21
ڒْحُوكْمْ خْ ثمُّورْثْ ن لْجَانُوبْ
1 يُوسَا-د غَارِي وَاوَاڒْ ن سِيذِي، إِنَّا: 2 ”أَ مِّيسْ ن بْنَاذمْ، أڭّْ ؤُذمْ نّشْ غَارْ لْجَانُوبْ، أجّْ أَوَاڒنْ نّشْ أَذْ ؤُذُومنْ جِّيهثْ ن لْجَانُوبْ ؤُشَا نَابّْ ضِيدّْ إِ وزْغَارْ ن ييَّارْ ذِي ثمُّورْثْ ن لْجَانُوبْ. ◼21:2 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘. 3 إِنِي إِ وزْغَارْ ن ثمُّورْثْ ن لْجَانُوبْ: ’سڒْ إِ وَاوَاڒْ ن سِيذِي: أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَذْ سَّارْغغْ ذَايمْ إِشْثْ ن ثْمسِّي، ثنِّي إِ غَا إِشّنْ كُوڒْ ثَاشجَّارْثْ ثَازِيزَاوْثْ ؤُ كُوڒْ ثَاشجَّارْثْ يُوژْغنْ. أَشعَّاڒْ ن ڒْعابُوقْ وَارْ إِتّْوَاخسِّي ؤُ س ؤُيَا أَذْ تّْوَاشمْضنْ مَارَّا إِغمْبَابْ زِي لْجَانُوبْ أَڒْ شَّامَالْ ◘21:3 لك. 23:31 4 ؤُشَا مَارَّا إِوْذَانْ ذ ڒْمَاڒْ أَذْ ژَترنْ أَقَا نشّْ، سِيذِي، ذ ونِّي إِسَّارْغنْ ثِيمسِّي. وَارْ ثتّْوَاخسِّي شَا.‘ ◼21:4 ’مَارَّا إِوْذَانْ ذ ڒْمَاڒْ‘ - س ثْعِيبْرَانِيثْ ’مَارَّا أَيْسُومْ‘. 5 نِّيغْ نشّْ: ’أَ، سِيذِي إِنُو، سِيذِي، عَاذْ نِيثْنِي قَّارنْ خَافِي: ’مَا وَارْ إِسِّيوڒْ نتَّا س ثْحُوجَا ن ثْوَافِيثْ وَاهَا؟‘!“
ڒْحُوكْمْ ن سِيذِي خْ ؤُرْشَالِيمْ
6 يُوسَا-د غَارِي وَاوَاڒْ ن سِيذِي، إِنَّا: 7 ”أَ مِّيسْ ن بْنَاذمْ، أڭّْ ؤُذمْ نّشْ غَارْ ؤُرْشَالِيمْ، أجّْ أَوَاڒنْ نّشْ أَذْ ؤُذُومنْ ضِيدّْ إِ ثْزَاوِييِّينْ إِقدّْسنْ ؤُشَا نَابّْ ضِيدّْ إِ ثمُّورْثْ ن إِسْرَائِيل. 8 إِنِي إِ ثمُّورْثْ ن إِسْرَائِيل: ’أَمُّو إِ إِقَّارْ سِيذِي إِنُو، سِيذِي: خْزَارْ، أَقَا غَارمْ، نشّْ أَذْ د-جبْذغْ سِّيفْ إِنُو زڭْ ؤُفُورُّو ن وغْڒَافْ نّسْ ؤُشَا أَذْ قضْعغْ أَمْ ؤُمْسڭّذْ أَمْ ؤُعفَّانْ. 9 مِينْزِي أَذْ قضْعغْ أَمْ ؤُمْسڭّذْ أَمْ ؤُعفَّانْ زِي ڒْوسْطْ نّمْ، س ؤُيَا أَذْ د-إِفّغْ سِّيفْ إِنُو زڭْ ؤُفُورُّو ن وغْڒَافْ نّسْ، ضِيدّْ إِ مَارَّا إِنِّي غَارْسنْ أَرِّيمثْ ن ويْسُومْ، زِي لْجَانُوبْ أَڒْ شَّامَالْ، 10 ؤُشَا مَارَّا إِنِّي غَارْسنْ أَرِّيمثْ ن ويْسُومْ أَذْ سّْننْ، بلِّي نشّْ، سِيذِي، جبْذغْ سِّيفْ إِنُو زڭْ ؤُفُورُّو ن وغْڒَافْ.عمَّارْصْ وَارْ غَارسْ د-إِذِّيكّْوِيڒْ.‘ “
11 ”مَاشَا شكْ، أَ مِّيسْ ن بْنَاذمْ، سْغُونْفَا، سْغُونْفَا زَّاثْ إِ ثِيطَّاوِينْ نْسنْ س ثجْعِينَّاثِينْ تّْوَارْژنْثْ ذ ثَارْزُوڭِي. 12 أَذْ إِمْسَارْ خْمِي ذ أَشْ إِ غَا إِنِينْ: ’مَاغَارْ ثسّْغُونْفِيذْ أَمُّو؟‘، أَقَا شكْ أَذْ ثِينِيذْ: ’زِي سِّيبّثْ ن مِينْ سْڒِيغْ، مَاغَارْ أَذْ د-يَاسْ ؤُشَا كُوڒْ ؤُڒْ أَذْ إِفْسِي ؤُ مَارَّا إِفَاسّنْ أَذْ هيّْفنْ ؤُ مَارَّا بُوحْبڒْ أَذْ يَارْخُو ؤُ مَارَّا إِفَادّنْ أَذْ أَرْذْبنْ أَمْ وَامَانْ. خْزَارْ، أَذْ د-يَاسْ ؤُشَا أَذْ يِيڒِي، أَمُّو إِ إِقَّارْ سِيذِي إِنُو، سِيذِي.‘ “ ◘21:12 إِرْم. 6:24؛ 49:23؛ حِز. 4:17؛ 7:17
13 يُوسَا-د غَارِي وَاوَاڒْ ن سِيذِي، إِنَّا: 14 ”أَ مِّيسْ ن بْنَاذمْ، نَابّْ ؤُشَا إِنِي: ’أَمُّو إِ إِقَّارْ سِيذِي إِنُو، سِيذِي!‘ ؤُشَا إِنِي:
’سِّيفْ، سِّيفْ،
أَقَا إِتّْوَاسّقْضعْ ؤُ إِتّْوَاسُّويْذَا.
15 إِتّْوَاسّقْضعْ مَاحنْذْ أَذْ إِغَارْصْ ثِيغَارْصَا،
إِتّْوَاسُّويْذَا مَاحنْذْ أَذْ إِللّشْ.‘
نِيغْ إِتّْخصَّا إِ نشِّينْ أَذْ نْفَارّحْ، أَذْ نِينِي:
’أَزدْجَاضْ ن ڒحْكَامثْ ن مِّي
16 ’إِمّوْشْ مَاحنْذْ أَذْ إِتّْوَاسُّويْذَا،
مَاحنْذْ أَذْ ث طّْفنْ ذڭْ ؤُفُوسْ.
سِّيفْ إِتّْوَاقْضعْ ؤُ إِتّْوَاسُّويْذَا،
مَاحنْذْ أَذْ إِتّْوَاڭّْ ذڭْ ؤُفُوسْ ن ؤُقتَّاڒْ.
17 سْغُويّْ ؤُشَا ثْرُوذْ، أَ مِّيسْ ن بْنَاذمْ،
مَاغَارْ أَذْ يِيڒِي خْ ڒْڭنْسْ إِنُو،
أَذْ يِيڒِي خْ مَارَّا ڒْحُوكَّامْ ن إِسْرَائِيل.
أَقَا مّوْشنْ إِ سِّيفْ مُوننْ
أَكْ-ذ ڒْڭنْسْ إِنُو.
س ؤُيَا، وّثْ خْ ثْمصَّاضْثْ نّشْ.‘ ◘21:17 حِز. 6:11؛ 7:27
18 ’وَاهْ، سِّيفْ إِتّْوَاقدْجبْ.
مَاشَا مَانَا، مَاڒَا أَزدْجَاضْ
نِّي إِسّحْقَارنْ مَارَّا أَكشُّوضْ
وَارْ د-إِتِّيڒِي عَاذْ؟‘،
أَمُّو إِ إِقَّارْ سِيذِي إِنُو، سِيذِي. ◘21:18 إِشا. 1:5؛ إِرْم. 6:28-30
19 ’شكْ، أَ مِّيسْ ن بْنَاذمْ، نَابّْ،
ؤُشَا وّثْ إِفَاسّنْ إِجّْ ذڭْ ونّغْنِي،
مَاغَارْ سِّيفْ أَذْ إِوّثْ ثْنَاينْ،
وَاهْ، ثْڒَاثَا ن إِمُورنْ.
أَقَا-ث ذ سِّيفْ ن يِينِّي إِتّْوَانْغنْ،
سِّيفْ ن ؤُمقّْرَانْ نِّي إِتّْوَانغْ،
سِّيفْ نِّي غَارْسنْ إِتَّاذْفنْ،
20 حِيمَا خنِّي ؤُڒْ أَذْ إِفْسِي
ؤُشَا أَذْ مَّارنْينْثْ ثْعنْكْرِيفِينْ.
