1 Boe ma Yesus sakaꞌ laꞌo ela Uma Mamaso Yahudi Ina a. Ana kalua, boe ma ana mana tuka dea nara mai ratudun Uma Mamasoꞌ ria lole-napun. 2 Tehuu Ana nataa si nae, “Tebe Uma ia malole na seliꞌ! Tehuu nenene! Ta dooꞌ a soꞌ, te lahenda ra fate heni batu ia ra katemaꞌ.”

3 Yesus neu natuuꞌ nai lete Saitun. Boe ma ana mana tuka dea nara mai dedea ro noi mesaꞌ Ana rae, “Papa! Soba mafada seluꞌ bisinaaꞌ a Papa dedea ma. Fai hidaꞌ riꞌ Papa matafali mai? Ma tanda nara leo beaꞌ e? Boe ma dae-bafoꞌ a nonoe na leo beaꞌ?”

4 Yesus nataa si nae, “Manea matalolole ao mara, oo! Fo ela bosoꞌ lahenda tipu-dai ralaꞌ emi. 5 Neuꞌ ko lahenda rupaꞌ ara mai fo fapa ara nara rae, ‘Au ia, nana Kristus, Lahenda fo riꞌ Manetualain helu neme uluꞌ mai.’ No ria na, ara tipu-dai lahenda dodouꞌ. 6 Maneniko emi mita lahenda ratatiao, do emi mamanene haraꞌ rae, natati aoꞌ nai basa mamanaꞌ ain, sona emi bosoꞌ bii. Huu fo hihii-nanauꞌ rupa leo naꞌ a, muste dadi. Tehuu dae-bafoꞌ a nonoe na bei ta losa fa. 7 Neuꞌ ko leo esa natati soaꞌ leo fekeꞌ. Nusaꞌ esa natati soaꞌ nusaꞌ fekeꞌ. Dae natakeko nai basa mamanaꞌ ain. Ma fai laa-roes boe masalae naan seli! 8 Tehuu basa sira nana besaꞌ ko tanda masososaꞌ, fo natudu nae dae-bafoꞌ a nonoe na naneneaꞌ so. Ria sama leoꞌ inaꞌ fo nameda hedis bobokiꞌ, nana huu ria ledo-fai boboki na naneneaꞌ.

9 De emi muste manea matalolole ao mara! Huu fo neuꞌ ko ara mai ese-rumu raisa emi. Ma neuꞌ ko basa lahenda nusaꞌ ara eteꞌ ao nara ro emi, nana huu emi tuka Au.✡Mateos 10:22 10 Tepoꞌ ria, te lahenda dodouꞌ boꞌe heni ao nara, ma ta nau ramahere Au soꞌ. Ara ramananasaaoꞌ, ma esa naseꞌo esa. 11 Neuꞌ ko manatipu-manadaiꞌ ara rae sira nana, Manetualain mana nesi matan. Ma lahenda dodouꞌ ramahere si. 12 Neuꞌ ko lahenda ra tadalu nara boe-boe tamba dodouꞌ, losaꞌ ta rasue-ralai ao soꞌ. 13 Tehuu lahenda fo nanenete losaꞌ mate, tantu Manetualain poꞌi-tata naan.✡Mateos 10:22 14 Huu fo lahenda muste tui-beka Manetualain Tutui Malolen, losa dae-bafoꞌ a buku nara, fo ela basa lahenda bisa ralelaꞌ Manetualain eno masoda roo-tetu Na. Basa ria, besaꞌ ko dae-bafoꞌ a noe.”

