١ خْ ثْمسْڒَايِينْ ن أَرُّوحْ، أَ أَيْثْمَا، خْسغْ أَذْ ثسّْنمْ، ٢ ثُوغَا كنِّيوْ ذ لْكُوفَّارْ ؤُ ثتّْوَانذْهمْ غَارْ لْ-أَصْنَامْ إِڭْنَاونْ بْڒَا مَا ثُوشِيمْ. ٣ س ؤُينِّي سَّارڭْبغْ كنِّيوْ، أَقَا وَارْ ذِينْ ؤُڒَا ذ إِجّنْ ونِّي إِ غَا إِسِّيوْڒنْ س أَرُّوحْ ن أَربِّي، أَذْ يِينِي: ’أَقَا إِتّْوَانْعڒْ يَاسُوع!‘، ؤُ وَارْ ذِينْ ؤُڒَا ذ إِجّنْ ونِّي إِ غَا يِينِينْ: ’يَاسُوع ذ سِيذِي!‘، مْغِيرْ س أَرُّوحْ إِقدّْسنْ وَاهَا. ◘12:‏3 مك. 9‏:‏39؛ يُوح. 13‏:‏13؛ 1 كُور. 8‏:‏6.

٤ أَقَا ذِينْ ثِيوْهِيبِينْ إِفَارْزنْ، مَاشَا أَرُّوحْ أَقَا-ث ذ إِجّْ. ◘12:‏4 رُوم. 12‏:‏6؛ 1 بُط. 4‏:‏10. ٥ ؤُ أَقَا ذِينْ ڒخْذَايمْ ن ثْسخَّارْثْ إِفَارْزنْ، مَاشَا سِيذِي أَقَا-ث ذ إِجّْ. ٦ ؤُشَا أَقَا ذِينْ ڒعْجَايبْ إِفَارْزنْ، مَاشَا أَربِّي أَقَا-ث ذ إِجّْ، ذ ونِّي إِتّڭّنْ مَارَّا ذِي مَارَّا بْنَاذمْ. ٧ مَاشَا أَسَارْڭبْ ن أَرُّوحْ أَذْ إِمّوْشْ إِ كُوڒْ إِجّْ حِيمَا أَذْ ث إِعَاونْ.

٨ أَقَا س أَرُّوحْ إِمّوْشْ إِ يِيجّنْ أَوَاڒْ ن ثِيغِيثْ، إِ ونّغْنِي أَوَاڒْ ن ثُوسّْنَا س أَرُّوحْ ذ إِجّنْ، ◘12:‏8 ؤُف. 31‏:‏3؛ 35؛13؛ إِشا. 11‏:‏2؛ كُول. 1‏:‏9 ٩ إِ ونّغْنِي لْ-إِيمَانْ س أَرُّوحْ، إِ ونّغْنِي ثَاوْهِيبْثْ إِ ؤُسْڭنْفِي س أَرُّوحْ ذ إِجّنْ، ١٠ إِ ونّغْنِي مَاحنْذْ أَذْ إِڭّْ ڒعْجَايبْ، إِ ونّغْنِي مَاهنْذْ أَذْ إِنبّْ، إِ ونّغْنِي ڒْْفَارْزْ ن أَرُّوحَاثْ، إِ ونّغْنِي عْڒَامْ كُوڒْ  إِڒْسَاونْ ؤُشَا إِ ونّغْنِي أَفسَّارْ ن إِڒْسَاونْ. ١١ مَاشَا مَانْ أَيَا مَارَّا إِتّڭّْ إِ-ث أَرُّوحْ ذ إِجّنْ، ونِّي إِبطَّانْ إِ كُوڒْ إِجّْ أَنشْثْ مَامّشْ إِخْسْ نتَّا. ◘12:‏11 رُوم. 12‏:‏3، 6؛ 1 كُور. 7‏:‏7؛ 2 كُور. 10‏:‏13؛ أَفا. 4‏:‏7.

