١ ؤُمِي إِزْذغْ ذَاوُوذْ ذِي ثَادَّارْثْ نّسْ، إِنَّا ذَاوُوذْ إِ ؤُنَابِي نَاثَانْ: ”خْزَارْ، نشّْ زدّْغغْ ذڭْ إِشْثْ ن ثَادَّارْثْ ن ؤُكشُّوضْ ن ثْشجَّارْثْ ن ثنْڭلْثْ، مَاشَا تَّابُوثْ ن ڒْْعَاهْذْ ن سِيذِي أَقَا-ت سَاذُو ڒْْكتَّانْ ن ؤُقِيضُونْ.“ ◘17:‏1 [2 صم. 7‏:‏1‏-‏15] ٢ نَاثَانْ يَارَّا-د خْ ذَاوُوذْ: ”أڭّْ مَارَّا مِينْ غَاركْ ذڭْ وُوڒْ نّشْ، مَاغَارْ أَربِّي أَكِيذكْ.“

٣ ذِي دْجِيڒثْ نِّي إِمْسَارْ أَقَا يُوسَا-د وَاوَاڒْ ن أَربِّي غَارْ نَاثَانْ، إِنَّا: ٤ ”ؤُيُورْ، إِنِي إِ ؤُمْسخَّارْ إِنُو ذَاوُوذْ: ’أَمُّو إِ إِقَّارْ سِيذِي: وَارْ ذ أَيِي ثْبنِّيذْ ثَادَّارْثْ إِ نشّْ، حِيمَا أَذْ ذَايسْ زذْغغْ، ٥ مَاغَارْ زڭْ وَاسّْ ؤُمِي د-سّْڭعّْذغْ إِسْرَائِيل زِي مِيصْرَا، نشّْ وَارْ زْذِيغغْ عمَّارْصْ ذڭْ إِشْثْ ن ثَادَّارْثْ. مَاشَا نشّْ ثُوغَا ڭُّورغْ زڭْ ؤُقِيضُونْ غَارْ ؤُقِيضُونْ، زِي ثْزذِّيغْثْ غَارْ ثْزذِّيغْثْ. ٦ مَانِي مَا ؤُيُورغْ أَكْ-ذ مَارَّا إِسْرَائِيل، مَا نشّْ سِّيوْڒغْ عمَّارْصْ ؤُڒَا س إِجّْ ن وَاوَاڒْ أَكْ-ذ إِجّنْ زِي ڒْْقُوضَاثْ ن إِسْرَائِيل، إِنِّي ثُوغَا ڭِّيغْ أَذْ أَروْسنْ ڒْْڭنْسْ إِنُو إِسْرَائِيل، نِّيغْ: مَايمِّي كنِّيوْ وَارْ ذ أَيِي ثْبنِّيمْ شَا ثَادَّارْثْ س ؤُكشُّوضْ ن ثْشجَّارْثْ ن ثنْڭلْثْ؟‘ ◘17:‏6 2 صم. 7‏:‏7 ٧ خنِّي ڒخُّو، أَمُّو إِ غَا ثِينِيذْ إِ ؤُمْسخَّارْ إِنُو، إِ ذَاوُوذْ: ’أَمُّو إِ إِقَّارْ سِيذِي ن ڒْْعسْكَارَاثْ إِجهْذنْ: نشّْ إِوْيغْ-د شكْ زِي ڒْْكُورِي، زِي ضفَّارْ ن وُودْجِي، مَاحنْذْ أَذْ ثْذوْڒذْ ذ ڒْْحَاكمْ خْ ڒْْڭنْسْ إِنُو إِسْرَائِيل. ٨ مَانِي مَا ثُويُورذْ، ثُوغَا أَيِي أَكِيذكْ ؤُ نشّْ ثحِّيغْ مَارَّا ڒْْعذْيَانْ زَّاثْ إِ ثِيطَّاوِينْ نّشْ ؤُ نشّْ ڭِّيغْ أَشْ إِجّْ ن يِيسمْ أَمْ يِيسمْ ن إِمقّْرَاننْ خْ ثمُّورْثْ. ٩ نشّْ نيّْشغْ إِجّْ ن ومْشَانْ إِ ڒْْڭنْسْ إِنُو ؤُشَا ژُّوغْ ث ذِينْ، مَاحنْذْ أَذْ إِزْذغْ ذڭْ ومْشَانْ نّسْ، وَارْ إِتّْوَاسّْنخْڒِيعْ عَاذْ ؤُ وَارْ ث حصَّارنْ عَاذْ أَيْثْ ن ڒْْمُوعْصِييّثْ أَمْ زِيشْ، ١٠ زڭْ وُوسَّانْ ؤُمِي نشّْ ڭِّيغْ ڒْْقُوضَاثْ خْ ڒْْڭنْسْ إِنُو إِسْرَائِيل. نشّْ سّْوَاضْعغْ مَارَّا ڒْْعذْيَانْ نّشْ ؤُ سَّارْڭْبغْ شكْ بلِّي سِيذِي أَذْ أَشْ إِبْنَا إِشْثْ ن ثَادَّارْثْ. ١١ خْ مِينِّي إِ غَا قفْڒنْ وُوسَّانْ نّشْ ؤُ أَذْ ثڭّذْ أَذْ ثَاريّْحذْ جَارْ ڒجْذُوذْ نّشْ، أَذْ إِمْسَارْ، نشّْ أَذْ سّكَّارغْ مِّيشْ أَوَارْنِي أَشْ، ونِّي إِ غَا إِفّْغنْ زڭْ وَارَّاونْ نّشْ، ؤُ نشّْ أَذْ سّْمثْنغْ ثَاڭلْذِيثْ نّسْ. ◼17:‏11 ’مِّيشْ‘ - س ثْعِيبْرَانِيثْ ’زَّارِيعثْ نّكْ‘. ١٢ نتَّا أَذْ أَيِي إِبْنَا إِشْثْ ن ثَادَّارْثْ ؤُ نشّْ أَذْ سّْبدّغْ ڒْْعَارْشْ نّسْ إِ ڒبْذَا. ١٣ نشّْ أَذْ إِڒِيغْ ذ بَابَاسْ إِ نتَّا ؤُ نتَّا أَذْ أَيِي يِيڒِي ذ مِّي ؤُ نشّْ وَارْ خَاسْ سّْحيِّيذغْ شَا ثَامخْسِيوْثْ إِنُو إِشوَّارنْ أَمْ مَامّشْ ت سْحيّْذغْ خْ ونِّي ثُوغَا ذ أَشْ إِزْوَارنْ. ١٤ نشّْ أَذْ ث سّْمثْنغْ ذِي ثَادَّارْثْ إِنُو ؤُ ذِي ثْڭلْذِيثْ إِنُو إِ ڒبْذَا ؤُ ڒْعَارْشْ نّسْ أَذْ إِبدّْ إِمْثنْ إِ ڒبْذَا.‘ “ ١٥ إِسِّيوڒْ نَاثَانْ أَكْ-ذ ذَاوُوذْ نِيشَانْ أَمْ مَامّشْ مَارَّا أَوَاڒنْ-أَ ؤُ أَمْ مَامّشْ مَارَّا ڒوْحِييْ-أَ.

١٦ خنِّي يُوذفْ ؤُجدْجِيذْ ذَاوُوذْ ؤُشَا إِقِّيمْ زَّاثْ إِ وُوذمْ ن سِيذِي، إِنَّا: ”مِينْ عْنِيغْ نشّْ، سِيذِي أَربِّي، ؤُ مِينْ ثعْنَا ثَادَّارْثْ إِنُو أَقَا شكْ ثْنذْهذْ أَيِي-د أَڒْ ذَانِيثَا؟ ◘17:‏16 [2 صم. 7‏:‏18‏-‏29] ١٧ ذِي ثِيطَّاوِينْ نّشْ ثُوغَا مَانْ أَيَا ذْرُوسْ وَاهَا، أَ أَربِّي، ؤُ ڒخُّو ثسِّيوْڒذْ عَاذْ خْ ثَادَّارْثْ ن ؤُمْسخَّارْ نّشْ ذڭْ إِجّْ ن يِيمَارْ إِڭّْوجْ ؤُ ثْخزَّارذْ ذَايِي أَمْ يِيجّْ ن ؤُفِيڒُو ن وَارَّاونْ ن بْنَاذمْ إِ د-إِتَّاوْينْ غَارْ سنّجْ، أَ سِيذِي أَربِّي! ١٨ مِينْ ذ أَشْ إِ غَا يِينِي ذَاوُوذْ عَاذْ كْثَارْ خْ شّنْعثْ إِ ثسّشْنذْ إِ ؤُمْسخَّارْ نّشْ؟ أَقَا شكْ ثسّْنذْ أَمْسخَّارْ نّشْ! ١٩ أَ سِيذِي، أَقَا ثڭِّيذْ مَارَّا ڒمْغَارثْ-أَ ذِي طّْوعْ ن ؤُمْسخَّارْ نّشْ ؤُ عْلَاحْسَابْ ؤُڒْ نّشْ، حِيمَا أَذْ ثسَّارْڭْبذْ أَمُّو مَارَّا ثِيمسْڒَايِينْ-أَ ثِيمقّْرَانِينْ. ٢٠ أَ سِيذِي، ؤُڒَا ذ إِجّْ وَارْ إِدْجِي أَمْ شكْ. وَارْ ذِينْ أَربِّي مْغِيرْ شكْ س مَارَّا مِينْ نسْڒَا س إِمزُّوغنْ نّغْ. ٢١ مَانْ ونْ إِ إِدْجَانْ أَمْ ڒْْڭنْسْ نّشْ إِسْرَائِيل، أَينِّي ن ڒْْڭنْسْ إِ إِدْجَانْ خْ ثمُّورْثْ إِ غَارْ إِرَاحْ أَربِّي حِيمَا أَذْ ث إِفْذِي إِ يِيخفْ نّسْ ذ ڒْْڭنْسْ، حِيمَا أَذْ إِڭّْ إِ يِيخفْ نّسْ إِجّْ ن يِيسمْ س ثْمڭَّا ثِيمقّْرَانِينْ ذ إِسِّيڭّْوْذنْ، ؤُ حِيمَا أَذْ يَاژّڒْ خْ ڒڭْنُوسْ زَّاثْ إِ وُوذمْ ن ڒْْڭنْسْ نّشْ، ونِّي ثفْذِيذْ زِي مِيصْرَا؟ ◼17:‏21 ’إِفْذِي‘ - خْزَارْ إِزهد. 78‏:35. ٢٢ شكْ ثڭِّيذْ ڒْْڭنْسْ نّشْ إِسْرَائِيل ذ إِجّْ ن ڒْْڭنْسْ إِ يِيخفْ نّشْ إِ ڒبْذَا. شكْ، أَ سِيذِي، أَقَا شكْ ثْذوْڒذْ ذ أَربِّي إِ نِيثْنِي. ٢٣ خنِّي ڒخُّو، أَ سِيذِي أَربِّي، أجّْ أَوَاڒْ نِّي ثسِّيوْڒذْ خْ ؤُمْسخَّارْ نّشْ ؤُ خْ ثَادَّارْثْ نّسْ أَذْ إِبدّْ إِ ڒبْذَا ؤُ أڭّْ أَمْ مَامّشْ ثسِّيوْڒذْ. ٢٤ أجّْ إِسمْ نّشْ أَذْ إِتّْوَاسّمْغَارْ إِ ڒبْذَا ؤُمِي غَا إِنِينْ: سِيذِي ن ڒْْعسْكَارَاثْ إِجهْذنْ، أَربِّي ن إِسْرَائِيل، أَقَا-ث ذ أَربِّي خْ إِسْرَائِيل، ؤُشَا إِڒِي أَذْ ثتّْوَاسّمْثنْ ثَادَّارْثْ ن ؤُمْسخَّارْ نّشْ ذَاوُوذْ زَّاثْ إِ وُوذمْ نّشْ. ٢٥ مَاغَارْ شكْ، أَربِّي إِنُو، ثسَّارْڭْبذْ ذڭْ إِمزُّوغنْ ن ؤُمْسخَّارْ نّشْ أَقَا شكْ أَذْ أَسْ ثبْنِيذْ إِشْثْ ن ثَادَّارْثْ. خْ ؤُيَا ثُوسَا-د إِ ؤُمْسخَّارْ نّشْ ذڭْ وُوڒْ، حِيمَا أَذْ إِژَّادْجْ زَّاثْ إِ وُوذمْ نّشْ. ٢٦ خنِّي ڒخُّو، أَ سِيذِي، شكْ ذ أَربِّي نِّي ؤُ شكْ ثسِّيوْڒذْ س مَارَّا ثْشُونِي-يَا خْ ؤُمْسخَّارْ نّشْ. ٢٧ خنِّي ڒخُّو، أَقَا يَارْضَا إِ شكْ أَذْ ثْبَارْكذْ ثَادَّارْثْ ن ؤُمْسخَّارْ نّشْ، حِيمَا أَذْ ثِيڒِي زَّاثْ إِ وُوذمْ نّشْ إِ ڒبْذَا. مِينْزِي شكْ، أَ سِيذِي، ثْبَارْكذْ ت ؤُشَا أَذْ ثتّْوَابَاركْ إِ ڒبْذَا.“