18
Ramatua Yesus ana mana tuka dea nara ratatane aoꞌ rae, bea riꞌ bau lena
(Markus 9:33-37; Lukas 9:46-48)
1 Faiꞌ ria Yesus ana mana tuka dea nara mai ratane Ni rae, “Papa! Neme basa Manetualain lahenda nara mai, bea riꞌ bau lena?”✡Lukas 22:24
2 Boe ma Yesus naloo na ana aanaꞌ esa, de feen napadei neuꞌ sira talada. 3 Ana nae, “Nenene matalolole! Lahenda bea nau dadi neuꞌ Manetualain lahendan, ria muste narali duduꞌa-aafin ela dadi sama leoꞌ ana aanaꞌ fo ta natutua-nadedema aon.✡Markus 10:15; Lukas 18:17 4 Huu fo lahenda bea naloe-nadae aon sama leoꞌ ana aanaꞌ ia, sona ria riꞌ lahenda bau-inaꞌ nai Manetualain mata Na. 5 Ma lahenda bea sipoꞌ lahenda aanaꞌ leo iaꞌ, nana huu namahere Au, sona ana sipoꞌ Au ria so.”
Ramatua Yesus fee nafarereneꞌ laꞌe-neuꞌ lahenda fo riꞌ tao na lahenda fekeꞌ a tao salaꞌ
(Markus 9:42-48; Lukas 17:1-2)
6 Yesus nafada seluꞌ asa nae, “Maneniko lahenda bea tao na ana aanaꞌ esa, tuka eno masalaꞌ a, losaꞌ ta namahere Au, sona besa-besa, oo! Malole lenaꞌ lahenda heke batu bau-inaꞌ esa,*Dudui dedea Yunani a nae, ‘batu papaleꞌ’ fo ara paken ela pale reniꞌ hade-gandum. neuꞌ bolii na, fo dolu ni leo tasiꞌ daleꞌ neu. 7 Dae-bafoꞌ ia tebe-tebe mamana soe, huu fo hihii-nanauꞌ dodouꞌ riꞌ tao ra lahenda tuda rala sala-sikoꞌ daleꞌ. Tehuu lahenda fo soe raan seliꞌ a, nana siꞌ lahenda fo no ria tataon de lahenda fekeꞌ tao salaꞌ.
8 Maneniko o tao salaꞌ muniꞌ lima ma, do, ei ma, sona tete henis! Huu fo malole lenaꞌ o masoꞌ nusatetu-ikutemaꞌ a no lima seseriꞌ, do ei seseriꞌ, beraꞌ ko no o ei-lima katematuam, ara tuꞌu o leo ai-pila naraka a muu.✡Mateos 5:30 9 Maneniko o tao salaꞌ muniꞌ mata ma, sona edo henin! Huu fo malole lenaꞌ o masoꞌ nusatetu-ikutemaꞌ a no mata seseriꞌ, beraꞌ ko no o matam duas ara tuꞌu o leo ai-pila naraka muu.”✡Mateos 5:29
Ramatua Yesus fee nasasamaꞌ laꞌe-neuꞌ bibi-lopo manamopoꞌ esa
(Lukas 15:3-7)
10 Yesus dedea bali nae, “Besa-besa, oo! Bosoꞌ losa emi ta hika-hadaꞌ ana aana leo iaꞌ. Huu fo Manetualain eilaꞌo-limalopen rai nusatetu-ikutemaꞌ a riꞌ ranea si. Ma eilaꞌo-limalopen sira bisa masoꞌ faiꞌ bea a, fo reu rafada lahenda ia ra hihii-nanauꞌ nara nai Manetualain.
11-13 Emi afi matalolole, huu fo Au nau fee nasasamaꞌ leo iaꞌ: Lahenda esa nanuu bibi-lopo natun esa. Faiꞌ esa boe ma bibi esa sala de laꞌo mesaꞌ ana. Emi dodoo ma nana, mana foo ria muste tao ubeaꞌ? Tantu ana foa ela bibi-lopo kasio hulu sioꞌ sira reuꞌ leteꞌ lain, boe ma neu saka bibi-lopo iseꞌ mana mopoꞌ ria.✡Lukas 19:10
Maneniko hapu faliꞌ ana, sona dale na namahoꞌo-natadale nita bibi-lopo iseꞌ mana mopoꞌ ria, lena neme nita bibi-lopon kasio hulu sio mana mopo taaꞌ sira. [Au, Ana Lahenda ia, mai ela poꞌi-tata lahenda fo riꞌ heo reme eno roo-tetuꞌ a mai.]†Dudui Yunani malole inaꞌ, ma masososaꞌ a ta duiꞌ, mana duiꞌ fo nai kurung ia daleꞌ. 14 Huu fo leo mae mopo noi ana aanaꞌ kamahereꞌ esa boe oo, Au Papa Ka nai nusatetu-ikutema a, ta nau fa.”
