١ ”سْڒمْ، أَ إِجنْوَانْ، أَذْ سِّيوْڒغْ!

أجّْ ثَامُّورْثْ أَذْ ثْسڒْ

إِ وَاوَاڒنْ ن ؤُقمُّومْ إِنُو!

٢ أجّْ ثَاغُورِي إِنُو أَذْ ثُوذمْ أَمْ ونْژَارْ،

أَذْ هْوَانْثْ ثِيوَاڒِينْ إِنُو أَمْ نّْذَا،

أَمْ إِشْثْ ن ثْهِيضُورْثْ خْ ؤُغمُّويْ أَزِيزَا

ؤُ أَمْ ثْنشْنَاشِينْ خْ وفْسُو،

٣ مِينْزِي نشّْ أَذْ بَارّْحغْ إِسمْ ن سِيذِي،

أَرّمْ-د ڒمْغَارثْ إِ أَربِّي نّغْ!

٤ نتَّا ذ ثَاصْضَارْثْ، ڒْْخذْمثْ نّسْ نِيشَانْ،

مِينْزِي مَارَّا إِبْرِيذنْ نّسْ تّْوَاسڭّْذنْ،

إِجّْ ن أَربِّي ذ أَمْثِيقِّي بْڒَا ڒْْغشّْ،

أَقَا-ث ذ أَمْسڭّذْ، نِيشَانْ إِ يدْجَا.

٥ ڒْْڭنْسْ أَقَا إِسّفْسذْ إِخفْ نّسْ،

نِيثْنِي وَارْ دْجِينْ شَا ذ إِحنْجِيرنْ نّسْ،

مَاشَا ذ ڒفْضِيحثْ،

أَقَا-ث ذ إِجّْ ن جِّيڒْ إِفَارْغْ، إِخْنُونّسْ.

٦ مَا ثخْسمْ أَذْ ثڭّمْ أَيَا إِ سِيذِي،

أَ ڒْْڭنْسْ أَبُوهَاڒِي ذ وفْغُورْ!

مَا وَارْ إِدْجِي نتَّا ذ بَابَاشْ نِّي شكْ إِسْغِينْ،

ذ ونِّي شكْ إِڭِّينْ

ؤُ ذ ونِّي شكْ إِكوّْننْ؟

٧ إِذَارمْ ؤُسَّانْ إِعْذُونْ،

خمّمْ إِسڭّْوُوسَا ن جِّيڒْ أَڒْ جِّيڒْ،

سقْسَا بَابَاشْ ؤُ نتَّا أَذْ أَشْ ث إِعَاوذْ

سقْسَا إِمْغَارنْ ؤُ نِيثْنِي أَذْ أَشْ ث إِنِينْ.

٨ ؤُمِي إِوْشَا ؤُمْعُودْجِي خْ كُوڒْشِي

ثَاسْغَارْثْ نْسنْ إِ مَارَّا ڒڭْنُوسْ،

ؤُمِي إِبْضَا ثَارْوَا ن بْنَاذمْ،

إِسّْڭعّذْ إِيْمِيرنْ ن ڒڭْنُوسْ

عْلَاحْسَابْ ڒْْقدّْ ن أَيْثْ ن إِسْرَائِيل.

٩ مِينْزِي ثَاسْغَارْثْ ن سِيذِي ذ ڒْْڭنْسْ نّسْ،

يَاعْقُوبْ ذ أَفِيڒُو ن ڒعْبَارْ ن ثسْغَارْثْ نّسْ.

١٠ يُوفَا إِ-ث ذِي ثمُّورْثْ ن ڒخْڒَا،

ذِي ثْنزْرُوفْثْ إِخْڒَانْ أَكْ-ذ ڒوْحُوشْ

إِتّْزُونْ، إِسّْغُويُّونْ.

إِنّضْ أَسْ-د، إِسّڒْمذْ إِ-ث،

إِحْضَا إِ-ث أَمْ مُومُّو ن ثِيطّْ نّسْ.

