1 ؤُمِي كمّْڒنْ وُوسَّانْ أَڒْ ڒْعِيذْ ن خمْسِينْ ن وُوسَّانْ، ثُوغَا أَثنْ مَارَّا جْمِيعْ مُوننْ. ◘2:‏1 لَاوِي 23‏:‏15؛ أَعَوذ. 16‏:‏9؛ ڒخ. 1‏:‏14. 2 خْ إِشْثْ ن ڒْغفْڒثْ يُوسَا-د إِجّْ ن زّْهِيرْ زڭْ ؤُجنَّا، إِڭَّا أَخْمِي ذ أَسمِّيضْ إِجهْذنْ أَطَّاسْ، إِشُّورْ مَارَّا ثَادَّارْثْ مَانِي ثُوغَا قِّيمنْ. 3 ؤُشَا ضْهَارنْ أَسنْ-د إِڒْسَاونْ أَمْ ن ثْمسِّي نِّي إِتّمْسبْضَانْ، أَرْسِينْ خْ كُوڒْ إِجّنْ زَّايْسنْ، 4 ؤُ مَارَّا نِيثْنِي ذوْڒنْ شُّورنْ س أَرُّوحْ إِقدّْسنْ، بْذَانْ أَذْ سِّيوْڒنْ س إِجّْ ن يِيڒسْ نّغْنِي أَمْ مَامّشْ ذ أَسنْ إِوْشَا أَرُّوحْ أَذْ زَّايْسنْ نطْقنْ. ◘2:‏4 مت. 3‏:‏11؛ مك. 1‏:‏8؛ 16‏:‏17؛ لك. 3‏:‏16؛ يُوح. 14‏:‏26؛ 15‏:‏26؛ 16‏:‏13؛ ڒخ. 10‏:‏46؛ 11‏:‏15؛ 19‏:‏6.

5 ثُوغَا تّْغِيمَانْ ذِي ؤُرْشَالِيمْ إِرْيَازنْ نِّي إِتّڭْوذنْ أَربِّي، ؤُذَاينْ زِي مَارَّا ڒڭْنُوسْ سَاذُو ؤُجنَّا. 6 ؤُمِي إِكَّارْ زّْهِيرْ-أَ، إِمُونْ مَارَّا ڒْڭنْسْ ذِينِّي ؤُشَا ثْبهْثنْ، مِينْزِي كُوڒْ إِجّْ ثُوغَا إِتّسْڒَا أَسنْ سَّاوَاڒنْ س يِيڒْسَاونْ نْسنْ إِفَارْزنْ. 7 ذهْشنْ، ثْبهْثنْ مَارَّا، نَّانْ جَارْ أَسنْ: ”مَا وَارْ دْجِينْ مَارَّا إِنَا إِنِّي ذِينْ إِسَّاوَاڒنْ ذ إِجَالِيلِييّنْ؟ 8 مَامّشْ ذ أَسنْ نسْڒَا نشِّينْ، كُوڒْ إِجّْ زَّايْسنْ، سَّاوَاڒنْ س يِيڒسْ إِ زِي د-نثْوَاخْڒقْ؟ 9 إِبَارْثِييّنْ ذ إِمِيذِييّنْ ذ إِعِيلَامِييّنْ ذ إِمزْذَاغْ ن مِيسُوپُوثَامْيَا، ثنِّي ذ ثَامُّورْثْ جَارْ ثْنَاينْ ن إِغزْرَانْ، ذ وُوذَاينْ ذ إِنِّي زِي كَابَّاذُوكِييَا، إِنِّي د-يُوسِينْ زِي جّْوَايهْ ن بُونْطُوسْ ذ أَسِييَا، 10 زِي جّْوَايهْ ن فْرِيخِييَا، بَامْفِيلِييَا ذ مِيصْرَا ؤُ زِي جّْوَايهْ ن لِيبِييَا غَارْ قَايْرَاوَانْ، ؤُڒَا ذ إِنِّي د-يُوسِينْ زِي رُومَا، أَمْ ؤُذَاينْ أَمْ يِينِّي إِذوْڒنْ ذ إِمْعَاشَارنْ ن دِّينْ ن وُوذَاينْ، 11 إِنِّيد-يُوسِينْ زِي كْرِيثَا ؤُ زِي عَارَابِييَّا، أَقَا نشِّينْ نسْڒَا أَسنْ سَّاوَاڒنْ س يِيڒسْ نّغْ خْ ڒعْجَايبْ إِمقّْرَاننْ ن أَربِّي!“ 12 مَارَّا ثْبهْثنْ ؤُشَا نَّانْ إِجّْ إِ ونّغْنِي: ”مِينْ إِخْسْ أَذْ يِينِي مَانْ أَيَا؟“ 13 مَاشَا إِنّغْنِي سْثْهزَّانْ زَّايْسنْ، نَّانْ: ”نِيثْنِي سْوِينْ بِينُو ن جْذِيذْ.“

