١ بُولُوسْ، رَّاسُولْ - وَارْ إِدْجِي زڭْ إِوْذَانْ ؤُڒَا س ڒْْخَاضَارْ ن إِجّْ ن بْنَاذمْ، مَاشَا س يَاسُوع لْمَاسِيحْ، ؤُ س أَربِّي، بَابَاسْ، ونِّي إِ-ث-إِ-د-إِسّْنكَّارنْ زِي ثَادَّارْثْ ن إِمتِّيننْ - ◼1:‏1 ’رَّاسُولْ‘ - نِيغْ ’أَمَازَانْ‘. ٢ ؤُ مَارَّا أَوْمَاثنْ إِنِّي إِدْجَانْ أَكِيذِي، إِ ثْمسْمُونِينْ ن ڭَالَاطِييَا: ٣ أَرْضَا ذ ڒهْنَا أَذْ خَاومْ إِڒِينْ زِي أَربِّي، بَابَاثْنغْ، ؤُ زِي سِيذِيثْنغْ يَاسُوع لْمَاسِيحْ، ◘1:‏3 رُوم. 1‏:‏7؛ 1 كُور. 1‏:‏3؛ أَفا. 1‏:‏2؛ 1 بُط. 1‏:‏2. ٤ ونِّي إِوْشِينْ إِخفْ نّسْ خْ دّْنُوبْ نّغْ، حِيمَا أَذْ أَنغْ إِفكّْ زِي دُّونشْثْ-أَ ثَاعفَّانْثْ أَمْ مَامّشْ ت إِخْسْ أَربِّي، بَابَاثْنغْ. ◘1:‏4 مت. 20‏:‏28؛ ڭال. 2‏:‏20؛ أَفا. 5‏:‏2؛ ثِيث. 2‏:‏14؛ عبر. 9‏:‏14. ٥ إِ نتَّا ؤُمِي إِ غَارْ إِدْجَا ؤُعُودْجِي إِ ڒبْذَا قَاعْ. أَمِينْ.

٦ تّْبهْثغْ ؤُمِي ثْسمْحمْ أَمُّو ذغْيَا ذِي لْمَاسِيحْ، ونِّي ذ أَومْ د-إِڒَاغَانْ س أَرْضَا نّسْ. ثتّخْسمْ أَذْ ثْذوْڒنْ غَارْ إِجّْ ن ڒخْبَارْ أَصبْحَانْ نّغْنِي، ◼1:‏6 ’نّغْنِي‘ - إِخْسْ أَذْ يِينِي ’مْژُووَّارْ‘. ٧ نِّي وَارْ ذِينْ إِدْجِي، مَاشَا ذِينْ شَا ن يِينِّي كنِّيوْ إِحيَّارنْ ؤُشَا خْسنْ أَذْ سّْعوّْجنْ ڒخْبَارْ أَصبْحَانْ ن لْمَاسِيحْ. ◘1:‏7 ڒخ. 15‏:‏1. ٨ مَاشَا مَاڒَا نشِّينْ نِيغْ إِجّْ ن لْمَالَاكْ زڭْ ؤُجنَّا أَذْ أَومْ إِبَارّحْ س يِيجّْ ن ڒخْبَارْ أَصبْحَانْ نّغْنِي خْ ڒخْبَارْ أَصبْحَانْ إِ زِي نْبَارّحْ إِ كنِّيوْ، أَذْ يِيڒِي ذ أَمنْعُوڒْ. ◘1:‏8 2 كُور. 11‏:‏4. ٩ أَمْ إِزَّارغْ نِّيغْ، قَّارغْ ث عَاوذْ ڒخُّو إِجّْ ن ؤُمُورْ نّغْنِي: مَاڒَا إِبشَّارْ حذْ إِ كنِّيوْ س إِجّْ ’ڒخْبَارْ أَصبْحَانْ‘ نّغْنِي خْ ونِّي ثْقبْڒمْ، أَذْ ثَافْ أَذْ إِتّْوَانْعڒْ.

١٠ مَا أَرزُّوغْ ڒخُّو أَذْ سّْقنّْعغْ إِوْذَانْ نِيغْ أَربِّي؟ نِيغْ أَرزُّوغْ أَذْ أَرْضِيغْ إِوْذَانْ؟ مَاڒَا أَرزُّوغْ أَذْ أَرْضِيغْ إِوْذَانْ، وَارْ تِّيڒِيغْ ذ أَمْسخَّارْ ن لْمَاسِيحْ. ◘1:‏10 1 تس. 2‏:‏4؛ يَاع. 4‏:‏4.