١١ أَمْ ؤُڭِيذرْ نِّي إِسّْفَاقنْ ڒْْعُوشّْ نّسْ،

إِطَّاوْ سنّجْ إِ وَارُّوذْ نّسْ زِي سَّا غَارْ ذَا،

إِتّْبزّعْ أَفْرِيونْ نّسْ،

إِكْسِي إِ-ث ؤُشَا يَاربُّو ث خْ وَافْرِيونْ نّسْ،

١٢ أَمُّو إِ إِنْذهْ إِ-ث سِيذِي وَاهَا

ؤُشَا وَارْ ثُوغِي ذِينْ أَكِيذسْ

شَا ن أَربِّي ذ أَغْرِيبْ.

١٣ إِسّنْيَا إِ-ث خْ ثْعُوڒَاڒْ ن ثمُّورْثْ

ؤُشَا إِشَّا ڒْْغِيدْجثْ ن ييَّارْ.

إِجَّا إِ-ث أَذْ إِژمّْ ثَامّنْثْ زِي جَّارْفْ،

ذ زّشْثْ زڭْ وژْرُو ن ثصْضَارْثْ، ◘32:‏13 أَعَوذ. 33‏:‏26، إِشا. 58‏:‏14

١٤ ذ ثْرُوسِّي ن ثْفُونَاسِينْ ذ ؤُغِي ن وُودْجِي

س ثَاذُونْثْ ن إِزْمَارنْ ذ إِشَارِّييّنْ،

إِنِّي إِدْجَانْ أَمْ ثَارْوَا ن بَاشَانْ،

ؤُ س ثَاذُونْثْ ن إِغَايْضنْ،

س مُومُّو ن وَارنْ ن إِرْذنْ.

عَاوذْ شكْ ثسْوِيذْ زڭْ إِذَامّنْ ن ؤُضِيڒْ،

أَكْ-ذ ؤُكُوفُّو نّسْ خَاسْ.

١٥ إِذْوڒْ يَاشُورُونْ إِقْبُوبّزْ

ؤُشَا إِژّعْبضْ

- ’أَقَا ثْمسْڒذْ ؤُ ثقْبُوبّْزذْ،

وَاهْ، س ثَاذُونْثْ ثتّْوَاذْڒذْ!‘ -

ؤُشَا إِسْمحْ ذِي أَربِّي

نِّي إِ-ث د-إِخڒْقنْ

ؤُشَا إِسّحْقَارْ ثَاصْضَارْثْ ن ؤُسنْجمْ نّسْ.

١٦ س إِربِّيثنْ إِغْرِيبنْ

سّكَّارنْ نِيثْنِي ثُوسْمِي نّسْ،

س جّْعَايفْ سْعَارنْ ث.

١٧ نِيثْنِي قدّْمنْ ثِيغَارْصَا إِ شّْوَاطنْ،

وَارْ إِدْجِي إِ أَربِّي،

إِ إِربِّيثنْ نِّي وَارْ سِّيننْ،

إِربِّيثنْ ن جْذِيذْ،

إِنِّي د-يُوسِينْ عَاذْ مَامّشْ،

وَارْ زَّايْسنْ تَّارْجِيجنْ ڒجْذُوذْ نْومْ.

١٨ ثَاصْضَارْثْ نِّي إِ شكْ د-يجِّينْ،

ثْسمْحذْ ذَايسْ

ؤُ ثتُّوذْ أَربِّي

نِّي إِ شكْ د-يُورْونْ س ڒوْجعْ.

١٩ إِژْرَا سِيذِي مَانْ أَيَا ؤُشَا إِسّهْقَارْ إِ-ثنْ،

زِي سِّيبّثْ ن ؤُسْذُوقّزْ

ن إِحنْجِيرنْ نّسْ ذ يسِّيسْ.

