١ ”ثِينَا إِ إِدْجَانْ ذ لْفَارَايِيضْ نِّي ذ أَسنْ غَا ثسِّيوْضذْ. ٢ مَاڒَا ثسْغِيذْ إِسْمغْ ذ أَعِيبْرَانِي، خنِّي نتَّا أَذْ أَشْ إِسخَّارْ ستَّا ن إِسڭّْوُوسَا، مَاشَا ذڭْ ؤُسڭّْوَاسْ وِيسّْ سبْعَا أَذْ إِفّغْ ذ أَحُورِّي بَاطڒْ. ◘21:‏2 أَعَوذ. 15‏:‏12؛ إِرْم. 34‏:‏14 ٣ مَاڒَا يُوذفْ وحّْذسْ، وحّْذسْ إِ غَا إِفّغْ، مَاڒَا غَارسْ ثَامْغَارْثْ، أَذْ إِفّغْ نتَّا ذ ثمْغَارْثْ نّسْ. ٤ مَاڒَا سِيذِيسْ إِوْشَا أَسْ ثَامْغَارْثْ ؤُشَا نتَّاثْ ثجَّا أَسْ-د إِحنْجِيرنْ ذ ثْحنْجِيرِينْ، خنِّي ثَامْغَارْثْ ذ ثَارْوَا نّسْ أَذْ إِڒِينْ ن سِيذِيسْ، ؤُ خنِّي نتَّا أَذْ إِفّغْ س إِمَانْ نّسْ. ٥ مَاشَا مَاڒَا إِسْمغْ إِنَّا نِيشَانْ: ’نشّْ خْسغْ سِيذِي إِنُو ذ ثمْغَارْثْ إِنُو ذ ثَارْوَا إِنُو، وَارْ خْسغْ أَذْ فّْغغْ ذ أَحُورِّي!‘، ◘21:‏5 أَعَوذ. 15‏:‏16 ٦ ڒخْذنِّي سِيذِيسْ أَذْ ث إِسّْبدّْ زَّاثْ إِ أَربِّي. أَذْ ث يَاوِي غَارْ ثوَّارْثْ نِيغْ غَارْ ثفْڒَاوْثْ غَارْ ؤُغزْذِيسْ ن ثوَّارْثْ ؤُشَا سِيذِيسْ أَذْ أَسْ إِسّْنُوقّبْ أَمجِّينْ نّسْ س يِيشْثْ ن ثْسِينفْثْ ؤُشَا نتَّا أَذْ أَسْ إِسخَّارْ إِ ڒبْذَا. ◘21:‏6 أَعَوذ. 15‏:‏17 ٧ مَاڒَا إِزّنْزْ حذْ يدْجِيسْ ذ ثَايَّا، وَارْ إِتّفِّيغْ أَمْ مُوخَاسْ تّفّْغنْ إِسمْغَانْ. ٨ مَاڒَا وَارْ ثعْجِيبْ إِ ثِيطَّاوِينْ ن سِيذِيسْ ؤُ نتَّا ثُوغَا إِخْضبْ إِ-ت، أَذْ ت يجّْ أَذْ ثتّْوَافْذِي. وَارْ إِزمَّارْ أَذْ ت إِزّنْزْ إِ يِيجّْ ن ڒْْڭنْسْ ن بَارَّا مِينْزِي نتَّا إِغْذَارْ زَّايسْ س مِينْ إِڭَّا. ٩ مَاڒَا إِخْضبْ إِ-ت إِ مِّيسْ، أَذْ كِيذسْ يڭّْ عْلَاحْسَابْ لْفَارِيضَا زِي جّْهثْ ن يدْجِيسْ. ١٠ مَاڒَا إِكْسِي ثَامْغَارْثْ نّغْنِي إِ يِيخفْ نّسْ، وَارْ إِنقّصْ ڒْْعُوتْشْ ن ويْسُومْ نّسْ، نِيغْ أَرُّوضْ نّسْ، نِيغْ ڒْْعَاشَارْثْ نّسْ. ١١ مَاڒَا نتَّا وَارْ ذ أَسْ إِڭِّي ثْڒَاثَا-يَا، خنِّي نتَّاثْ أَذْ ثفّغْ بَاطڒْ، بْڒَا ڒخْرَاصْ.“

١٢ ”ونِّي إِ غَا إِوْثنْ حذْ أَڒْ غَا إِمّثْ، أَذْ ث نْغنْ نِيشَانْ. ◘21:‏12 لَاوِي 24‏:‏17 ١٣ مَاڒَا وَارْ ث إِڭِّي نعْمَاذَا، مَاشَا أَربِّي إِڭَّا أَسْ-د ذڭْ ؤُفُوسْ نّسْ، ڒخْذنِّي نشّْ أَذْ أَشْ سّشْنغْ أَمْشَانْ مَانِي إِزمَّارْ أَذْ يَارْوڒْ. ١٤ مَاشَا مَاڒَا يُوفّْ حذْ خْ وَاجَّارْ نّسْ ؤُشَا إِنْغَا إِ-ث س ڒغْذَارثْ، خنِّي أَذْ ث ثكْسِيذْ غَارْ ؤُعَالْطَارْ إِنُو، مَاحنْذْ أَذْ ث نْغنْ.

