أَذْلِيسْ إِقدّْسنْ أَعَاوذْ ن شَّارِيعَا ٣١

٣١

يَاشُووَا إِكْسِي أَمْشَانْ ن مُوسَا

١ إِرُوحْ مُوسَا ؤُشَا إِسِّيوڒْ س وَاوَاڒنْ-أَ أَكْ-ذ مَارَّا إِسْرَائِيل، ٢ إِنَّا أَسنْ: ”أَسّْ-أَ نشّْ غَارِي مْيَا ؤُ-عِيشْرِينْ ن إِسڭّْوُوسَا. وَارْ زمَّارغْ عَاذْ أَذْ فّْغغْ ؤُڒَا أَذْ أَذْفغْ ؤُشَا سِيذِي إِنَّا أَيِي: ’وَارْ ثْژكّْوِيذْ إِغْزَارْ-أَ ن لْ-ؤُرْذُونْ!‘ ◘ ٣ سِيذِي، أَربِّي نّشْ، أَذْ إِژْوَا زَّاثْ إِ وُوذمْ نّشْ. نتَّا أَذْ يَاردّدْجْ ڒڭْنُوسْ-أَ زَّاثْ إِ وُوذمْ نّشْ ؤُشَا أَذْ ثطّْفذْ ڒْْوَارْثْ نْسنْ. يَاشُووَا أَذْ إِژْوَا زَّاثْ إِ وُوذمْ نّشْ، أَمْ مَامّشْ إِنَّا سِيذِي. ◘ ٤ سِيذِي أَذْ كِيسنْ إِڭّْ أَمْ مَامّشْ إِڭَّا أَكْ-ذ سِيحُونْ ذ عُوجْ، إِجدْجِيذنْ ن إِمُورِييّنْ، إِنِّي يَاردّدْجْ نتَّا س ثْنَاينْ، ؤُ أَمْ مَامّشْ إِڭَّا أَكْ-ذ ثمُّورْثْ نْسنْ. ◘ ٥ خْمِي ثنْ غَا إِسلّمْ سِيذِي زَّاثْ إِ وُوذمْ نْومْ، أَذْ كِيسنْ ثڭّمْ عْلَاحْسَابْ مَارَّا ثَاوْصيّثْ نِّي زِي كنِّيوْ وصِّيغْ◘ ٦ إِڒِيمْ ذ إِرْيَازنْ ؤُ إِڒِيمْ ثْمحْضمْ، وَارْ تّڭّْوذمْ، وَارْ تَّارْجِيجمْ شَا زَّاثْ إِ وُوذمْ نْسنْ، مِينْزِي سِيذِي، أَربِّي نّشْ، ذ ونِّي أَكِيذكْ إِڭُّورنْ. نتَّا وَارْ ذَايكْ إِسمّحْ نِيغْ شكْ إِتّجِّي.“ ◘

٧ إِڒَاغَا مُوسَا إِ يَاشُووَا، إِنَّا أَسْ زَّاثْ إِ ثِيطَّاوِينْ ن مَارَّا إِسْرَائِيل: ”إِڒِي ذ أَرْيَازْ ؤُ إِڒِي ثْمحْضذْ، مِينْزِي أَذْ ثَاذْفذْ أَكْ-ذ ڒْْڭنْسْ-أَ غَارْ ثمُّورْثْ نِّي إِجِّيدْجْ سِيذِي إِ ڒجْذُوذْ نْسنْ أَذْ أَسنْ ت-إِ-د-إِوْشْ ؤُشَا شكْ أَذْ ثنْ ثجّذْ أَذْ ت طّْفنْ ذ ڒْْوَارْثْ. ٨ سِيذِي، ذ ونِّي يُويُورنْ زَّاثْ إِ وُوذمْ نّشْ، ذ نتَّا إِ غَا يِيڒِينْ أَكِيذكْ، وَارْ شكْ إِتّتُّو شَا نِيغْ أَذْ ذَايكْ إِسْمحْ. وَارْ تّڭّْوذْ ؤُ وَارْ تَّارْجِيجِي.“ ◘