ڒقْضعْ ن سِّيفْ ڭِّيغْ ث
خْ مَارَّا ثِيوُّورَا نْسنْ.
أَيْ، أَقَا سِّيفْ إِوْجذْ مَاحنْذْ أَذْ إِللّشْ،
أَقَا إِتّْوَاجبّْ-د زڭْ ؤُفُورُّو ن وغْڒَافْ
مَاحنْذْ أَذْ إِغَارْصْ. ◘21:20 حِز. 21:32
21 سْمُونْ جّهْذْ نّشْ، قسّْ غَارْ ؤُفُوسِي،
بدّْ، قسّْ غَارْ ؤُزڒْمَاضْ،
أَرّْ ڒقْضعْ نّشْ مَانِي مَا ثخْسذْ.‘
22 ’ؤُڒَا ذ نشّْ أَذْ وْثغْ إِفَاسّنْ إِنُو
إِجّْ ذڭْ ونّغْنِي
ؤُشَا أَذْ سَّاريّْحغْ أَسْعَارْ إِنُو.
نشّْ، سِيذِي، أَقَا سِّيوْڒغْ.‘ “
23 يُوسَا-د غَارِي وَاوَاڒْ ن سِيذِي، إِنَّا: 24 ”شكْ، أَ مِّيسْ ن بْنَاذمْ، أڭّْ ثْنَاينْ ن إِبْرِيذنْ زِي مَانِي د غَا يَاسْ سِّيفْ ن ؤُجدْجِيذْ ن بَابِيلْ. زڭْ إِشْثْ ن ثمُّورْثْ أَذْ فّْغنْ نِيثْنِي س ثْنَاينْ إِذْسنْ. نْقشْ إِجّْ ن ؤُشِييَّارْ غَارْ ؤُبطُّو ن وبْرِيذْ، نْقشْ إِ-ث غَارْ ؤُبطُّو ن وبْرِيذْ غَارْ ثنْذِينْثْ. 25 أَذْ ثْنيّْشذْ أَبْرِيذْ س مَانِيسْ د غَا يَاسْ سِّيفْ غَارْ رَابَّا ن أَيْثْ ن عَامُّونْ ؤُ غَارْ يَاهُوذَا أَڒْ ذَاخڒْ ذِي ثنْذِينْثْ إِتّْوَاسّْجهْذنْ: ؤُرْشَالِيمْ. 26 مِينْزِي أَجدْجِيذْ ن بَابِيلْ أَذْ إِبدّْ غَارْ مَانِي فَارْقنْ إِبْرِيذنْ، غَارْ ؤُبدُّو ن ثْنَاينْ ن إِبْرِيذنْ نِّي مَاحنْذْ أَذْ إِعزّمْ. أَذْ إِزّرْزْ فْڒِيثْشَاثْ ن ڒْقوْصْ، أَذْ إِسّقْسَا ڒخْيَاڒَاثْ ن لْ-أَصْنَامْ، أَذْ إِخْزَارْ ثْسَا. 27 ذڭْ ؤُفُوسْ نّسْ ؤُفُوسِي يُوسَا-د وشْثَابْ ن ’ؤُرْشَالِيمْ!‘، مَاحنْذْ أَذْ ذِينْ يڭّْ ڒقْشُوعْ ن وذْهَامْ، مَاحنْذْ أَذْ يَارْزمْ أَقمُّومْ نّسْ س إِغُويَّانْ ن ونْغِي، مَاحنْذْ أَذْ إِسّْڭعّذْ ثْمِيجَّا نّسْ س إِغُويَّانْ ن ؤُمنْغِي، مَاحنْذْ أَذْ إِڭّْ ڒقْشُوعْ ن وذْهَامْ ضِيدّْ إِ ثوُّورَا، مَاحنْذْ أَذْ يڭّْ أَشْبَارْ، مَاحنْذْ أَذْ إِڭّْ لْبَارَاجَاثْ. ◘21:27 حِز. 4:2؛ 17:17 28 مَاشَا مَانْ أَيَا أَذْ غَارْسنْ يِيڒِي أَمْ ؤُڭزّنْ إِغشّنْ ذِي ثِيطَّاوِينْ نْسنْ، مَاغَارْ نِيثْنِي أَقَا غَارْسنْ ثِيجَادْجَاثِينْ إِمثْننْ، مَاشَا نتَّا أَذْ إِسّعْقڒْ خْ ڒْمُوعْصِييّثْ نْسنْ، مَاحنْذْ أَذْ تّْوَاطّْفنْ نِيثْنِي.“