١٢ مِينْزِي أَمْ أَرِّيمثْ أَقَا-ت ذ إِشْثْ ؤُ غَارسْ أَطَّاسْ ن إِغزْذِيسنْ، عَاذْ أَقَا أَثنْ مَارَّا ذ إِغزْذِيسنْ ن إِشْثْ ن أَرِّيمثْ. وَاخَّا نِيثْنِي ذڭْ وَاطَّاسْ، أَقَا تّڭّنْ إِشْثْ ن أَرِّيمثْ وَاهَا، ؤُشَا أَمُّو إِ ثدْجَا ثْمسْڒَاشْثْ ؤُڒَا أَكْ-ذ لْمَاسِيحْ. ◘12:‏12 رُوم. 12‏:‏4، 5؛ أَفا. 4‏:‏16. ١٣ مِينْزِي نتّْوَاسّغْضصْ مَارَّا س يِيجّْ ن أَرُّوحْ ذڭْ إِشْثْ ن أَرِّيمثْ، نِيغْ ؤُذَاينْ نِيغْ إِرَامِييّنْ نِيغْ إِسمْغَانْ نِيغْ إِحُورِّييّنْ، ؤُشَا مَارَّا نشِّينْ نْسُو زڭْ إِجّْ ن أَرُّوحْ. ◘12:‏13 يُوح. 7‏:‏37‏-‏39؛ ڭال. 3‏:‏28. ١٤ ؤُڒَا ذ أَرِّيمثْ وَارْ ثدْجِي شَا س إِجّْ ن ؤُغزْذِيسْ وَاهَا، مَاشَا س وَاطَّاسْ ن إِغزْذِيسنْ. ١٥ مَاڒَا أَضَارْ أَذْ إِنِي: ”مِينْزِي وَارْ دْجِيغْ ذ أَفُوسْ، وَارْ دْجِيغْ زِي أَرِّيمثْ!“، مَا خنِّي وَارْ إِتِّيڒِي زِي أَرِّيمثْ؟“ ١٦ ؤُشَا مَاڒَا أَمزُّوغْ إِنَّا: ”مِينْزِي وَارْ دْجِيغْ ذ ثِيطّْ، وَارْ دْجِيغْ زِي أَرِّيمثْ!“، مَا خنِّي وَارْ إِتِّيڒِي زِي أَرِّيمثْ؟ ١٧ مَاڒَا مَارَّا أَرِّيمثْ ثُوغَا-ت ذ ثِيطّْ، مَانِيسْ ذ إِكَّا ؤُسدْجِي؟ مَاڒَا مَارَّا أَرِّيمثْ ثُوغَا-ت ذ أَسدْجِي، مَانِيسْ ذ إِكَّا ؤُشمِّي؟