14 أَوَارْنِي أَسْ إِكَّارْ شِيمْعُونْ بُوطْرُوسْ، أَكْ-ذ حِيطَاشْ ن رُّوسُولْ. نتَّا إِسّْڭعّذْ ثْمِيجَّا نّسْ، إِنَّا أَسنْ:

”كنِّيوْ، أَ إِرْيَازنْ ذ ؤُذَاينْ ؤُ مَارَّا إِمزْذَاغْ ن ؤُرْشَالِيمْ، إِتّْخصَّا أَذْ سْنمْ أَيَا، سْڒمْ غَارْ وَاوَاڒنْ إِنُو! 15 إِوْذَانْ-أَ وَارْ سْشَارنْ شَا أَمْ مَامّشْ ذ أَومْ إِتّْغِيڒْ، مِينْزِي أَقَا-ت ذ ثَاسَاعّثْ ذ ثْڒَاثَا ن وَاسّْ. 16 مَاشَا أَيَا مِينْ إِتّْوَانَّانْ زڭْ ؤُنَابِي يُووِيلْ:

17 ’أَذْ يِيڒِي ذڭْ وُوسَّانْ إِنڭُّورَا،

إِقَّارْ أَربِّي،

أَقَا أَذْ فَارّْغغْ أَرُّوحْ إِنُو خْ مَارَّا دَّاثْ.

أَذْ نبَّانْ إِحنْجِيرنْ نْومْ ذ ثْحنْجِيرِينْ نْومْ،

إِبْڒِيغنْ نْومْ أَذْ ثْوَاڒَانْ إِوحَّانْ،

ؤُشَا إِمقّْرَاننْ نْومْ أَذْ أَرْجَانْ ثِيرْجَا. ◘2:‏17 إِشا. 44‏:‏3؛ حِز. 11‏:‏19؛ 36‏:‏27؛ يُووِ. 3‏:‏1‏-‏5؛ زَاك. 12‏:‏10؛ لك. 2‏:‏36؛ يُوح. 7‏:‏3؛ ڒخ. 10‏:‏45؛ 21‏:‏9.

18 ؤُڒَا خْ إِمْسخَّارنْ إِنُو ؤُ خْ ثِييَّا إِنُو

أَذْ فَارّْغغْ أَرُّوحْ إِنُو ذڭْ وُوسَّانْ نِّي،

ؤُشَا أَذْ نبَّانْ.

19 أَذْ وْشغْ لْمُوعْجِيزَاثْ ذڭْ ؤُجنَّا

ؤُڒَا ذ ڒعْڒَامَاثْ خْ ثمُّورْثْ:

إِذَامّنْ ذ ثْمسِّي ذ ڒفْوَارْ ن دّخَّانْ.

20 أَذْ ثذْوڒْ ثْفُوشْثْ غَارْ ثَادْجسْثْ،

ذ ثْزِيرِي غَارْ إِذَامّنْ،

قْبڒْ د غَا يَاسْ

وَاسّْ إِمْغَارنْ إِعُودْجنْ ن سِيذِي. ◘2:‏20 مـَال. 3‏:‏23

21 ؤُشَا أَذْ يِيڒِي،

أَقَا مَارَّا وِي غَا إِڒَاغَانْ خْ يِيسمْ ن سِيذِي،

أَذْ إِتّْوَاسّنْجمْ!‘ ◘2:‏21 يُووِ. 3‏:‏1‏-‏5؛ رُوم. 10‏:‏13.

