١ ”خْمِي غَا يَاوِي إِجّْ ن ورْيَازْ إِشْثْ ن ثمْغَارْثْ ؤُشَا إِمْڒشْ أَكِيذسْ ؤُشَا وَارْ ذ أَسْ ثعْجِيبْ ؤُمِي ذَايسْ يُوفَا شَا ن ڒفْضِيحثْ، ؤُشَا خنِّي أَذْ أَسْ يَارِي ثَابْرَاثْ ن ودْجَافْ، أَذْ أَسْ ت إِوْشْ ذڭْ ؤُفُوسْ نّسْ ؤُشَا أَذْ ت إِسُّوفغْ زِي ثَادَّارْثْ نّسْ، ◘24:‏1 مت. 5‏:‏31؛ 19‏:‏7؛ مك. 10‏:‏4 ٢ ؤُشَا خنِّي ثفّغْ نتَّاثْ زِي ثَادَّارْثْ نّسْ، ثْرُوحْ ؤُشَا ثذْوڒْ ذ ثَامْغَارْثْ غَارْ إِجّْ ن ورْيَازْ نّغْنِي، ٣ ؤُشَا أَرْيَازْ أَنڭَّارُو إِشَارْهْ إِ-ت، أَذْ أَسْ يَارِي ثَابْرَاثْ ن ودْجَافْ ؤُشَا أَذْ أَسْ ت إِوْشْ ذڭْ ؤُفُوسْ نّسْ ؤُشَا أَذْ ت إِسّكّْ زِي ثَادَّارْثْ نّسْ، نِيغْ أَرْيَازْ أَنڭَّارُو نِّي إِ-ت يِيوْينْ ذ ثَامْغَارْثْ نّسْ، إِمُّوثْ، ٤ خنِّي وَارْ إِعدّڒْ إِ ورْيَازْ نّسْ أَمزْوَارُو، ونِّي ذ أَسْ إِطلّْقنْ، أَذْ ت يڭّْ عَاوذْ ذ ثَامْغَارْثْ إِ يِيخفْ نّسْ، أَوَارْنِي ؤُمِي ثتّْوَاسّخْمجْ نتَّاثْ، مِينْزِي مَانْ أَيَا ذ جّْعِيفشْثْ زَّاثْ إِ وُوذمْ ن سِيذِي. وَارْ إِعدّڒْ أَذْ ثسِّيوِيضْ دّنْبْ خْ ثمُّورْثْ إِ ذ أَشْ إِوْشَا سِيذِي، أَربِّي نّشْ، ذ ڒْْوَارْثْ.“

٥ ”خْمِي إِجّْ ن ورْيَازْ ثُوغَا أَمْ إِمْڒشْ، خنِّي وَارْ إِتّفّغْ شَا أَكْ-ذ ڒْْعسْكَارْ ؤُ وَارْ خَاسْ ثتّْوَاڭّْ ؤُڒَا ذ إِشْثْ ن ثْمسْڒَاشْثْ. أَذْ يِيڒِي إِجّْ ن ؤُسڭّْوَاسْ إِ ثَادَّارْثْ نّسْ وَاهَا ؤُ أَذْ إِسّْفَارْحْ ثَامْغَارْثْ نّسْ إِ يِيوِي إِ يِيخفْ نّسْ.“ ◘24:‏5 أَعَوذ. 20‏:‏7

٦ ”وَارْ إِعدّڒْ أَذْ ثكْسِيذْ إِژْرَا ن ثْسِيرْثْ س ثْنَاينْ ذ أَضْمَانْ، نِيغْ أَژْرُو نِّي زَّايْسنْ إِتّنْهزَّانْ وَاهَا، مِينْزِي أَقَا خنِّي أَذْ يِيڒِي ڒعْمَارْ ذ أَضْمَانْ.“