٢٠ نتَّا إِنَّا:

’أَذْ زَّايْسنْ فَّارغْ ؤُذمْ إِنُو،

أَذْ ژَترغْ مَامّشْ غَا يِيڒِي

زّْمَانْ ؤُنڭَّارُو نْسنْ،

مِينْزِي نِيثْنِي ذ إِجّْ ن جِّيڒْ إِتّْنقْڒَابْ،

ذ ثَارْوَا إِ ذِي وَارْ إِدْجِي ڒْْمَانثْ.

٢١ نِيثْنِي سّكَّارنْ ثُوسْمِي إِنُو

س مِينْ وَارْ إِدْجِينْ ذ أَربِّي،

سْعَارنْ أَيِي س لْ-أَصْنَامْ نْسنْ إِبطّْڒنْ.

نشّْ أَذْ سّكَّارغْ ثُوسْمِي نْسنْ

س مِينْ وَارْ إِدْجِينْ ذ ڒْْڭنْسْ،

س يِيجّْ ن ڒْْڭنْسْ ذ أَبُوهَاڒِي أَذْ ثنْ سْعَارغْ. ◘32:‏21 رُوم. 10‏:‏19

٢٢ مِينْزِي س وغْضَابْ إِنُو ثكَّارْ ثْمسِّي،

أَذْ ثشْمضْ أَڒْ ڒَْاخَارْثْ ذِينْ سْوَادَّايْ،

ؤُشَا أَذْ ثشّْ ثَامُّورْثْ ذ ڒْْغِيدْجثْ نّسْ،

ؤُ أَذْ ثسّشْمضْ ثِيسِي ن إِذُورَارْ. ◘32:‏22 إِرْم. 15‏:‏14

٢٣ نشّْ أَذْ أَسنْ أَرْنِيغْ إِشڒْوَاونْ،

أَذْ خَاسنْ نيّْشغْ فْڒِيثْشَاثْ إِنُو.

٢٤ أَذْ تّْوَاهيّْفنْ س ڒَْاژْ

ؤُشَا أَذْ تّْوَاصَارْضنْ س طَّاعُونْ

ؤُ س وَاردّدْجْ أَمرْزَاڭْ

ؤُ نشّْ أَذْ ذَايْسنْ سّكّغْ

ثِيغْمَاسْ ن ڒْْمَاڒْ

س سّمْ إِنقّنْ ن إِفِيغْرَانْ

إِنِّي إِتّْمُودْجُوغنْ ذِي ثْعجَّاجْثْ.

٢٥ زِي بَارَّا أَذْ إِكّسْ سِّيفْ ثَارَّاوْثْ،

ؤُ زڭْ وخَّامْ ن ذَاخڒْ

أَذْ ثڒْقفْ ثِيڭّْوُوذِي:

أَمْ ؤُبْڒِيغْ أَمْ ثعْزَارشْثْ،

أَسيْمِي أَكْ-ذ ؤُمشَّايْبُو.

٢٦ ثُوغَا خْسغْ أَذْ إِنِيغْ:

’أَمْ ؤُسمِّيضْ أَذْ ثنْ فَارثْكغْ،

أَذْ سّْبدّغْ ڒِْيذَارثْ نْسنْ جَارْ إِوْذَانْ!‘،

٢٧ مْڒِي وَارْ دْجِيغْ تّڭّْوِيذغْ

زڭْ وسْعَارْ ن ڒعْذُو،

حِيمَا إِغْرِيمنْ نْسنْ وَارْ ث نكَّارنْ

ؤُشَا أَذْ إِنِينْ:

’إِفَاسّنْ نّغْ،

إِنِّي إِتّْوَاسّْڭعّْذنْ أَمُّو س جّهْذْ،

ڭِّينْ أَيَا مَارَّا، وَارْ إِدْجِي ذ سِيذِي.‘

٢٨ مِينْزِي نِيثْنِي ذ إِجّْ ن ڒْْڭنْسْ بْڒَا أَرَّايْ

ؤُ وَارْ ذَايْسنْ ڒفْهَامثْ.