22 أَ إِرْيَازنْ، أَيْثْ ن إِسْرَائِيل، سْڒمْ أَوَاڒنْ-أَ: يَاسُوع نَّاصِيرِي، أَقَا-ث ذ بْنَاذمْ إِ ذ أَومْ د-إِتّْوَاسّْشَاننْ زِي أَربِّي س ثْمڭَّا ثِيمقّْرَانِينْ ذ ڒعْڒَامَاثْ ذ لْمُوعْجِيزَاثْ إِ يڭَّا أَربِّي س ؤُفُوسْ نّسْ ذِي ڒْوسْطْ نْومْ، أَمْ مَامّشْ ثسّْنمْ كنِّيوْ، 23 أَقَا وَانِيثَا، ونِّي إِتّْوَاحُوزنْ إِ مَانْ أَيَا إِ نتَّا عْلَاحْسَابْ ثُوسّْنَا ن أَربِّي قْبڒْ ؤُ عْلَاحْسَابْ ڒْخَاضَارْ نّسْ، أَقَا كنِّيوْ ثْسلّْممْ ث ذڭْ إِفَاسّنْ ن إِعفَّاننْ ؤُ ثْصلّْبمْ ث ؤُ ثنْغِيمْ ث. ◘2:‏23 ڒخ. 4‏:‏28؛ 5‏:‏30. 24 مَاشَا إِسّْنكَّارْ إِ-ث-إِ-د أَربِّي ؤُشَا إِسَّارْخُو إِسغْوَانْ ن ڒَاخَارْثْ، مَاغَارْ وَارْ إِزمَّارْ أَذْ إِتّْوَاطّفْ ذِي ڒَاخَارْثْ. ◘2:‏24 ڒخ. 10‏:‏40، 1 إِج. 3‏:‏16‏-‏28. 25 مِينْزِي ذَاوُوذْ إِنَّا خَاسْ:

’ثُوغَا تّْوَاڒِيغْ سِيذِي زَّاثِي ذِي كُوڒْ أَمُورْ،

أَقَا-ث خْ يفُوسْ إِنُو،

حِيمَا وَارْ تّْميِّيڒغْ. ◘2:‏25 إِزهد. 16‏:‏8‏-‏11.

26 س ؤُيَا إِفَارّهْ ؤُڒْ إِنُو

ؤُڒَا ذ أَسمْغَارْ إِنُو إِفيّضْ س ڒفْرَاحثْ،

ؤُڒَا ذ أَرِّيمثْ إِنُو أَذْ يَاريّحْ

خْ ؤُسِيثمْ وَانِيثَا،

27 مِينْزِي وَارْ ثتّجِّيذْ ڒعْمَارْ إِنُو ذِي ڒَاخَارْثْ،

ؤُڒَا وَارْ ثتّجِّيذْ أَمْسِيزْذڭْ نّشْ أَذْ إِكِيشُّو. ◘2:‏27 إِزهد. 16‏:‏10؛ إِزهد. 49‏:‏10؛ ڒخ. 13‏:‏35

28 شكْ ثسّشْنذْ أَيِي أَبْرِيذْ ن ثُوذَارْثْ،

شكْ أَذْ أَيِي ثشُّورذْ س ڒفْرَاحثْ

ذِي لْحَاضَارْ نّشْ.‘ ◘2:‏28 إِزهد. 16‏:‏8‏-‏11.

