١ نِيثْنِي سِّيذْفنْ تَّابُوثْ ن أَربِّي غَارْ ذَاخڒْ ؤُشَا سَّارْسنْ ت ذِي ڒْْوسْطْ ن ؤُقِيضُونْ نِّي ثُوغَا ذ أَسْ د-إِشدّْ ذَاوُوذْ، ؤُشَا قدّْمنْ نِيثْنِي ثِيغَارْصَا ن وشْمَاضْ ذ ثِيغَارْصَا ن ڒهْنَا زَّاثْ إِ وُوذمْ ن أَربِّي. ٢ ؤُمِي إِكمّڒْ ذَاوُوذْ أَسْڭعّذْ ن ثْغَارْصْثْ ن وشْمَاضْ ذ ثْغَارْصَا ن ڒهْنَا، إِبَاركْ نتَّا ڒْْڭنْسْ ذڭْ يِيسمْ ن سِيذِي. ٣ نتَّا إِبْضَا إِ مَارَّا ذِي إِسْرَائِيل، إِ يرْيَازنْ ذ ثمْغَارِينْ، إِ كُوڒْ إِجّْ، إِجّْ ن ونْڭُورْ ن وغْرُومْ، إِجّْ ن ؤُشدْجِيقْ ن ويْسُومْ ن ؤُفُونَاسْ ذ إِجّْ ن وَارقِّيعْ ن زّْبِيبْ. ٤ نتَّا إِڭَّا شَا ن إِلَاوِييّنْ ذ إِمْسخَّارنْ إِ تَّابُوثْ ن سِيذِي، حِيمَا أَذْ سّْعقْڒنْ ؤُ أَذْ قَاذَانْ ؤُ أَذْ سّمْغَارنْ سِيذِي، أَربِّي ن إِسْرَائِيل. ٥ أَسَافْ ثُوغَا-ث ذ أَزدْجِيفْ ذ زَاكَارِييَّا ثُوغَا-ث ذ وِيسّْ ثْنَاينْ أَوَارْنِي أَسْ ؤُ خنِّي يَاعِييِيلْ، شَامِيرَامُوثْ، يَاحِييِيلْ، مَاتِّيثْيَا، إِلِييَابْ، بَانَايَا، عُوبِيذْ-إِذُومْ ذ يَاعِييِيلْ أَكْ-دُّوزَانَاثْ أَمْ لهَارْپَاثْ ذ ڒْْڭَامْبْرِييَاثْ، ؤُشَا أَسَافْ إِڭَّا أَذْ أَسْ سْڒنْ س ثدْجُونِينْ ن وُوزَّاڒْ. ٦ إِكهَّاننْ بَانَايَا ذ يَاحْزِييِيلْ ؤُيُورنْ س ڒبْوَاقْ زَّاثْ إِ تَّابُوثْ ن ڒْْعَاهْذْ ن أَربِّي.

٧ ذڭْ وَاسّْ نِّي إِڭَّا ذَاوُوذْ إِ ثْوَاڒَا ثَامزْوَارُوثْ خْ أَسَافْ ذ أَيْثْمَاسْ مَاحنْذْ أَذْ سّمْغَارنْ سِيذِي.

٨ ”قَاذَامْ سِيذِي، ڒَْاغَامْ خْ يِيسمْ نّسْ،

بَارّْحمْ س ثْمڭَّا نّسْ جَارْ ڒڭْنُوسْ.◘16:‏8 [إِزهد. 105‏:‏1‏-‏15؛ 96‏:‏1‏-‏13؛ 106‏:‏1، 47‏-‏48]

٩ غنّْجمْ أَسْ، زهّْذمْ إِ نتَّا،

سِيوْڒمْ خْ مَارَّا لْمُوعْجِيزَاثْ نّسْ.

١٠ شنّْعمْ س يِيسمْ نّسْ أَمْقدّسْ،

حِيمَا ؤُڒْ ن يِينِّي يَارزُّونْ سِيذِي،

أَذْ إِفَارْحْ.

١١ سقْسَامْ خْ سِيذِي ذ جّهْذْ نّسْ،

أَرْزُومْ ؤُذمْ نّسْ ڒبْذَا.

١٢ عقْڒمْ خْ ڒعْجَايبْ نّسْ إِ إِڭَّا،

خْ ڒعْڒَامثْ نّسْ

ؤُ خْ ڒحْكَامَاثْ ن ؤُقمُّومْ نّسْ.

١٣ زَّارِيعثْ ن إِسْرَائِيل، أَمْسخَّارْ نّسْ،

إِحنْجِيرنْ ن يَاعْقُوبْ،

إِنِّي زَّايسْ إِتّْوَافَارْزنْ!

١٤ نتَّا ذ سِيذِي، أَربِّي نّغْ.

ڒحْكَامَاثْ نّسْ إِ د-إِتَّاسنْ

خْ مَارَّا ثَامُّورْثْ.