٢٩ مْڒِي ڭِّينْ ثِيغِيثْ،

خنِّي إِڭُّورْ أَذْ فهْمنْ أَيَا

ؤُ أَذْ وْشنْ ثَايْنِيثْ إِ ؤُنڭَّارْ نْسنْ.

٣٠ مَامّشْ إِزمَّارْ أَذْ إِضْفَارْ

إِجّْ ن بْنَاذمْ أَڒفْ ن إِوْذَانْ

ؤُ مَامّشْ زمَّارنْ ثْنَاينْ

أَذْ أَرّنْعشْرَا-أَڒَافْ أَذْ أَروْڒنْ،

مَاڒَا وَارْ ذ أَسنْ ثمّنْزْ ثصْضَارْثْ نْسنْ

ؤُشَا وَارْ ذ أَسنْ إِسلّمْ سِيذِي إِ نِيثْنِي؟

٣١ مِينْزِي ثَاصْضَارْثْ نْسنْ

وَارْ ثدْجِي أَمْ ثَاصْضَارْثْ نّغْ.

أجّْ أَذْ حكْمنْ ڒْْعذْيَانْ نّغْ س إِخفْ نْسنْ.

٣٢ مِينْزِي ثَازَايَارْثْ نْسنْ

ثدْجَا زِي ثْزَايَارْثْ ن سَاذُومْ

ؤُ زڭْ إِيَّارنْ ن عَامُورَّا.

أَضِيڒْ نْسنْ ذ أَضِيڒْ ن سّمْ،

غَارْسنْ إِزكُّوننْ شُّورنْ س ثَارْزُوڭِي. ◼32:‏32 ’ثَازَايَارْثْ‘ - نِيغْ ’ضِيڒشْثْ‘.

٣٣ بِينُو نْسنْ

أَمشْنَاوْ أَسُوضِي ن ثْمسِّي ن ڒْْهَايْشَاثْ،

أَمشْنَاوْ سّمْ إِنقّنْ ن ثْڒفْسِيوِينْ.

٣٤ مَا مَارَّا أَيَا وَارْ غَارِي إِتّْوَاخْزنْ،

إِتّْوَاشمّعْ ذڭْ إِخَّامنْ ن ثْخُوبَايْ إِنُو؟

٣٥ ذ نشّْ إِ يدْجَانْ خْ نّقْمثْ ذ ڒخْڒَاصْ،

خْمِي غَا إِحْڒُودْجضْ ؤُضَارْ نْسنْ.

أَسّْ ن ؤُضيّعْ نْسنْ أَقَا يُوذسْ،

ؤُشَا مِينْ خَاسنْ إِ غَا يِيڒِي، أَذْ إِمْسَارْ ذغْيَا. ◘32:‏35 رُوم. 12‏:‏19؛ عبر. 10‏:‏30؛ 1 بُط. 2‏:‏23

٣٦ مِينْزِي سِيذِي أَذْ إِڭّْ س ڒْْحقّْ

ذِي طّْوعْ ن ڒْْڭنْسْ نّسْ،

نتَّا أَذْ إِحنّْ خْ إِمْسخَّارنْ نّسْ

خْمِي غَا إِژَارْ بلِّي جّهْذْ إِمّكْسِي،

ؤُشَا وَارْ ذِينْ إِقِّيمْ عَاذْ

ونِّي إِتّْوَاطّْفنْ ذ ونِّي إِجِّينْ. ◼32:‏36 ’جّهْذْ‘ - س ثْعِيبْرَانِيثْ ’أَفُوسْ‘ ونِّي ذ ڒعْڒَامثْ ن جّهْذْ ذ ثْزمَّارْ ن بْنَاذمْ.  ◘32:‏36 إِزهد. 135‏:‏14؛ إِزهد. 90‏:‏13

٣٧ خنِّي أَذْ يِينِي:

