١ إِسِّيوڒْ أَربِّي مَارَّا أَوَاڒنْ-أَ، إِنَّا:

٢ ”نشّْ ذ سِيذِي، أَربِّي نّشْ، ونِّي شكْ د-إِسُّوفّْغنْ زِي ثمُّورْثْ ن مِيصْرَا، زِي ثَادَّارْثْ ن ثسْمُوغِي. ◘20:‏2 ؤُف. 13‏:‏3؛ أَعَوذ. 5‏:‏6؛ إِزهد. 81‏:‏11

٣ وَارْ غَاركْ تِّيڒِينْ إِربِّيثنْ نّغْنِي زَّاثْ إِ وُوذمْ إِنُو.

٤ وَارْ تّڭّْ إِ يِيخفْ نّشْ ڒخْيَاڒْ إِنقْشنْ نِيغْ شَا ن ڒْْحَاجّثْ ثَارْوسْ ذِي مِينْ إِدْجَانْ سنّجْ ذڭْ ؤُجنَّا نِيغْ ذِي شَا ذَا سْوَادَّايْ ذِي ثمُّورْثْ نِيغْ ذِي شَا ذڭْ وَامَانْ إِ إِدْجَانْ سَاذُو ثمُّورْثْ. ◘20:‏4 لَاوِي 26‏:‏1؛ إِزهد. 97‏:‏7 ٥ وَارْ ذ أَسنْ تّْبنْذِيقْ ؤُڒَا أَذْ خَاسنْ ثْسخَّارذْ، مِينْزِي نشّْ، سِيذِي، أَربِّي نّشْ، ذ إِجّْ ن أَربِّي إِتَّاسْمنْ، ونِّي د-يَارزْفنْ ڒْْمُوعْصِييّثْ ن إِبَابَاثنْ ذِي ثَارْوَا أَڒْ جِّيڒْ وِيسّْ ثْڒَاثَا ذ وِيسّْ أَربْعَا ن يِينِّي ذ أَيِي إِشَارّْهنْ، ٦ ذ ونِّي إِسّْشَاننْ ثَامخْسِيوْثْ نّسْ إِشوَّارنْ إِ ڒُْوڒُوفْ ن يِينِّي ذ أَيِي إِتّخْسنْ ؤُ حطَّانْ ڒُْومُورَاثْ إِنُو.

٧ وَارْ نطّقْ س يِيسمْ ن سِيذِي، أَربِّي نّشْ، ذِي ڒْْبَاطڒْ، مِينْزِي وَارْ إِتّْبَارِّي سِيذِي إِ ونِّي إِ غَا إِنطْقنْ س يِيسمْ نّسْ ذِي ڒْْبَاطڒْ. ◘20:‏7 لَاوِي 9‏:‏12؛ إِزهد. 139‏:‏20؛ مت. 5‏:‏33؛

٨ إِذَارْ أَسّْ ن سّبْثْ، حِيمَا أَذْ ث ثسّْقدّْسذْ. ◘20:‏8 حِز. 20‏:‏12 ٩ ستَّا ن وُوسَّانْ إِ غَا ثْخذْمذْ، أَذْ ثڭّذْ مَارَّا ڒْْخذْمثْ نّشْ. ◘20:‏9 ؤُف. 23‏:‏12؛ 34‏:‏21؛ لك. 13‏:‏14 ١٠ أَسّْ وِيسّْ سبْعَا ذ وَاسّْ ن سّبْثْ ن سِيذِي، أَربِّي نّشْ. وَارْ ذَايسْ تّڭّْ ؤُڒَا ذ إِشْثْ ن ڒْْخذْمثْ، شكْ لَّا، ؤُڒَا ذ مِّيشْ لَّا، ذ يدْجِيشْ لَّا، ذ إِسْمغْ نّشْ لَّا، ذ ثَايَّا نّشْ لَّا، ذ ڒبْهِيمثْ نّشْ لَّا، ؤُڒَا ذ أَبَارَّانِي نِّي أَكِيذكْ إِدْجَانْ ذَاخڒْ إِ ثوُّورَا نّشْ لَّا. ١١ مِينْزِي ذِي ستَّا ن وُوسَّانْ إِڭَّا سِيذِي إِجنْوَانْ ذ ثمُّورْثْ، ڒبْحَارْ ذ مَارَّا مِينْ ذَايسْ ؤُشَا يَاريّحْ ذڭْ وَاسّْ وِيسّْ سبْعَا. خْ ؤُيَا إِبَاركْ سِيذِي أَسّْ ن سّبْثْ ؤُشَا إِسّْقدّسْ إِ-ث. ◘20:‏11 أَمز. 2‏:‏2

١٢ وقَّارْ بَابَاشْ ذ يمَّاشْ، مَاحنْذْ ؤُسَّانْ ن ثُوذَارْثْ نّشْ زمَّارنْ أَذْ زُّوڭَّارْثنْ ذِي ثمُّورْثْ إِ ذ أَشْ غَا يوْشْ سِيذِي، أَربِّي نّشْ. ◘20:‏12 مت. 15‏:‏4؛ أَفا. 6‏:‏2

١٣ وَارْ نقّْ. ◘20:‏13 مت. 5‏:‏21

١٤ وَارْ زنَّا. ◘20:‏14 مت. 5‏:‏27

١٥ وَارْ تَّاشَارْ.

