١ إِنَا إِ د-يُوسِينْ غَارْ ذَاوُوذْ غَارْ صِيقْلَاغْ، ؤُمِي ثُوغَا إِتّْخصَّا عَاذْ أَذْ إِقِّيمْ ذَاوُوذْ إِتّڭّْوجْ خْ وُوذمْ ن شَاوُولْ، مِّيسْ ن قِيشْ. نِيثْنِي ثُوغَا تّقّنْ إِ أَيْثْ ن بُو-ثغْرُوضْثْ إِنِّي إِوْشِينْ أَفُوسْ إِ ذَاوُوذْ ذڭْ ؤُمنْغِي. ٢ نِيثْنِي ثُوغَا حزْمنْ س ڒقْوَاسْ ؤُ زمَّارنْ أَذْ حجَّارنْ س يژْرَا ؤُ أَذْ وْثنْ فْڒِيثْشَاثْ س ڒْْقوْسْ س ؤُفُوسْ أَفُوسِي ؤُ س ؤُفُوسْ أَزڒْمَاضْ. نِيثْنِي ثُوغَا أَثنْ زڭْ أَيْثْمَاسْ ن شَاوُولْ، زِي بِينْيَامِينْ.

٣ أَخِيعَازَارْ ثُوغَا ذ أَزدْجِيفْ نْسنْ، خنِّي يُووَاشْ، نِيثْنِي س ثْنَاينْ إِذْسنْ ذ أَرَّاونْ ن شَامَاعَا، زِي جِيبْعَا،

خنِّي يَازُو‘إِلْ ذ فَالَاطْ، نِيثْنِي س ثْنَاينْ إِذْسنْ ذ أَرَّاونْ ن عَازْمَاوثْ،

ؤُ بَارَاخْيَا ذ يَاهُو، زِي عَانَاثُوثْ،

٤ ؤُ يَاشْمَاعْيَا، زِي جِيبْعُونْ، ونِّي ثُوغَا ذ إِجّْ ن بُو-ثغْرُوضْثْ جَارْ ثْڒَاثِينْ ؤُ ثُوغَا خْ ثْڒَاثِينْ،

٥ ؤُڒَا ذ إِرْمِييَا، يَاحْزِييِيلْ، يُوحَانَانْ ذ يُوزَابَاذْ، أَجَاذِيرِي،

٦ إِلْعُوزَايْ، يَارِيمُوثْ، بَاعْلِييَا، شَامَارْيَا، شَافَاطْيَا، أَحَارُوفِي،

٧ إِلْقَانَا، يَاشِّي-يَاهْ، عَازْرِييِيلْ، يُوعَازَارْ ذ يَاشُوبْعَامْ، نِيثْنِي ذ إِقُورَاحِييّنْ،

٨ ؤُ غَارْ ؤُنڭَّارْ يُوعِيلَا ذ زَابَاذْيَا، نِيثْنِي س ثْنَاينْ إِذْسنْ ذ أَرَّاونْ ن يَارُوحَامْ زِي جَاذُورْ.

٩ زڭْ أَيْثْ ن جَاذْ أَقَا ذِينْ إِنِّي إِمّْسبْضَانْ إِخفْ نْسنْ حِيمَا أَذْ ژْوَانْ غَارْ ذَاوُوذْ، ذِي لْقلْعَا ذِي ڒخْڒَا. أَيْثْ ن بُو-ثغْرُوضْثْ إِمحْضنْ، إِعسْكَارِييّنْ وجْذنْ إِ ؤُمنْغِي، تّْوَاحزْمنْ س ثْسدَّارِييِينْ ن ؤُعسْكَارِي ثِيمقّْرَانِينْ ؤُ س إِحْرِيشنْ. ؤُذْمَاونْ نْسنْ أَمْ وُوذْمَاونْ ن ويْرَاذنْ ؤُ نِيثْنِي ؤُيُورنْ س ثَازْڒَا أَمشْنَاوْ إِغَايْضنْ ن وزْغَارْ خْ إِذُورَارْ.