١٥ عقْڒمْ خْ ڒْْعَاهْذْ نّسْ إِ ڒبْذَا،

أَوَاڒْ نِّي إِوصَّا إِ أَڒفْ ن جِّيڒَاثْ،

١٦ ڒْْعَاهْذْ إِ إِڭَّا أَكْ-ذ إِبْرَاهِيمْ،

إِسّمْثنْ إِ-ث س ثْجَادْجِيثْ نّسْ إِ إِسْحَاقْ.

١٧ نتَّا إِڭَّا إِ-ث ذ إِشْثْ ن ثوْصيّثْ إِ يَاعْقُوبْ،

إِ إِسْرَائِيل إِڭَّا إِ-ث ذ إِجّْ ن ڒْْعَاهْذْ إِ ڒبْذَا،

١٨ ؤُمِي إِنَّا:

’أَذْ أَشْ وْشغْ ثَامُّورْثْ ن كنْعَانْ،

ثَاسْغَارْثْ إِ ذ أَومْ د-إِكَّارنْ!‘،

١٩ ؤُمِي كنِّيوْ ثُوغَا ذ إِجّْ ن وُورُو ن يرْيَازنْ،

س ذْرُوسْثْ وَاهَا،

ذ إِبَارَّانِييّنْ ذِي ثمُّورْثْ.

٢٠ ثلْعنْ زِي ڒْڭنْسْ غَارْ ڒْْڭنْسْ نّغْنِي،

زڭْ إِشْثْ ن ثْڭلْذِيثْ غَارْ إِجّْ ن ڒْْڭنْسْ نّغْنِي.

٢١ نتَّا وَارْ إِجِّي ؤُڒَا ذ إِجّْ أَذْ ثنْ إِحْصَارْ،

ؤُ نتَّا إِعَاقبْ إِجدْجِيذنْ ذِي طّْوعْ نْسنْ.

٢٢ ’وَارْ تّْحَاذَامْ شَا إِمذْهَانْ إِنُو،

وَارْ تّڭّمْ ڒْْغَارْ ذڭْ إِنَابِييّنْ إِنُو!‘

٢٣ غنّْجمْ إِ سِيذِي، مَارَّا ثَامُّورْثْ،

بَارّْحمْ إِ ؤُسنْجمْ نّسْ أَسّْ خْ وَاسّْ.

٢٤ حَاجَامْ أَعُودْجِي نّسْ جَارْ ڒڭْنُوسْ،

ڒعْجَايبْ نّسْ جَارْ مَارَّا ڒڭْنُوسْ.

٢٥ مَاغَارْ سِيذِي ذ أَمقّْرَانْ،

إِسّْذَاحدْجْ أَسمْغَارْ أَطَّاسْ،

نتَّا ذ أَمَاڭّْوذْ مَاهُو مَارَّا إِربِّيثنْ.

٢٦ مِينْزِي مَارَّا إِربِّيثنْ ن ڒڭْنُوسْ

أَقَا أَثنْ ذ لْ-أَصْنَامْ،

مَاشَا سِيذِي إِڭَّا إِجنْوَانْ.

٢٧ ثِيسِّيقْثْ ذ ڒْْعزّْ أَقَا أَثنْ

زَّاثْ إِ وُوذمْ نّسْ،

جّهْذْ ذ ڒفْرَاحثْ ذڭْ ومْشَانْ نّسْ.

٢٨ وْشمْ إِ سِيذِي، أَ ثِيقبَّاڒْ ن ڒڭْنُوسْ،

وْشمْ إِ سِيذِي أَعُودْجِي ذ جّهْذْ.

٢٩ وْشمْ إِ سِيذِي أَعُودْجِي ن يِيسمْ نّسْ،

أَوْيمْ ثَاوْهِيبْثْ ؤُشَا أَسمْ-د

زَّاثْ إِ وُوذمْ نّسْ،

بنْذْقمْ إِ سِيذِي

ذڭْ ؤُشُووَّاضْ ن زَّاوشْثْ إِقدّْسنْ.

٣٠ أَرْجِيجمْ زَّاثْ إِ وُوذمْ نّسْ،

أَ مَارَّا ثَامُّورْثْ!

نِيشَانْ، ڒخُّو دُّونشْثْ ثْبدّْ ثمْثنْ،

وَارْ تّنْهزِّي عَاذْ.

٣١ أجّْ أَجنَّا أَذْ إِفَارْحْ

ؤُ ثَامُّورْثْ أَذْ ثْفَارْحْ،

أَذْ إِنِينْ جَارْ ڒڭْنُوسْ:

سِيذِي إِحكّمْ.

٣٢ أجّْ أَذْ إِزْهَارْ ڒبْحَارْ ذ ؤُعمَّارْ نّسْ،

أجّْ أَذْ إِسْڒِيوْڒوْ ييَّارْ س ڒفْرَاحثْ،

س مَارَّا مِينْ ذَايسْ.

