١ ذ مَانْ أَيَا إِمْسَارْ ؤُمِي ڭعّْذنْ شِيمْعُونْ بُوطْرُوسْ ذ يُوحَانَّا جْمِيعْ غَارْ زَّاوشْثْ ثَامقّْرَانْثْ ذِي ثْسَاعّثْ ن ثْژَادْجِيثْ ثنِّي ذ وِيسّْ ثسْعَا، إِخْسْ أَذْ يِينِي ذ ثْڒَاثَا أَوَارْنِي ضّْهُورْ. ٢ خْزَارْ، ثُوغَا ذِينْ إِجّْ ن ورْيَازْ ذ أَنعْضَابْ زڭْ ؤُعذِّيسْ ن يمَّاسْ، أَرْبُونْ ث إِنِّي إِنُّومنْ أَذْ ث-إِ-د-أَوْينْ، سّْغِيمَانْ ث غَارْ ثوَّارْثْ ن زَّاوشْثْ ثَامقّْرَانْثْ ؤُمِي قَّارنْ ’ثَاوَّارْثْ ثَاصبْحَانْثْ‘، حِيمَا أَذْ إِتَّارْ صّذْقثْ زڭْ إِنِّي إِتَّاذْفنْ غَارْ زَّاوشْثْ ثَامقّْرَانْثْ. ◘3:‏2 يُوح. 9‏:‏8؛ ڒخ. 14‏:‏8. ٣ أَقَا وَا، ؤُمِي إِژْرَا بلِّي شِيمْعُونْ ذ يُوحَانَّا تَّاذْفنْ غَارْ زَّاوشْثْ ثَامقّْرَانْثْ، إِتَّارْ زَّايْسنْ حِيمَا أَذْ أَسْ وْشنْ إِشْثْ ن صّذْقثْ. ٤ شِيمْعُونْ أَكْ-ذ يُوحَانَّا نْضَارنْ ذَايسْ ثِيطَّاوِينْ، نَّانْ أَسْ: ”خْزَارْ ذَايْنغْ!“ ٥ نتَّا إِقْشعْ ذَايْسنْ، إِتّْرَاجَا أَذْ زَّايْسنْ إِطّفْ شَا. ٦ إِنَّا أَسْ شِيمْعُونْ: ”نُّوقَارْثْ ذ وُورغْ وَارْ غَارِي دْجِينْ، مَاشَا مِينْ غَارِي ذ مَانْ أَيَا إِ ذ أَشْ غَا وْشغْ س يِيسمْ ن يَاسُوع لْمَاسِيحْ نَّاصِيرِي! كَّارْ، ثُويُورذْ!“ ◘3:‏6 ڒخ. 4‏:‏10. ٧ إِطّفْ إِ-ث زڭْ ؤُفُوسْ نّسْ أَفُوسِي ؤُشَا إِسّْنكَّارْ إِ-ث. ڒخْذنِّي منْعنْ إِضَارنْ نّسْ ذ ثِيشعْبِينْ نّسْ، ٨ ؤُشَا إِنْڭزْ ؤُشَا إِبدّْ خْ إِضَارنْ، إِڭُّورْ ؤُشَا يُوذفْ أَكِيذْسنْ غَارْ زَّاوشْثْ ثَامقّْرَانْثْ، إِڭُّورْ، إِنڭّزْ، إِسّمْغَارَا ذِي أَربِّي. ◼3:‏8 ’إِنڭّزْ‘ - نِيغْ ’إِنطُّو‘.