Ramatua Yesus nafada eno na leoꞌ beaꞌ ela ita malolole seluꞌ to lahenda fo tao rasalaꞌ ita
15 Yesus dedea seluꞌ nae, “Maneniko toranoom lahenda kamahereꞌ tao nasalaꞌ o, sona muste muu dama ni. Maneniko noi emi dua, sona besaꞌ ko mafada ria sala na. Kalu ana namanene o dedea-nafadam, sona emi dua malole ma seluꞌ ao mara.✡Lukas 17:3 16 Tehuu maneniko ana ta nau namanene neuꞌ o, sona muu mala tia-laim esa-dua fo mo si sama-sama meu dama lahenda ria, ela dedea mo ni seluꞌ. Huu fo mana duiꞌ nai Manetualain Susura Makamoi Na daleꞌ nae, ‘Nai dedeaꞌ esa, muste hapu sakasii dua do telu tutui nara sama, besaꞌ ko bisa sipoꞌ asa.’✡Tui Seluꞌ Laꞌe Neuꞌ Eno Sodaꞌ a 19:15 17 Tehuu maneniko ana bei ta nau namanene neuꞌ emi, sona meu mafada saraniꞌ ara. Ma kalu ana ta nau sipoꞌ saraniꞌ ara dedean no malole, sona tao ni sama leoꞌ lahenda fo ta nalelaꞌ Manetualain. Taꞌa, sona tao ni neuꞌ lahenda tadaluꞌ sama leoꞌ mana susu bea.
18 Mafarereneꞌ matalolole Au dedea Ka! Kalu hata ubeaꞌ fo emi horo ta bole taon nai dae-bafoꞌ a, sona Manetualain boe horo leo naꞌ nai nusatetu-ikutemaꞌ a. Ma kalu hata ubeaꞌ fo emi ta horo bole taon nai dae-bafoꞌ a, sona Manetualain boe ta horo leo naꞌ nai nusatetu-ikutemaꞌ a.✡Mateos 16:19; Yohanis 20:23
19 Ma Au afada seluꞌ ae, maneniko lahenda dua neme emi mai daleꞌ esa, fo hule-haradoi, neuꞌ ko Au Papa Ka nai nusatetu-ikutemaꞌ a fee hata fo ara hule a. 20 Maneniko Au lahenda Ki dua do telu rabua-raesa fo hule-haradoi sama-sama, sona Au boe nai sira talada.”
Ramatua Yesus fee nasasamaꞌ laꞌe-neuꞌ pegawe fo ta fee ampon neuꞌ ria tia-lain
21 Boe ma Petrus mai natane Yesus nae, “Ramatuaꞌ, au nau atane baiꞌ. Maneniko au toranoo lahenda kamahere ka tao nasalaꞌ au kose-kose, sona au muste fee ampon neuꞌ ana losa laiꞌ hida? Losa laiꞌ hitu, do?”
22 Yesus nataa ni nae, “Taꞌa! O muste fee ampon neuꞌ ana hitu laiꞌ hitu hulu (7 x 70),‡Dedea Yunani nai ia, bisa sosoa na nae, “hitu laiꞌ hitu hulu (7 x 70)”. Bisa boe, “laiꞌ hitu hulu hitu (77 x)”. losaꞌ o reke doaꞌ asa.✡Lukas 17:3-4 23 Emi muste tao tuka leoꞌ na, nana huu Manetualain sama leoꞌ maneꞌ esa bareken pegawe nara huta-buꞌun. 24 Tepoꞌ fo ana mulai bareken, boe ma nadenu ria lahendan neu naloo pegawe fo riꞌ nahuta ni doiꞌ, losa kefu-kafun.§Susura Makamoiꞌ dedea Yunani nai ia duiꞌ nae, “τάλαντον(talanton) rifun sanahulu (10.000)”. Talanton esa, riꞌ lahenda mana noi esa kadin teuꞌ sanahulu lima losa dua hulu (teuꞌ 15-20). Susura Makamoiꞌ dedea Indonesia nai ia nae ‘talenta’. 25 Tehuu pegawe ria ta bisa bae nala huta na. De maneꞌ a pareta nae, ‘Meu seꞌo lahenda ia noo sao-anan katemaꞌ, ela ara dadi ata. Ma seꞌo heni basa hata-heton, fo ela bae ria huta-buꞌun.’