29 أَ إِرْيَازنْ ثَاوْمَاثْ، أَقَا ثعْذڒْ أَيِي أَذْ أَومْ سِّيوْڒغْ س بْطَايْطَايْ خْ أَرَّايْسْ ن ڒجْذُوذْ نّغْ ذَاوُوذْ، ونِّي أَقَا إِمُّوثْ، إِتّْوَانْضڒْ، ؤُشَا أَنْضڒْ نّسْ أَقَا-ث غَارْنغْ أَڒْ أَسّْ-أَ. ◘2:‏29 1 إِج. 2‏:‏10؛ ڒخ. 13‏:‏36. 30 مَاغَارْ نتَّا ثُوغَا ذ أَنَابِي، إِسّنْ بلِّي أَربِّي إِجُّودْجْ أَسْ س إِشْثْ ن ثْجَادْجِيثْ:

’أَذْ سّْغِيمغْ إِجّنْ زِي ڒْغِيدْجثْ ن ثْعذِّيسْثْ نّشْ

خْ ڒْكُورْسِي ن ڒْعَارْشْ نّسْ.‘ ◘2:‏30 2 صم. 7‏:‏12؛ إِزهد. 132‏:‏11؛ لك. 1‏:‏32؛ ڒخ. 13‏:‏23؛ رُوم. 1‏:‏3؛ 2 تِيم. 2‏:‏8.

31 أَمُّو ثُوغَا نتَّا إِزْوَارْ إِژْرَا ؤُشَا إِسِّيوڒْ خْ ثْنُوكْرَا ن لْمَاسِيحْ، بلِّي وَارْ إِتّْوَاجِّي شَا ذِي ڒَاخَارْثْ ؤُشَا أَرِّيمثْ نّسْ وَارْ ثتَّاشِي أَكِيشُّو. ◘2:‏31 إِزهد. 16‏:‏10؛ ڒخ. 13‏:‏35. 32 يَاسُوع وَانِيثَا أَقَا إِسّْنكَّارْ إِ-ث-إِ-د أَربِّي ؤُ نشِّينْ مَارَّا ذ ڒشْهُوذْ نّسْ. ◘2:‏32 يُوح. 15‏:‏27؛ ڒخ. 1‏:‏8. 33 نتَّا إِتّْوَاسّْڭعّذْ أَڒْ أَفُوسْ أَفُوسِي ن أَربِّي ؤُشَا إِطّفْ لْوَاعْذْ ن أَرُّوحْ إِقدّْسنْ زِي بَابَاسْ. أَقَا إِفَارّغْ ثَاوْهِيبْثْ-أَ ڒخُّو أَمْ مَامّشْ ثتّْوَاڒَامْ ؤُ ثتّسْڒَامْ. ◘2:‏33 ڒخ. 1‏:‏4؛ 5‏:‏31؛ 10‏:‏45؛ فِيل. 2‏:‏9. 34 ذَاوُوذْ مَاشَا وَارْ إِڭعّذْ شَا غَارْ إِجنْوَانْ، مَاغَارْ إِنَّا:

’سِيذِي إِنَّا إِ سِيذِي إِنُو:

قِّيمْ خْ يفُوسْ إِنُو، ◘2:‏34 إِزهد. 110‏:‏1؛ 1 كُور. 15‏:‏25؛ أَفا. 1‏:‏20؛ عبر. 1‏:‏13.

35 أَڒْ ذ غَا ڭّغْ ڒْعذْيَانْ نّشْ

ذ ثَانبْذَاثْ سَاذُو إِضَارنْ نّشْ.‘ ◘2:‏35 إِزهد. 110‏:‏1.

36 أَذْ ثسّنْ مَارَّا ثَادَّارْثْ ن إِسْرَائِيل نِيشَانْ، بلِّي أَربِّي إِڭَّا يَاسُوع وَانِيثَا، ونِّي ثْصلّْبمْ كنِّيوْ، ذ سِيذِي ذ لْمَاسِيحْ.“

