١ أَقَا ثَا ذ ثْوَاڒَا وِيسّْ ثْڒَاثَا أَذْ غَارْومْ د-أَسغْ. ”خْ ؤُقمُّومْ ن ثْنَاينْ نِيغْ ثْڒَاثَا ن ڒشْهُوذْ أَذْ إِتّْوَاضْمنْ مَارَّا وَاوَاڒْ!“ ◘13:‏1 ڒخْڒ. 35‏:‏30؛ أَعَوذ. 17‏:‏6؛ 19‏:‏5؛ مت. 18‏:‏16؛ يُوح. 8‏:‏17؛ عبر. 10‏:‏28. ٢ نِّيغْ ت قْبڒْ ؤُشَا أَذْ أَومْ ت إِنِيغْ قْبڒْ عَاوذْ، أَخْمِي ت نِّيغْ ڒَْامِي ذ أَيِي ثُوغَا أَكِيذْومْ وِيسّْ مَارْثَاينْ، ؤُشَا عَاوذْ ڒخُّو، ؤُمِي غَابغْ، تَّارِيغْ ت إِ يِينِّي إِخْضَانْ ؤُ إِ مَارَّا إِنّغْنِي، أَقَا، مَاڒَا ؤُسِيغْ-د ثْوَاڒَا نّغْنِيثْ، وَارْ أَرحّْمغْ شَا. ٣ مِينْزِي كنِّيوْ ثَارزُّومْ لْبُورْهَانْ بلِّي أَقَا لْمَاسِيحْ إِ ذ أَيِي إِسَّاوَاڒنْ، ونِّي وَارْ إِضْعِيفنْ ذَايْومْ، مَاشَا أَقَا إِجْهذْ ذَايْومْ. ٤ وَاخَّا نتَّا إِتّْوَاصلّبْ ذِي ثُوضْعفْثْ، أَقَا إِدَّارْ س جّهْذْ ن أَربِّي. ؤُڒَا ذ نشِّينْ أَقَا نضْعفْ أَكِيذسْ، مَاشَا أَذْ كِيسْ ندَّارْ زِي جّهْذْ ن أَربِّي إِ ذَايْومْ إِدْجَانْ.

٥ قدْجْبمْ إِخفْ نْومْ، مَا أَقَا كنِّيوْ ثتّْبدَّامْ ذِي لْ-إِيمَانْ، أَرْزُومْ ڒعْمُورْ نْومْ. نِيغْ وَارْ ثسِّينمْ شَا بلِّي يَاسُوع لْمَاسِيحْ أَقَا-ث ذَايْومْ، ؤُ مَاڒَا وَارْ إِدْجِي أَمنِّي، أَقَا كنِّيوْ ثمّنْضَارمْ؟ ◘13:‏5 1 كُور. 11‏:‏28. ٦ مَاشَا سِّيثِيمغْ أَذْ ثسّْنمْ، بلِّي وَارْ نمّنْضَارْ. ٧ تّتَّارغْ أَربِّي، مَاحنْذْ وَارْ ذَايْومْ ثتّْوِيفْ ؤُڒَا ذ إِشْثْ ن ڒْْحَاجّثْ ذ ثَاعفَّانْثْ، حِيمَا أَذْ د-ثْبَانْ ثْقدْجبْثْ نّغْ ؤُشَا كنِّيوْ ثتّڭّمْ مِينْ إِدْجَانْ ذ أَصبْحَانْ، وَاخَّا نشِّينْ نْبَانْ أَخْمِي نمّنْضَارْ. ٨ مِينْزِي نشِّينْ وَارْ نْزمَّارْ وَالُو ضِيدّْ إِ ثِيذتّْ، مَاشَا إِ ثِيذتّْ وَاهْ. ٩ مِينْزِي نشِّينْ نْفَارّحْ، ڒَْامِي نضْعفْ ؤُ كنِّيوْ ثْجهْذمْ. ؤُشَا نتّْژَادْجْ عَاوذْ أَذْ ثِيڒِيمْ ثْكمّْڒمْ. ١٠ س ؤُينِّي تَّارِيغْ أَومْ-د مَانْ أَيَا أَمْ غَابغْ، مَاحنْذْ، خْمِي د غَا يَاسغْ، إِتّْخصَّا وَارْ تّقْسِيحغْ شَا عْلَاحْسَابْ صُّولْطَا إِ ذ أَيِي إِوْشَا سِيذِي إِنُو إِ ڒبْنِي، وَارْ إِدْجِي إِ وَاردّدْجْ. ◘13:‏10 2 كُور. 10‏:‏8.

١١ زِي سَّا ذ ثْسَاونْثْ، أَ أَيْثْمَا، إِڒِيمْ ثْفَارّْحمْ ذ ثْكمّْڒمْ، إِڒِيمْ ثتّْفوّْجمْ، خَارّْصمْ س يِيجّْ ن ؤُخَارّصْ، ؤُشَا جّمْ أَذْ ذِينْ ثِيڒِي ڒْْهُوذْنثْ جَارْ أَومْ، خنِّي أَذْ كِيومْ يِيڒِي أَربِّي ن ثَايْرِي ذ ڒهْنَا. ◘13:‏11 رُوم. 12‏:‏16، 18؛ 15‏:‏5؛ 1 كُور. 1‏:‏10؛ فِيل. 2‏:‏2؛ عبر. 12‏:‏14؛ 1 بُط. 3‏:‏8

١٢ سدْجْممْ إِجّنْ خْ ونّغْنِي س ڒهْنَا س ؤُسُوذمْ إِقدّْسنْ. ◘13:‏12 رُوم. 16‏:‏16؛ 1 كُور. 16‏:‏20؛ 1 تس. 5‏:‏26؛ 1 بُط. 5‏:‏14.

١٣ مَارَّا إِمْقدَّاسنْ تّْسدْجَامنْ خَاومْ س ڒهْنَا.

١٤ ڒهْنَا ن سِيذِيثْنغْ يَاسُوع لْمَاسِيحْ ذ ثَايْرِي ن أَربِّي ذ ثْمُونْثْ ن أَرُّوحْ إِقدّْسنْ أَذْ إِڒِينْ أَكِيذْومْ مَارَّا. أَمِينْ.