29 ”س ؤُيَا، أَمُّو إِ إِقَّارْ سِيذِي إِنُو سِيذِي: ’مِينْزِي ثسّعْقِيڒمْ خْ ڒْمُوعْصِييّثْ نْومْ ؤُمِي إِعذِّيينْ نْومْ تّْبَاننْ نِيشَانْ، خْمِي تّْوَاژَارّنْ دّْنُوبْ نْومْ س مَارَّا مِينْ ثتّڭّمْ، وَاهْ، مِينْزِي ثْسّعْقِيڒمْ خْ ڒْمُوعْصِييّثْ نْومْ، س ؤُيَا أَذْ كنِّيوْ طّْفنْ س ؤُفُوسْ.‘ 30 ؤُ شكْ، أَعفَّانْ إِيزّْمنْ إِ ڒْموْثْ، شكْ، أَ ڒْحَاكمْ ن إِسْرَائِيل، ونِّي أَسّْ نّسْ أَذْ د-يَاسْ ذِي ڒْوقْثْ ن ڒحْسَابْ أَنڭَّارُو ن ڒْمُوعْصِييّثْ، 31 أَمُّو إِ ذ أَشْ إِقَّارْ سِيذِي إِنُو، سِيذِي: ’كّسْ أَرژّثْ نِّي، كّسْ تَّاجْ نِّي. أَمُّو وَارْ إِتِّيڒِي عَاذْ. مِينْ إِسّهْوَانْ، أَذْ إِتّْوَاسُّوعْڒَا، ؤُ مِينْ إِسُّوعْڒَانْ، أَذْ د-إِتّْوَاسّهْوَا. 32 أَذْ أَرّغْ أَيَا ذ ڒْخَارْبثْ، ذ ڒْخَارْبثْ، وَاهْ، أَذْ ث أَرّغْ ذ ڒْخَارْبثْ. مَاشَا مَارَّا أَيَا وَارْ إِتّْغِيمِي عَاذْ، مْغِيرْ أَڒْ د غَا يَاسْ ونِّي غَارْ إِدْجَانْ ڒْحقّْ ؤُشَا نشّْ أَذْ أَسْ ث وْشغْ.‘ “ ◘21:32 أَمز. 49:10
ڒْحُوكْمْ ن سِيذِي خْ إِعَامُّونِييّنْ
33 ”ؤُ شكْ، أَ مِّيسْ ن بْنَاذمْ، نَابّْ ؤُشَا إِنِي: ’أَمُّو إِ إِقَّارْ سِيذِي إِنُو، سِيذِي، خْ أَيْثْ نْ عَامُّونْ ؤُ خْ ؤُسحْقَارْ نْسنْ!‘ إِنِي:
’سِّيفْ، سِّيفْ إِتّْوَاجبْذْ-د،
إِتّْوَاسُّويْذَا مَاحنْذْ أَذْ يشّْ،
مَاحنْذْ أَذْ إِللّشْ، ...
34 - وَاخَّا نِيثْنِي تّْوَاڒَانْ إِ شكْ إِجّْ ن ڒوْحِييْ وَارْ إِدْجِينْ، وَاخَّا نِيثْنِي تّْڭزّْننْ إِ شكْ إِجّْ ن ؤُڭزّنْ إِسّْخَارِّيقنْ -
... أَقَا سِّيفْ إِتّْوَاجبْذْ-د
مَاحنْذْ أَذْ شكْ يَارّْ
غَارْ إِرَاونْ ن إِعفَّاننْ إِتّْوَاسّْنُوقّْبنْ
نِّي زِي د-يُوسَا وَاسّْ نْسنْ
ذِي ڒْوقْثْ ن ڒحْسَابْ أَنڭَّارُو ن ڒْمُوعْصِييّثْ.
35 أَرّْ سِّيفْ غَارْ ؤُفُورُّو ن وغْڒَافْ نّسْ.
ذڭْ ومْشَانْ مَانِي د-ثتّْوَاخڒْقذْ،
ذِي ثمُّورْثْ ن لْ-أَصلْ نّشْ
أَذْ شكْ حكْمغْ.
36 أَذْ خَاكْ زدْجْعغْ وسْخضْ إِنُو.
س ثْمسِّي ن ؤُذُوقّزْ إِنُو ن ؤُفُوڭمْ
أَذْ خَاكْ سُوضغْ ؤُشَا أَذْ شكْ ڭّغْ
ذڭْ ؤُفُوسْ ن أَيْثْ ن بُو -غزُّو
نِّي إِسّْننْ أَذْ ذدْجنْ.