١٠ عَازَارْ ثُوغَا-ث ذ أَزدْجِيفْ،

عُوبَاذْيَا ذ وِيسّْ ثْنَاينْ، إِلِييَابْ ذ وِيسّْ ثْڒَاثَا،

١١ مِيشْمَانَّا ذ وِيسّْ أَربْعَا، إِرْمِييَا ذ وِيسّْ خمْسَا،

١٢ عَاتَّايْ ذ وِيسّْ ستَّا، إِلِييِيلْ ذ وِيسّْ سبْعَا،

١٣ يُوحَانَانْ ذ وِيسّْ ثْمنْيَا، إِلْزَابَاذْ ذ وِيسّْ ثسْعَا،

١٤ إِرْمِييَا ذ وِيسّْعشْرَا، مَاخْبَانَايْ ذ وِيسّْ حِيطَاشْ.

١٥ إِنَا ثُوغَا أَثنْ زڭْ وَارَّاونْ ن جَاذْ، إِمقّْرَاننْ ن ڒْْعسْكَارْ. أَمژْيَانْ حسْبنْ ث أَمْ مْيَا ن يرْيَازنْ ؤُ أَمقّْرَانْ أَمْ أَڒفْ. ١٦ إِنَا ذ إِنِّي إِژْوَانْ لْ-ؤُرْذُونْ ذڭْ ؤُيُورْ أَمزْوَارُو، ؤُمِي إِسْفِي لْ-ؤُرْذُونْ بَارَّا مَارَّا ثِيمُووَّا نّسْ ؤُ نِيثْنِي ؤُژّْڒنْ خْ مَارَّا إِمزْذَاغْ ن ڒوْضَاثْ ن ثغْزُورْثْ إِ إِدْجَانْ غَارْ شَّارْقْ ذ ڒْْغَارْبْ.

١٧ ؤُڒَا زڭْ وَارَّاونْ ن بِينْيَامِينْ ؤُ زڭْ وَارَّاونْ ن يَاهُوذَا ؤُسِينْ-د يرْيَازنْ غَارْ ذَاوُوذْ غَارْ لْقلْعَا ن وذْرَارْ. ١٨ ذَاوُوذْ إِفّغْ-د غَارْسنْ حِيمَا أَذْ ثنْ إِڒْقَا، ؤُشَا إِطّفْ ذڭْ وَاوَاڒْ، إِنَّا أَسنْ: ”مَاڒَا كنِّيوْ ثُوسِيمْ-د غَارِي حِيمَا أَذْ أَيِي ثوْشمْ أَفُوسْ، خنِّي نشّْ أَذْ إِڒِيغْ س وُوڒْ ذ إِجّْ أَكِيذْومْ، مَاشَا مَاڒَا كنِّيوْ ثُوسِيمْ-د حِيمَا أَذْ أَيِي ثْسلّْممْ إِ إِغْرِيمنْ إِنُو، وَاخَّا وَارْ ذِينْ ثدْجِي ڒخْشُونثْ غَارْ إِفَاسّنْ إِنُو، خنِّي إِڒِي أَذْ ث إِژَارْ أَربِّي ن ڒجْذُوذْ نّغْ ؤُ أَذْ كنِّيوْ إِخدْجسْ!“ ١٩ إِوْضَا-د أَرُّوحْ أَمْ وَارُّوضْ خْ عَامَاسَايْ، أَزدْجِيفْ ن ثْڒَاثِينْ، نتَّا إِنَّا: ”نشِّينْ أَكِيذكْ، ذَاوُوذْ، ؤُ نشِّينْ أَكِيذكْ، مِّيسْ ن يَاسَّا. ڒهْنَا، ڒهْنَا أَذْ كِيذكْ يِيڒِي ؤُ ڒهْنَا أَذْ يِيڒِي أَكْ-ذ يِينِّي ذ أَشْ إِوْشِينْ أَفُوسْ، مَاغَارْ أَربِّي نّشْ إِوْشَا أَشْ أَفُوسْ.“ خنِّي إِسِّيذفْ إِ-ثنْ ذَاوُوذْ ؤُ إِڭَّا إِ-ثنْ ذ إِزدْجِيفنْ خْ ثرْبِيعْثْ ن ڒْْعسْكَارْ.

