١ مَارَّا إِسْرَائِيل يُوسَا-د غَارْ ذَاوُوذْ غَارْ حَابْرُونْ، نَّانْ: ”خْزَارْ، نشِّينْ ذ إِغْسَانْ ذ ويْسُومْ نّشْ. ◘11:‏1 [2 صم. 5‏:‏1‏-‏10] ٢ عَاذْ ؤُمِي ثُوغَا شَاوُولْ ذ أَجدْجِيذْ خَانغْ، أَقَا ذ شكْ إِ د-إِسُّوفّْغنْ إِسْرَائِيل غَارْ ؤُمنْغِي ؤُشَا ثْجبْذذْ ث-إِ-د أَذْ د-إِذْوڒْ. عَاوذْ إِنَّا أَشْ سِيذِي، أَربِّي نّشْ: ’شكْ أَذْ ثَاروْسذْ ڒْْڭنْسْ إِنُو إِسْرَائِيل ؤُ شكْ أَذْ ثِيڒِيذْ ذ ڒْْحَاكمْ خْ إِسْرَائِيل.‘ “ ٣ خنِّي ؤُسِينْ-د مَارَّا إِمْغَارنْ ن إِسْرَائِيل غَارْ ؤُجدْجِيذْ ذِي حَابْرُونْ ؤُشَا إِڭَّا ؤُجدْجِيذْ ذَاوُوذْ إِجّْ ن ڒْْعَاهْذْ أَكِيذْسنْ ذِي حَابْرُونْ زَّاثْ إِ وُوذمْ ن سِيذِي. نِيثْنِي ذهْننْ ذَاوُوذْ ذ أَجدْجِيذْ خْ إِسْرَائِيل عْلَاحْسَابْ أَوَاڒْ ن سِيذِي س ؤُقمُّومْ ن شَامْوِيلْ. ◼11:‏3 ’س ؤُقمُّومْ‘ - س ثْعِيبْرَانِيثْ ’س ؤُفُوسْ‘.  ◘11:‏3 1 صم. 16

٤ ذَاوُوذْ إِفّغْ أَكْ-ذ مَارَّا إِسْرَائِيل غَارْ ؤُرْشَالِيمْ، أَقَا-ث ذ يابُوسْ. ذِينِّي ثُوغَا زدّْغنْ أَيْثْ ن يابُوسْ، إِمزْذَاغْ ن ثمُّورْثْ. ٥ إِمزْذَاغْ ن يابُوسْ نَّانْ إِ ذَاوُوذْ: ”شكْ وَارْ ذَا ثتِّيذْفذْ شَا.“ مَاشَا ذَاوُوذْ إِطّفْ لْبُورْجْ ن صِيهْيُونْ، أَقَا-ث ذ ثَانْذِينْثْ ن ذَاوُوذْ. ٦ مَاغَارْ ذَاوُوذْ إِنَّا: ”كُوڒْ إِجّْ ونِّي إِ غَا إِوْثنْ أَيْثْ ن يابُوسْ ذ أَمزْوَارُو، أَذْ إِذْوڒْ ذ أَزدْجِيفْ ن إِكُومَانْذَارنْ. ؤُشَا يُووَابْ، مِّيسْ ن سَارَايَا، إِڭعّذْ ذ أَمزْوَارُو، س ؤُينِّي إِذْوڒْ نتَّا ذ أَزدْجِيفْ. ٧ ثُوغَا ذَاوُوذْ إِزدّغْ ذِي لْقلْعَا. خْ ؤُيَا قَّارنْ أَسْ إِ لْقلْعَا ثَانْذِينْثْ ن ذَاوُوذْ. ٨ نتَّا إِبْنَا ثَانْذِينْثْ إِ ذ أَسْ د-إِنّْضنْ، زِي لْقلْعَا ؤُ سّنِّي إِقُووَّارْ أَسْ-د. إِعْذڒْ يُوعَابْ مِينْ إِقِّيمنْ ن ثنْذِينْثْ. ٩ إِذْوڒْ ذَاوُوذْ يَارنِّي ذِي ڒمْغَارثْ، مَاغَارْ سِيذِي ن ڒْْعسْكَارَاثْ ثُوغَا-ث أَكِيذسْ.