٧ ”مَاڒَا إِتّْوَافْ إِجّْ ن ورْيَازْ يُوشَارْ شَا ن يِيجّْ زڭْ وَاوْمَاثنْ نّسْ، زڭْ أَيْثْ ن إِسْرَائِيل، ؤُشَا نتَّا يَارَّا إِ-ث ذ إِسْمغْ ؤُشَا إِزّنْزْ إِ-ث، خنِّي أَذْ إِمّثْ ؤُشفَّارْ نِّي. إِتّْخصَّا أَذْ ثكّْسذْ ڒْْغَارْ زِي ڒْْوسْطْ نّشْ.“ ◘24:‏7 ؤُف. 21‏:‏16

٨ ”خْمِي ذِينْ ثدْجَا جّْرِيحشْثْ ن ڒْْبَارْصْ، حْضَا أَذْ ثحْضِيذْ ؤُ أَذْ ثڭّذْ نِيشَانْ عْلَاحْسَابْ مَارَّا مِينْ ذ أَشْ غَا سّْڒمْذنْ إِكهَّاننْ إِلَاوِييّنْ. أَذْ ثحْضَامْ مَاحنْذْ أَذْ ثڭّمْ مَارَّا أَمْ مَامّشْ ثنْ ؤُمُورغْ. ◘24:‏8 لَاوِي 13‏:‏2 ٩ إِذَارْ مِينْ إِڭَّا سِيذِي، أَربِّي نّشْ، أَكْ-ذ مَارْيَامْ ذڭْ وبْرِيذْ ؤُمِي د-ثفّْغمْ زِي مِيصْرَا.“◘24:‏9 ڒخْڒ. 12‏:‏10

١٠ ”مَاڒَا ثَارْضْڒذْ شَا إِ جَّارْ نّشْ، خنِّي وَارْ تِّيذفْ غَارْ ثَادَّارْثْ نّسْ حِيمَا أَذْ زَّايسْ ثكْسِيذْ شَا ذ أَضْمَانْ إِ يِيخفْ نّشْ. ١١ أَذْ ثقِّيمذْ بَارَّا ؤُشَا أَرْيَازْ إِ ؤُمِي ثَارْضْڒذْ أَذْ أَشْ د-يَاوِي دِّييّثْ غَارْ بَارَّا. ١٢ مَاڒَا ثُوغَا ذ أَرْيَازْ ذ أَمزْڒُوضْ، خنِّي وَارْ تّتّْنُوسِي ذڭْ ورْهَانْ نّسْ أَمشْنَاوْ إِ يدْجَا ذ ثَاسُّوثْ نّسْ. ١٣ أَذْ أَسْ د-ثَارّذْ دِّييّثْ نِّي نِيشَانْ غَارْ ؤُغدْجِي ن ثْفُوشْثْ، حِيمَا أَذْ إِطّصْ ذِي ثَاسُّوثْ نّسْ ؤُشَا أَذْ أَشْ إِبَاركْ. مَانْ أَيَا أَذْ أَشْ ثِيڒِي ذ ثَاسڭْذَا زَّاثْ إِ وُوذمْ ن سِيذِي، أَربِّي نّشْ.“◘24:‏13 ؤُف. 22‏:‏26

١٤ ”وَارْ سْحِيسّْفمْ أَشوَّاڒْ أَمحْذَاجْ أَمزْڒُوضْ زڭْ أَيْثْمَاشْ نِيغْ زڭْ إِبَارَّانِييّنْ إِ إِزدّْغنْ ذِي ثمُّورْثْ نّشْ ؤُ ذَاخڒْ إِ ثوُّورَا نّشْ. ◘24:‏14 لَاوِي 19‏:‏13؛ يَاع. 5‏:‏4 ١٥ أَذْ أَسْ ثوْشذْ ڒْْمُونثْ نّسْ كُوڒْ أَسّْ. وَارْ خَاسْ ثْغدْجِي ثْفُوشْثْ خْ مَانْ أَيَا، مِينْزِي نتَّا ذ أَمزْڒُوضْ ؤُشَا إِمّژْرِي ذَايسْ، حِيمَا نتَّا وَارْ إِتّْڒِيغِي إِ سِيذِي ذِي سِّيبّثْ نّشْ ؤُشَا أَذْ ذَايكْ يِيڒِي دّنْبْ.“

