١ ضْفَارمْ ثَايْرِي ؤُ نْجبْذمْ غَارْ ثوْهِيبِينْ ن أَرُّوحْ، ذ أَمزْوَارُو حِيمَا أَذْ ثْنبَّامْ. ◼14:‏1 ’ثَايْرِي‘ - نِيغْ: ’ڒمْحِيبّثْ‘. ٢ مِينْزِي ونِّي إِسَّاوَاڒنْ س إِڒْسَاونْ نّغْنِي، وَارْ إِسِّيوِيڒْ شَا إِ إِوْذَانْ، مَاشَا إِ أَربِّي، مِينْزِي ؤُڒَا ذ إِجّْ وَارْ ذ أَسْ إِفهّمْ، مَاشَا إِسَّاوَاڒْ ڒسْرَارْ س أَرُّوحْ. ٣ مَاشَا ونِّي إِتّْنَابّنْ، إِسَّاوَاڒْ غَارْ يوْذَانْ، حِيمَا أَذْ ثنْ إِبْنَا، أَذْ ثنْ إِسجّعْ، أَذْ ثنْ إِسّْفوّجْ. ٤ ونِّي إِسَّاوَاڒنْ س يِيجّْ ن إِڒسْ نّغْنِي، إِبنَّا إِخفْ نّسْ، مَاشَا ونِّي إِتّْنَابّنْ إِبنَّا ثَامسْمُونْثْ. ٥ إِوَا خْسغْ مَارَّا كنِّيوْ أَذْ ثسِّيوْڒمْ س إِڒْسَاونْ نّغْنِي، مَاشَا مْلِيحْ عَاذْ أَذْ ثْنبَّامْ، مِينْزِي أَمنْزُو وِي إِتّْنبَّانْ خْ وِي إِسِّيوْڒنْ س إِڒْسَاونْ نّغْنِي، مْغِيرْ مَاڒَا وَانِيثَا أَذْ ث إِفسَّارْ، مِينْزِي مَاڒَا إِفسَّارْ أَذْ ثتّْوَابْنَا ثْمسْمُونْثْ.

٦ خنِّي ڒخُّو، أَ أَيْثْمَا، مَاڒَا ؤُسِيغْ-د غَارْومْ ؤُشَا أَذْ كِيومْ سِّيوْڒغْ س إِڒْسَاونْ نّغْنِي، مَانْ نّْفعْ إِ غَارْومْ إِ غَا يَاوْيغْ مَاڒَا وَارْ ذ أَومْ سِّيوْڒغْ شَا س ؤُسَارْڭبْ نِيغْ س ثُوسّْنَا نِيغْ س إِجّْ ن وَاوَاڒْ إِ غَا نبّغْ نِيغْ س ؤُسڒْمذْ؟ ٧ مَاغَارْ ؤُڒَا ذ ڒحْوَايشْ وَارْ إِدَّارنْ أَمْ ثَامْجَا نِيغْ لْڭَامْبْرِي، ڭِّينْ ڒْْحسّْ. مَاڒَا وَارْ ڭِّينْ ڒْْفَارْزْ جَارْ إِجّْ ن ڒْْحسّْ ذ ؤُمَاسْ، مَامّشْ غَا سّْننْ إِنِّي إِتّسْڒَانْ مِينْ تِّيرَارنْ س ثَامْجَا نِيغْ س لهَارْپَا؟ ٨ إِوَا، مَاڒَا أَسُوضِي ذڭْ ؤُيِيشّْ إِتّڭّْ ڒْْحسّْ وَارْ إِصْفِي، وِي غَا إِسّْوجْذنْ خنِّي إِ ؤُمنْغِي؟ ٩ أَمُّو عَاوذْ كنِّيوْ، مَاڒَا ثسِّيوِيڒمْ أَوَاڒنْ س إِجّْ ن يِيڒسْ نّغْنِي، مَاشَا وَارْ ثنْ ثْفسَّارمْ، مَامّشْ غَا فهْمنْ مِينْ ثقَّارمْ؟ أَذْ ثسِّيوْڒمْ خنِّي أَمْ ونِّي إِسَّاوَاڒنْ ذِي ڒعْوِينْ. ١٠ أَقَا ذِينْ وِي إِسّْننْ مشْحَاڒْ ن إِڒْسَاونْ ذِي دُّونشْثْ ؤُشَا ؤُڒَا ذ إِجّنْ زَّايْسنْ وَارْ إِدْجِي بْڒَا ڒْْحسّْ نّسْ. ١١ خنِّي مَاڒَا وَارْ سِّينغْ ڒَْادْجَاغْ ن ڒْْحسّْ، أَذْ إِڒِيغْ نشّْ ذ إِجّْ ن ؤُبَارَّانِي إِ ونِّي إِسَّاوَاڒنْ، ذ ونِّي إِسَّاوَاڒنْ أَذْ يِيڒِي ذ أَبَارَّانِي إِ نشّْ.