١١ مَاشَا أَذْ أَومْ مْڒغْ، أَ أَيْثْمَا، بلِّي ڒخْبَارْ أَصبْحَانْ إِ ذ إِتّْوَابَارّْحنْ زَّايِي، وَارْ إِدْجِي زِي بْنَاذمْ، ◘1:‏11 1 كُور. 15‏:‏1. ١٢ مَاغَارْ نشّْ وَارْ ث تّطّْفغْ نِيغْ وَارْ ث ڒْْمِيذغْ زِي بْنَاذمْ، مَاشَا س ؤُسَارْڭبْ ن يَاسُوع لْمَاسِيحْ. ◘1:‏12 أَفا. 3‏:‏3. ١٣ أَقَا ثسْڒِيمْ مَامّشْ ثُوغَا ڭُّورغْ قْبڒْ ذِي دِّينْ ن وُوذَاينْ، ثُوغَا ذَارّْشغْ خْ ثْمسْمُونْثْ ن أَربِّي أَطَّاسْ، أَرزُّوغْ أَذْ ت أَردّْدْجغْ. ◘1:‏13 ڒخ. 8‏:‏3؛ 9‏:‏1؛ 22‏:‏4؛ 26‏:‏9؛ فِيل. 3‏:‏6؛ 1 تِيم. 1‏:‏13. ١٤ ثُوغَا إِزَّارغْ ذِي دِّينْ ن وُوذَاينْ خْ وَاطَّاسْ ن إِقْرِيننْ زِي ڒْْڭنْسْ إِنُو، مِينْزِي ثُوغَا محْضغْ أَطَّاسْ خْ ثْغُورِي ن ڒجْذُوذْ إِنُو.

١٥ مَاشَا ڒَْامِي ثُوغَا يَارْضَا نتَّا، ونِّي ذ أَيِي إِحُوزنْ ؤُمِي ذ أَيِي ثُوغَا عَاذْ ذڭْ ؤُعذِّيسْ ن يمَّا، ؤُشَا إِڒَاغَا أَيِي س أَرْضَا نّسْ، ◘1:‏15 ڒخ. 9‏:‏15؛ 13‏:‏2. ١٦ مَاحنْذْ أَذْ ذَايِي د-إِسّضْهَارْ مِّيسْ حِيمَا أَذْ زَّايسْ بَارّْحغْ جَارْ ڒڭْنُوسْ، خنِّي وَارْ سَّارْڭِيبغْ مَانْ أَيَا ذغْيَا إِ ينِّي غَارْسنْ إِدْجَا دَّاثْ ذ إِذَامّنْ. ◘1:‏16 مت. 16‏:‏17؛ ڒخ. 9‏:‏15؛ 13‏:‏2؛ 22‏:‏21؛ ڭال. 2‏:‏8؛ أَفا. 3‏:‏8. ١٧ عَاوذْ وَارْ رُوحغْ شَا غَارْ ؤُرْشَالِيمْ، غَارْ يِينِّي إِ ثُوغَا ذ رُّوسُولْ قْبڒْ إِنُو، مَاشَا رُوحغْ غَارْ عَارَابِييَّا، ؤُشَا ذوْڒغْ-د خنِّي عَاوذْ غَارْ ذِيمَاشْقْ.

١٨ ثْڒَاثَا ن إِسڭّْوُوسَا أَوَارْنِي أَسْ، رُوحغْ غَارْ ؤُرْشَالِيمْ حِيمَا أَذْ مّڒْقِيغْ أَكْ-ذ كِيفَا ؤُشَا زذْغغْ أَكِيذسْ خمّسْطَاشْ ن وُوسَّانْ. ١٩ وَارْ ژْرِيغْ حذْ نّغْنِي زِي رُّوسُولْ مْغِيرْ يَاعْقُوبْ، ؤُمَاسْ ن سِيذِيثْنغْ. ٢٠ مِينْ ذ أَومْ تَّارِيغْ ڒخُّو، أَقَا ذَا شهّْذغْ زَّاثْ إِ أَربِّي: وَارْ سّْخَارِّيقغْ شَا! ◘1:‏20 رُوم. 1‏:‏9؛ 9‏:‏1؛ 2 كُور. 1‏:‏23؛ 11‏:‏31؛ 1 تس. 2‏:‏5؛ 1 تِيم. 5‏:‏21؛ 2 تِيم. 4‏:‏1. ٢١ أَوَارْنِي مَانْ أَيَا رُوحغْ غَارْ جّْوَايهْ ن سُورِييَا ذ كِيلِيكِييَا. ٢٢ ثِيمسْمُونِينْ ن يَاهُوذِييَّا إِ إِدْجَانْ ذِي لْمَاسِيحْ، وَارْ سِّيننْ أَغمْبُوبْ إِنُو. ٢٣ نِيثْنِي ثُوغَا سْڒِينْ خَافِي أَمُّو وَاهَا: ”أَقَا ونِّي ثُوغَا خَانغْ إِذَارّْشنْ قْبڒْ، ڒخُّو إِتّْبَارّحْ س لْ-إِيمَانْ إِ ثُوغَا يَاردّدْجْ زِيشْ!“، ٢٤ ؤُشَا سّمْغَارنْ ذِي أَربِّي زِي سِّيبّثْ إِنُو.