٩ مَارَّا ڒْْڭنْسْ إِژْرَا إِ-ث إِڭُّورْ، إِسّمْغَارَا ذِي أَربِّي. ١٠ سّْننْ إِوْذَانْ أَقَا نتَّا ذ ونِّي ثُوغَا إِتّْغِيمَانْ إِتّتَّارْ كُوڒْ أَسّْ غَارْ ثوَّارْثْ ن زَّاوشْثْ ثَامقّْرَانْثْ ؤُمِي قَّارنْ ’ثَاصبْحَانْثْ‘ ؤُشَا نِيثْنِي ذوْڒنْ شُّورنْ س وذْهَاشْ ذ ؤُثبْهثْ خْ مِينْ ذ أَسْ إِمْسَارنْ. ١١ أَمْ ثُوغَا أَرْيَازْ أَنعْضَابْ إِتّْشبَّارْ ذِي شِيمْعُونْ ذ يُوحَانَّا، دُّوقّْزنْ خَاسنْ مَارَّا إِوْذَانْ غَارْ ؤُسقِّيفْ أَكْ-ذ ؤُكُولْوَارْ ذ إِپِيلَارنْ، ؤُمِي قَّارنْ ’أَسقِّيفْ ن سُولِيمَانْ‘، ثْبهْثنْ.

١٢ ؤُمِي إِژْرَا شِيمْعُونْ أَيَا، إِطّفْ ذڭْ وَاوَاڒْ، إِنَّا أَسنْ: ”أَ إِرْيَازنْ، إِحنْجِيرنْ ن إِسْرَائِيل، مِينْ كنِّيوْ إِذعْونْ ثتّْبهْثمْ س ؤُيَا؟ مَايمِّي ذَايْنغْ ثجْعَارمْ أَخْمِي س جّهْذْ ن يِيخفْ نّغْ نِيغْ س صُّولْطَا ن يِيخفْ نّغْ نَارَّا إِ-ث إِڭُّورْ؟ ١٣ أَربِّي ن إِبْرَاهِيمْ ذ إِسْحَاقْ ذ يَاعْقُوبْ، أَربِّي ن ڒجْذُوذْ نّغْ، أَقَا إِسّْعُودْجْ مِّيسْ يَاسُوع ونِّي ثْسلّْممْ ؤُ ثْمنْضَارمْ زَّاثْ ن وُوذمْ ن بِيلَاطُوسْ ونِّي ثُوغَا خَاسْ إِحْكمْ س إِجّْ ن ڒْْحُوكْمْ إِسڭّْذنْ ؤُ ثُوغَا إِخْسْ أَذْ أَسْ يَارْخُو. ◘3:‏13 ؤُف. 3‏:‏6، 15؛ مت. 27‏:‏20؛ مك. 15‏:‏11؛ لك. 23‏:‏18؛ يُوح. 18‏:‏40. ١٤ مَاشَا كنِّيوْ أَقَا ثمّنْضَارمْ أَمْقدَّاسْ ذ أَمْسڭَّاذْ، ثْزَاوْڭمْ أَذْ أَومْ إِمّوْشْ أَرْيَازْ أَقتَّاڒْ. ◘3:‏14 لك. 23‏:‏18. ١٥ أَقَا ثنْغِيمْ أَزدْجِيفْ ن ثُوذَارْثْ، ونِّي د-إِسّْنكَّارْ أَربِّي زِي ثَادَّارْثْ ن إِمتِّيننْ، أَقَا نشِّينْ مَارَّا ذ ڒشْهُوذْ خْ مَانْ أَيَا. ◘3:‏15 ڒخ. 1‏:‏8؛ 2‏:‏32. ١٦ س لْ-إِيمَانْ ذڭْ يِيسمْ نّسْ، أَقَا إِسّجْهذْ ؤُ إِسّْڭنْفَا نتَّا وَا، ونِّي ثتّْوَاڒَامْ، ثسّْنمْ ث. لْ-إِمَانْ ذَايسْ أَقَا إِوْشَا أَسْ أَڭنْفِي-يَا زَّاثْومْ مَارَّا.

