1 ”مَاڒَا ذِينْ إِجّْ ن ؤُمْشُوبّشْ جَارْ إِرْيَازنْ ؤُشَا إِتّْخصَّا أَسنْ أَذْ ؤُيُورنْ غَارْ ڒْمحْكَامَا، أَذْ خَاسنْ حكْمنْ، خنِّي أَذْ بَارّْحنْ خْ ونِّي غَارْ إِدْجَا ڒْحقّْ ؤُشَا أَذْ حكْمنْ خْ ؤُمذْنُوبْ. ◼25:‏1 ’ونِّي غَارْ إِدْجْ ڒْحقّْ‘ - س ثْعِيبْرَانِيثْ ’أَمْسڭّذْ‘. 2 مَاڒَا أَمذْنُوبْ إِسّْذَاهدْجْ ثِييِّيثَا، خنِّي ڒْقَاضِي أَذْ يجّْ أَذْ ثغضْڒنْ غَارْ ثمُّورْثْ ؤُشَا أَذْ ث فَارْشنْ زَّاثْ إِ وُوذمْ نّسْ أَنشْثْ إِتُّورْسْ ذِي ڒحْسَابْ ن ڒْغشّْ نّسْ. 3 إِعدّڒْ أَذْ أَسْ إِوْشْ أَربْعِينْ ن ثيِّيثَا، وَارْ غَارْسنْثْ يَارنِّي شَا، مِينْزِي مَاڒَا أَذْ ث إِفَارْشْ عَاذْ كْثَارْ سنّجْ إِ ثِييِّيثَا-يَا، أَقَا ؤُمَاشْ أَذْ أَشْ د-إِبَانْ ذ أَمحْڭُورْ جَارْ ثِيطَّاوِينْ نّشْ.“◘25:‏3 2 كُور. 11‏:‏24

4 ”وَارْ تّڭّْ ثَاشْمَانْثْ إِ ؤُفُونَاسْ خْمِي إِسَّارْوَاثْ.“ ◘25:‏4 1 كُور. 9‏:‏9؛ 1 تِيم. 5‏:‏18

5 ”خْمِي زدّْغنْ وَاوْمَاثنْ أَكْ-ذ وَايَاوْيَا ؤُشَا إِمُّوثْ إِجّْ زَّايْسنْ، ؤُشَا وَارْ د-يجِّي شَا مِّيسْ، خنِّي ثَامْغَارْثْ ن ؤُمتِّينْ وَارْ ثْمدْجشْ شَا أَكْ-ذ شَا ن ورْيَازْ بَارَّا فَامِيلِييَا نّسْ. أَذْ خَاسْ يَاذفْ وَاڒوْسْ ؤُشَا أَذْ ت إِڭّْ ذ ثَامْغَارْثْ نّسْ ؤُشَا أَذْ أَسْ يڭّْ خنِّي لْوَاجِيبْ ن وَاڒوْسْ. ◼25:‏5 ’أَڒْوسْ‘ - نِيغْ ’ؤُمَاسْ ن ورْيَازْ نّسْ‘.  ◘25:‏5 مت. 22‏:‏24؛ مك. 12‏:‏19؛ لك. 20‏:‏28 6 ؤُشَا أَمنْزُو نِّي إِ د غَا ثَارُووْ، أَذْ إِخْڒفْ إِسمْ ن ؤُمَاسْ إِمُّوثنْ، حِيمَا إِسمْ ن وَا وَارْ إِمحِّي شَا زِي إِسْرَائِيل. 7 مَاشَا مَاڒَا أَرْيَازْ وَارْ إِخْسْ أَذْ إِكْسِي ثَامْغَارْثْ ن ؤُمَاسْ، أَذْ ثْڒَاهْ خنِّي ثمْغَارْثْ ن ؤُمَاسْ غَارْ ثوَّارْثْ، غَارْ إِمْغَارنْ، أَذْ ثِينِي: ’أَڒوْسْ إِنُو يُوڭِي أَذْ إِخْڒفْ إِسمْ ن ؤُمَاسْ ذِي إِسْرَائِيل، وَارْ إِخْسْ أَذْ إِڭّْ لْوَاجِيبْ ن وَاڒوْسْ.‘ ◘25:‏7 رَاع. 4‏:‏7 8 خنِّي إِمْغَارنْ ن ثنْذِينْثْ نِّي أَذْ أَسْ د-ڒَْاغَانْ ؤُشَا أَذْ أَكِيذسْ سِّيوْڒنْ. مَاڒَا نتَّا إِمْنعْ ذڭْ وَاوَاڒْ نّسْ ؤُشَا إِنَّا: ’وَارْ خْسغْ شَا أَذْ ت أَوْيغْ!‘، 9 أَذْ غَارسْ د-ثْقَارّبْ خنِّي ثَاڒوْسْثْ زَّاثْ إِ ثِيطَّاوِينْ ن إِمْغَارنْ، أَذْ أَسْ ثكّسْ سَانْذَالَا نّسْ زڭْ ؤُضَارْ ؤُشَا أَذْ خَاسْ ثسُّوسفْ خْ ؤُغمْبُوبْ، أَذْ ثْبَارّحْ، أَذْ ثِينِي: ’أَمُّو إِ إِتّْوَاڭّْ ذڭْ ورْيَازْ نِّي وَارْ إِخْسنْ أَذْ إِبْنَا ثَادَّارْثْ ن ؤُمَاسْ!‘ ◘25:‏9 رَاع. 4‏:‏5 10 ؤُشَا أَذْ أَسْ ڒَاغَانْ ذِي إِسْرَائِيل س يِيسمْ وَانِيثَا: ’ثَادَّارْثْ ن ونِّي ؤُمِي إِتّْوَاكّسْ سَانْذَالَا نّسْ!‘ “