٢٠ ؤُڒَا زِي مَانَاسَّا ثُوغَا ذِينْ إِنِّي إِعْذُونْ غَارْ ذَاوُوذْ، ؤُمِي د-إِفّغْ أَكْ-ذ إِفِيلِيسْطِينِييّنْ غَارْ ؤُمنْغِي أَكْ-ذ شَاوُولْ. إِفِيلِيسْطِينِييّنْ مَاشَا وَارْ ذ أَسنْ جِّينْ أَذْ وْشنْ أَفُوسْ، مِينْزِي ڒْْبَاشَاثْ ن ثْندَّامْ ن إِفِيلِيسْطِينِييّنْ سّكّنْ ث، نَّانْ: ”زعْمَا نتَّا إِزمَّارْ أَذْ إِعْذُو س إِزدْجِيفنْ نّغْ ذڭْ ؤُفُوسْ نّسْ غَارْ شَاوُولْ، سِيذسْ.“ ٢١ ؤُمِي د-إِعْقبْ غَارْ صِيقْلَاغْ، عْذُونْ إِنَا غَارسْ زڭْ أَيْثْ ن مَانَاسَّا: عَاذْنَاحْ، يُوزَابَاذْ، يَاذِيعِيلْ، مِيخَايِيلْ، يُوزَابَاذْ، إِلِيهُو ذ صِيلّْثَايْ، ڒْْقبْطَانَاثْ خْ ڒُْورُوفْ ن مَانَاسَّا. ٢٢ نِيثْنِي وْشِينْ أَفُوسْ إِ ذَاوُوذْ حِيمَا أَذْ إِڭوّذْ ثِيرْبِيعِينْ ن ڒْْعسْكَارْ، مَاغَارْ نِيثْنِي مَارَّا ثُوغَا أَثنْ ذ أَيْثْ ن بُو-ثغْرُوضْثْ إِمحْضنْ ؤُ نِيثْنِي ثُوغَا أَثنْ ذ إِكُومَانْذَارنْ ن ڒْْعسْكَارْ. ٢٣ مَاغَارْ ذِي ڒْوقْثْ نِّي ؤُسِينْ-د يرْيَازنْ غَارْ ذَاوُوذْ زڭْ وَاسّْ أَڒْ أَسّْ حِيمَا أَذْ أَسْ وْشنْ أَفُوسْ، أَڒَامِي ذوْڒنْ ذ ڒْْعسْكَارْ ذ أَمقّْرَانْ، أَمْ ڒْْعسْكَارْ ن أَربِّي.

٢٤ وَا ذ ڒْْقدّْ ن إِزدْجِيفنْ نِّي إِتّْوَاحسْبنْ ن يِينِّي إِ ثُوغَا إِسّْوجْذنْ إِ ؤُمنْغِي، إِنِّي د-يُوسِينْ غَارْ ذَاوُوذْ ذِي حَابْرُونْ مَاحنْذْ أَذْ غَارسْ سّعْذُونْ ثَاڭلْذَا ن شَاوُولْ، أَمْ مَامّشْ ث يُومُورْ سِيذِي:

٢٥ زڭْ وَارَّاونْ ن يَاهُوذَا ثُوغَا ڒْْقدّْ ن يِينِّي يَارْبُونْ ثِيسدَّارِييِينْ ن ؤُعسْكَارِي ثِيمقّْرَانِينْ ذ إِحْرِيشنْ ستَّا-أَڒَافْ ؤُ-ثمْنْ-مْيَا ن يرْيَازنْ. نِيثْنِي ثُوغَا وجْذنْ إِ ؤُمنْغِي.