15 Yesus dedea naroo nae, “Manetualain mana nesi matan Danial duiꞌ laꞌe-neuꞌ lahenda makaresiꞌ esa. Neuꞌ ko ana masoꞌ neu napadei nai mamana luli nai Manetualain Uma Mamaso Yahudi Ina na. De ana tao nakekeo-nakakanu mamanaꞌ ria. Huu ria na, Manetualain foa ela mamanaꞌ ria. Maneniko emi mita leo naꞌ, sona besa-besa, oo! (Bea riꞌ lees duduiꞌ ia, muste bubulu-nalelaꞌ natalolole!)✡Daniel 9:27; 11:31; 12:11 16 Huu fo ria dadi tanda nae, fai susa-lela a nai lelesu bafaꞌ a so. Maneniko lahenda rai propensi Yudea rita leoꞌ na, sona ara ralai leteꞌ reu leo. 17 Maneniko bea kalua neme uma mai, sona bosoꞌ fali neu hai hata bali. Nalale fo nalaiꞌ, ela bosoꞌ hapu soe. 18 Lahenda fo nai oka-tine, bosoꞌ fali hai lafa hanas bali. Nalai naroo leo!✡Lukas 17:31 19 Ina kairus ara, ma ina anutu ra kasian raan seli. Huu fo ara ta ralai rala fa. 20 De, malole lenaꞌ emi hule-haradoi fo ela soe ria, bosoꞌ naraa laꞌe fai uda, do fai mamasoꞌ. 21 Huu fo fai ria susa na masalae naan seli! Mulai neme Manetualain adu dae-bafoꞌ a losaꞌ besaꞌ ia, lahenda bei ta parnaa nita susa bau-ina rupa leo naꞌ. Ma neuꞌ ko lahenda ta nita seluꞌ susa rupa leo naꞌ a soꞌ.✡Daniel 12:1; Daebafo Rupa-lole Bebeuꞌ a 7:14 22 Tehuu emi maua-manale maan seli, huu fo Manetualain tao eetu fai ria. Kalu taꞌa, sona ta hapu lahenda esa bisa nasoda boeꞌ. Tehuu no Manetualain sue-lai Ria lahendan teteka-hehere nara, de Ana tao eetu fai susa sira.

23 Maneniko fai sira losa, sona emi mamanene lahenda rae, ‘Mete dei! Kristus nai ia!’ Ma lahenda fekeꞌ rae, ‘Kristus nai ele!’ Tehuu emi bosoꞌ mamahere! 24 Huu fo neuꞌ ko lahenda kalua ma fapa ara na nae, ‘Au ia, Kristus!’ Ma fekeꞌ a bali nae, ‘Au ia, Manetualain mana nesi matan.’ Neuꞌ ko ara tao tanda heran rupaꞌ ara pake nitu a kuasa na, fo rapuputaꞌ lahenda. Ara soba tipu-dai Manetualain lahenda nara! 25 De emi muste manea matalolole ao mara! Fai susa sira bei ta losa fa, tehuu Au afarereneꞌ memaꞌ fee emi so!

26 Maneniko lahenda rafada emi rae, ‘Kristus nai moo loan ele!’ sona emi bosoꞌ leo naꞌ meu. Ma kalu ruma rae, ‘Kristus nai uma ia daleꞌ!’, sona emi bosoꞌ mamahere sira napuputan. 27 Huu fo Au ia, Ana Lahenda. Maneniko Au atafali seluꞌ leo dae-bafoꞌ ia mai, neuꞌ ko basa lahenda rita Au, sama leoꞌ lahenda rita relas a nahate neme dulu mai losa muri neu.✡Lukas 17:23-24

28 Maneniko Au atafali mai, neuꞌ ko emi bubuluꞌ Au nai bea. Sama leoꞌ lahenda bubuluꞌ rae, maneniko manupui mana naa poporaꞌ ara rabubuta rai mamanaꞌ esa, sona tantu hapu poporaꞌ nai naa.”✡Lukas 17:37

29 Boe ma Yesus nafada selu ana mana tuka dea nara nae, “Maneniko basa fai susa-lela sira,

30 Boe ma basa lahenda ra rita tanda nai lalai rae, Ana Lahenda a sakaꞌ natafali mai. Basa lahenda nusaꞌ nai dae-bafoꞌ ia rita leoꞌ na, boe ma bii losaꞌ ara dola. Huu fo neuꞌ ko Au onda mai oo oaꞌ a, besaꞌ ko ara rita Au kuasa Ka ma Au marela-masaꞌa kara katemaꞌ.✡Daniel 7:13; Sakaria 12:10-14; Daebafo Rupa-lole Bebeuꞌ a 1:7 31 Faiꞌ fo fufuuꞌ a nalii bau-inaꞌ, boe ma Au pareta Manetualain eilaꞌo-limalopen rai nusatetu-ikutemaꞌ a, reu rabubua basa Au lahenda teteka-hehere kara reme dae-bafoꞌ a buku nara mai, neme dulu losa muri; ma neme ii losa ona.”