١٢ أَمُّو عَاوذْ كنِّيوْ، ؤُمِي ثنْجبْذمْ غَارْ ثوْهِيبِينْ ن أَرُّوحْ، أَرْزُومْ أَذْ ثْفيّْضمْ ذِي طّْوعْ ن ڒبْنِي ن ثْمسْمُونْثْ.

١٣ ونِّي إِسَّاوَاڒنْ س شَا ن إِڒسْ نّغْنِي، أَذْ إِژَّادْجْ حِيمَا إِزمَّارْ إِ ؤُفسَّارْ نّسْ. ١٤ مِينْزِي مَاڒَا نشّْ ژُّودْجغْ س شَا ن يِيڒسْ نّغْنِي، أَرُّوحْ إِنُو أَقَا إِژُّودْجْ، مَاشَا ڒفْهَامثْ إِنُو أَذْ ثقِّيمْ بْڒَا ڒْْغِيدْجثْ. ١٥ مَامّشْ إِ غَا ڭّغْ؟ أَذْ ژَّادْجغْ س أَرُّوحْ إِنُو، مَاشَا أَذْ ژَّادْجغْ عَاوذْ س ڒعْقڒْ إِنُو، أَذْغنّْجغْ س أَرُّوحْ إِنُو، مَاشَا أَذْغنّْجغْ عَاوذْ س ڒعْقڒْ إِنُو. ◘14:‏15 أَفا. 5‏:‏19؛ كُول. 3‏:‏16. ١٦ مَامّشْ نّغْنِي، مَاڒَا ثْبَارْكمْ س أَرُّوحْ، إِزمَّارْ حذْ إِ ذِينْ إِقِّيمنْ أَمْ وَارْ إِفْهِيمْ، أَذْ يِينِي ’أَمِينْ!‘ إِ ثْژَادْجِيثْ ن ؤُقَاذِي نّشْ، مِينْزِي نتَّا وَارْ إِسِّينْ مِينْ ثقَّارذْ. ١٧ مِينْزِي وَاخَّا شكْ ثْبَارْكذْ مْلِيحْ، مَاشَا ونِّي ذ أَشْ يُوذْسنْ وَارْ إِتّْوَابنِّي شَا زِي مَانْ أَيَا. ١٨ نشّْ تّْقَاذِيغْ أَربِّي أَقَا سَّاوَاڒغْ س إِڒْسَاونْ كْثَارْ زَّايْومْ مَارَّا، ١٩ مَاشَا ذِي ثْمسْمُونْثْ أَقَا معْلِيكْ ؤُفِيغْ أَذْ إِنِيغْ خمْسَا ن وَاوَاڒنْ س ڒعْقڒْ إِنُو، حِيمَا أَذْ سّْڒمْذغْ عَاوذْ إِنّغْنِي، خْعشْرَا-أَڒَافْ ن وَاوَاڒنْ س يِيجّْ ن يِيڒسْ نّغْنِي.