١٠ إِنَا ذ إِزدْجِيفنْ ن أَيْثْ ن بُو-ثغْرُوضْثْ ن ذَاوُوذْ إِنِّي إِسّْجّهْذنْ أَكِيذسْ ثَاڭلْذَا نّسْ ذِي مَارَّا إِسْرَائِيل، حِيمَا أَذْ ث ڭّنْ ذ أَجدْجِيذْ خْ إِسْرَائِيل عْلَاحْسَابْ أَوَاڒْ ن سِيذِي. ◘11:‏10 [2 صم. 23‏:‏8‏-‏39] ١١ ثَا ذ لِيسْثَا ن لْعَاذَاذْ ن أَيْثْ ن بُو-ثغْرُوضْثْ ن ذَاوُوذْ: يَاشُوبْعَامْ، مِّيسْ ن هَاكْمُونِي، أَزدْجِيفْ ن ثْڒَاثِينْ. نتَّا إِحنّضْ س لَانْسَا نّسْ خْ ثڒْثْ-مْيَا ن يرْيَازنْ نِّي إِسّْنُوقّبْ ذڭْ إِجّْ ن ؤُمُورْ. ١٢ أَوَارْنِي أَسْ يُوسَا-د أَلِيعَازَارْ، مِّيسْ ن ذُوذُو، أَخُوخِي. نتَّا ثُوغَا ذ إِجّْ زِي ثْڒَاثَا ن أَيْثْ ن بُو-ثغْرُوضْثْ. ١٣ نتَّا ثُوغَا-ث أَكْ-ذ ذَاوُوذْ ذِي فَاسْ-ذَامِّيمْ. إِفِيلِيسْطِينِييّنْ نّْيَارْونْ ذِينْ إِ ؤُمنْغِي. إِجّْ ن وزْينْ ن ييَّارْ ثُوغَا إِشُّورْ س إِمنْذِي ؤُمِي يَارْوڒْ ڒْْڭنْسْ زڭْ إِفِيلِيسْطِينِييّنْ. ١٤ نِيثْنِي بدّنْ ذِي ڒْوسْثْ ن وزْينْ ن ييَّارْ نِّي، فكّنْ ث، ؤُشَاغڒْبنْ خْ إِفِيلِيسْطِينِييّنْ. أَمُّو إِ يَارَّا سِيذِي ذ أَسنْجمْ ذ أَمقّْرَانْ.

