15
Eilaꞌo-limalope hitu reni soe bauinaꞌ hitu leo dae-bafoꞌ a neu
1 Boe ma au ita hata kahereꞌ esa nai lalai, losa au heran an seli. Eilaꞌo-limalope hitu reme nusatetu-ikutemaꞌ a mai, esaꞌ ko homuꞌ kuasan fo fee soe bauinaꞌ neuꞌ dae-bafoꞌ a. Soe ia ra hitu, nana soe mateꞌe oeꞌ. Maneniko basa sira dadi, sona sosoa na nae, Manetualain dale Na masufun, de Ana ta namanasa no lahenda dae-bafoꞌ a soꞌ.
2 Boe ma au ita tasiꞌ a pila sama leoꞌ tiroao a nanaepoꞌ no aipilaꞌ. Au ita lahenda dodouꞌ rapadeiꞌ rai tasiꞌ ria suu na boe. Sira nana, lahenda fo ta tuka banda maꞌaaꞌ ria, ta soko neuꞌ patung na, ma ta sipoꞌ ria ee-dededen. Basa si homu hata maliiꞌ sama leoꞌ sasandu, fo ara sipo neme Manetualain mai. 3 Ara soda sosodaꞌ neme baꞌi Musa fo riꞌ Manetualain lahenda nadedenu faiꞌ ulu na. Lahenda sira soda sosodaꞌ esa boe, fo io-oa Yesus. Fai a ulu na lahenda raisa Ni, sama leoꞌ lahenda hala bibi-lopo anaꞌ nai Manetualain Uma Mamaso Na, fo tao masufu Ria dale Na. Ara soda rae,*Musa duiꞌ na sosodaꞌ ria, tepoꞌ fo Ramatuaꞌ a napipipi-nalalaꞌo noo lahenda Israel ara kalua reme Masir mai, sira mamana doidoso na.
“Ami io-oa Manetualain!
Ami soꞌu madedema Ria nade Na!
Nana huu Ramatuaꞌ a kuasa Na, kahere nan seli.
Ma Ramatuaꞌ a kahere Na, talalu heran.
Ramatuaꞌ a pareta basa lahenda nusaꞌ rai dae-bafoꞌ a.
Ramatuaꞌ a dadi Maneꞌ soaneuꞌ basa leo ra rai dae-bafoꞌ a.
Ramatuaꞌ a nonoi-tataon, kahereꞌ nan seli!
Ramatuaꞌ a nonoi-tataon, malole na seli!
Ramatuaꞌ a eno-dalan, roo-tetu!✡Kalua reme Masir 15:1-18
4 Basa lahenda ra soꞌu radedema Ramatuaꞌ a nade Na,
basa lahenda ra io-oa Ramatuaꞌ a malole Na.
Nana huu noi Ramatuaꞌ a riꞌ malalao-malalafuꞌ.
Noi Ria mesaꞌ ana riꞌ ta nanuu salaꞌ fa.
Neuꞌ ko basa lahenda nusaꞌ ara mai doꞌo-tabe Ramatuaꞌ a.
Neuꞌ ko basa leo ra mai hule makasi neuꞌ Ramatuaꞌ a.
Nana huu basa lahenda ra rita Ramatuaꞌ a nonoi-tatao malole Na.
Ma basa lahenda ra bubuluꞌ Ramatuaꞌ a dale Na roo-tetuꞌ.”✡Yeremia 10:7; Sosoda Iꞌio-oꞌoaꞌ ara 86:9
5 Lahenda sira soda basa, boe ma au ita Ramatuaꞌ a Uma Mamaso Ina Na nai nusatetu-ikutemaꞌ a. Au ita nai Kama Malalao-malalafuꞌ a, tema manapepele na manasoi napepelaꞌ.✡Kalua reme Masir 38:21 6 Boe ma au ita eilaꞌo-limalope kahituꞌ fo riꞌ reni soe kahituꞌ sira a. Ara kalua reme Ramatuaꞌ a Uma Mamason ria mai. Ara pake papake fula makadilaꞌ, makamoiꞌ ma rasaa lafa anaꞌ lilopilas teaꞌ. 7 Boe ma au ita banda kahereꞌ sira haa, fo riꞌ rai Ramatuaꞌ a kadera manaparetan boboa na a, esa bati bokor lilopilas hitu fee eilaꞌo-limalope sira hitu. Bokor sira hitu esa-esaꞌ ko nana pedaꞌ huhukuꞌ neme Manetualain mai. Ria riꞌ nasoda naroo losa doo na neu. Ana sadia poꞌa nasa-bolii Na leo dae-bafoꞌ a neu. 8 Ta doo bea boeꞌ te, Uma Mamasoꞌ a henuꞌ no ai masuꞌ fo kalua neme Manetualain rela-saꞌan ma kuasa na mai. Ta hapu lahenda esa bisa masoꞌ leo naꞌ neu boeꞌ. Eilaꞌo-limalope sira hitu, muste poꞌa rabasa soe kahituꞌ ara leo dae-bafoꞌ a mai, besaꞌ ko lahenda bisa masoꞌ leo naꞌ reu.✡Kalua reme Masir 40:34; 1 Maneꞌ ara 8:10-11; 2 Israel no Yahuda Tutui na 5:13-14; Yesaya 6:4
*15:3 Musa duiꞌ na sosodaꞌ ria, tepoꞌ fo Ramatuaꞌ a napipipi-nalalaꞌo noo lahenda Israel ara kalua reme Masir mai, sira mamana doidoso na.
✡15:3 Kalua reme Masir 15:1-18
✡15:4 Yeremia 10:7; Sosoda Iꞌio-oꞌoaꞌ ara 86:9
✡15:5 Kalua reme Masir 38:21
✡15:8 Kalua reme Masir 40:34; 1 Maneꞌ ara 8:10-11; 2 Israel no Yahuda Tutui na 5:13-14; Yesaya 6:4