٢٠ أَ أَيْثْمَا إِنُو، وَارْ تِّيڒِيمْ ذ ثَارْوَا ذڭْ إِخَارِّيصنْ نْومْ، مَاشَا إِڒِيمْ ذ إِسيْمَانْ ذِي ثُوعفّْنَا، ؤُ إِڒِيمْ ثِيوْضمْ ذِي ڒفْهَامثْ. ◘14:‏20 مت. 18‏:‏3؛ 19‏:‏14؛ أَفا. 4‏:‏14؛ 1 بُط. 2‏:‏1، 2. ٢١ أَقَا ثُورَا ذِي شَّارِيعَا:

”أَذْ سِّيوْڒغْ إِ ڒْْڭنْسْ-أَ

س إِجّْ ن ڒْْهَارْذْ ن ڒْْبَارَّانِي

ؤُ س إِجّْ ن يِيڒسْ نّغْنِي.

وَاخَّا أَمُّو وَارْ ذ أَيِي تّسْڒِينْ شَا،

إِقَّارْ سِيذِي.“ ◘14:‏21 أَعَوذ. 28‏:‏49؛ إِشا. 28‏:‏11‏-‏12.

٢٢ أَمُّو خنِّي إِڒْسَاونْ ذ ڒعْڒَامثْ، وَارْ إِدْجِي إِ يِينِّي يُومْننْ، مَاشَا إِ يِينِّي وَارْ يُومِيننْ شَا، مَاشَا أَوَاڒْ إِ إِتّْوَانَابّنْ زَّايسْ وَارْ إِدْجِي إِ يِينِّي وَارْ يُومِيننْ، مَاشَا إِ يِينِّي يُومْننْ.

٢٣ مَاڒَا مَارَّا ثَامسْمُونْثْ ثسّْمُونْ ؤُ مَارَّا ثُوغَا سَّاوَاڒنْ س إِڒْسَاونْ، ؤُشَا خنِّي ؤُذْفنْ إِنِّي إِجهْڒنْ نِيغْ إِنِّي وَارْ يُومِيننْ، مَا نِيثْنِي وَارْ قَّارنْ بلِّي أَقَا إِوْذَانْ-أَ تّْخڒْفنْ؟ ٢٤ مَاشَا مَاڒَا مَارَّا ثْنبَّامْ ؤُشَا يُوذفْ-د حذْ وَارْ يُومِينْ نِيغْ حذْ إِجْهڒْ، خنِّي وَانِيثَا أَذْ إِتّْوَاسّقْنعْ زِي مَارَّا كنِّيوْ ؤُشَا أَذْ إِتّْوَاوبّخْ زَّايْومْ مَارَّا، ٢٥ ؤُشَا مِينْ إِنُّوفَارنْ ذڭْ وُوڒْ نّسْ أَذْ إِتّْوَاعَارَّا. نتَّا أَذْ يَاضَارْ س وُوذمْ نّسْ، أَذْ إِسْجذْ إِ أَربِّي، أَذْ يِينِي: ”أَقَا س ثِيذتّْ أَربِّي أَقَا-ث جَارْ أَومْ!“

٢٦ س ؤُينِّي أَذْ أَومْ إِنِيغْ، أَ أَيْثْمَا إِنُو، مَاڒَا ثْمُونمْ، أجّْ كُوڒْ إِجّنْ زَّايْومْ ونِّي غَارْ إِدْجَا إِجّْ ن ؤُزهِّيذْ نِيغْ إِشْثْ ن ثْغُورِي نِيغْ إِجّْ ن ؤُسَارْڭبْ نِيغْ إِجّْ ن يِيڒسْ نِيغْ إِجّْ ن ؤُفسَّارْ أَذْ زَّايسْ د-إِنْطقْ. أجّْ أَذْ يِيڒِي مَارَّا إِ ڒبْنِي. ٢٧ مَاڒَا ذِينْ حذْ إِسِّيوڒْ س يِيجّْ ن إِڒسْ نّغْنِي، أجّْ إِ-ثنْ أَذْ سِّيوْڒنْ س ثْنَاينْ نِيغْ س وَاطَّاسْ س ثْڒَاثَا يِيذْسنْ، ؤُشَا كُوڒْ إِجّنْ زَّايْسنْ س نُّوبثْ نّسْ، ؤُ أجّْ إِجّْ أَذْ ث إِفسَّارْ. ٢٨ مَاشَا مَاڒَا وَارْ ذِينْ إِدْجِي وِي إِزمَّارنْ أَذْ إِفسَّارْ، أَذْ إِسْقَارْ نتَّا ذِي ثْمسْمُونْثْ، أَذْ إِسِّيوڒْ إِ يِيخفْ نّسْ ؤُ إِ أَربِّي.