٢٦ زڭْ وَارَّاونْ ن شِيمْعُونْ ثُوغَا ڒْْقدّْ ن أَيْثْ ن بُو-ثغْرُوضْثْ إِمحْضنْ إِ ڒْْعسْكَارْ سبْعَا-أَڒَافْ ؤُ-مْيَا ن يرْيَازنْ.

٢٧ زڭْ وَارَّاونْ ن لَاوِي أَربْعَا-أَڒَافْ ؤُ-ستَّا-مْيَا ن يرْيَازنْ.

٢٨ يَاهُويَاذَاعْ ثُوغَا ذ ڒْْحَاكمْ إِ وَارَّاونْ ن هَارُونْ. نتَّا يِيوِي أَكِيذسْ ثڒْثْ-أَڒَافْ ؤُ-سبْعَا-مْيَا ن يرْيَازنْ.

٢٩ صَاذُوقْ ثُوغَا ذ أَحُوذْرِي، بُو-ثغْرُوضْثْ إِمحْضنْ. زِي ثَادَّارْثْ ن بَابَاسْ ثُوغَا ذِينْ ثْنَاينْ ؤُ-عِيشْرِينْ ن ڒْْقبْطَانَاثْ.

٣٠ زڭْ وَارَّاونْ ن بِينْيَامِينْ، أَيْثْمَاسْ ن شَاوُولْ، ثُوغَا ذِينْ ثڒْثْ-أَڒَافْ ن يرْيَازنْ، مِينْزِي أَزْينْ أَمقّْرَانْ زَّايْسنْ ثُوغَا حطَّانْ ثَادَّارْثْ ن شَاوُولْ.

٣١ زڭْ وَارَّاونْ ن إِفْرَايِيمْ ثُوغَا ذِينْ عِيشْرِينْ-أَڒفْ ؤُ-ثْمنْيَا-مْيَا ن يرْيَازنْ، أَيْثْ ن بُو-ثغْرُوضْثْ إِمحْضنْ، إِرْيَازنْ س يِيسمْ ذِي ثَادَّارْثْ ن إِبَابَاثنْ نْسنْ.

٣٢ زڭْ وزْينْ ن ثقْبِيتْشْ ن مَانَاسَّا ثُوغَا ذِينْ ثْمنْطَاشْ-أَڒفْ ن يرْيَازنْ، إِنِّي ثُوغَا تّْوَاڒَاغَانْ س يِيسْمَاونْ نْسنْ مَاحنْذْ أَذْ د-أَسنْ أَذْ ڭّنْ ذَاوُوذْ ذ أَجدْجِيذْ.

٣٣ زڭْ وَارَّاونْ ن إِسَّاكَارْ، إِنِّي غَارْسنْ ڒفَاهْمثْ ن ڒْْمِيجَاڒَاثْ ن ڒْْوقْثْ حِيمَا أَذْ سّْننْ مِينْ ثُوغَا خْ إِسْرَائِيل أَذْ إِڭّْ، ثُوغَا ڒْْقبْطَانَاثْ نْسنْ مِيثَاينْ ن يرْيَازنْ، ؤُ مَارَّا أَيْثْمَاثْسنْ ثُوغَا أَثنْ سَاذُو أَفُوسْ نْسنْ. ◼12:‏33 ’سَاذُو أَفُوسْ نْسنْ‘ - س ثْعِيبْرَانِيثْ ’سَاذُو أَقمُّومْ نْسنْ‘.

