leo kasanahulu dua nara naden.*Tuka lahenda fo nalelaꞌ Susura Makamoiꞌ a, nomer sanahulu dua, nana nomer fo natudu nomer matetuꞌ laꞌeneuꞌ lahenda dae-bafoꞌ a. 13 Lelesu bafaꞌ ina telu rasare duluꞌ, telu rasare muriꞌ, telu rasare iiꞌ, ma telu bali rasare onaꞌ.✡Yeskial 48:30-35 14 Tembok ria napadeiꞌ nai batu fanderen bauinaꞌ sanahulu dua lain. Nai batu sira esa-esa manaduiꞌ nadeꞌ neme Bibi-lopo Anaꞌ a lahenda nadedenu kasanahulu duan fo riꞌ ralalau Ni nai dae-bafoꞌ a.
15 Boe ma, eilaꞌo-limalope fo dedea no au a, ana homu neni teteꞌe uukuꞌ lilopilas esa, fo sakaꞌ uku kota ria lelesu bafaꞌ ina nara ma tembok na.✡Yeskial 40:3 16 Ana uku nauluꞌ kota ria tembok fo bukuꞌ haa. Nanaru na, loloa na, ma dedema na basan sama, riꞌ kilo rifun dua natun dua dua hulu (2.220).†Susura Makamoiꞌ dedea Yunani manaduiꞌ nae, stadia rifun sanahulu dua. 17 Basa de, ana uku tembok ria aate na, meter nee hulu lima, tuka lahenda dae-bafoꞌ a uuku na.‡Susura Makamoiꞌ dedea Yunani manaduiꞌ nai ia nae, “peihon natun esa haa hulu haa”. Peihon esa, sona sama no hasta esa. Sanahulu dua laiꞌ sanahulu dua, riꞌ natun esa haa hulu haa (144). De, kalu sanahulu dua sosoa na nae, manadaiꞌ, natun esa haa hulu haa (144), sosoa na, natetu-naraa. 18 Ara tao tembok ria, neme batu makadilaꞌ mabeli, nade yaspis. Ma basa-basan fo rai kota ria daleꞌ, ara tao neme lilo isiꞌ fo makaneneun sama leoꞌ tiroao.
19 Batu natendeꞌ sira sanahulu dua, parong asa reniꞌ batu makadilaꞌ rupaꞌ mabeli. Masososaꞌ a pake batu yaspis nahaa rupa modoꞌ. Kadua a, pake batu nilam, nahaa rupa modobarakeoꞌ. Katelu a, pake batu mirah, nahaa rupa pilas. Kahaa a, pake batu samrud, nahaa rupa modoꞌ. 20 Kalima a, pake batu unam, nahaa rupa soklat ma baraeta fulaꞌ. Kanee a, pake batu sardius, nahaa rupa pilas. Kahitu a, pake batu ratna cempaka, nahaa rupa uniꞌ. Kafalu a, pake batu beril, nahaa rupa modobarakeoꞌ. Kasio a, pake batu krisolit, nahaa rupa uniꞌ. Kasanahulu a, pake batu krisopras, nahaa rupa momodoꞌ. Kasanahulu esa a, pake batu lasuardi, nahaa rupa modobarakeoꞌ. Ma kasanahulu dua a, pake batu kecubung, nahaa rupa pilabarakeoꞌ. 21 Ma lelesu bafaꞌ ina kasanahulu duaꞌ sira, tao si reme mutiara dekeꞌ sanahulu dua mai. Lelesu esa sona tao ni neme mutiara dekeꞌ esa. Ma kota ria okafoo na, ara taon neme lilo isiꞌ makadilaꞌ, sama leoꞌ tiroao.✡Yesaya 54:11-12
22 Tehuu au ta ita Uma Mamaso Ina nai kota ria fa. Huu fo Manetualain mana kuasa bau-ina, ma Bibi-lopo Anaꞌ a rahaniꞌ naa. Huu ria na de, lahenda ra reuꞌ doꞌo-tabe mataꞌ Asa. 23 Kota ria boe, ta parlu ledo ma bulaꞌ fo ela makaledoꞌ a, nana huu Manetualain rela-saꞌan nahaa nai naa. Ma Bibi-lopo Anaꞌ ria, dadi sama leoꞌ dededeꞌ a pila.✡Yesaya 60:19-20 24 Neuꞌ ko, lahenda remeꞌ basa nusaꞌ fo rai dae-bafoꞌ a, mai fo laꞌo-laꞌo rai makaledoꞌ ria. Maneꞌ fo rai dae-bafoꞌ a boe, reni sira hata-heto kahere nara leo naaꞌ reu.✡Yesaya 60:3 25 Ta hapu hatuꞌ nai naa soꞌ. Huu ria na de, ta parlu ena lelesu fo masoꞌ leo kota ria neu. 26 Neuꞌ ko, ara reni basa hata malole ma basa hada-horomata neme basa nusaꞌ fo rai dae-bafoꞌ a, leo kota ria daleꞌ reu.✡Yesaya 60:11 27 Tehuu ta bole maso leo naꞌ reu a, nana siꞌ basa tadaluꞌ ara, leo-leoꞌ: mana soko, mana hohoke, ma mapuputaꞌ ara. Bole masoꞌ reu a, nana noi lahenda fo rasoda raroo roo Manetualain a nade nara manadui rai Bibi-lopo Anaꞌ a susura na.✡Yesaya 52:1; Yeskial 44:9
✡21:1 Yesaya 65:17; 66:22; 2 Petrus 3:13
✡21:2 Yesaya 52:1; Daebafo Rupa-lole Bebeuꞌ a 3:12; Yesaya 61:10
✡21:3 Yeskial 37:27; Malaka Agama ra Atoran 26:11, 12
✡21:4 Yesaya 25:8; 35:10; 65:19
✡21:6 Yesaya 55:1
✡21:7 2 Samuel 7:14; Sosoda Iꞌio-oꞌoaꞌ ara 89:26-27
✡21:10 Yeskial 40:2
*21:12 Tuka lahenda fo nalelaꞌ Susura Makamoiꞌ a, nomer sanahulu dua, nana nomer fo natudu nomer matetuꞌ laꞌeneuꞌ lahenda dae-bafoꞌ a.
✡21:13 Yeskial 48:30-35
✡21:15 Yeskial 40:3
†21:16 Susura Makamoiꞌ dedea Yunani manaduiꞌ nae, stadia rifun sanahulu dua.
‡21:17 Susura Makamoiꞌ dedea Yunani manaduiꞌ nai ia nae, “peihon natun esa haa hulu haa”. Peihon esa, sona sama no hasta esa. Sanahulu dua laiꞌ sanahulu dua, riꞌ natun esa haa hulu haa (144). De, kalu sanahulu dua sosoa na nae, manadaiꞌ, natun esa haa hulu haa (144), sosoa na, natetu-naraa.
✡21:21 Yesaya 54:11-12
✡21:23 Yesaya 60:19-20
✡21:24 Yesaya 60:3
✡21:26 Yesaya 60:11
✡21:27 Yesaya 52:1; Yeskial 44:9