١٥ ثْڒَاثَا زِي ثْڒَاثِينْ ن إِزدْجِيفنْ هْوَانْ أَڒْ ثَاصْضَارْثْ، ؤُسِينْ-د غَارْ ذَاوُوذْ ذڭْ إِفْرِي ن أَبْذُولَّامْ. ڒْْعسْكَارْ ن إِفِيلِيسْطِينِييّنْ ثُوغَا إِوْثَا إِقِيضَانْ نّسْ ذِي ثغْزُورْثْ ن إِرَافَاوِييّنْ. ١٦ ذَاوُوذْ ثُوغَا-ث ذِي لْقلْعَا ؤُ ثُوغَا ذِينْ إِجّْ ن ڒْْعسْكَارْ ن ؤُحوّسْ ن إِفِيلِيسْطِينِييّنْ ذِي بَايْثْ-لَاحْمْ. ١٧ ذَاوُوذْ إِڒْقفْ إِ-ث ؤُفَاذِي، إِنَّا: ”وِي إِ ذ أَيِي د غَا يَاوْينْ أَمَانْ زِي ثَاڒَا ن بَايْثْ-لَاحْمْ نِّي إِدْجَانْ غَارْ ثوَّارْثْ ن ثنْذِينْثْ؟“ ١٨ خنِّي شُوقنْ ثْڒَاثَا نِّي ڒْْمَارْڭحْ ن ڒْْعسْكَارْ ن إِفِيلِيسْطِينِييّنْ، ؤُيْمنْ-د أَمَانْ زِي ثَاڒَا ن بَايْثْ-لَاحْمْ، ثنِّي إِدْجَانْ غَارْ ثوَّارْثْ ن ثنْذِينْثْ. كْسِينْ ثنْ أَكِيذْسنْ ؤُشَا إِوْضنْ غَارْ ذَاوُوذْ. نتَّا يُوڭِي أَذْ ثنْ إِسُو، مَاشَا إِزدْجعْ إِ-ثنْ زَّاثْ إِ سِيذِي. ١٩ نتَّا إِنَّا: ”أَيَا إِڭّْوجْ خَافِي، أَ أَربِّي إِنُو، أَقَا نشّْ أَذْ ڭّغْ مَانْ أَيَا. مَا أَذْ سْوغْ إِذَامّنْ ن يرْيَازنْ س ڒعْمَارْ نْسنْ ذَايْسنْ، مَاغَارْ نِيثْنِي سبّْڒنْ ثُوذَارْثْ نْسنْ سِيمَانْثْ نْسنْ؟“ ؤُ نتَّا وَارْ إِخْسْ أَذْ ثنْ إِسُو. ذ مَانْ أَيَا إِ ڭِّينْ ثْڒَاثَا ن أَيْثْ ن بُو-ثغْرُوضْثْ نِّي. ٢٠ أَبِيشَايْ، مِّيسْ ن يُووَابْ، ثُوغَا ذ أَزدْجِيفْ ن ثْڒَاثَا نِّي. نتَّا إِحنّضْ لَانْسَا نّسْ خْ ثڒْثْ-مْيَا ن يرْيَازنْ، إِسّْنُوقّبْ إِ-ثنْ. نتَّا غَارسْ إِجّْ ن يِيسمْ إِتّْوَاشنّْعنْ جَارْ ثْڒَاثَا نِّي. ٢١ جَارْ ثْڒَاثَا-يَا ثُوغَا أَبِيشَايْ ذ ونِّي إِتّْوَاشنّْعنْ ثْنَاينْ ن إِمُورنْ، ؤُ نتَّا ثُوغَا ذ ڒْْقبْطَانْ إِ نِيثْنِي. مَاشَا نتَّا وَارْ يِيوِيضْ ؤُڒَا أَمْ ثْڒَاثَا إِمزْوُورَا.

٢٢ خنِّي بَانَايَا، مِّيسْ ن يَاهُويَاذَاعْ، مِّيسْ ن إِجّْ ن ورْيَازْ إِمحْضنْ، ثِيمڭَّا نّسْ مْغَارنْثْ. نتَّا زِي قَابْضِييِيلْ. إِغْڒبْ خْ ثْنَاينْ ن إِيْرَاذنْ جهْذنْ زِي مُوآبَ. عَاوذْ ثُوغَا إِهْوَا إِشْثْ ن ثْوَاڒَا، إِغْڒبْ خْ إِجّْ ن ويْرَاذْ ذِي ڒْْوسْطْ ن إِجّْ ن وَانُو ذڭْ إِجّْ ن وَاسّْ ؤُمِي إِوْثَا وذْفڒْ. ٢٣ نتَّا إِغْڒبْ ؤُڒَا خْ يِيجّْ ن ورْيَازْ ذ أَمِيصْرِي، س يِيجّْ ثِيذِّي ن خمْسَا ن إِغَادْجنْ. أَمِيصْرِي ثُوغَا غَارسْ لَانْسَا ذڭْ ؤُفُوسْ نّسْ ثڭَّا أَمْ يِيجّْ ن وعْمُوذْ ن ؤُكشُّوضْ ن ؤُخيّضْ. إِهْوَا غَارسْ س وعْمُوذْ، إِكّسْ أَسْ لَانْسَا زڭْ ؤُفُوسْ ن ؤُمِيصْرِي ؤُشَا إِنْغَا إِ-ث س لَانْسَا نّسْ. ٢٤ ذ مَانْ أَيَا إِ إِڭَّا بَانَايَا، مِّيسْ ن يَاهُويَاذَاعْ. س ؤُيَا غَارسْ إِدْجَا إِسمْ إِشْنعْ جَارْ ثْڒَاثَا ن أَيْثْ ن بُو-ثغْرُوضْثْ. ٢٥ نتَّا ثُوغَا ذ ونِّي إِتّْوَاشنّْعنْ أَطَّاسْ زِي ثْڒَاثِينْ، مَاشَا وَارْ يِيوضْ أَڒْ ثْڒَاثَا إِمزْوُورَا. ذَاوُوذْ إِڭَّا إِ-ث جَارْ إِمْثِيقَّانْ نّسْ.