مُوسَا إِوْشَا شَّارِيعَا إِ أَيْثْ ن لَاوِي

٩ يُورَا مُوسَا شَّارِيعَا-يَا ؤُشَا إِوْشَا إِ-ت إِ إِكهَّاننْ، أَيْثْ ن لَاوِي، إِنِّي يَارْبُونْ تَّابُوثْ ن ڒْْعَاهْذْ ن سِيذِي، ؤُ إِ مَارَّا إِمْغَارنْ ن إِسْرَائِيل. ١٠ مُوسَا يُومُورْ إِ-ثنْ، إِنَّا: ”أَوَارْنِي سبْعَا ن إِسڭّْوُوسَا، ذِي ڒْْوقْثْ إِتّْوَاڭّنْ ن ؤُسڭّْوَاسْ ن ؤُفكِّي ن إِمرْوُوسنْ ذِي ڒْْعِيذْ ن إِعُوشُّوثنْ، ١١ خْمِي غَا إِمُونْ مَارَّا إِسْرَائِيل مَاحنْذْ أَذْ إِحْضَارْ زَّاثْ إِ وُوذمْ ن سِيذِي، أَربِّي نّشْ، ذڭْ ومْشَانْ نِّي إِ غَا يِيخْضَارْ نتَّا، أَذْ ثْغَارذْ س جّهْذْ شَّارِيعَا-يَا زَّاثْ إِ مَارَّا إِسْرَائِيل ذڭْ إِمزُّوغنْ نْسنْ. ◘ ١٢ أجّْ أَذْ إِمُونْ ڒْْڭنْسْ، إِرْيَازنْ ذ ثمْغَارِينْ ذ إِحنْجِيرنْ ذ إِبَارَّانِييّنْ نِّي إِدْجَانْ غَارْ ذَاخڒْ ن ثوُّورَا نّشْ حِيمَا أَذْ سْڒنْ ؤُ حِيمَا أَذْ ڒمْذنْ أَذْ ڭّْوذنْ سِيذِي، أَربِّي نْومْ ؤُشَا أَذْ حْضَانْ مَارَّا أَوَاڒنْ ن شَّارِيعَا-يَا ١٣ ؤُ حِيمَا إِحنْجِيرنْ نْسنْ، إِنِّي وَارْ ت إِسِّيننْ، أَذْ سْڒنْ ؤُشَا أَذْ ڒمْذنْ أَذْ ڭّْوذنْ سِيذِي، أَربِّي نْومْ مَارَّا ؤُسَّانْ نِّي إِ غَا ثدَّارمْ خْ وُوذمْ ن ثمُّورْثْ نِّي غَارْ غَا ثژْوَامْ خْ لْ-ؤُرْذُونْ مَاحنْذْ أَذْ ت ثطّْفمْ ذ ڒْْوَارْثْ.“