١٦ ”إِبَابَاثنْ وَارْ تّْوَانقّنْ ذِي سِّيبّثْ ن إِحنْجِيرنْ نْسنْ ؤُ إِحنْجِيرنْ وَارْ تّْوَانقّنْ ذِي سِّيبّثْ ن إِبَابَاثنْ نْسنْ. كُوڒْ إِجّْ أَذْ إِتّْوَانغْ ذِي سِّيبّثْ ن دّنْبْ نّسْ.“◘24:‏16 2 إِج. 14‏:‏6؛ 2 إِم. 25‏:‏4؛ إِرْم. 31‏:‏30؛ حِز. 18‏:‏20

١٧ ”وَارْ سْفَارَّاغْ ڒحْكَامْ ن ؤُبَارَّانِي ذ ؤُيُوجِيڒْ نِيغْ أَذْ ثكْسِيذْ أَرُّوضْ ن ثَاجَّاتْشْ ذ أَضْمَانْ.◘24:‏17 ؤُف. 22‏:‏21، 22؛ أَوڒن. 22‏:‏22؛ إِشا. 1‏:‏23؛ إِرْم. 5‏:‏28؛ 22‏:‏3؛ حِز. 22‏:‏29؛ زَاك. 7‏:‏10 ١٨ أَذْ ثْعقْڒذْ بلِّي ثُوغَا شكْ ذ إِسْمغْ ذِي مِيصْرَا ؤُشَا أَقَا سِيذِي، أَربِّي نّشْ، إِفْذِي شكْ سّنِّي. خْ ؤُيَا نشّْ تُّومُورغْ شكْ أَذْ ثڭّذْ مَانْ أَيَا. ◼24:‏18 ’إِفْذِي‘ - خْزَارْ إِزهد. 78:35. ١٩ خْمِي ثْمجَّارذْ صَّابثْ نّشْ ذڭْ إِيَّارْ نّشْ ؤُشَا ثتُّوذْ شَا ن ثْقبِّيضْثْ ذڭْ إِيَّارْ، خنِّي وَارْ د-ثذِّيكّْوِيڒذْ مَاحنْذْ أَذْ ت ثكْسِيذْ. أَذْ ثِيڒِي ذ ثَاسْغَارْثْ إِ ؤُبَارَّانِي، إِ ؤُيُوجِيڒْ ؤُ إِ ثَاجَّاتْشْ، حِيمَا أَذْ شكْ إِبَاركْ سِيذِي، أَربِّي نّشْ، ذِي مَارَّا ڒْْخذْمثْ ن إِفَاسّنْ نّشْ.◘24:‏19 لَاوِي 19‏:‏9؛ 23‏:‏22 ٢٠ خْمِي غَا ثْژوْضذْ ثَاشجَّارْثْ نّشْ ن زِّيثُونْ، وَارْ تِّيشْ ثَايْنِيثْ عَاذْ إِ مِينْ إِقِّيمنْ أَوَارْنِي أَشْ. ذ مَانْ أَيَا إِ غَا يِيڒِينْ إِ ؤُبَارَّانِي، إِ ؤُيُوجِيڒْ ؤُ إِ ثَاجَّاتْشْ. ٢١ أَوَارْنِي ڒَْامِي ثْڒقْضذْ أَضِيڒْ ن ؤُمَارْجعْ نّشْ ن ؤُضِيڒْ، وَارْ أَرزُّو أَذْ ثْڒقْضذْ مِينْ إِقِّيمنْ أَوَارْنِي أَشْ عَاوذْ. أَقَا مَانْ أَيَا أَذْ يِيڒِي إِ ؤُبَارَّانِي، إِ ؤُيُوجِيڒْ ؤُ إِ ثَاجَّاتْشْ. ٢٢ أَذْ ثْعقْڒذْ بلِّي ثُوغَا شكْ ذ إِسْمغْ ذِي ثمُّورْثْ ن مِيصْرَا. خْ ؤُيَا نشّْ تُّومُورغْ شكْ أَذْ ثڭّذْ مَانْ أَيَا.“