١ أَ إِڭَالَاطِييّنْ إِفْغُوڒنْ، وِي كنِّيوْ إِسُّوفّْغنْ زڭْ وبْرِيذْ؟ أَقَا لْمَاسِيحْ ثُوغَا إِتّْوَارْشمْ قِيبَاتْشْ إِ ثِيطَّاوِينْ نْومْ أَمْ ونِّي إِمُّوثنْ خْ صَّالِيبْ. ◘3:‏1 ڭال. 5‏:‏7. ٢ ذڭَّا وَاهَا خْسغْ أَذْ ث سّْنغْ زَّايْومْ: مَا ثطّْفمْ أَرُّوحْ س ڒخْذَايمْ ن شَّارِيعَا نِيغْ ؤُمِي ثتّڭّمْ أَرَّايْ إِ لْ-إِيمَانْ؟ ٣ مَا أَمنِّي ثدْجَامْ ذ إِفْغُوڒنْ، أَقَا ثبْذَامْ س أَرُّوحْ، مَا ڒخُّو أَذْ ثْكمّْڒمْ س دَّاثْ؟ ٤ مَا ثكْسِيمْ ثَامَارَا أَطَّاسْ خْ وَالُو؟ مَا ثُوغَا س ثِيذتّْ خْ وَالُو؟ ٥ ونِّي ذ أَومْ إِوْشِينْ أَرُّوحْ ؤُشَا إِتّڭّْ لْمُوعْجِيزَاثْ جَارْ أَومْ، مَا إِتّڭّْ إِ-ثنْثْ زِي ڒخْذَايمْ ن شَّارِيعَا نِيغْ ؤُمِي ثتّسْڒَامْ ثَابَارّحْثْ ن لْ-إِيمَانْ، ٦ أَمْ مَامّشْ ثُوغَا إِبْرَاهِيمْ يُومنْ ذِي أَربِّي ؤُشَا خنِّي إِتّْوَاحْسبْ أَسْ-د مَانْ أَيَا ذ ثَاسڭْذَا. ◘3:‏6 أَمز. 15‏:‏6؛ رُوم. 4‏:‏3؛ يَاع. 2‏:‏23. ٧ س ؤُينِّي سّْنمْ، بلِّي إِنِّي إِدْجَانْ ن لْ-إِيمَانْ، نِيثْنِي ذ أَيْثْ ن إِبْرَاهِيمْ. ٨ مِينْزِي إِسّنْ أَربِّي قْبڒْ، أَقَا ڒڭْنُوسْ أَذْ تّْوَاسڭّْذنْ س لْ-إِيمَانْ، إِزَّارْ إِبشَّارْ نتَّا إِ إِبْرَاهِيمْ س ڒخْبَارْ أَصبْحَانْ، أَمْ مَامّشْ قَّارنْثْ ثِيرَا إِقدّْسنْ: ”ذَايكْ إِ غَا تّْوَابَارْكنْ ڒڭْنُوسْ مَارَّا.“ ◘3:‏8 أَمز. 12‏:‏3؛ 18‏:‏18؛ 22‏:‏18؛ 26‏:‏4؛ 49‏:‏10؛ ڒخ. 3‏:‏25. ٩ س ؤُينِّي إِنِّي يُومْننْ أَذْ تّْوَابَارْكنْ أَكْ-ذ ڒْْمُومنْ إِبْرَاهِيمْ.