١٨ مَاشَا ڒخُّو أَربِّي إِڭَّا إِغزْذِيسنْ ذِي أَرِّيمثْ، كُوڒْ إِجّْ زَّايْسنْ أَمْ مَامّشْ إِخْسْ نتَّا. ١٩ مِينْزِي مَاڒَا مَارَّا ثُوغَا ذ إِجّْ ن ؤُغزْذِيسْ، مَانِي ثدْجَا أَرِّيمثْ خنِّي؟ ٢٠ مَاشَا ڒخُّو أَقَا ذِينْ أَطَّاسْ ن إِغزْذِيسنْ، مَاشَا ذ إِشْثْ ن أَرِّيمثْ وَاهَا. ٢١ ثِيطّْ وَارْ ثْزمَّارْ أَذْ ثِينِي إِ ؤُفُوسْ: ”وَارْ شكْ حْوِيجغْ شَا!“، نِيغْ عَاوذْ أَزدْجِيفْ إِ إِضَارنْ: ”وَارْ كنِّيوْ حْوِيجغْ شَا!“ ٢٢ مَاشَا س ڒْْعكْسْ إِغزْذِيسنْ ن أَرِّيمثْ إِنِّي نْحسّبْ ضعْفنْ، أَقَا نِيثْنِي تّْوَاحْذَاجنْ أَطَّاسْ. ٢٣ إِغزْذِيسنْ نِّي ن أَرِّيمثْ إِ ذ أَنغْ إِتّْغِيڒنْ ذ إِمُوقْڒِيڒنْ، نتّڭّْ أَسنْ شَّانْ كْثَارْ، ؤُشَا إِغزْذِيسنْ إِنِّي إِتَّاوْينْ أَسضْحِي، أَذْ أَسنْ نسّْحِينّبْ س وَاطَّاسْ ن ڒهْزُوطْ. ٢٤ مِينْزِي إِغزْذِيسنْ نّغْ نِّي غَارْ إِدْجَا ڒهْزُوطْ، وَارْ حْذَاجنْ مَانْ أَيَا، مَاغَارْ أَربِّي إِڭَّا أَرِّيمثْ، ؤُشَا إِ إِغزْذِيسنْ إِ إِدْجَانْ ذ قلّْ، إِوْشَا أَسنْ شَّانْ كْثَارْ، ٢٥ حِيمَا وَارْ إِتِّيڒِي ؤُبطُّو ذِي أَرِّيمثْ، مَاشَا إِغزْذِيسنْ أَذْ وْشنْ ثَايْنِيثْ إِجّنْ إِ ونّغْنِي ذڭْ ؤُقَارنْ ذ إِجّنْ. ٢٦ مَاڒَا إِجّْ ن ؤُغزْذِيسْ ثتّكّْ خَاسْ ثَامَارَا، مَارَّا إِغزْذِيسنْ أَذْ كْسِينْ ثَامَارَا أَكِيذسْ، ؤُ مَاڒَا إِجّْ ن ؤُغزْذِيسْ إِفَارْحْ، أَذْ فَارْحنْ مَارَّا إِغزْذِيسنْ أَكِيذسْ. ٢٧ كنِّيوْ ذ أَرِّيمثْ ن لْمَاسِيحْ ذ إِغزْذِيسنْ ذڭْ ومْشَانْ إِ ذ أَومْ إِتّْوَاڭّنْ. ◘12:‏27 رُوم. 12‏:‏5؛ أَفا. 1‏:‏23؛ 4‏:‏12؛ 5‏:‏23؛ كُول. 1‏:‏24.

٢٨ زعْمَا أَربِّي أَقَا إِڭَّا ذِي ثْمسْمُونْثْ ذ أَمزْوَارُو رُّوسُولْ، أَوَارْنِي أَسنْ إِنَابِييّنْ، أَوَارْنِي أَسنْ إِمسْغَارنْ، أَوَارْنِي أَسنْ إِنِّي إِتّڭّنْ ڒعْجَايبْ، أَوَارْنِي أَسنْ ثِيوْهِيبِينْ ن ؤُسْڭنْفِي، إِنِّي إِتِّيشنْ أَفُوسْ، إِنِّي إِضبَّارنْ ؤُشَا ؤُڒَا ذ عْڒَامْ كُوڒْ إِڒْسَاونْ. ◘12:‏28 أَفا. 4‏:‏11؛ 2‏:‏20. ٢٩ مَا زعْمَا مَارَّا نِيثْنِي ذ رُّوسُولْ؟ مَا مَارَّا ذ إِنَابِييّنْ؟ مَا مَارَّا ذ إِمسْغَارنْ؟ مَا مَارَّا نِيثْنِي تّڭّنْ ڒعْجَايبْ؟ ٣٠ مَا مَارَّا غَارْسنْ ثِيوْهِيبِينْ ن ؤُسْڭنْفِي؟ مَا سَّاوَاڒنْ مَارَّا س إِڒْسَاونْ؟ مَا تّْفسَّارنْ مَارَّا إِڒْسَاونْ؟ ٣١ مَاشَا مَاڒَا ثَارْزُومْ خنِّي ذِي ثوْهِيبِينْ ثِيمقّْرَانِينْ قَاعْ، أَقَا نشّْ أَذْ أَومْ سّشْنغْ إِجّْ ن وبْرِيذْ يُوعْڒَانْ.