37 ڒَامِي سْڒِينْ مَانْ أَيَا، ثُوذفْ أَسنْ ذڭْ وُوڒْ نْسنْ ذَاخڒْ، نَّانْ إِ شِيمْعُونْ ؤُ إِ رُّوسُولْ نّغْنِي: ”مِينْ غَا نڭّْ، أَ ثَاوْمَاثْ نّغْ؟“ ◘2:‏37 زَاك. 12‏:‏10؛ لك. 3‏:‏10؛ ڒخ. 9‏:‏6؛ 16‏:‏30. 38 إِنَّا أَسنْ شِيمْعُونْ: ”ثُوبمْ، أجّْ كُوڒْ إِجّنْ زَّايْومْ أَذْ إِتّْوَاسّغْضصْ س يِيسمْ ن سِيذِي يَاسُوع إِ وغْفَارْ ن دّْنُوبْ، ؤُشَا أَذْ ثْقبْڒمْ ثَاوْهِيبْثْ ن أَرُّوحْ إِقدّْسنْ. 39 مِينْزِي لْوَاعْذْ إِ كنِّيوْ ؤُ إِ ثَارْوَا نْومْ ؤُ إِ مَارَّا إِنِّي إِدْجَانْ غَارْ ڒَاڭّْوَاجْ، إِنِّي خْ إِ ذ غَا إِڒَاغَا أَربِّي نّغْ.“ ◘2:‏39 يُووِ. 3‏:‏1؛ أَفا. 2؛13. 40 ؤُشَا س وَاوَاڒنْ نّغْنِي أَطَّاسْ ثُوغَا إِسّقْنعْ ؤُ إِعْڒمْ أَسنْ، إِنَّا: ”نجْممْ زِي ثَاصِيڒثْ-أَ إِفَارْغنْ.“ 41 ثُوغَا جَارْ أَسنْ إِنِّي إِوجْذنْ أَذْ قبْڒنْ أَوَاڒْ نّسْ ؤُشَا تّْوَاسّْغضْصنْ نِيثْنِي. مَّارْنِينْ-د ذڭْ وَاسّْ نِّي عْڒَاحَاڒْ ثڒْثْ-أَڒَافْ ن ڒعْمُورْ.

42 نِيثْنِي قِّيمنْ صْبَارنْ ذِي ثْغُورِي ن رُّوسُولْ ؤُ شَارّْشنْ ذِي ثْژَادْجِيثْ ؤُ ذِي ثَارژِّيثْ ن وغْرُومْ ن نِّيعْمثْ.

43 كُوڒْ إِجّنْ ثُوذفْ إِ-ث ثِيڭّْوُوذِي ؤُشَا مْسَارنْثْ لْمُوعْجِيزَاثْ ذ ڒعْڒَامَاثْ أَطَّاسْ س إِفَاسّنْ ن رُّوسُولْ ذِي ؤُرْشَالِيمْ. ◘2:‏43 مك. 16‏:‏17؛ ڒخ. 5‏:‏12. 44 مَارَّا إِنِّي يُومْننْ ثُوغَا أَثنْ مُوننْ جْمِيعْ، ؤُ مَارَّا مِينْ غَارْسنْ ثُوغَا إِشَارْشْ. ◘2:‏44 أَعَوذ. 15‏:‏4؛ ڒخ. 4‏:‏32. 45 إِنِّي غَارْ إِدْجَا وَاڭْڒَا ثُوغَا زّْنُوزَانْ مَانْ أَيَا ؤُشَا بطَّانْ أَرْبحْ عْلَاحْسَابْ مِينْ إِحْذَاجْ كُوڒْ إِجّْ. ◘2:‏45 إِشا. 58‏:‏7؛ ڒخ. 4‏:‏35. 46 ثُوغَا تّْمُوننْ كُوڒْ أَسّْ ذِي زَّاوشْثْ ثَامقّْرَانْثْ س ذْمَامْ ذ إِجّنْ، تَّارژَّانْ أَغْرُومْ ذِي ثُوذْرِينْ، كْسِينْ مَاشَّا نْسنْ س ڒفْرَاحثْ ؤُ س وُوڒْ إِصْفَا، ◘2:‏46 ڒخ. 1‏:‏14؛ 20‏:‏7. 47 أَمْ سّمْغَارَانْ ذِي أَربِّي ؤُ ثُوغَا تّْوَاسّْعِيزّنْ غَارْ مَارَّا إِوْذَانْ. كُوڒْ أَسّْ ثُوغَا سِيذِيثْنغْ يَارنِّي غَارْ ثْمسْمُونْثْ إِنِّي إِوْضنْ غَارْ ثُوذَارْثْ. ◘2:‏47 ڒخ. 5‏:‏14؛ 11‏:‏21.