’مَانِي دْجَانْ إِربِّيثنْ نْسنْ،

مَانِي ثَاصْضَارْثْ إِ غَارسْ ؤُفِينْ أَذُورِّي؟

٣٨ مَانِي دْجَانْ إِربِّيثنْ نِّي زِي

شِّينْ ثَاذُونْثْ ن ثْغَارْصَا نْسنْ،

إِنِّي زِي سسّنْ بِينُو

ن ثوْهِيبِينْ ن ؤُسيّبْ نْسنْ؟

أجّْ إِ-ثنْ أَذْ كَّارنْ، أَذْ شكْ عَاوْننْ

ؤُ أجّْ إِ-ث أَذْ خَاومْ إِسّْذُورِي.‘

٣٩ خْزَارمْ ڒخُّو،

أَقَا ذ نشّْ، وَاهْ ذ نشّْ،

ؤُ وَارْ ذِينْ شَا ؤُڒَا ذ إِجّْ ن أَربِّي أَكِيذِي.

نشّْ نقّغْ ؤُ نشّْ سّدَّارغْ،

نشّْ ڒبّْزغْ ؤُ سّْڭنْفِيغْ

ؤُ وَارْ ذِينْ وِي غَا إِفكّنْ زڭْ ؤُفُوسْ إِنُو. ◘32:‏39 أَعَوذ. 4‏:‏35؛ 1 صم. 2‏:‏6؛ إِشا. 45‏:‏5، 18، 22

٤٠ مِينْزِي نشّْ أَذْ سّْوِيژّْضغْ أَفُوسْ إِنُو

غَارْ ؤُجنَّا،

أَذْ إِنِيغْ: ’نشّْ أَقَا دَّارغْ إِ ڒبْذَا!‘

٤١ مَاڒَا سّْقضْعغْ سِّيفْ إِنُو إِتّْوسّْڭنْ

ؤُشَا أَفُوسْ إِنُو أَذْ إِطّفْ ذِي ڒْْحُوكْمْ،

خنِّي نشّْ أَذْ نْثَاقْمغْ زِي إِغْرِيمنْ إِنُو

ؤُ زڭْ إِنِّي ذ أَيِي إِشَارّْهنْ.

٤٢ أَذْ سّسْشَارغْ فْڒِيثْشَاثْ ن ڒْْقوْسْ إِنُو

س إِذَامّنْ،

ؤُشَا سِّيفْ إِنُو أَذْ إِسَارْضْ أَيْسُومْ،

إِذَامّنْ ن ونِّي إِتّْوَانْغنْ

ؤُ ن ونِّي إِتّْوَاحبّْسنْ

أَزدْجِيفْ ن ڒعْذُو

أَكْ-ذ إِجطَّاينْ ن ؤُشُوَّافْ نّسْ. ◘32:‏42 إِزهد. 68‏:‏22

٤٣ سْڒِيوْڒومْ، أَ ڒڭْنُوسْ!، أَكْ-ذ ڒْْڭنْسْ نّسْ،

مِينْزِي نتَّا أَذْ إِنْثَاقمْ

إِ إِذَامّنْ ن إِمْسخَّارنْ نّسْ،

أَذْ يَارَّا نّقْمثْ خْ إِغْرِيمنْ نّسْ،

ؤُشَا أَذْ إِڭّْ وصْڒَاحْ

إِ ثمُّورْثْ نّسْ ذ ڒْْڭنْسْ نّسْ.“ ◼32:‏43 ’إِڭّْ وصْرَاحْ‘ - خْزَارْ إِزهد. 78:35: إِفْذِي، أَمفْذِي.  ◘32:‏43 رُوم. 15‏:‏10