37 أَذْ ثِيڒِيذْ ذ مَاشَّا إِ ثْمسِّي،
إِذَامّنْ نّشْ أَذْ ثنْ سِّيزّْڒنْ ذِي ڒْوسْطْ ن ثمُّورْثْ.
وَارْ ثتِّيڒِي قَاعْ ڒِيذَارثْ ذَايكْ،
مَاغَارْ نشّْ، سِيذِي، أَقَا سِّيوْڒغْ.‘ “
◼21:2 21:2 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘.
◘21:3 21:3 لك. 23:31
◼21:4 21:4 ’مَارَّا إِوْذَانْ ذ ڒْمَاڒْ‘ - س ثْعِيبْرَانِيثْ ’مَارَّا أَيْسُومْ‘.
◘21:12 21:12 إِرْم. 6:24؛ 49:23؛ حِز. 4:17؛ 7:17
◼21:15 21:15 ’مِّي‘ - أَقَا-ث ذ يَاهُوذَا (خْزَارْ أَمز. 49:9) ’أَزدْجَاضْ‘ - أَقَا-ث ذ أَزدْجَاضْ (ن صُّولْطَا) ن يَاهُوذَا (خْزَارْ أَمز. 49:10). ذڭْ أَمز. 49:10 نتَّافْ أَقَا أَزدْجَاضْ-أَ وَارْ د-إِتّْوَاكّسْ زِي يَاهُوذَا. ڒخُّو حِيزْقِييَالْ، ؤُمِي ڒْڭنْسْ إِسّنْ أَقَا إِخْسْ أَذْ إِطّفْ ذِي لْوَاعْذْ-أَ، إِسّقْسَا ’مَا أَذْ ثقِّيمْ صُّولْطَا ن يَاهُوذَا أَمْ مَامّشْ ذ أَسْ إِتّْغِيڒْ إِ ڒْڭنْسْ خْ ذْسَاسْ ن لْوَاعْذْ نِيغْ لَّا؟ مِينْزِي نِيثْنِي قَّارنْ س يِيخفْ نْسنْ ’أَزدْجَاضْ ن مِّي إِسّحْقَارْ كُوڒْ أَكشُّوضْ (نّغْنِي)‘، إِخْسْ أَذْ يِينِي لْوَاعْذْ أَذْ إِقِّيمْ ؤُشَا أَجدْجِيذْ ن بَابِيلْ (’سِّيفْ‘) وَارْ ذ أَنغْ إِزمَّارْ. خنِّي يَارَّا-د سِيذِي بلِّي ڒْڭنْسْ ن يَاهُوذَا أَذْ إِتّْوَاڒْقفْ س سِّيفْ ن ؤُجدْجِيذْ ن بَابِيلْ ؤُ نتَّا أَذْ ثنْ إِسُّوفّغْ ذِي ثْمحْبَاسْثْ غَارْ بَابِيلْ، مَاشَا لْوَاعْذْ إِ يَاهُوذَا ذِي أَمز. 49:10 أَذْ إِقِّيمْ ؤُشَا أَذْ إِتّْوَاكمّڒْ ذِي لْمَاسِيحْ ونِّي د إِ غَا إِتّْوَاخڒْقنْ أَوَارْنِي عْڒَاينْ 500 ن إِسڭّْوُوسَا ذِي بَايْثْ-لَاحْمْ، ثَانْذِينْثْ ن يَاهُوذَا، زِي أَرُّوحْ إِقدّْسنْ، زڭْ ؤُعذِّيسْ ن مَارْيَامْ، ثنِّي ثُوغَا إِتّْوَاخْضْبنْ إِ يُوسُوفْ. يُوسُوفْ ذ مَارْيَامْ ثُوغَا-ثنْ س ثْنَاينْ إِذْسنْ زِي ثْوَاشُونْثْ ن ذَاوُوذْ، زڭْ إِشْثْ ن ثْوَاشُونْثْ إِڭلّْذنْ، وَاخَّا ؤُذَاينْ وَارْ غَارْسنْ أَجدْجِيذْ زڭْ يِيخفْ نْسنْ ذِي ڒْوقْثْ نِّي مَاغَارْ هِيرُوذُوسْ زِي إِذُومْ ثُوغَا ذ أَجدْجِيذْ خْ ڒُومُورْ ن إِرُومَانِييّنْ.
◘21:17 21:17 حِز. 6:11؛ 7:27
◘21:18 21:18 إِشا. 1:5؛ إِرْم. 6:28-30
◘21:20 21:20 حِز. 21:32
◘21:27 21:27 حِز. 4:2؛ 17:17
◘21:32 21:32 أَمز. 49:10