١٥ ونِّي إِوْثِينْ بَابَاسْ نِيغْ يمَّاسْ، أَذْ إِتّْوَانغْ نِيشَانْ. ◘21:‏15 مت. 15‏:‏4

١٦ ونِّي يُوشَارنْ بْنَاذمْ ؤُشَا إِزّنْزْ إِ-ث، نِيغْ إِتّْوَافْ عَاذْ غَارسْ، أَذْ إِتّْوَانغْ نِيشَانْ.

١٧ ونِّي إِ غَا إِنعْڒنْ بَابَاسْ نِيغْ يمَّاسْ، أَذْ إِتّْوَانغْ نِيشَانْ. ◘21:‏17 لَاوِي 20‏:‏9؛ أَوڒن. 20‏:‏20؛ مت. 15‏:‏4؛ مك. 7‏:‏10

١٨ مَاڒَا إِرْيَازنْ مّْشُوبّْشنْ ؤُشَا إِجّنْ إِوْثَا ونّغْنِي س وژْرُو نِيغْ س ڒْْپُونِييّثْ، ؤُشَا وَانِيثَا وَارْ إِمُّوثْ، مَاشَا إِوْضَا ذِي ثَاسُّوثْ، ١٩ خنِّي، مَاڒَا وَانِيثَا إِكَّارْ عَاوذْ ؤُشَا يُويُورْ غَارْ بَارَّا خْ ثغَّارْشْثْ، أَذْ يِيڒِي ونِّي ث إِوْثِينْ ذ أَمزْذَاڭْ. أَذْ أَسْ إِخدْجصْ مْغِيرْ مِينْ يَاريّحْ ؤُشَا أَذْ ث يجّْ أَذْ إِڭّنْفَا مْلِيحْ.

٢٠ مَاڒَا إِوْثَا حذْ إِسْمغْ نّسْ نِيغْ ثَايَّا نّسْ س وعْمُوذْ ؤُشَا إِمُّوثْ سَاذُو ؤُفُوسْ نّسْ، خنِّي إِتّْخصَّا أَذْ أَسْ يَاغْ خْ ثسْغَارْثْ نّسْ نِيشَانْ. ٢١ مَاشَا مَاڒَا إِقِّيمْ إِبدّْ إِجّْ نِيغْ ثْنَاينْ ن وُوسَّانْ، وَارْ ذ أَسْ يُوغِي ثَاسْغَارْثْ، مِينْزِي نتَّا ذ ثَامنْيَاثْ ن نُّوقَارْثْ نّسْ إِ يدْجَا.

٢٢ مَاڒَا إِرْيَازنْ مّنْغنْ ؤُشَا وْثِينْ إِشْثْ ن ثمْغَارْثْ س دّيْسثْ ؤُشَا إِوْضَا أَسْ-د ؤُعذِّيسْ نّسْ، مَاشَا وَارْ إِدْجِي شَا ذ أَيزِّيمْ، خنِّي نتَّا أَذْ إِخدْجصْ نِيشَانْ إِجّْ ن مُولْثَا عْلَاحْسَابْ مِينْ ذ أَسْ غَا إِتَّارْ ورْيَازْ ن ثمْغَارْثْ ؤُشَا أَذْ ت إِوْشْ إِ ڒْْقُوضَاثْ. ◼21:‏22 ’ڒْْقُوضَاثْ‘ - نِيغْ ’إِمزُورْفَا‘، أَقَا-ثنْ ذ إِوْذَانْ نِّي غَارْ إِدْجْ ثُوسّْنَا ن إِزرْفَانْ (شَّارِيعَا) ؤُشَا سْڒِينْ إِ دّْعَاوِي ن إِوْذَانْ مَاحنْذْ أَذْ خَاسنْ حكّْمنْ. ٢٣ مَاڒَا إِمْسَارْ شَا ن ؤُيزِّيمْ ذ أَعفَّانْ، ڒخْذنِّي أَذْ ثوْشذْ ثُوذَارْثْ س ثُوذَارْثْ، ٢٤ ثِيطّْ س ثِيطّْ، ثِيغْمسْثْ س ثغْمسْثْ، أَفُوسْ س ؤُفُوسْ، أَضَارْ س ؤُضَارْ، ◘21:‏24 لَاوِي 24‏:‏20؛ أَعَوذ. 19‏:‏21؛ مت. 5‏:‏38 ٢٥ أَشْمَاضْ س وشْمَاضْ، أَيزِّيمْ س ؤُيزِّيمْ، ثِيشْثِي س ثشْثِي.