٤٤ يُوسَا-د مُوسَا ؤُشَا إِسِّيوڒْ مَارَّا أَوَاڒنْ ن ثِيزْڒِيثْ-أَ خْ إِمزُّوغنْ ن ڒْْڭنْسْ، نتَّا جْمِيعْ أَكْ-ذ هُوشِيعَا، مِّيسْ ن نُونْ. ◼32:‏44 ’هُوشِيعَا‘ - إِجّْ ن يِيسمْ نّغْنِي إِ يَاشُووَا. ٤٥ ؤُمِي إِكمّڒْ مُوسَا مَارَّا أَوَاڒنْ-أَ إِ زِي إِسِّيوڒْ غَارْ مَارَّا إِسْرَائِيل، ٤٦ إِنَّا أَسنْ: ”أَرّمْ مَارَّا أَوَاڒنْ-أَ نِّي خْ ذ أَومْ نِّيغْ أَسّْ-أَ غَارْ وُوڒْ نْومْ، حِيمَا أَذْ ثنْ ثُومُورمْ إِ إِحنْجِيرنْ نْومْ مَاحنْذْ أَذْ حْضَانْ مَارَّا أَوَاڒنْ ن شَّارِيعَا-يَا أَذْ زَّايْسنْ ڭّنْ، ٤٧ مِينْزِي وَارْ إِدْجِي ذ أَوَاڒْ ن بَاطڒْ إِ كنِّيوْ، مَاشَا ذ ثُوذَارْثْ نْومْ. س وَاوَاڒْ-أَ أَذْ ثزُّوڭَّارْثمْ ؤُسَّانْ نْومْ خْ ثمُّورْثْ إِ غَارْ غَا ثژْوِيمْ خْ لْ-ؤُرْذُونْ، مَاحنْذْ أَذْ ت ثطّْفمْ ذ ڒْْوَارْثْ.“

٤٨ إِسِّيوڒْ سِيذِي أَكْ-ذ مُوسَا ذڭْ وَاسّْ نِّي، إِنَّا:

٤٩ ”ڭعّذْ أَذْرَارْ ن أَبَارِيمْ، أَقَا-ث ذ أَذْرَارْ ن نابُو نِّي إِدْجَانْ ذِي ثمُّورْثْ ن مُوآبَ أَرنْذَاذْ ن أَرِيحَا، ؤُشَا خْزَارْ ثَامُّورْثْ ن كنْعَانْ نِّي إِ غَا وْشغْ ذ ڒْْوَارْثْ إِ أَيْثْ ن إِسْرَائِيل، ◘32:‏49 ڒخْڒ. 27‏:‏12 ٥٠ ؤُشَا مّثْ خْ وذْرَارْ نِّي غَارْ غَا ثْڭعّْذذْ. أَذْ ثْذوْڒذْ أَذْ ثمَّارْنِيذْ غَارْ ڒْْڭنْسْ نّشْ، أَمْ مَامّشْ إِمُّوثْ ؤُمَاشْ هَارُونْ خْ وذْرَارْ ن هُورْ ؤُشَا إِمَّارْنِي غَارْ ڒْْڭنْسْ نّسْ، ◘32:‏50 ڒخْڒ. 27‏:‏13؛ 33‏:‏38 ٥١ مِينْزِي كنِّيوْ ثغْذَاڒمْ زَّايِي ذِي ڒْْوسْطْ ن أَيْثْ ن إِسْرَائِيل غَارْ وَامَانْ ن مَارِيبَا-قَاذَاشْ ذِي ڒخْڒَا ن صِينْ، مِينْزِي كنِّيوْ وَارْ ذ أَيِي ثسّْقدّْسمْ ذِي ڒْْوسْطْ ن أَيْثْ ن إِسْرَائِيل. ◘32:‏51 ڒخْڒ. 20‏:‏12 ٥٢ خنِّي ڒخُّو أَذْ طْژَارذْ ثَامُّورْثْ زَّاثكْ، مَاشَا وَارْ تِّيذْفذْ شَا غَارْ ثمُّورْثْ نِّي إِ غَا وْشغْ إِ أَيْثْ ن إِسْرَائِيل.“