26 Pegawe ria namanene leoꞌ na, boe ma ana sundaꞌ undulaka na nai maneꞌ a matan, fo leleꞌo ni nae, ‘Adoo! Papa, ee! Papa mane fee au fai lelaꞌ baiꞌ dei! Neuꞌ ko au bae etu katemaꞌ huta kara.’ 27 Maneꞌ a namanene leoꞌ na, boe ma kasian neuꞌ ana. De ana eꞌa heni tutiꞌ pegawe ria huta nara katemaꞌ, ma ana poꞌi ni.
28 Tehuu pegawe ria kalua, boe ma neu dama tia-lain fo riꞌ nahuta ni doiꞌ baiꞌ.*Susura Makamoi dedea Yunani nai ia duiꞌ nae, “δηνάριον(deinarion) natun esa (100)”. Deinarion esa, riꞌ lahenda mana noi esa kadi na faiꞌ esa. De maneniko nararaaꞌ ana noo τάλαντον(talanton) rifun sanahulu (10.000) fo nai (lalane kadua hulu haan), sona hutaꞌ ia ra sosoa-raraaꞌ taꞌa. Ana hopu na tia na, de rumu neuꞌ bolii na, ma nasapaa nae, ‘O bae huta ma besaꞌ ia leo!’
29 Tia na namanene leoꞌ na, boe ma sundaꞌ undulaka na fo leleꞌo ni nae, ‘Adoo! Tia, ee! Fee au fai lelaꞌ baiꞌ dei! Neuꞌ ko au bae etu katemaꞌ huta kara.’
30 Tehuu pegawe ria nae, ‘Ta bisa fa! Leo mae leoꞌ bea boe oo, muste bae adaꞌ besaꞌ ia!’ Boe ma ana tee tia na leo bui daleꞌ neu, losaꞌ ana bae etu katemaꞌ huta nara. 31 Maneꞌ a pegawe feke nara rita hata mana dadiꞌ ria, boe ma dale nara susa, de reu tui maneꞌ a.
32 Maneꞌ a namanene leoꞌ na, boe ma naloo na pegawe mata mamae taaꞌ ria. Ana nasaꞌai ni nae, ‘Ae, lahenda tadaluꞌ on! O hule au kasian neuꞌ o, huu ria na de au eꞌa heni katemaꞌ huta mara so. 33 Tehuu ubeaꞌ taon de o ta kasian neuꞌ tia-laim ria, sama leoꞌ au kasian neuꞌ o?’ 34 Maneꞌ a namanasa, losaꞌ ana nadenu si teen leo bui daleꞌ neu, fo ela ara ese-rumun, losa ana bae nabasa huta-buꞌun.”
35 Yesus tui nateꞌe, boe ma Ana nafada nae, “Au Papa Ka nai nusatetu-ikutemaꞌ a bareken leo naꞌ boe. Maneniko emi ta tebe-tebe mafarene heni toranoo kamahere mara sala-sikon, sona neuꞌ ko Ana huku emi.”
✡18:3 Markus 10:15; Lukas 18:17
*18:6 Dudui dedea Yunani a nae, ‘batu papaleꞌ’ fo ara paken ela pale reniꞌ hade-gandum.
†18:11-13 Dudui Yunani malole inaꞌ, ma masososaꞌ a ta duiꞌ, mana duiꞌ fo nai kurung ia daleꞌ.
✡18:16 Tui Seluꞌ Laꞌe Neuꞌ Eno Sodaꞌ a 19:15
✡18:18 Mateos 16:19; Yohanis 20:23
‡18:22 Dedea Yunani nai ia, bisa sosoa na nae, “hitu laiꞌ hitu hulu (7 x 70)”. Bisa boe, “laiꞌ hitu hulu hitu (77 x)”.
§18:24 Susura Makamoiꞌ dedea Yunani nai ia duiꞌ nae, “τάλαντον(talanton) rifun sanahulu (10.000)”. Talanton esa, riꞌ lahenda mana noi esa kadin teuꞌ sanahulu lima losa dua hulu (teuꞌ 15-20). Susura Makamoiꞌ dedea Indonesia nai ia nae ‘talenta’.
*18:28 Susura Makamoi dedea Yunani nai ia duiꞌ nae, “δηνάριον(deinarion) natun esa (100)”. Deinarion esa, riꞌ lahenda mana noi esa kadi na faiꞌ esa. De maneniko nararaaꞌ ana noo τάλαντον(talanton) rifun sanahulu (10.000) fo nai (lalane kadua hulu haan), sona hutaꞌ ia ra sosoa-raraaꞌ taꞌa.