٣٤ زڭْ وَارَّاونْ ن زابُولُونْ، زڭْ يِينِّي د-إِفّْغنْ أَكْ-ذ ڒْْعسْكَارْ س مَارَّا ڒسْنَاحْ نْسنْ، ثُوغَا ذِينْ خمْسِينْ-أَڒفْ ن يرْيَازنْ. نِيثْنِي ثُوغَا سّْوجْذنْ حِيمَا أَذْ ستّْفنْ إِخفْ نْسنْ ذڭْ ؤُسذِّي س وُوڒْ إِمُونْ نِيشَانْ.

٣٥ زڭْ وَارَّاونْ ن نَافْثَالِي ثُوغَا ذِينْ أَڒفْ ن ڒْْقبْطَانَاثْ. ثُوغَا-ثنْ ذِي سبْعَا ؤُ-ثْڒَاثِينْ-أَڒفْ ن يرْيَازنْ إِنِّي يَارْبُونْ ثَاسدَّارْثْ ن ؤُعسْكَارِي ثَامقّْرَانْثْ ذ لَانْسَا،

٣٦ زڭْ وَارَّاونْ ن ذَانْ ثُوغَا ذِينْ ثْمنْيَا ؤُ-عِيشْرِينْ أَڒفْ ؤُ-ستَّا-مْيَا ن يرْيَازنْ، وجْذنْ إِ ؤُمنْغِي.

٣٧ زڭْ وَارَّاونْ ن أَشِيرْ فّْغنْ-د أَربْعَا-أَڒَافْ ن يرْيَازنْ أَكْ-ذ ڒْْعسْكَارْ حِيمَا أَذْ سّْبدّنْ إِخفْ نْسنْ ذڭْ ؤُسذِّي.

٣٨ زڭْ ؤُجمَّاضْ ن لْ-ؤُرْذُونْ، زڭْ وَارَّاونْ ن رُوبِينْ ؤُ زڭْ وَارَّاونْ ن جَاذْ ؤُ زڭْ وزْينْ ن ثقْبِيتْشْ ن مَانَاسَّا ثُوغَا ذِينْ مْيَا ؤُ-عِيشْرِينْ-أَڒفْ ن يرْيَازنْ أَكْ-ذ مَارَّا ڒسْنَاحْ إِ ؤُمنْغِي.

٣٩ مَارَّا إِعسْكَارِييّنْ-أَ ؤُسِينْ-د غَارْ حَابْرُونْ، تّْوَاستّْفنْ ذڭْ إِسذِّييّنْ س وُوڒْ إِمُونْ، حِيمَا أَذْ ڭّنْ ذَاوُوذْ ذ أَجدْجِيذْ خْ مَارَّا إِسْرَائِيل. ؤُڒَا ذ مِينْ إِقِّيمنْ ن أَيْثْ ن إِسْرَائِيل ثُوغَا أَثنْ س وُوڒْ ذ إِجّْ حِيمَا أَذْ ڭّنْ ذَاوُوذْ ذ أَجدْجِيذْ. ٤٠ نِيثْنِي قِّيمنْ ثْڒَاثَا ن وُوسَّانْ ذِينِّي غَارْ ذَاوُوذْ، شِّينْ سْوِينْ، مَاغَارْ أَيْثْمَاثْسنْ ثُوغَا بدّنْ أَكِيذْسنْ. ٤١ ؤُڒَا ذ يِينِّي يُوذْسنْ أَڒْ إِسَّاكَارْ ذ زابُولُونْ ذ نَافْثَالِي ؤُسِينْ-د، إِوْينْ-د وغْرُومْ خْ إِغْيَاڒْ، خْ إِڒغْمَانْ، خْ إِسَارْضَانْ ؤُ خْ إِفُونَاسنْ، س ڒعْوتْشْ أَمْ فَارِينَا ذ إِغْرُومنْ ن ثَازَارْثْ ذ إِغْرُومنْ ن زّْبِيبْ ذ بِينُو ذ زّشْثْ ذ إِفُونَاسنْ ذ وُودْجِي س ؤُفيّضْ، مَاغَارْ ثُوغَا ذِينْ ڒفْرَاحثْ ذِي إِسْرَائِيل.