١ مَا وَارْ دْجِيغْ ذ أَحُورِّي؟ مَا وَارْ دْجِيغْ ذ رَّاسُولْ؟ مَا وَارْ ژْرِيغْ سِيذِيثْنغْ يَاسُوع لْمَاسِيحْ؟ مَا وَارْ ثدْجِيمْ كنِّيوْ ذ ڒْْخذْمثْ إِنُو ذِي سِيذِي إِنُو؟ ◘9:‏1 ڒخ. 9‏:‏3، 17؛ 22‏:‏14، 18؛ 23‏:‏11؛ 1 كُور. 4‏:‏15؛ 15‏:‏8؛ 2 كُور. 12‏:‏2. ٢ مَاڒَا وَارْ دْجِيغْ ذ رَّاسُولْ إِ ونّغْنِي، إِ كنِّيوْ نِيشَانْ عْنِيغْ ث، وَاهْ، كنِّيوْ ذ أَشمِّيعْ ن ڒْْخذْمثْ إِنُو ن رَّاسُولْ.

٣ نشّْ أَرِّيغْ-د خْ يِينِّي خَافِي إِحكّْمنْ أَمُّو: ٤ مَا وَارْ غَارْنغْ بُو تّسْرِيحْ حِيمَا أَذْ نشّْ، أَذْ نْسُو؟ ◘9:‏4 1 كُور. 9‏:‏14؛ 1 تس. 2‏:‏6؛ 2 تس. 3‏:‏9. ٥ مَا وَارْ غَارْنغْ بُو تّسْرِيحْ أَذْ نَاوِي أَكِيذْنغْ إِشْثْ ن ثْوتْشْمَاثْ ذ ثَامْغَارْثْ أَمْ عَاوذْ رُّوسُولْ إِنّغْنِي ذ وَاوْمَاثنْ ن سِيذِيثْنغْ ذ كِيفَا؟ ◘9:‏5 مت. 8‏:‏14. ٦ نِيغْ وَاهَا بَارْ-نَابَا ذ نشّْ وَارْ غَارْنغْ بُو تّسْرِيحْ حِيمَا وَارْ نْخدّمْ؟ ٧ مَانْ ونْ إِ غَا إِخدّْمنْ ذِي ڒْْعسْكَارْ أَذْ إِخدْجصْ ڒْْمُونثْ إِ يِيخفْ نّسْ؟ مَانْ ونْ إِ غَا إِژُّونْ إِشْثْ ن ثْزَايَارْثْ ذڭْ إِجّْ ن ؤُمَارْجعْ ن ؤُضِيڒْ، وَارْ إِتّتّْ شَا زِي ڒْْغِيدْجثْ نّسْ؟ نِيغْ مَانْ ونْ إِ غَا يَاركّْوسنْ إِشْثْ ن ثْحِيمَارْثْ، وَارْ إِسسّْ شَا أَغِي ن ثْحِيمَارْثْ؟ ◘9:‏7 يُوح. 21‏:‏15؛ 1 كُور. 3‏:‏6، 7، 8؛ 2 كُور. 10‏:‏4؛ 1 بُط. 5‏:‏2. ٨ مَا قَّارغْ مَانْ أَيَا أَمْ بْنَاذمْ وَاهَا؟ خْزَارْ، ؤُڒَا ذ شَّارِيعَا ثقَّارْ أَيَا! ٩ مِينْزِي ثُورَا ذِي شَّارِيعَا ن مُوسَا: ”وَارْ تّڭّْ ثَاشْمَانْثْ إِ ؤُينْذُوزْ إِسَّارْوَاثنْ.“ مَا أَربِّي إِحطَّا خْ إِينْذُوزنْ س ثِيذتّْ؟ ◘9:‏9 أَعَوذ. 25‏:‏4؛ 1 تِيم. 5‏:‏18. ١٠ نسّنْ أَقَا إِنَّا إِ-ث ذِي طّْوعْ نّغْ ؤُ مَانْ أَيَا ثُورَا ذِي طّْوعْ نّغْ، مِينْزِي ونِّي إِشَارّْزنْ، أَذْ إِشَارْزْ س ؤُسِيثمْ ؤُ ونِّي إِسَّارْوَاثنْ، أَذْ إِسَّارْوَاثْ س ؤُسِيثمْ أَذْ غَارسْ يِيڒِي صَّابثْ.

