١ نتَّا إِنَّا أَيِي: ”أَ مِّيسْ ن بْنَاذمْ، مِينْ ثتّْوَاڒِيذْ ذَانِيثَا، أشّْ إِ-ث! أشّْ أَذْلِيسْ-أَ إِتّْوَانّْضنْ ؤُشَا ؤُيُورْ، سِيوڒْ أَكْ-ذ ثَادَّارْثْ ن إِسْرَائِيل.“ ◘3:‏1 إِرْم. 15‏:‏16؛ 2‏:‏8؛ أَسَا. 10‏:‏8‏-‏11 ٢ نشّْ أَرْزْمغْ أَقمُّومْ إِنُو ؤُ نتَّا إِسّشّْ أَيِي أَذْلِيسْ نِّي إِتّْوَانّْضنْ. ٣ إِنَّا أَيِي: ”أَ مِّيسْ ن بْنَاذمْ، عْڒفْ أَعذِّيسْ نّشْ، شُّورْ ثَاكْرِيشْثْ نّشْ س وذْلِيسْ إِتّْوَانّْضنْ نِّي إِ ذ أَشْ غَا وْشغْ.“ خنِّي شِّيغْ ؤُ ثُوغَا-ث ذ أَمِيژِيذْ ذڭْ ؤُقمُّومْ إِنُو أَمْ ثَامّنْثْ. ◘3:‏3 إِزهد. 19‏:‏11؛ 119‏:‏103؛ أَسَا. 10‏:‏10

٤ خنِّي إِنَّا أَيِي: ”أَ مِّيسْ ن بْنَاذمْ، ؤُيُورْ، أَذفْ غَارْ ثَادَّارْثْ ن إِسْرَائِيل ؤُشَا سِيوڒْ أَوَاڒنْ إِنُو أَكِيذْسنْ. ◘3:‏4 إِرْم. 1‏:‏17 ٥ مِينْزِي وَارْ د-ثتّْوَاسّكّذْ شَا غَارْ إِجّْ ن ڒْْڭنْسْ س إِجّْ ن يِيڒسْ إِوْعَارْ ؤُ س إِجّْ ن وَاوَاڒْ إِقْسحْ، مَاشَا غَارْ ثَادَّارْثْ ن إِسْرَائِيل، ٦ وَارْ إِدْجِي غَارْ ڒڭْنُوسْ أَطَّاسْ س إِجّْ ن يِيڒسْ إِوْعَارْ نِيغْ س إِجّْ ن وَاوَاڒْ إِقْسحْ، إِ زِي وَارْ ثْزمَّارذْ أَذْ ثْفهْمذْ أَوَاڒنْ نْسنْ. مَاڒَا سكّغْ شكْ غَارْسنْ نِيثْنِي، س ثِيذتّْ أَذْ أَشْ سْڒنْ. ٧ مَاشَا ثَادَّارْثْ ن إِسْرَائِيل وَارْ إِخْسْ أَذْ غَاركْ إِسڒْ، مِينْزِي وَارْ خْسنْ أَذْ د-سْڒنْ غَارِي، مِينْزِي مَارَّا ثَادَّارْثْ ن إِسْرَائِيل، أَقَا نِيثْنِي غَارْسنْ أَزدْجِيفْ إِقْسحْ ؤُ غَارْسنْ ؤُڒْ يزْلڭْ. ٨ خْزَارْ، نشّْ ڭِّيغْ ؤُذمْ نّشْ إِقْسحْ أَمْ وُوذْمَاونْ نْسنْ، ؤُ ثَانْيَارْثْ نّشْ ڭِّيغْ ت ثقْسحْ أَمْ ثنْيَارِينْ نْسنْ. ◘3:‏8 إِرْم. 1‏:‏18؛ مِيخَا 3‏:‏8 ٩ نشّْ ڭِّيغْ ثَانْيَارْثْ نّشْ أَمْ يِيجّْ ن ؤُمسْمِيرْ إِ إِدْجَانْ إِقسْحنْ خْ إِشْثْ ن ثْخذْمشْثْ ن وژْرُو. وَارْ زَّايْسنْ تّڭّْوذْ شَا ؤُ وَارْ تّْنخْڒِيعْ شَا زڭْ وُوذْمَاونْ نْسنْ، مِينْزِي نِيثْنِي ذ إِشْثْ ن ثَادَّارْثْ إِغوّْغنْ.“ ◘3:‏9 إِرْم. 1‏:‏8، 17؛ 5‏:‏3؛ حِز. 2‏:‏6؛ 1 بُط. 3‏:‏14