أَبَارّحْ خْ ڒْْمُوعْصِييّثْ إِ د غَا يَاسنْ

١٤ سِيذِي إِنَّا إِ مُوسَا: ”أَقَا إِوْضنْ-د وُوسَّانْ نّشْ إِ ذِي غَا ثمّْثذْ. ڒَْاغَا إِ يَاشُووَا ؤُ سْبدّمْ إِخفْ نْومْ ذڭْ ؤُقِيضُونْ ن ؤُمْسَاڭَارْ حِيمَا أَذْ ث ؤُمُورغْ.“ مُوسَا ذ يَاشُووَا رُوحنْ، بدّنْ ذڭْ ؤُقِيضُونْ ن ؤُمْسَاڭَارْ. ١٥ خنِّي إِبَانْ-د سِيذِي ذڭْ ؤُقِيضُونْ، ذڭْ إِجّْ ن ؤُقلِّيجْ ن ؤُسيْنُو، ؤُشَا إِبدّْ ؤُقلِّيجْ ن ؤُسيْنُو سنّجْ إِ وَاذَافْ ن ؤُقِيضُونْ. ١٦ سِيذِي إِنَّا إِ مُوسَا: ”أَقَا شكْ أَذْ ثتّْوَاسّْمُونذْ أَكْ-ذ ڒجْذُوذْ نّشْ ؤُشَا خنِّي ڒْْڭنْسْ-أَ أَذْ إِكَّارْ أَذْ إِسّفْسذْ إِخفْ نّسْ أَمْ غَا يُويُورْ أَوَارْنِي إِ إِربِّيثنْ ن إِبَارَّانِييّنْ ن ثمُّورْثْ نِّي غَارْ غَا يَاذفْ ڒْْڭنْسْ أَڒْ ڒْْوسْطْ نّسْ ؤُشَا ڒْْڭنْسْ أَذْ ذَايِي إِسْمحْ، أَذْ يَارْژْ ڒْْعَاهْذْ إِنُو ونِّي كِيذْسنْ ڭِّيغْ. ١٧ ذڭْ وَاسّْ نِّي أَذْ يَارغْ وغْضَابْ إِنُو خْ ڒْْڭنْسْ ؤُشَا أَذْ ثنْ جّغْ، أَذْ زَّايْسنْ فَّارغْ ؤُذمْ إِنُو ؤُشَا أَذْ إِتّْوَاصَارْضْ ڒْْڭنْسْ ؤُشَا أَذْ خَاسْ د-أَسنْ وَاطَّاسْ ن إِشڒْوَاونْ ذ ڒحْصَارَاثْ، أَڒْ غَا يِينِي ڒْْڭنْسْ ذڭْ وَاسّْ نِّي: ’مَا وَارْ خَافِي د-ؤُسِينْ إِشڒْوَاونْ-أَ، مِينْزِي أَربِّي وَارْ كِيذِي إِدْجِي؟‘ ◼ ١٨ ذڭْ وَاسّْ نِّي أَذْ فَّارغْ ؤُذمْ إِنُو مَارَّا ذِي سِّيبّثْ ن ڒْْغَارْ نِّي إِڭَّا ؤُمِي إِذْوڒْ غَارْ إِربِّيثنْ نّغْنِي. ١٩ ڒخُّو خنِّي، أَرِي ثِيزْڒِيثْ-أَ إِ يِيخفْ نْومْ ؤُشَا سڒْمذْ إِ-ت إِ أَيْثْ ن إِسْرَائِيل، أڭّْ إِ-ت ذڭْ ؤُقمُّومْ نْسنْ، حِيمَا ثِيزْڒِيثْ-أَ أَذْ ثِيڒِي ذ أَشهَّاذْ ذِي طّْوعْ إِنُو ضِيدّْ إِ إِسْرَائِيل، ٢٠ مِينْزِي نشّْ أَذْ سِّيذْفغْ ڒْْڭنْسْ-أَ غَارْ ثمُّورْثْ نِّي خْ جُّودْجغْ إِ ڒجْذُوذْ نْسنْ أَذْ أَسنْ ت وْشغْ، إِشْثْ ن ثمُّورْثْ إِفيّْضنْ س ؤُغِي ذ ثَامّنْثْ، ؤُشَا أَذْ شّنْ، أَذْ جِّيوْننْ، أَذْ ذوْڒنْ قْبُوبّْزنْ. خنِّي أَذْ ذوْڒنْ غَارْ إِربِّيثنْ نّغْنِي، أَذْ خَاسنْ سخَّارنْ ؤُشَا أَذْ أَيِي سّْذُوقْزنْ، أَذْ أَرْژنْ ڒْْعَاهْذْ إِنُو. ٢١ ؤُشَا أَذْ إِمْسَارْ ؤُمِي ذ أَسْ د-ؤُسِينْ إِ ڒْڭنْسْ-أَ أَطَّاسْ ن إِشڒْوَاونْ ذ ڒحْصَارَاثْ، أَقَا خنِّي إِزْڒِي-يَا أَذْ د-ثَارّْ ذڭْ وُوذمْ نّسْ أَمْ يِيجّْ ن ؤُشهَّاذْ، مِينْزِي وَارْ ثتِّيڒِي ثتّْوَاتُّو زڭْ ؤُقمُّومْ ن ثَارْوَا نّسْ، مِينْزِي نشّْ سّْنغْ أَخَارّصْ نِّي إِحطَّا عَاذْ أَسّْ-أَ ذِي ذَاخڒْ نّسْ، قْبڒْ مَا أَذْ ث سِّيذْفغْ ذِي ثمُّورْثْ نِّي خْ جُّودْجغْ أَذْ أَسنْ ت وْشغْ.“ ◼

٢٢ ذڭْ وَاسّْ نِّي يُورَا مُوسَا ثِيزْڒِيثْ-أَ ؤُشَا إِسّڒْمذْ إِ-ت إِ أَيْثْ ن إِسْرَائِيل. ٢٣ ؤُشَا نتَّا يُومُورْ إِ يَاشُووَا، مِّيسْ ن نُونْ، إِنَّا: ”إِڒِي ذ أَرْيَازْ، إِڒِي ثْمحْضذْ، مِينْزِي أَذْ ثسِّيذْفذْ أَيْثْ ن إِسْرَائِيل ذِي ثمُّورْثْ نِّي خْ ذ أَسنْ جُّودْجغْ مَاحنْذْ أَذْ أَسنْ ت وْشغْ ؤُشَا نشّْ أَذْ أَكِيذكْ إِڒِيغْ.“ ◘