١١ مَاڒَا نشِّينْ أَقَا نْزَارّعْ ذَايْومْ مِينْ إِدْجَانْ ن أَرُّوحْ، خنِّي مَا ذ أَطَّاسْ مَاڒَا نمْجَارْ زَّايْومْ شَا زِي مِينْ إِدْجَانْ ن ثمُّورْثْ؟ ◘9:‏11 رُوم. 15‏:‏27؛ ڭال. 6‏:‏6. ١٢ مَاڒَا إِنّغْنِي غَارْسنْ تّسْرِيحْ-أَ خَاومْ، مَاحنْذْ أَذْ شَارْشنْ ذِي مِينْ إِدْجَانْ نْومْ، مَايمِّي نشِّينْ كْثَارْ لَّا؟ مَاشَا نشِّينْ وَارْ نسّْثنْفِيعْ زِي تّسْرِيحْ-أَ، مَاشَا نكْسِي مَارَّا، حِيمَا وَارْ نتّڭّْ ؤُڒَا ذ إِشْثْ ن ثْعنْكْرِيفْثْ إِ ڒخْبَارْ أَصبْحَانْ ن لْمَاسِيحْ. ◘9:‏12 ڒخ. 20‏:‏33؛ 2 كُور. 11‏:‏9؛ 12‏:‏13. ١٣ مَا وَارْ ثسِّينمْ شَا بلِّي إِنِّي إِتّْسخَّارنْ ذڭْ ؤُقدَّاسْ أَذْ تّْوَارزْقنْ زِي مِينْ إِدْجَانْ ذڭْ ؤُقدَّاسْ؟ ؤُشَا إِنِّي إِتّْسخَّارنْ غَارْ ؤُعَالْطَارْ أَذْ طّْفنْ ثَاسْغَارْثْ نْسنْ زڭْ ؤُعَالْطَارْ؟ ◘9:‏13 أَعَوذ. 18‏:‏1. ١٤ أَمُّو عَاوذْ يُومُورْ سِيذِيثْنغْ إِ يِينِّي إِتّْبَارّْحنْ ڒخْبَارْ نّسْ أَصبْحَانْ، أَقَا أَذْ دَّارنْ زِي ڒخْبَارْ أَصبْحَانْ. ◘9:‏14 لَاوِي 19‏:‏13؛ أَعَوذ. 24‏:‏14؛ 25‏:‏4؛ مت. 10‏:‏10؛ لك. 10‏:‏7؛ 1 تِيم. 5‏:‏18.

١٥ مَاشَا نشّْ وَارْ سّْثنْفِيعغْ زڭْ ؤُڒَا ذ إِشْثْ زِي ثْمسْڒَايِينْ-أَ. ؤُ نشّْ وَارْ ث ؤُرِيغْ شَا، حِيمَا أَذْ إِتّْوَاڭّْ مَانْ أَيَا إِ نشّْ، معْلِيكْ ؤُفِيغْ أَذْ مّْثغْ خْ ؤُسبْضڒْ ن ؤُسمْغَارْ إِنُو س شَا ن يِيجّنْ. ١٦ خنِّي مَاڒَا نشّْ تّْبَارّْحغْ س ڒخْبَارْ أَصبْحَانْ، نشّْ وَارْ غَارِي شَا مِينْ ذِي غَا سّمْغَارغْ، مِينْزِي إِتّْخصَّا أَيِي مَانْ أَيَا. أَيحَّاثْ خَافِي، مَاڒَا وَارْ تّْبَارّْحغْ شَا س ڒخْبَارْ أَصبْحَانْ! ١٧ س ؤُينِّي، مَاڒَا ڭِّيغْ ت س ڒْْخَاضَارْ إِنُو، أَذْ غَارِي ثِيڒِي ڒْْمُونثْ، مَاشَا مَاڒَا وَارْ ت تّڭِّيغْ س ڒْْخَاضَارْ، أَقَا أَذْ إِقِّيمْ ؤُوكّڒْ ذڭْ ؤُفُوسْ إِنُو. ١٨ مَانْ ثنْ قَاعْ إِدْجَانْ ذ ڒْْمُونثْ إِنُو؟ أَقَا-ت ذ ثَا: أَمْ تّْبَارّْحغْ س ڒخْبَارْ أَصبْحَانْ أَذْ سّحْضَارغْ ڒخْبَارْ أَصبْحَانْ ن لْمَاسِيحْ بَاطڒْ، وَارْ كسِّيغْ شَا تّسْرِيحْ إِنُو إِ ذَايِي إِوْشَا أَربِّي ذِي لْ-إِنْجِيلْ.