١٠ نتَّا إِنَّا أَيِي: ”أَ مِّيسْ ن بْنَاذمْ، حْضَا مَارَّا أَوَاڒنْ إِنُو نِّي إِ غَا سِّيوْڒغْ أَكِيذكْ ذڭْ وُوڒْ نّشْ ؤُشَا سڒْ غَارْسنْ س إِمزُّوغنْ نّشْ. ١١ ؤُيُورْ، أَذفْ غَارْ أَيْثْ ن لْمنْفَا غَارْ ثَارْوَا ن ڒْْڭنْسْ نّشْ ؤُشَا سِيوڒْ أَكِيذْسنْ، إِنِي أَسنْ: ’أَمُّو إِ إِقَّارْ سِيذِي إِنُو، سِيذِي!‘، مَا أَذْ سْڒنْ نِيغْ أَذْ سمْحنْ ذِي مَانْ أَيَا.“ ◘3:‏11 حِز. 2‏:‏5، 7

١٢ خنِّي إِسّْڭعّذْ أَيِي أَرُّوحْ ؤُشَا سْڒِيغْ أَوَارْنِي أَيِي إِشْثْ ن ثْمِيجَّا ثدَّارْذِيحْ أَطَّاسْ، ثقَّارْ: ”أَذْ إِتّْوَابَاركْ ؤُعُودْجِي ن سِيذِي زڭْ ومْشَانْ ن ثْزذِّيغْثْ نّسْ!“ ◘3:‏12 حِز. 8‏:‏3 ١٣ سْڒِيغْ إِ ڒْْحسّْ ن وَافْرِيونْ ن إِمُودَّارنْ نِّي إِڒقّْفنْ إِجّْ إِ ونّغْنِي ؤُڒَا إِ ڒْْحسّْ ن ثْجَارَّارِينْ زَّاثْ نْسنْ ؤُ إِ ڒْْحسّْ ن إِجّْ ن ؤُذَارْذِيحْ إِمْغَارْ. ١٤ خنِّي إِسّْڭعّذْ أَيِي أَرُّوحْ ؤُشَا إِكْسِي أَيِي. نشّْ ؤُيُورغْ، ذ أَمَارْزَاڭْ، إِتّحْذُوذُوقْ بُوحْبڒْ إِنُو ذَايِي ؤُ أَفُوسْ ن سِيذِي ثُوغَا إِذْقڒْ خَافِي. ١٥ أَمُّو إِ د-ؤُسِيغْ غَارْ أَيْثْ ن لْمنْفَا ذِي ثَالْ-أَبِيبْ، إِنِّي إِزدّْغنْ غَارْ يغْزَارْ ن خابُورْ. نشّْ قِّيمغْ ذِينْ مَانِي ثُوغَا زدّْغنْ، وَاهْ، قِّيمغْ ذِينْ سبْعَا ن وُوسَّانْ تّْبهْثغْ ڒَْامِي ذ أَيِي ثُوغَا جَارْ أَسنْ. ◘3:‏15 أَيُوبْ 2‏:‏13

١٦ إِمْسَارْ أَوَارْنِي ڒَْامِي عْذُونْ سبْعَا ن وُوسَّانْ، أَقَا يُوسَا-د غَارِي وَاوَاڒْ ن سِيذِي. إِنَّا: ١٧ ”أَ مِّيسْ ن بْنَاذمْ، نشّْ ڭِّيغْ شكْ ذ أَعسَّاسْ خْ ثَادَّارْثْ ن إِسْرَائِيل. خْمِي غَا ثسْڒذْ إِ يِيجّْ ن وَاوَاڒْ زڭْ ؤُقمُّومْ إِنُو، إِتّْخصَّا شكْ أَذْ أَسنْ ثْعڒْمذْ زَّايِي. ◘3:‏17 إِشا. 62‏:‏6؛ حِز. 33‏:‏7؛ 1 تِيم. 3‏:‏1 ١٨ خْمِي غَا إِنِيغْ إِ ؤُعفَّانْ ’س ثِيذتّْ أَذْ ثمّْثذْ!‘ ؤُشَا شكْ وَارْ ذ أَسْ ثعْڒِيمذْ شَا ؤُ وَارْ ثسِّيوْڒذْ حِيمَا أَذْ ثْعڒْمذْ أَعفَّانْ ذِي سِّيبّثْ ن وبْرِيذْ نّسْ أَعفَّانْ مَاحنْذْ أَذْ ث ثحْضِيذْ حِيمَا أَذْ إِقِّيمْ أَذْ إِدَّارْ، خنِّي أَذْ إِمّثْ ؤُعفَّانْ نِّي ذِي ڒْْغشّْ نّسْ، مَاشَا إِذَامّنْ نّسْ أَذْ ثنْ تَّارغْ زڭْ ؤُفُوسْ نّشْ. ◘3:‏18 حِز. 33‏:‏8 ١٩ مَاشَا مَاڒَا ثْعڒْمذْ إِ ؤُعفَّانْ ؤُ نتَّا وَارْ إِبعّذْ شَا خْ ثُوعفّْنَا نّسْ ؤُ خْ وبْرِيذْ نّسْ إِعفّْننْ، خنِّي نتَّا أَذْ إِمّثْ ذِي ڒْْمُوعْصِييّثْ نّسْ، مَاشَا ڒعْمَارْ نّشْ أَذْ إِنْجمْ.“