٢٤ ؤُشَا إِمْسَارْ ؤُمِي إِكمّڒْ مُوسَا ثِيرَا ن وَاوَاڒنْ ن شَّارِيعَا-يَا ذڭْ إِجّْ ن وذْلِيسْ إِتّْوَانّْضنْ، أَڒْ أَنڭَّارْ نْسنْ، ٢٥ أَقَا مُوسَا يُومُورْ إِلَاوِييّنْ نِّي يَارْبُونْ تَّابُوثْ ن ڒْْعَاهْذْ ن سِيذِي، إِنَّا: ٢٦ ”كْسِيمْ أَذْلِيسْ-أَ إِتّْوَانْضنْ ن شَّارِيعَا ؤُشَا ثڭّمْ ث زَّاثْ إِ تَّابُوثْ ن ڒْْعَاهْذْ ن سِيذِي، أَربِّي نْومْ، مَاحنْذْ أَذْ ذِينْ يِيڒِي ذ أَشهَّاذْ ضِيدّْ نْومْ، ◘ ٢٧ مِينْزِي نشّْ سّْنغْ أَغوّغْ نْومْ ذ ثْغنَّانْثْ نْومْ. خْزَارْ، ؤُمِي نشّْ دَّارغْ عَاذْ أَكِيذْومْ أَسّْ-أَ، كنِّيوْ أَقَا ثْغوّْغمْ خْ سِيذِي، مشْحَاڒْ عَاذْ كْثَارْ إِ غَا ثڭّمْ أَوَارْنِي إِ ڒْْموْثْ إِنُو! ٢٨ سْمُونمْ-د غَارِي مَارَّا إِمْغَارنْ ن ثْقبَّاڒْ نْومْ ذ إِمحْضَاينْ نْومْ، خنِّي أَذْ سِّيوْڒغْ أَوَاڒنْ-أَ ذڭْ إِمزُّوغنْ نْسنْ ؤُشَا أَذْ ڭّغْ أَجنَّا ذ ثمُّورْثْ ذ ڒشْهُوذْ ضِيدّْ نْسنْ. ٢٩ مِينْزِي نشّْ سّْنغْ أَقَا أَوَارْنِي ڒْْموْثْ إِنُو أَذْ ثْفسْذمْ أَڒْ طَّارْفْ ؤُشَا أَذْ ثفّْغمْ خْ وبْرِيذْ نِّي خْ كنِّيوْ ؤُمُورغْ. ذڭْ ؤُنڭَّارْ ن وُوسَّانْ، أَذْ ثڭّمْ ڒْْغَارْ ذِي ثِيطَّاوِينْ ن سِيذِي أَڒْ غَا ث ثسْعَارمْ س ڒْْخذْمثْ إِ ثڭِّيمْ س إِفَاسّنْ نْومْ.“

٣٠ خنِّي إِسِّيوڒْ مُوسَا ذڭْ إِمزُّوغنْ ن مَارَّا أَڭْرَاوْ ن ڒْْڭنْسْ ن إِسْرَائِيل س وَاوَاڒنْ ن ثِيزْڒِيثْ-أَ أَڒَامِي ثنْ إِكمّڒْ.

◘٣١:٢ 31:‏2 ڒخْڒ. 27‏:‏12؛ أَعَوذ. 3‏:‏26

◘٣١:٣ 31:‏3 ڒخْڒ. 27‏:‏18

◘٣١:٤ 31:‏4 ڒخْڒ. 21‏:‏24، 33

◘٣١:٥ 31:‏5 أَعَوذ. 7‏:‏1، 2

◘٣١:٦ 31:‏6 ياش. 1‏:‏5؛ عبر. 13‏:‏5

◘٣١:٨ 31:‏8 ياش. 1‏:‏9

◘٣١:١١ 31:‏11 عِز. 8

◼٣١:١٧ 31:‏17 ’وَارْ كِيذِي إِدْجِي‘ - س ثْعِيبْرَانِيثْ ’وَارْ إِدْجِي ذِي ڒْْوسْثْ إِنُو‘.

◼٣١:٢١ 31:‏21 ’ثَارْوَا‘ - س ثْعِيبْرَانِيثْ ’زَاأَذْ‘.

◘٣١:٢٣ 31:‏23 ياش. 1‏:‏6

◘٣١:٢٦ 31:‏26 2 إِج. 22‏:‏8