١٩ نشّْ، ؤُمِي قِّيمغْ تّْوَاحَارّغْ زِي مَارَّا، أَقَا أَرّغْ إِخفْ إِنُو ذ أَمْسخَّارْ ن مَارَّا، حِيمَا أَذْ أَربْحغْ أَطَّاسْ ن إِوْذَانْ. ٢٠ إِ وُوذَاينْ ذوْڒغْ أَمْ وُوذَايْ حِيمَا أَذْ أَربْحغْ ؤُذَاينْ، إِ يِينِّي إِدْجَانْ سَاذُو شَّارِيعَا ذوْڒغْ أَمْ يِينِّي سَاذُو شَّارِيعَا، حِيمَا أَذْ أَربْحغْ إِنِّي إِدْجَانْ سَاذُو شَّارِيعَا. ◘9:‏20 ڒخ. 16‏:‏3؛ 18‏:‏18؛ 21‏:‏23. ٢١ إِ يِينِّي إِدْجَانْ بْڒَا شَّارِيعَا ذوْڒغْ أَمْ ونِّي بْڒَا شَّارِيعَا - وَارْ دْجِيغْ بْڒَا شَّارِيعَا قِيبَاتْشْ إِ أَربِّي، مَاشَا أَقَا-يِي دَّارغْ ذِي شَّارِيعَا ن لْمَاسِيحْ - حِيمَا أَذْ أَربْحغْ إِنِّي إِدْجَانْ بْڒَا شَّارِيعَا. ◘9:‏21 ڭال. 2‏:‏3. ٢٢ ثُوغَا أَيِي ضعْفغْ غَارْ يِينِّي إِضعْفنْ، حِيمَا أَذْ أَربْحغْ إِنِّي إِضعْفنْ. أَقَا ذوْڒغْ ذ مَارَّا إِ مَارَّا، حِيمَا بعْذَا أَذْ وْشغْ ثُوذَارْثْ إِ مَارَّا. ◘9:‏22 رُوم. 15‏:‏1؛ 1 كُور. 10‏:‏33؛ ڭال. 6‏:‏1. ٢٣ مَانْ أَيَا تّڭّغْ، حِيمَا أَذْ طّْفغْ ثَاسْغَارْثْ ذِي ڒخْبَارْ أَصبْحَانْ.

٢٤ مَا وَارْ ثسِّينمْ شَا بلِّي إِنِّي إِتّڭّنْ ثْحَامَاثْ ن ثَازْڒَا ذِي ڒْْمڒْعبْ، مَارَّا نِيشَانْ أَقَا تَّازّْڒنْ، مَاشَا إِجّنْ زَّايْسنْ إِ غَا يَاربْحنْ وَاهَا؟ خنِّي أَزّْڒمْ كنِّيوْ أَمُّو أَڒْ ذ غَا ثَاربْحمْ. ◘9:‏24 ڭال. 2‏:‏2؛ 5‏:‏7؛ فِيل. 2‏:‏16؛ 2 تِيم. 4‏:‏7؛ عبر. 6‏:‏18. ٢٥ مَاشَا كُوڒْ أَرْيَازْ إِ إِتّڭّنْ إِشْثْ ن ثْحَامثْ، إِحكّمْ خْ يِيخفْ نّسْ ذِي مَارَّا. نِيثْنِي ؤُزّْڒنْ حِيمَا أَذْ أَربْحنْ إِجّْ ن تَّاجْ إِفنَّا، مَاشَا نشِّينْ حِيمَا أَذْ نَارْبحْ إِجّْ ن تَّاجْ وَارْ إِفنِّي. ◘9:‏25 2 تِيم. 2‏:‏4؛ 4‏:‏8؛ 1 بُط. 1‏:‏4؛ 5‏:‏4. ٢٦ س ؤُينِّي نشّْ وَارْ تِّيزّْڒغْ شَا أَمنِّي وَاهَا، وَارْ تّْمنْغِيغْ أَمْ ونِّي إِشَّاثنْ ذِي ڒعْوِينْ، ٢٧ مَاشَا تّْمَارَّاثغْ أَرِّيمثْ إِنُو، أَذْ أَسْ قثْمَارغْ، حِيمَا نشّْ وَارْ تّْوَاسُّوفُّوغغْ شَا بَارَّا أَوَارْنِي ڒَْامِي بَارّْحغْ إِنّغْنِي.