١٧ ڒخُّو، أَ أَيْثْمَا، سّْنغْ، أَقَا ثڭِّيمْ أَيَا س ثْقُوبَّانشْثْ، أَمْ مَامّشْ إِ ڭِّينْ ؤُڒَا ذ إِمقّْرَاننْ نْومْ. ١٨ أَمُّو أَقَا إِكمّڒْ أَربِّي مِينْ ثُوغَا إِسِّيزْوَارْ إِخبَّارْ خَاسْ س ؤُقمُّومْ ن مَارَّا إِنَابِييّنْ بلِّي لْمَاسِيحْ إِڭُّورْ أَذْ إِودّبْ. ◘3:‏18 إِشا. 50‏:‏6؛ 53‏:‏5؛ لك. 24‏:‏27. ١٩ س ؤُينِّي ثُوبمْ، ثْذوْڒمْ غَارْ وبْرِيذْ حِيمَا أَذْ أَومْ تّْوَامسْحنْ دّْنُوبْ نْومْ ؤُشَا خنِّي أَذْ د-أَسنْ زّْمَانَاثْ ن أَرَّاحثْ زَّاثْ إِ وُوذمْ ن سِيذِي، ◘3:‏19 ڒخ. 2‏:‏38. ٢٠ ؤُشَا نتَّا أَذْ أَومْ د-إِسّكّْ ونِّي إِوجْذنْ إِ كنِّيوْ إِ مَانْ أَيَا: يَاسُوع لْمَاسِيحْ، ٢١ ونِّي إِتّْخصَّا ؤُجنَّا أَذْ ث إِقْبڒْ أَڒْ ؤُكمّڒْ ن زّْمَانَاثْ، ن مَارَّا مِينْ خفْ ثُوغَا إِسَّاوَاڒْ أَربِّي س ؤُقمُّومْ ن مَارَّا إِنَابِييّنْ نّسْ إِقدّْسنْ زِي زّْمَانْ. ٢٢ مَاغَارْ مُوسَا إِنَّا:

’سِيذِي أَذْ أَومْ د-إِسّْڭعّذْ إِجّْ ن ؤُنَابِي

أَمْ نشّْ زڭْ وَاوْمَاثْومْ.

إِ نتَّا ؤُمِي غَا ثسْڒمْ

ذِي مَارَّا مِيخفْ ذ أَومْ إِ غَا إِسِّيوڒْ.‘ ◘3:‏22 أَعَوذ. 18‏:‏15‏-‏16، 18؛ يُوح. 1‏:‏46؛ ڒخ. 7‏:‏37.

٢٣ أَذْ يِيڒِي بلِّي كُوڒْ ڒعْمَارْ

إِ وَارْ إِسْڒِينْ غَارْ ؤُنَابِي نِّي،

أَذْ إِتّْوَاسّْهلّكْ زڭْ ڒْْڭنْسْ.

٢٤ مَارَّا إِنَابِييّنْ زِي شَامْوِيلْ ذ مَارَّا إِنَابِييّنْ نِّي إِ-ث-إِ-د-إِخڒْفنْ، أَقَا إِزْوَارنْ خبَّارنْ خْ وُوسَّانْ-أَ. ٢٥ كنِّيوْ ذ أَيْثْ ن إِنَابِييّنْ ؤُ ن ڒْْعَاهْذْ إِ إِڭَّا أَربِّي أَكْ-ذ ڒجْذُوذْ نْومْ ڒَْامِي ثُوغَا إِقَّارْ إِ إِبْرَاهِيمْ:

’س زَّارِيعثْ نّشْ أَذْ تّْوَابَارْكنْثْ

مَارَّا ثِيقبَّاڒْ ن ثمُّورْثْ!‘ ◘3:‏25 أَمز. 22‏:‏18؛ ڭال. 3‏:‏8.

٢٦ زِيشْ إِڭَّا نتَّا ڒْْعَاهْذْ نّسْ أَكِيذْومْ ؤُشَا إِسّكّْ-د أَربِّي ڒخُّو مِّيسْ مَاحنْذْ أَذْ أَومْ إِبَاركْ، مَاڒَا أَذْ ثْذوْڒمْ، أَذْ ثثُوبمْ زِي ڒْغَارْ نْومْ.“