١ أَقَا نشِّينْ، أَمْ إِمْعَاشَارنْ ن أَربِّي، نْزَاوڭْ كنِّيوْ أَمُّو، حِيمَا أَرْضَا ن أَربِّي إِ ثطّْفمْ، وَارْ ذَايْومْ إِتّْوَاسّْبطّڒْ شَا، ◘6:‏1 1 كُور. 3‏:‏9؛ عبر. 12‏:‏15. ٢ مِينْزِي إِنَّا:

”ذِي ڒْْوقْثْ ن أَرْضَا سْڒِيغْ أَشْ،

ؤُشَا ذڭْ وَاسّْ ن ؤُسنْجمْ عَاوْنغْ شكْ!“

خْزَارْ، أَقَا ذَا ڒخُّو ذ ڒْْوقْثْ ن أَرْضَا، خْزَارْ، أَقَا ذَا ڒخُّو ذ أَسّْ ن ؤُسنْجمْ. ◘6:‏2 إِشا. 49‏:‏8.

٣ مَايمِّي غَا ثوْشذْ سِّيبّثْ إِ شَا ن يِيجّنْ أَڒَامِي إِ غَا إِنْذرْفْ؟ إِتّْخصَّا وَارْ ذِينْ إِتِّيڒِي شَا ن ڒْْعِيبْ ذِي ثْسخَّارْثْ نّغْ، ◘6:‏3 رُوم. 14‏:‏13؛ 1 كُور. 10‏:‏32. ٤ مَاشَا ذِي مَارَّا نتّْوصَّا إِخفْ نّغْ أَمْ إِمْسخَّارنْ ن أَربِّي: ذڭْ وَاطَّاسْ ن صّْبَارْ، ذِي ڒمْحَايمْ، ذِي ڒغْبنْ، ذِي ڒحْبُوسَاثْ، ◘6:‏4 1 كُور. 4‏:‏1؛ 2 كُور. 11‏:‏23. ٥ سَاذُو ثِييِّيثَا، ذِي سّْنَاسڒْ، ذڭْ ؤُغُووّغْ، ذِي ثَامَارَا، ذِي دْجْيَاڒِي بْڒَا إِضصْ، ذڭْ وُوسَّانْ ن ؤُژُومِّي، ٦ ذِي ڒصْفَايثْ، ذِي ثُوسّْنَا، ذِي تَّاسِيعْ ن ڒْْخَاضَارْ، ذِي ڒضْرَافثْ، ذِي أَرُّوحْ إِقدّْسنْ، ذِي ثَايْرِي بْڒَا نِّيفَاقْ، ٧ س وَاوَاڒْ ن ثِيذتّْ، ذِي جّهْذْ ن أَربِّي، س ڒسْنَاحْ ن ثْسڭْذَا غَارْ ؤُفُوسِي ذ ؤُزڒْمَاضْ، ٨ س ؤُعُودْجِي ذ دّدْجْ، س شّنْعثْ ثَاعفَّانْثْ ؤُ س شّنْعثْ ثَاصبْحَانْثْ، أَمْ إِغشَّاشنْ، وَاخَّا أَمنِّي ذ إِمْثِيقَّانْ، ٩ أَخْمِي وَارْ نتّْوِيسّنْ، وَاخَّا نتّْوَاسّنْ، أَخْمِي نتّْمتَّا، ؤُ خْزَارْ، أَقَا ندَّارْ، أَخْمِي نتّْوَاعَاقبْ مَاشَا وَارْ نتّْمتِّي شَا، ◘6:‏9 إِزهد. 118‏:‏18؛ إِشا. 26‏:‏19. ١٠ أَخْمِي نشِّينْ نفُّوڭمْ، مَاشَا نْفَارّحْ ڒبْذَا، أَخْمِي نزْڒضْ، وَاخَّا نتّجَّارْ أَطَّاسْ، أَخْمِي وَارْ غَارْنغْ شَا، وَاخَّا غَارْنغْ كُوڒْشِي.