٣٣ خنِّي أَذْ سْڒِيوْڒِيونْثْ

مَارَّا ثِيشجِّيرَا ن وزْغَارْ

زَّاثْ إِ وُوذمْ ن سِيذِي،

مَاغَارْ نتَّا أَذْ د-يَاسْ،

حِيمَا أَذْ إِسڭّذْ ثَامُّورْثْ. ◼16:‏33 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘.

٣٤ قَاذَامْ سِيذِي، مَاغَارْ نتَّا إِصْبحْ،

مَاغَارْ ثَامخْسِيوْثْ نّسْ إِشوَّارنْ

ثتّْغِيمَا إِ ڒبْذَا.

٣٥ إِنِيمْ: سنْجمْ أَنغْ،

أَ أَربِّي ن ؤُسنْجمْ نّغْ،

نْذهْ أَنغْ نْمُونْ، فكّْ أَنغْ زِي ڒڭْنُوسْ،

حِيمَا أَذْ نْقَاذَا إِسمْ إِقدّْسنْ نّكْ

ؤُ أَذْ شكْ نْصبّحْ س إِزْڒَانْ ن ؤُصبّحْ.

٣٦ أَذْ إِتّْوَابَاركْ سِيذِي، أَربِّي ن إِسْرَائِيل،

زِي ڒبْذَا أَڒْ ڒبْذَا!“

ؤُ مَارَّا ڒْْڭنْسْ إِنَّا: ”أَمِينْ!“ ؤُشَا إِمْذحْ سِيذِي.

٣٧ نتَّا إِڭَّا ذِينْ زَّاثْ إِ وُوذمْ ن تَّابُوثْ ن سِيذِي، إِ أَسَافْ ذ يَايْثْمَاسْ، حِيمَا أَذْ سخَّارنْ ڒبْذَا زَّاثْ إِ وُوذمْ ن تَّابُوثْ، حِيمَا أَذْ ڭّنْ كُوڒْ أَسّْ مِينْ يُورِينْ إِ وَاسّْ نِّي. ٣٨ عُوبِيذْ-إِذُومْ أَكْ-ذ أَيْثْمَاثْسنْ، ثُوغَا أَثنْ جْمِيعْ ثْمنْيَا ؤُ-ستِّينْ ن يرْيَازنْ. عُوبِيذْ-إِذُومْ، مِّيسْ ن يَاذِيثُونْ، ذ حُوسَا ثُوغَا أَثنْ ذ إِعسَّاسنْ ن ثِيوُّورَا، ٣٩ ؤُشَا أَكهَّانْ صَاذُوقْ ذ يَايْثْمَاسْ، إِكهَّاننْ، ثُوغَا تّْسخَّارنْ زَّاثْ إِ ثْزذِّيغْثْ ن سِيذِي خْ ڒْْڭعّْذثْ نِّي إِدْجَانْ غَارْ جِيبْعُونْ، ٤٠ حِيمَا أَذْ أَوْينْ ثِيغَارْصَا ن وشْمَاضْ بْڒَا أَقطُّو إِ سِيذِي خْ ؤُعَالْطَارْ ن وشْمَاضْ، غَارْ ثُوفُّوثْ ؤُ غَارْ ثْمذِّيثْ، أَمْ مَامّشْ مَارَّا مِينْ يُورَانْ ذِي شَّارِيعَا ن سِيذِي، ثنِّي إِڭَّا خْ إِسْرَائِيل. ٤١ غَارْسنْ ثُوغَا هَايْمَانْ ذ يَاذُوثُونْ أَكْ-ذ إِنّغْنِي إِنِّي إِتّْوَافَارْزنْ ؤُ إِتّْوَاڭّنْ س يِيسْمَاونْ نْسنْ، حِيمَا أَذْ قَاذَانْ سِيذِي: ’مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا!‘ ٤٢ ثُوغَا غَارْ هَايْمَانْ ذ يَاذُوثُونْ ذ ونّغْنِي ڒبْوَاقْ ذ ثَادْجُونِينْ ن وُوزَّاڒْ، مَاحنْذْ أَذْ ڭّنْ أَذْ أَسنْ سْڒنْ يوْذَانْ، ؤُڒَا ذ دُّوزَانَاثْ ن لْمُوسِيقَا إِنّغْنِي إِ ؤُسمْغَارْ ن أَربِّي. أَرَّاونْ ن يَاذُوثُونْ ثُوغَا بدّنْ غَارْ ثوَّارْثْ ن وَاذَافْ. ٤٣ خنِّي يُويُورْ مَارَّا ڒْْڭنْسْ، كُوڒْ إِجّْ غَارْ ثَادَّارْثْ نّسْ. ؤُڒَا ذ ذَاوُوذْ إِعْقبْ غَارْ ثَادَّارْثْ نّسْ حِيمَا أَذْ إِبَاركْ ثَادَّارْثْ نّسْ.