٢٦ أَيْثْ بُو-ثغْرُوضْثْ إِمحْضنْ إِ إِقِّيمنْ ثُوغَا أَثنْ:

عَسَائِيلْ، ؤُمَاسْ ن يُووَابْ،

إِلْحَانَانْ، مِّيسْ ن ذُوذُو، زِي بَايْثْ-لَاحْمْ،

٢٧ شَامُّوثْ، أَهَارُوذِي،

حَالِيصْ، أَلْفَالُونِي،

٢٨ عِيرَا، مِّيسْ ن عِيقِّيشْ، أَثِيقُّوعِي،

أَبِيعَازَارْ، أَعَانَاثُوثِي،

٢٩ سِيبِّيكَايْ، أَحُوشَاثِي،

عِيلَايْ، أَخُوخِي،

٣٠ مَاهَارَايْ، أَنَاطُوفَاثِي،

خَالِيذْ، مِّيسْ ن بَاعْنَا، أَنَاطُوفَاثِي،

٣١ إِتَّايْ، مِّيسْ ن رِيبَايْ، زِي جِيبْعَا زڭْ وَارَّاونْ ن بِينْيَامِينْ،

بَانَايَا، زِي فِيرْعَاثُونْ،

٣٢ هُورَايْ زِي ثغْزَارِينْ ن جَاعَاشْ،

أَبِييِيلْ، أَعَارَابَاثِي،

٣٣ عَازْمَاوثْ، أَبَاحْرُومِي،

إِلْيَاحْبَا، أَشَاعَالْبُونِي،

٣٤ أَرَّاونْ ن هَاشِيمْ، أَجَازُونِي،

يُونَاثَانْ، مِّيسْ ن شَاجَايْ، أَهَارَارِي،

٣٥ أَخِييَامْ، مِّيسْ ن سَاكَارْ، أَهَارَارِي،

إِلِيفَالْ، مِّيسْ ن ؤُرْ،

٣٦ حَافِيرْ، أَمَاكِيرَاثِي،

أَخِييَا، أَفَالُونِي،

٣٧ حَاصْرُو، أَكَارْمَالِي،

نَاعْرَايْ، مِّيسْ ن إِزْبَايْ،

٣٨ يُووِيلْ، ؤُمَاسْ ن نَاثَانْ،

مِيبْحَارْ، مِّيسْ ن هَاجْرِي،

٣٩ صَالِيقْ، أَعَامُّونِي،

نَاحْرَايْ، أَبَائِيرُوثِي، أَحمَّاڒْ ن ڒسْنَاحْ ن يُووَابْ، مِّيسْ ن صَارُويَا،

٤٠ عِيرَا، أَيِيثْرِي،

جَارِيبْ، أَيِيثْرِي،

٤١ ؤُرِييَا، أَحِيتِّي،

زَابَاذْ، مِّيسْ ن أَحْلَايْ،

٤٢ أَذِينَا، مِّيسْ ن شِيزَا، زِي ثقْبِيتْشْ ن رُوبِينْ، ونِّي ذ أَزدْجِيفْ ن أَيْثْ ن رُوبِينْ، ؤُ سنّجْ نّسْ عَاذْ ثْڒَاثِينْ ن يرْيَازنْ،

٤٣ حَانَانْ، مِّيسْ ن مَاعْكَا،

ذ يُوشَافَاطْ، أَمَاثْنِي،

٤٤ عُوزِّييَا أَعَاشْثَارُوثِي،

شَامَاعْ ذ يَاعِييِيلْ، أَرَّاونْ ن حُوثَامْ، أَعَارُوعِيرِي،

٤٥ يَاذِيعِيلْ، مِّيسْ ن شِيمْرِي،

يُوحَا، ؤُمَاسْ، أَثِيصِي،

٤٦ إِلِييِيلْ أَمَاحْوِيمْ،

يَارِيبَايْ ذ يُوشُووْيَا، أَرَّاونْ ن إِلْنَاعَامْ،

ذ يِيثْمَا أَمُو‘أَبِي،

٤٧ إِلِييِيلْ، عُوبِيذْ ذ يَاعْسِييِيلْ زِي مَاصُوبَايَا.