٢٦ مَاڒَا إِڒْقفْ حذْ ثِيطّْ ن إِسْمغْ نّسْ نِيغْ ثِيطّْ ن ثَايَّا نّسْ، إِضيّعْ إِ-ت، خنِّي أَذْ ث يجّْ أَذْ يُويُورْ أَمنِّي زِي سِّيبّثْ ن ثِيطّْ نّسْ. ٢٧ مَاڒَا س ثشْثِي إِتّكّسْ ثِيغْمسْثْ ن إِسْمغْ نّسْ، نِيغْ ثِيغْمسْثْ ن ثَايَّا نّسْ، خنِّي أَذْ أَسْ يجّْ أَذْ يُويُورْ أَمنِّي زِي سِّيبّثْ ن ثغْمسْثْ نّسْ.

٢٨ مَاڒَا أَفُونَاسْ إِبَارّزْ أَرْيَازْ نِيغْ ثَامْغَارْثْ، ؤُ وَانِيثَا إِمُّوثْ، خنِّي أَذْ أَرْجْمنْ أَفُونَاسْ ؤُ أَيْسُومْ نّسْ وَارْ زَّايسْ تّتّنْ. بَابْ ن ؤُفُونَاسْ أَذْ يِيڒِي ذ أَفُورِّي. ◘21:‏28 أَمز. 9‏:‏5 ٢٩ مَاشَا مَاڒَا أَفُونَاسْ ثُوغَا ذ أَبَارّزْ إِضنَّاضْ ذ فَارِيضنَّاضْ ؤُشَا بَابْ نّسْ ثُوغَا إِسّنْ ؤُشَا وَارْ ث إِحْضِي ؤُشَا إِنْغَا أَرْيَازْ نِيغْ ثَامْغَارْثْ، خنِّي أَذْ أَرْجْمنْ أَفُونَاسْ ؤُشَا عَاوذْ أَذْ نْغنْ بَابْ نّسْ. ٣٠ مَاڒَا ڭِّينْ خَاسْ دّيّثْ، ڒخْذنِّي أَذْ إِوْشْ مَارَّا مِينْ خَاسْ ڭِّينْ ذ تَّامَانْ ن ؤُفكِّي إِ ثُوذَارْثْ نّسْ، ◼21:‏30 ’ثُوذَارْثْ‘ - س ثْعِيبْرَانِيثْ ’ڒعْمَارْ‘. ٣١ نِيغْ مَاڒَا أَفُونَاسْ إِبَارّزْ أَحنْجِيرْ نِيغْ ثَاحنْجِيرْثْ. أَذْ أَسْ ڭّنْ عْلَاحْسَابْ لْفَارِيضَا-يَا. ٣٢ مَاڒَا أَفُونَاسْ إِبَارّزْ إِسْمغْ نِيغْ ثَايَّا، أَذْ وْشنْ ثْڒَاثِينْ شِيقْلُو ن نُّوقَارْثْ إِ سِيذِيسْ، ؤُشَا أَفُونَاسْ أَذْ ث أَرْجْمنْ.

٣٣ مَاڒَا يَارْزمْ حذْ أَنُو نِيغْ مَاڒَا إِغْزَا حذْ أَنُو ؤُشَا وَارْ ث إِذْڒِي، ؤُشَا إِوْضَا ذَايسْ ؤُفُونَاسْ نِيغْ أَغْيُوڒْ، ٣٤ خنِّي بَابْ ن وَانُو أَذْ إِخدْجصْ. أَذْ يَارّْ نُّوقَارْثْ إِ بَابْ نّسْ ؤُشَا ڒبْهِيمثْ إِمُّوثنْ أَذْ ثِيڒِي نّسْ.

٣٥ مَاڒَا أَفُونَاسْ إِيْزمْ أَفُونَاسْ ن وَاجَّارْ نّسْ أَڒَامِي إِمُّوثْ، ڒخْذنِّي أَذْ زّنْزنْ أَفُونَاسْ إِدَّارنْ، أَذْ بْضَانْ ثَامنْيَاثْ-أَ جَارْ أَسنْ ؤُشَا أَذْ بْضَانْ عَاوذْ أَفُونَاسْ أَمتِّينْ. ٣٦ مَاشَا مَاڒَا إِسّنْ بلِّي أَفُونَاسْ إِبَارّزْ إِضنَّاضْ ذ فَارِيضنَّاضْ، ؤُشَا بَابْ نّسْ وَارْ ث إِحْضِي، أَذْ إِخدْجصْ أَفُونَاسْ س ؤُفُونَاسْ ؤُشَا أَفُونَاسْ أَمتِّينْ أَذْ يِيڒِي نّسْ. ٣٧ مَاڒَا يُوشَارْ حذْ أَفُونَاسْ نِيغْ إِجّنْ زڭْ وُودْجِي ؤُشَا إِغَارْصْ أَسْ نِيغْ إِزّنْزْ إِ-ث، خنِّي أَذْ إِخدْجصْ خمْسَا ن إِفُونَاسنْ خْ يِيجّْ ن ؤُفُونَاسْ ؤُ أَربْعَا ن وُودْجِي خْ يِيجّنْ ن وُودْجِي.“ ◘21:‏37 2 صم. 12‏:‏6