32 “Au hai conto neme ai huuꞌ a. Maneniko doo na mulai mofa, ria natudu tanda nae, fai hanas a naneneaꞌ so. 33 Leoꞌ na boe, kalu emi mita fai susa-lela sira mai, sama leoꞌ bisinaaꞌ a Au afada a, ria natudu tanda nae, Au mamai Ka naneneaꞌ so. 34 Besaꞌ ia, nenene matalolole! Neme basa lahenda fo rasoda nai besaꞌ ia, neuꞌ ko ruma bei ta mate fa, te fai susa-lela sira mai so. 35 Leo mae lalai ma dae-bafoꞌ sapu-lalo, tehuu Au Dedea-nafada Ki natea-namepe ma ta moi-mosa.”

36 “Ta hapu lahenda bubuluꞌ fai hidaꞌ Au atafali mai. Manetualain eilaꞌo-limalopen rai nusatetu-ikutemaꞌ a boe ta bubuluꞌ. Au boe ta bubuluꞌ. Noi Au Papa Ka riꞌ bubuluꞌ. 37 Huu fo Au ia, Ana Lahenda. Maneniko Au atafali mai, ria sama leoꞌ fai a ulu na tepoꞌ fo Noh bei nasoda.✡Tutui Masososaꞌ 6:5-8 38 Faa ina ria bei ta mai fa, te lahenda raa-rinu mina-malada, ma rasao aoꞌ sama leo biasa na. Ara tao leo naꞌ raroo losaꞌ Noh masoꞌ leo ofa bau-inaꞌ ria daleꞌ neu. 39 Tehuu tepoꞌ fo faa ina a mai de lepa neni katemaꞌ asa, besaꞌ ko mata nara radilaꞌ, de bubuluꞌ mana dadi ubeaꞌ ria. Neuꞌ ko Au mamai Ka boe leoꞌ na.✡Tutui Masososaꞌ 7:6-24 40 Tepoꞌ ria kalu lahenda dua roi nonoiꞌ nai okaꞌ, kekeneu te Manetualain noo esa, tehuu fekeꞌ a sona Ana foa elan. 41 Maneniko inaꞌ dua rapau hade, kekeneu te, Manetualain noo esa, tehuu fekeꞌ a sona Ana foa elan.

42 Huu ria na, emi boe muste manea hatu-leledon, huu fo emi ta bubuluꞌ mae fai hidaꞌ emi Ramatua ma natafali mai. 43 Afi matalolole! Kalu uma ramatuaꞌ a bubuluꞌ nae selubaiꞌ hatu na naꞌo a sakaꞌ mai, sona tantu ana nanea naroo, fo ela naꞌo a bosoꞌ masoꞌ leo uman daleꞌ neu. 44 De emi boe muste sadia. Huu fo Au natafali mai Ka, noi nakekeꞌ a!”✡Lukas 12:39-40

45 Yesus dedea tamba nae, “Emi muste dadi sama leoꞌ ata fo riꞌ tuka naroo ria malaka na hihii-nanaun. Maneniko malaka na sakaꞌ leo dae dooꞌ neu, ana soꞌu ata leo naꞌ, fo urus basa uma isiꞌ a nanaa-nininun katemaꞌ. 46 Maneniko ramatua na fali ma nita ria ata na noi-tao natalolole, tantu dale na namahoꞌo no lahenda ria. 47 Mamahere Au, huu fo neuꞌ ko malaka ria fee ata a kuasa fo urus ria hata-heton katemaꞌ.

48 Tehuu maneniko ata ria tadaluꞌ a, tantu ana dedea nai dale na nae, 49 ‘Malole a! Malaka a laꞌo so, bea bubuluꞌ nae fai hidaꞌ ana fali, oo!’ Afi nae leoꞌ na, boe ma ana mulai popoꞌo tia-lain ata fekeꞌ ara. Ma ana natuuꞌ naa-ninu mina-malada sama-sama no mana mafuꞌ ara. 50 Tehuu ta bubuluꞌ fa, kekeneu te malaka na fali main. 51 Boe ma malaka ria ese-rumu naan seli, basa te tuꞌun leo deaꞌ neu, fo ana leo sama-sama no lahenda dea-mataꞌ ara. Nai mamanaꞌ ria, basa si dola-ramatani, nana huu ara doidoso raan seli.”