1 Yesus nafada ana mana tuka dea nara nae, “Kadodou na hapu lahenda tuda rala salaꞌ dale, huu no lahenda fekeꞌ a duduku-papaun. Tehuu lahenda manaduduku-papauꞌ ria riꞌ hapu soe bauinaꞌ. 2 Maneniko lahenda ra duduku-papauꞌ, losa ana aanaꞌ ara ta nau ramahere neuꞌ Au, neuꞌ ko Manetualain fee ni huhuku mabera. Heke batu bauinaꞌ esa neuꞌ bolii na, fo tuꞌun leo tasiꞌ daleꞌ neu boe, ria nana bei kafaꞌ a. 3 De, manea matalolole ao mara, ela emi bosoꞌ tao ma lahenda tuda leo salaꞌ a neu. Tehuu maneniko o toranoo ma tao nasalaꞌ, sona masaꞌai ni. Maneniko ana saledale-tuꞌetei na, ma ana hule ampon, sona mafarene heni sala na leo.✡Mateos 18:15

4 Maneniko nai faiꞌ esa dalen toranoo ma tao salaꞌ laiꞌ hitu, boe ma saledale-tuꞌetei na, basa de ana mai fo hule ampon laiꞌ hitu, sona o muste mafarene heni ria sala na laiꞌ hitu boe.”

5 Faiꞌ esa, boe ma Yesus ana mana tuka dea nara*Dedea Yunani a mana duiꞌ nai ia nae, “lahenda nadedenuꞌ”. Lukas nahiiꞌ duiꞌ “lahenda nadedenuꞌ” neuꞌ Ramatua Yesus ana mana tuka dea kasanahulu dua nara. mai rasare ran de hule rae, “Papa Mesen! Ami dale namahere ma ta teaꞌ a fa. De, tao matetea tamba ami namahere ma dei.”

6 Yesus nataa nae, “Maneniko emi namahere ma neuꞌ Manetualain kuasa na, leo mae noi baianaꞌ a, tehuu emi bisa pareta ai huu inaꞌ ia mae, ‘Nanafaꞌu, fo marali tasiꞌ daleꞌ muu!’ Neuꞌ ko ai huuꞌ ria tuka tutiꞌ emi pareta ma.”

7 Basa boe ma Yesus dedea bali nae, “Hai natutuduꞌ. Hapu ata fo foi dae nai okaꞌ, do nanea bibi-lopo nai mooꞌ a. Basa boe ma, ata ria fali uma neu. Leo mae leoꞌ bea boe, malaka na ta bisa nafada ni nae, ‘Mai fo ita dua taa-tinu sama-sama leo!’ 8 Taꞌa! Naraa na, riꞌ malaka na nae, ‘Peda ma mei a fo au ua dei! Basa, sona besaꞌ ko o mua-minuuꞌ.’ 9 Maneniko ata ria tao tuka malaka na hihii-nanaun, emi bate mae neuꞌ ko malaka ria hule makasi neuꞌ ana, do? Taꞌa! 10 Emi leoꞌ na boe. Maneniko emi moi-tao ma basa-basan fo Manetualain pareta so a, sona emi mafada mae, ‘Ami nana noi lahenda nadedenuꞌ. Ami ta saka iꞌio fa. Ami malalaꞌo noi ami nonoi laka ma.’ ”

11 Tepoꞌ fo Yesus asa leo Yerusalem reu, ara losa propinsi Galilea no propinsi Samaria a too na. 12 Ara sakaꞌ masoꞌ leo koroꞌ esa nai na reu, hapu lahenda kamahedi kusta sanahulu mai, fo nau raneta ro Yesus. Ara rapadei nai dooꞌ a. 13 Basa boe ma ara raloo belaꞌ a rae, “Yesus! Ramatuaꞌ! Kasian neuꞌ ami dei!”

14 Yesus nita si, boe ma Ana nadenu nae, “Emi meu matudu ao-ina mara nai malaka agama ra dei, fo ela ara parisaꞌ rae, emi hedi kusta mara mopo si so, do beiꞌ.” Ramanene leoꞌ na, boe ma ara reu. Tehuu nai eno taladaꞌ, kekeneu te, basa si ao-ina nara makamoiꞌ tutiꞌ a so.✡Malaka Agama ra Atoran 14:1-32

15 Ara laꞌo raroo no dale namahoꞌo. Tehuu sira esa fali seluꞌ leo Yesus neu. Ana heꞌi-heꞌi mesan nae, “Io-oa neuꞌ Manetualain! Huu fo au ao-ina ka makamoiꞌ a so!” 16 Boe ma ana sundaꞌ undulaka na, fo hule makasi neuꞌ Yesus. (Sekonaa te ria, nana lahenda ta Yahudi fa. Ria lahenda Samaria fo radedea ro lahenda Yahudi ra laꞌo naroo.)

17 Boe ma Yesus dedea no basa lahenda fo tuka Ni a nae, “Bisinaꞌ a Au puli a lahenda sanahulu, hete? Tehuu sio rai bea? 18 Ubeaꞌ taon de noi lahenda mana mai ia riꞌ natafali mai, fo hule makasi neuꞌ Manetualain, ma io-oa neuꞌ Ana?”

