16
Manetualain nasa-bolii na nana poꞌa leo dae-bafoꞌ a neu
1 Basa de au amanene haraoeꞌ esa kalua neme Uma Mamasoꞌ a mai, pareta eilaꞌo-limalope sira hitu nae, “Meu leo! Hai meni bokor sira fo poꞌa Ramatuaꞌ a nasa-boliin leo dae-bafoꞌ a neu leo.”
2 Eilaꞌo-limalope masososaꞌ a namanene leoꞌ na, boe ma ana poꞌa heni ria bokor na isi na leo dae-bafoꞌ a neu. Kekeneu te, soe a laꞌe basa lahenda fo parnaa sipo banda maꞌaaꞌ ria eꞌe-dededen, ma lahenda fo soko neuꞌ ria patung na. Ara hapu bisu puruꞌ nanoso na seli.✡Kalua reme Masir 9:10
3 Basa boe ma, eilaꞌo-limalope kadua a poꞌa heni ria bokor na isi na leo tasiꞌ a neu. Kekeneu te, tasi oeꞌ a dadi daa, naboo puruꞌ, sama leoꞌ lahenda mana mateꞌ a. Boe ma basa hata masoda rai tasiꞌ daleꞌ, mate basa si.
4 Basa de, eilaꞌo-limalope katelu a poꞌa ria bokor na isi na leo lee ra, ma oe mataꞌ ara neu. Boe ma basa oe ra dadi daa.✡Kalua reme Masir 7:17-21; Sosoda Iꞌio-oꞌoaꞌ ara 78:44 5 Basa de, au amanene eilaꞌo-limalope esa fo riꞌ ana urus basa oe nai dae-bafoꞌ a. Ana io-oa Manetualain nae,
“Oo Ramatuaꞌ!
Ramatuaꞌ a malalao-malalafuꞌ!
Ramatuaꞌ a fo ta parnaa tao salaꞌ!
Ramatuaꞌ a masodaꞌ neme masososa na mai.
Ma Ramatuaꞌ a masodaꞌ losa doo na neu.
Ramatuaꞌ a naetuꞌ dedeaꞌ no matetuꞌ.
Ramatuaꞌ a natetaꞌ huhukuꞌ sona naraa.
6 Lahenda ra ratiti-ranosiꞌ heni
Ramatuaꞌ a lahenda nara daa na.
Ma raisa Ramatuaꞌ a mana nesimata nara.
Huu ria na de Ramatuaꞌ a huku si, naraa no sira nonoi-tataon,
de Ana naseti si fo rinu daa ria.”
7 Basa ria, boe ma au amanene haraoeꞌ esa kalua neme mei tutunu-hohotuꞌ a mai, nataa nae,
“Tebe! Manetualain riꞌ mana kuasa nan seli.
Tebe! Manetualain riꞌ kahereꞌ nan seli.
Ramatuaꞌ a naetuꞌ dedeaꞌ no matetuꞌ.
Ramatuaꞌ a natetaꞌ huhukuꞌ naraa laꞌe eno na.”
8 Basa boe ma eilaꞌo-limalope kahaa a poꞌa bokor na isi na leo ledo a neu. Kekeneu te, ledo a nahaa na seli, losaꞌ putu lahenda dae-bafoꞌ ara. 9 Basa lahenda dae-bafoꞌ fo putu si a, ara kutuk Manetualain nade Na, nana huu Ana nadenu fo haitua fee si soe ria. Leo mae leoꞌ na, tehuu ta hapu lahenda esa saledale-tuꞌetei na, fo natafali leo Ramatuaꞌ a neu, ela io-oa neuꞌ Ana.
10 Basa de, eilaꞌo-limalope kalima a poꞌa ria bokor na isin leo banda maꞌaaꞌ ria kadera pareta na neu. Kekeneu te, maꞌiu inaꞌ a napoti na basa lahenda fo soko neuꞌ ana, losaꞌ ara rakemuꞌ nisi nara, ela bisa ranenete doidoso a.✡Kalua reme Masir 10:21 11 Sira boe kutuk neuꞌ Manetualain nai nusatetu-ikutemaꞌ a, nana huu hina nara, ranoso ran seli. Leo mae leoꞌ na, tehuu ta hapu esa hahae tatao tadaluꞌ a boeꞌ, fo natafali neu tuka Ramatuaꞌ a.