١٦ وَارْ شهّذْ س ژُورْ ضِيدّْ إِ جَّارْ نّشْ.

١٧ وَارْ مژْرِي ذِي شَا، ثَادَّارْثْ ن جَّارْ نّشْ وَارْ ذَايسْ مژْرِي. وَارْ مژْرِي ذِي ثَامْغَارْثْ ن جَّارْ نّشْ، نِيغْ ذڭْ يِيسْمغْ نّسْ، نِيغْ ذِي ثَايَّا نّسْ، نِيغْ ذڭْ ؤُفُونَاسْ نّسْ، نِيغْ ذڭْ وغْيُوڒْ نّسْ ؤُڒَا ذڭْ إِشْثْ ن ڒْْحَاجّثْ إِ إِدْجَانْ ن جَّارْ نّشْ.“ ◘20:‏17 رُوم. 7‏:‏7

١٨ مَارَّا ڒْْڭنْسْ إِژْرَا ؤُ إِسْڒَا إِ وَاجَّاجنْ ذ وَاسَّامنْ ذ دّْرِيزْ ن ؤُسُوضِي ذڭْ ؤُيِيشّْ ن إِشَارِّي ذ وذْرَارْ إِدُّوخُّوننْ. ؤُمِي إِژْرَا ڒْْڭنْسْ مَانْ أَيَا، خنِّي أَرْجِيجنْ ؤُشَا بعّْذنْ نِيثْنِي غَارْ ڒَْاڭّْوَاجْ. ◘20:‏18 ؤُف. 19‏:‏16؛ أَسَا. 4‏:‏5 ١٩ نَّانْ إِ مُوسَا: ”سِيوڒْ شكْ أَكِيذْنغْ ؤُشَا أَذْ نْسڒْ. مَاشَا إِتّْخصَّا أَربِّي وَارْ كِيذْنغْ إِسِّيوِيڒْ، حِيمَا وَارْ نتّْمتِّي!“ ◘20:‏19 أَعَوذ. 5‏:‏25؛ عبر. 12‏:‏19 ٢٠ إِنَّا مُوسَا إِ ڒْْڭنْسْ: ”وَارْ ثڭّْوذمْ شَا، أَقَا يُوسَا-د أَربِّي، حِيمَا أَذْ كنِّيوْ إِقدْجبْ ؤُ حِيمَا أَذْ زَّايسْ ثڭّْوذمْ مَاحنْذْ وَارْ ثْخطِّيمْ شَا.“ ٢١ إِبدّْ ڒْْڭنْسْ زِي ڒَْاڭّْوَاجْ، مَاشَا مُوسَا إِقَارّبْ-د غَارْ ؤُسيْنُو إِبُّومْبْسنْ مَانِي ثُوغَا أَربِّي. ◘20:‏21 ؤُف. 19‏:‏17؛ عبر. 12‏:‏18

٢٢ إِنَّا سِيذِي إِ مُوسَا: ”أَمُّو إِتّْخصَّا أَذْ ثِينِيذْ إِ أَيْثْ ن إِسْرَائِيل: ’كنِّيوْ ثژْرِيمْ بلِّي سِّيوْڒغْ-د أَكِيذْومْ زڭْ ؤُجنَّا. ٢٣ وَارْ كِيذِي تّڭّمْ إِربِّيثنْ ن نُّوقَارْثْ ؤُ وَارْ تّڭّمْ إِربِّيثنْ ن وُورغْ إِ يِيخفْ نْومْ. ٢٤ أڭّْ أَيِي إِجّْ ن ؤُعَالْطَارْ س ؤُشَاڒْ، قدّمْ خَاسْ ثِيغَارْصَا نّشْ ن وشْمَاضْ ذ ثِيغَارْصَا نّشْ ن ڒهْنَا، ؤُدْجِي نّشْ ذ إِفُونَاسنْ ذ ثْفُونَاسِينْ نّشْ. ذِي كُوڒْ أَمْشَانْ مَانِي غَا ڭّغْ ڒِْيذَارثْ ن يِيسمْ إِنُو، أَذْ غَاركْ د-أَسغْ ؤُشَا أَذْ أَشْ بَارْكغْ. ◘20:‏24 ؤُف. 27‏:‏1؛ 38‏:‏1 ٢٥ مَاڒَا ثڭِّيذْ أَيِي إِجّْ ن ؤُعَالْطَارْ ن إِژْرَا، وَارْ ث ثْبنِّيذْ س ثْصُوضَارْ إِتّْوَاسُّويْذَانْ، مِينْزِي مَاڒَا ثدّْزذْ س ؤُڒيْزِيمْ نّشْ، إِڒِي أَذْ ث ثسّْعِيدْجْثذْ. ◘20:‏25 أَعَوذ. 27‏:‏5؛ ياش. 8‏:‏30، 31 ٢٦ وَارْ تّْڭِيعِّيذْ غَارْ ؤُعَالْطَارْ إِنُو س يِيجّْ ن دّْرُوجْ، حِيمَا وَارْ إِتّْبِينْ ؤُسضْحِي نّشْ.“