11 ”مَاڒَا ذِينْ إِرْيَازنْ مْشُوبُّوشنْ ؤُشَا ثْرحّڭْ-د ثمْغَارْثْ ن شَا ن إِجّْ حِيمَا أَذْ ثْفكّْ أَرْيَازْ نّسْ زڭْ ؤُفُوسْ ن وِي ث إِشَّاثنْ ؤُشَا نتَّاثْ ثسّْوِيژّضْ أَفُوسْ نّسْ ؤُشَا ثطّفْ إِ-ث زِي ثْفُولِينْ ن ؤُسضْحِي نّسْ، 12 أَذْ أَسْ ثْقسّذْ خنِّي أَفُوسْ نّسْ، وَارْ ذ أَمْ تّزِّيدْجِيزْ.“

13 ”وَارْ غَاركْ إِتِّيڒِي ذِي ثْخَانْشثْ نّشْ إِجّْ ن وژْرُو ن ڒوْزنْ ذ إِجّْ ن وژْرُو نّغْنِي، إِجّْ ن وژْرُو ذ أَمقّْرَانْ ؤُڒَا ذ إِجّْ ن وژْرُو ذ أَمژْيَانْ. 14 وَارْ غَاركْ إِتِّيڒِي ذِي ثَادَّارْثْ نّشْ، ڒْْمُوذْ ن إِجّْ ن إِفَا ؤُڒَا ذ إِجّْ ن إِفَا نّغْنِي، إِجّْ ن إِفَا ذ أَمقّْرَانْ ؤُڒَا ذ إِجّْ ن إِفَا ذ أَمژْيَانْ. 15 إِجّْ ن وژْرُو ن ڒوْزنْ إِوَاطَا، إِسڭّمْ أَذْ غَاركْ يِيڒِي ؤُڒَا ذ إِجْ ن ڒْمُوذْ ن يِيجّْ ن إِفَا نِيشَانْ، إِوَاطَا، حِيمَا ؤُسَّانْ نّشْ أَذْ زُّوڭَّارْثنْ خْ وُوذمْ ن ثمُّورْثْ نِّي إِ ذ أَشْ غَا إِوْشْ، سِيذِي، أَربِّي نّشْ. 16 مِينْزِي مَارَّا وِي غَا إِڭِّينْ مَانْ أَيَا، مَارَّا وِي غَا إِڭِّينْ ڒْغشّْ، أَقَا نتَّا ذ نّْعِي غَارْ سِيذِي، أَربِّي نّشْ.“ ◘25:‏16 أَوڒن. 11‏:‏1

17 ”إِذَارْ مِينْ زَّايكْ إِڭَّا عَامَالِيقْ ذڭْ وبْرِيذْ، ؤُمِي د-ثفّْغذْ زِي مِيصْرَا، ◘25:‏17 ؤُف. 17‏:‏8 18 مَامّشْ د-إِفّغْ غَارْ ؤُمْسَاڭَارْ أَكِيذكْ ذڭْ وبْرِيذْ ؤُشَا إِهْجمْ خَاكْ زِي ضفَّارْ مَانِي دْجَانْ مَارَّا إِنِّي إِضعْفنْ، ؤُمِي شكْ ثُوغَا ثُوحْڒذْ، ثفْنِيذْ. نتَّا وَارْ إِڭّْوِيذْ شَا أَربِّي. 19 أَذْ إِمْسَارْ، خْمِي سِيذِي، أَربِّي نّشْ، أَذْ شكْ إِسَّاريّحْ زِي مَارَّا ڒْعذْيَانْ إِ ذ أَشْ-د إِنّْضنْ ذِي ثمُّورْثْ إِ ذ أَشْ غَا إِوْشْ سِيذِي، أَربِّي نّشْ، ذ ڒْوَارْثْ، حِيمَا أَذْ ت ثكْسِيذْ، أَقَا أَذْ ثمْحِيذْ ڒِيذَارثْ ن عَامَالِيقْ زِي سَاذُو ؤُجنَّا. وَارْ ث تّتُّو!“