٢٩ جّمْ أَذْ سِّيوْڒنْ ثْنَاينْ نِيغْ ثْڒَاثَا ن إِنَابِييّنْ، ؤُشَا إِنّغْنِي أَذْ حكْمنْ. ٣٠ مَاشَا مَاڒَا إِتّْوَاسَّارْڭبْ شَا إِ حذْ أَمْ إِقِّيمْ ذِينِّي، أجّْ خنِّي أَذْ إِسُّوسمْ ونِّي إِسَّاوَاڒنْ ذ أَمزْوَارُو، ٣١ مِينْزِي ثْزمَّارمْ أَذْ ثْنبَّامْ مَارَّا إِجّنْ أَوَارْنِي ونّغْنِي، حِيمَا مَارَّا أَذْ ڒمْذنْ ؤُشَا أَذْ ذَايْسنْ إِتّْوَاڭّْ وُوڒْ مَارَّا. ٣٢ مَاغَارْ أَرُّوحْ ن إِنَابِييّنْ، أَقَا-ث إِمَّارْسْ سَاذُو إِنَابِييّنْ، ٣٣ مِينْزِي أَربِّي وَارْ إِدْجِي ذ أَربِّي ن ؤُخَارْوضْ، مَاشَا ن ڒهْنَا، أَمُّو إِ يدْجَا ذِي مَارَّا ثِيمسْمُونِينْ ن إِمْقدَّاسنْ.

٣٤ ثُوسَا-د خْ ثمْغَارِينْ نْومْ أَذْ سُّوسْمنْثْ ذِي ثْمسْمُونِينْ، مِينْزِي وَارْ ذ أَسنْثْ إِسْمِيحْ أَذْ سِّيوْڒنْثْ، مَاشَا إِشُووَّارْ أَسنْثْ أَذْ إِڒِينْثْ تّْوَاضْعنْثْ أَمْ مَامّشْ ثقَّارْ عَاوذْ شَّارِيعَا. ◘14:‏34 أَمز. 3‏:‏16؛ أَفا. 5‏:‏22؛ كُول. 3‏:‏18؛ 1 تِيم. 2‏:‏12؛ ثِيث. 2‏:‏5؛ 1 بُط. 3‏:‏1. ٣٥ ؤُشَا مَاڒَا خْسنْثْ أَذْ ڒمْذنْثْ شَا، أَذْ سّقْسَانْثْ إِرْيَازنْ نْسنْثْ ذِي ثَادَّارْثْ نْسنْ، مِينْزِي أَقَا-ت ذ ڒفْضِيحثْ إِ ثمْغَارِينْ أَذْ سِّيوْڒنْثْ ذِي ثْمسْمُونْثْ. ٣٦ مَا زعْمَا إِفّغْ-د زَّايْومْ أَوَاڒْ ن أَربِّي؟ نِيغْ يِيوضْ-د غَارْومْ وَاهَا؟

٣٧ مَاڒَا حذْ إِتّْغِيڒْ أَسْ ذ أَنَابِي نِيغْ ذ بْنَاذمْ أَرُّوحَانِي، أجّْ إِ-ث أَذْ إِعْقڒْ مْلِيحْ بلِّي مِينْ ذ أَومْ تَّارِيغْ، أَقَا أَثنْثْ ذ ثِيوصَّا ن سِيذِيثْنغْ. ٣٨ مَاشَا مَاڒَا إِخْسْ حذْ أَذْ إِقِّيمْ إِجْهڒْ، أجّْ إِ-ث أَذْ إِجْهڒْ. ٣٩ أَمُّو خنِّي، أَ أَيْثْمَا إِنُو، نْجبْذمْ حِيمَا أَذْ ثْنبَّامْ، وَارْ منّْعمْ شَا أَوَاڒْ س إِڒْسَاونْ إِنّغْنِي. ٤٠ أَذْ إِمْسَارْ مَارَّا س لَاذَابْ ؤُ س ؤُستّفْ.