19 Boe ma Ana nafada lahenda ria nae, “Huu no mamahere tebe-tebe neuꞌ Au, de o teꞌe ma aom. Foa fo fali no soda-moleꞌ leo!”

20-21 Faiꞌ esa boe ma, lahenda Farisi hida mai ratane Yesus rae, “Papa Mesen! Soba mafada dei! Fai hidaꞌ rina Manetualain mai pareta nai dae-bafoꞌ a?”

Yesus nataa nae, “Leo iaꞌ! Manetualain pareta nai dae-bafoꞌ a, ta mulai neniꞌ tanda fo lahenda bisa ritan. Boe ma lahenda ta bisa natudu buti nae, ‘Mita, Manetualain pareta nai ia, do nai ele!’ Huu fo Ana pareta nai emi talada nai lahenda dae-bafoꞌ a dalen.”

22 Boe ma Yesus nafada ana mana tuka dea nara nae, “Ta dooꞌ a fa, te Au, Ana Lahenda, ta sama-sama oo emi soꞌ. Neuꞌ ko fai susa-lela a, te emi mahiiꞌ mita Au fai mamai Ka. Tehuu Au bei ta mai fa. 23 Kalu lahenda rafada rae, ‘Kristus nai ia!’, do, ‘Kristus nai ele!’ sona bosoꞌ kalua meu masakaꞌ, huu fo ara dedea fufudiꞌ ria. 24 Huu fo neuꞌ ko Ana Lahendaꞌ a natafali mai, tanda na sama leoꞌ relas a narela nahaa-nakaledo nai lalai bukun haas. 25 Tehuu Ana lepa-nasaa masososa doidoso rupaꞌ dei. Ma lahenda besaꞌ ia tipa-tola Ana. 26 Boe ma maneniko Ana sakaꞌ natafali mai, lahenda ra masoda nara sama leoꞌ nai Noh tepo na.✡Tutui Masososaꞌ 6:5-8 27 Noh tepo na nana lahenda ta nau ramanene fa, raa-rinu ma sao ana, losa Noh masoꞌ ofa daleꞌ neu. Boe ma, faa ina a mai, de namate basa si.✡Tutui Masososaꞌ 7:6-24

28 Ria sama leoꞌ nai Lot tepo na boe, lahenda ta nau ramanene fa. Ara raa-rinu, seꞌo-asa, sele-tande ma rafoa uma. 29 Tehuu fai fo Lot kalua ela Sodom, boe ma uda ai-pilaꞌ ma balerang onda neme lalai mai, de naa heni laiꞌ esaꞌ asa.✡Tutui Masososaꞌ 18:20—19:25

30 De, emi besa-besa, o! Boso losa fai fo Ana Lahendaꞌ a nau natafali mai, lahenda ra masoda nara leo-leoꞌ na. Tehuu kekeneu te Ana toda mai. 31 Faiꞌ ria, lahenda fo nai uma a titise mata na, bosoꞌ boe uma daleꞌ neu fo nafafau bali. Lahenda mana noi nai oka-tine, bosoꞌ boe fali uma fo hai hata bali.✡Mateos 24:17-18; Markus 13:15-16 32 Mafarene hata fo maulu na dadi neuꞌ Lot sao na a. Ana mate, nana huu nafarene hata-heton nai uma.✡Tutui Masososaꞌ 19:26

33 Lahenda fo ta nau tuka Au, huu no sue ao-ina na, neuꞌ ko soda na mana dadi taꞌ. Tehuu lahenda fo nau tuka Au losaꞌ fee heni ria ao-ina na nana huu sue Au, neuꞌ ko ana hapu sodaꞌ a, ma nasoda naroo no Manetualain.✡Mateos 10:39; 16:25; Markus 8:35; Lukas 9:24; Yohanis 12:25 34 Au afada memaꞌ! Tepoꞌ fo Ana Lahendaꞌ a natafali mai, maneniko hapu lahenda dua suku rabua rai mamana susukuꞌ esa, kekeneu te Manetualain soꞌu naaeꞌ esa, ma foa ela esa. 35 Maneniko hapu inaꞌ dua rapau sama-sama, neuꞌ ko Manetualain soꞌu naaeꞌ esa, ma foa ela fekeꞌ a. 36 [Maneniko hapu lahenda dua roi nonoi-tataoꞌ sama-sama nai oka-tine, neuꞌ ko Manetualain soꞌu naaeꞌ esa, ma foa ela fekeꞌ a.]”†Lalane katelu hulu nee na neꞌes ana dudui dedea Yunani malole inaꞌ a.

37 Yesus ana mana tuka dea nara ramanene ra ria, boe ma ara ratane Ni rae, “Papa Mesen! Neuꞌ ko basa sira dadi rai bea?”

Boe ma Yesus tuꞌu dedeaꞌ nae, “Leo iaꞌ. Maneniko emi mita manupui mana naa banda mates ara laa rabua rai bea, emi bubuluꞌ tanda ria so nae, tantu ara raa banda mates rai mamanaꞌ ria.” [Ma sosoa-raraan mana mafuniꞌ, de neuꞌ ko Kristus natafali mai, ria tanda na ledo-ledo, maneniko lahenda lees ralelaꞌ.]