١١ أَقمُّومْ نّغْ إِنُّورْزمْ إِ كنِّيوْ، أَ إِكُورِينْثِييّنْ، ؤُڒْ نّغْ إِمْغَارْ أَطَّاسْ. ١٢ كنِّيوْ وَارْ ثتّْوَاحْصَارمْ زَّايْنغْ، مَاشَا ثتّْوَاحْصَارمْ س ثْوَاشِيثْ إِ إِدْجَانْ ذِي ذَاخڒْ نْومْ. ١٣ مَاشَا أَذْ كِيومْ سِّيوْڒغْ أَخْمِي سَّاوَاڒغْ أَكْ-ذ إِحنْجِيرنْ: أَرّمْ أَيِي-د س مِينْ ذَايِي ثتُّورْسمْ ؤُ سْوسّْعمْ ثَايْرِي نْومْ إِ نشّْ! ◘6:‏13 1 كُور. 4‏:‏14.

١٤ وَارْ تّْمُونمْ شَا ذڭْ ؤُزَايْڒُو أَكْ-ذ لْكُوفَّارْ، مَاغَارْ مَانْ أَشْرَاشْ إِ غَارْ ثدْجَا غَارْ ثْسڭْذَا أَكْ-ذ ثُوعفّْنَا، ؤُ مَانْ ثَامُونْثْ إِ غَارْ ثدْجَا إِ ثْفَاوْثْ أَكْ-ذ ثَادْجسْثْ؟ ◘6:‏14 أَعَوذ. 7‏:‏2؛ 1 صم. 5‏:‏1، 2؛ 1 إِج. 8‏:‏21؛ 1 كُور. 5‏:‏9؛ 10‏:‏21؛ أَفا. 5‏:‏11 ١٥ نِيغْ مَانْ أَرْوَاسْ إِ ذِينْ إِدْجَا جَارْ لْمَاسِيحْ ذ شِّيطَانْ؟ نِيغْ مَانْ ثَاسْغَارْثْ ن ڒْْمُومنْ أَكْ-ذ ؤُكَافْرِيوْ؟ ١٦ نِيغْ مَانْ ثَاسْغُونْثْ إِ ذِينْ جَارْ زَّاوشْثْ ثَامقّْرَانْثْ ن أَربِّي ذ ثنِّي ن شّْوَاطنْ؟ أَقَا كنِّيوْ ذ زَّاوشْثْ ن أَربِّي إِدَّارنْ، أَمْ مَامّشْ إِنَّا أَربِّي:

”نشّْ أَذْ زذْغغْ أَكِيذْسنْ

ؤُشَا أَذْ ؤُيُورغْ جَارْ أَسنْ.

نشّْ أَذْ إِڒِيغْ ذ أَربِّي نْسنْ،

نِيثْنِي أَذْ إِڒِينْ ذ ڒْْڭنْسْ إِنُو. ◘6:‏16 ؤُف. 29‏:‏45؛ لَاوِي 26‏:‏11‏-‏12؛ إِرْم. 32‏:‏38؛ حِز. 37‏:‏27؛ 1 كُور. 3‏:‏16؛ 6‏:‏19؛ 10‏:‏7، 14؛ أَفا. 2‏:‏21؛ عبر. 3‏:‏6؛ 1 بُط. 2‏:‏5

١٧ س ؤُينِّي، فّْغمْ-د زِي ڒْْوسْطْ نْسنْ،

بْضَامْ خَاسنْ، إِقَّارْ سِيذِي.

وَارْ تّْحَاذَامْ مِينْ إِنڭْسنْ،

ؤُ نشّْ أَذْ كنِّيوْ قبْڒغْ. ◘6:‏17 إِشا. 52‏:‏11؛ حِز. 20‏:‏34، 41؛ أَسَا. 18‏:‏4.

١٨ نشّْ أَذْ أَومْ إِڒِيغْ ذ بَابَاثْومْ،

كنِّيوْ أَذْ أَيِي ثِيڒِيمْ ذ إِحنْجِيرنْ ذ ثْحنْجِيرِينْ،

إِقَّارْ سِيذِي، ونِّي ذ أَمْزمَّارْ خْ كُوڒْشِي.“ ◘6:‏18 2 صم. 7‏:‏8، 14