12 Basa de, eilaꞌo-limalope kanee a poꞌa ria bokor na isi na leo lee bauinaꞌ Efrat neu. Boe ma lee ria meti tutiꞌ oe na. Basa de ara tao enoꞌ nesiꞌ na, fee maneꞌ ara ma soldadu, fo reme dulu mai a.✡Yesaya 11:15 13 Boe ma, au ita nitu makaresiꞌ telu. Rupa nara sama leoꞌ kedeama. Esa kalua neme meke naga ria bafa na mai. Esa kalua neme banda maꞌaaꞌ ria bafa na mai. Ma esa bali kalua neme meke naga ria mana nesimata mapuputaꞌ na bafa na mai. 14 Nitu sira telu, ranuu kuasa fo tao tanda heran rupaꞌ ara. Ara mai raneta roo basa maneꞌ nai dae-bafoꞌ a fo rala-haraꞌ, ela faiꞌ esa sona, reu ratati soaꞌ Manetualain mana kuasa bauinaꞌ. Tehuu raheluꞌ raa ledo-fai a, naraa no Manetualain ledo-fain fo riꞌ Ana naeꞌtu memaꞌ neme uluꞌ mai, ela naseki katemaꞌ Ria musunoo nara.
15-16 Mamanaꞌ nabuaꞌ fo riꞌ neuꞌ ko rabua ela ratatiao a, dedea Ibrani na nae, Armagedon.
Yesus Kristus boe dedea nae, “Mafarereneꞌ matalolole! Kekeneu te, Au mai sama leoꞌ naꞌo, de lahenda ta bubuluꞌ fa. Ua-nale bauinaꞌ neuꞌ lahenda fo ranea ma kao-pake bua-loas. Maneniko Au mai, ana ta maeꞌ fa, nana huu lahenda ta rita ni poꞌiraoꞌ.”✡Mateos 24:43-44; Lukas 12:39-40; Daebafo Rupa-lole Bebeuꞌ a 3:3; 2 Maneꞌ ara 23:29; Sakaria 12:11
17 Basa de eilaꞌo-limalope kahitu a poꞌa ria bokor na isi na leo ani a neu. Boe ma Manetualain dedea namberaina neme kadera mana paretan fo nai Uma Mamasoꞌ a nae, “Basa so! Au nasa-bolii Ki poꞌa heni katemaꞌ asa so!”
18 Boe ma narela-natata natututiꞌ lii na bau na seli. Dae a natakeko nan seli, fo bei ta parnaa dadi nai dae-bafoꞌ a boe.✡Daebafo Rupa-lole Bebeuꞌ a 8:5; 11:13, 19 19 Tepoꞌ ria Manetualain ta nafarene heni kota Babel a tadalu na. Ana pake dae a natakeko kaheren ria, losaꞌ kota kahereꞌ ria hea batin neuꞌ telu. Ana tao leo naꞌ, ela lahenda Babel ara rameda rita Ria nasa-boliin. Kota fekeꞌ fo rai dae-bafoꞌ a hea heni si boe.✡Yesaya 51:17 20 Tepoꞌ ria pulu ra tenaꞌ heni asa, ma mopo basa leteꞌ ara boe.✡Daebafo Rupa-lole Bebeuꞌ a 6:14 21 Hapu uda es batu kabaꞌuina ara tuda reme lalai mai, de rapanuꞌi ra lahenda dae-bafoꞌ a. Es batu sira, ruma bebera nara losa kilo haa hulu.*Susura Makamoiꞌ dedea Yunani a mana duiꞌ nae, “bebera na sama noo talenta esa”. Talenta esa sona bebera na, riꞌ kilo telu hulu haa losa haa hulu (34-40kg). Huu no uda es ria tao na lahenda dae-bafoꞌ a doidoso, de ara kutuk Manetualain.✡Kalua reme Masir 9:23; Daebafo Rupa-lole Bebeuꞌ a 11:19
✡16:2 Kalua reme Masir 9:10
✡16:4 Kalua reme Masir 7:17-21; Sosoda Iꞌio-oꞌoaꞌ ara 78:44
✡16:10 Kalua reme Masir 10:21
✡16:12 Yesaya 11:15
✡16:15-16 Mateos 24:43-44; Lukas 12:39-40; Daebafo Rupa-lole Bebeuꞌ a 3:3; 2 Maneꞌ ara 23:29; Sakaria 12:11
✡16:18 Daebafo Rupa-lole Bebeuꞌ a 8:5; 11:13, 19
✡16:19 Yesaya 51:17
✡16:20 Daebafo Rupa-lole Bebeuꞌ a 6:14
*16:21 Susura Makamoiꞌ dedea Yunani a mana duiꞌ nae, “bebera na sama noo talenta esa”. Talenta esa sona bebera na, riꞌ kilo telu hulu haa losa haa hulu (34-40kg).
✡16:21 Kalua reme Masir 9:23; Daebafo Rupa-lole Bebeuꞌ a 11:19