٢٠ ”مَاڒَا أَمْسڭّذْ إِبعّذْ خْ ثْسڭْذَا نّسْ ؤُشَا إِڭَّا ڒْْمُوعْصِييّثْ خْمِي غَا سَّارْسغْ إِشْثْ ن سِّيبّثْ زَّاثسْ أَڒَامِي غَا إِخْضَا، خنِّي أَذْ إِمّثْ. مِينْزِي شكْ وَارْ ذ أَسْ ثعْڒِيمذْ، أَذْ إِمّثْ ذِي دّنْبْ نّسْ ؤُشَا ثِيمڭَّا إِسڭّْذنْ إِ يڭَّا وَارْ ذَايْسنْثْ إِذَارنْ عَاذْ. مَاشَا إِذَامّنْ نّسْ أَذْ ثنْ تَّارغْ زڭْ إِفَاسّنْ نّشْ. ◘3:‏20 حِز. 18‏:‏24؛ 33‏:‏12، 13 ٢١ مَاشَا مَاڒَا ثْعڒْمذْ إِ ؤُمْسڭّذْ، حِيمَا وَارْ إِخطِّي ؤُمْسڭّذْ ؤُ نتَّا وَارْ إِخْضِي، خنِّي أَذْ إِقِّيمْ إِدَّارْ س ثِيذتّْ مِينْزِي ثُوغَا إِتّْوَاعْڒمْ، ؤُ شكْ ثْفكّذْ ڒعْمَارْ نّشْ.“

٢٢ يُوسَا-د ذِينْ ؤُفُوسْ ن سِيذِي خَافِي ؤُشَا إِنَّا أَيِي: ”كَّارْ، فّغْ غَارْ ڒوْضَا ن ثغْزُورْثْ، أَذْ كِيذكْ سِّيوْڒغْ ذِينِّي.“ ٢٣ كَّارغْ ؤُشَا فّْغغْ غَارْ ڒوْضَا ن ثغْزُورْثْ، خْزَارْ، أَعُودْجِي ن سِيذِي ثُوغَا إِتّْبدَّا ذِينِّي أَمْ ؤُعُودْجِي إِ ژْرِيغْ غَارْ يغْزَارْ ن خابُورْ ؤُشَا وْضِيغْ خْ ؤُغمْبُوبْ إِنُو غَارْ ثمُّورْثْ. ◘3:‏23 حِز. 1‏:‏3 ٢٤ خنِّي يُوذفْ ذَايِي أَرُّوحْ ؤُشَا إِسّكَّارْ أَيِي خْ إِضَارنْ إِنُو ؤُشَا إِسِّيوڒْ أَكِيذِي. نتَّا إِنَّا أَيِي: ”ؤُيُورْ، بلّعْ إِخفْ نّشْ ذَاخڒْ ذِي ثَادَّارْثْ نّشْ. ◼3:‏24 ’ذَاخڒْ ذِي ثَادَّارْثْ نّكْ‘ - س ثْعِيبْرَانِيثْ ’ذِي ڒْوسْثْ ن ثَادَّارْثْ نّكْ‘.  ◘3:‏24 حِز. 2‏:‏2 ٢٥ ؤُ شكْ، أَ مِّيسْ ن بْنَاذمْ، خْزَارْ، أَذْ أَشْ ڭّنْ إِسغْوَانْ ؤُ أَذْ شكْ شَارْفنْ زَّايْسنْ. وَارْ ثتّفّغْ شَا حِيمَا أَذْ ثَاذْفذْ جَارْ أَسنْ. ٢٦ أَذْ سّْڒسْقغْ إِڒسْ نّشْ غَارْ وَانغْ نّشْ. أَذْ ثْذوْڒذْ ذ أَزِينُونْ ؤُشَا وَارْ ثتِّيڒِيذْ ذ أَرْيَازْ جَارْ أَسنْ ونِّي ثنْ إِ غَا إِوبّْخنْ، مِينْزِي نِيثْنِي ذ إِشْثْ ن ثَادَّارْثْ ثْغوّغْ. ◘3:‏26 حِز. 2‏:‏5 ٢٧ مَاشَا نشّْ، خْمِي كِيكْ إِ غَا سِّيوْڒغْ، أَذْ أَرْزْمغْ أَقمُّومْ نّشْ عَاوذْ ؤُشَا أَذْ أَسنْ ثِينِيذْ: ’أَمُّو إِ إِقَّارْ سِيذِي إِنُو، سِيذِي! وِي إِتّسْڒَانْ، أَذْ إِسڒْ، ؤُشَا وِي إِسمّْحنْ ذِي مَانْ أَيَا، وَاخَّا أَذْ ذَايسْ إِسْمحْ!‘، مِينْزِي نِيثْنِي ذ إِشْثْ ن ثَادَّارْثْ ثْغوّغْ.“ ◘3:‏27 حِز. 2‏:‏5، 7