١٠ مَارَّا إِنِّي إِدَّارنْ س ڒخْذَايمْ ن شَّارِيعَا، أَقَا نِيثْنِي سَاذُو نّعْڒثْ، مِينْزِي ثُورَا: ”ذ أَمنْعُوڒْ كُوڒْ إِجّنْ ونِّي وَارْ إِقِّيمنْ إِتّطّفْ ذِي مَارَّا ثِيمسْڒَايِينْ يُورَانْ ذڭْ وذْلِيسْ ن شَّارِيعَا حِيمَا أَذْ ثنْثْ إِڭّْ!“ ◘3:‏10 أَعَوذ. 27‏:‏26؛ ڭال. 3‏:‏10 ١١ أَقَا إِتّْبَانْ مْلِيحْ بلِّي وَارْ ذِينْ حذْ إِ غَا إِتّْوَاسڭّْذنْ غَارْ أَربِّي س شَّارِيعَا، مِينْزِي ثُورَا: ”أَمْسڭَّاذْ س لْ-إِيمَانْ أَذْ إِدَّارْ!“ ◘3:‏11 حَاب. 2‏:‏4؛ رُوم. 1‏:‏17؛ 3‏:‏20؛ ڭال. 2‏:‏16؛ عبر. 10‏:‏38 ١٢ خنِّي شَّارِيعَا وَارْ ثْكمّڒْ شَا س لْ-إِيمَانْ، مَاشَا بْنَاذمْ ونِّي إِتّڭّنْ مِينْ ذَايسْ يُورِينْ، أَذْ زَّايسْ إِدَّارْ. ◘3:‏12 لَاوِي 18‏:‏5؛ حِز. 20‏:‏11؛ رُوم. 10‏:‏5. ١٣ مَاشَا لْمَاسِيحْ أَقَا إِخدْجصْ خَانغْ، حِيمَا أَذْ أَنغْ إِفكّْ زِي نّعْڒثْ نِّي إِدْجَانْ خْ يِينِّي سَاذُو شَّارِيعَا أَمْ ذ إِذْوڒْ خَانغْ ذ أَمنْعُوڒْ، مِينْزِي ثُورَا: ”ذ أَمنْعُوڒْ كُوڒْ إِجّنْ إِ ث غَا يُويْڒنْ خْ ثحْنَاشْثْ!“، ◘3:‏13 أَعَوذ. 21‏:‏23؛ رُوم. 8‏:‏3؛ 2 كُور. 5‏:‏21. ١٤ حِيمَا أَذْ ثِيوضْ لْبَارَاكَا ن إِبْرَاهِيمْ غَارْ ڒڭْنُوسْ س يَاسُوع لْمَاسِيحْ، مَاحنْذْ س لْ-إِيمَانْ أَذْ نطّفْ لْوَاعْذْ ن أَرُّوحْ.

١٥ أَ أَيْثْمَا، أَذْ سِّيوْڒغْ خْ ڒحْسَابْ ڒعْقڒْ ن بْنَاذمْ: أَقَا إِجّْ ن ڒْْعَاهْذْ إِتّْوَاڭّنْ جَارْ إِوْذَانْ، وَارْ إِزمَّارْ ؤُڒَا ذ إِجّْ أَذْ ث إِبْضڒْ نِيغْ أَذْ ذَايسْ إِبدّڒْ شَا. ◘3:‏15 عبر. 9‏:‏17. ١٦ أَقَا لْوُوعُوذْ تّْوَاڭّنْ إِ إِبْرَاهِيمْ ذ زَّارِيعثْ نّسْ. نتَّا وَارْ ذ أَسْ يِينِي شَا: ”إِ إِعقَّاينْ ن زَّارِيعثْ نْومْ!“، أَمْ إِ وَاطَّاسْ، مَاشَا: ”إِ ؤُعقَّا ن زَّارِيعثْ نّشْ!“، أَمْ إِ يِيجّنْ، أَقَا-ث ذ لْمَاسِيحْ. ◘3:‏16 ڭال. 3‏:‏8. ١٧ خنِّي قَّارغْ أَمُّو: ڒْْعَاهْذْ نِّي إِڭِّينْ أَربِّي زِيشْ ذِي لْمَاسِيحْ، وَارْ ث ثْبطِّيڒْ شَا شَّارِيعَا، ثنِّي ثُوسَا-د أَربْعَا-مْيَا ؤُ-ثْڒَاثِينْ ن إِسڭّْوُوسَا أَوَارْنِي مَانْ أَيَا، حِيمَا أَذْ ثڭّْ لْوَاعْذْ إِخْوَانْ. ◘3:‏17 أَمز. 15‏:‏13؛ ؤُف. 12‏:‏40؛ ڒخ. 7‏:‏6. ١٨ مِينْزِي مَاڒَا ڒْْوَارْثْ إِدْجَا س شَّارِيعَا، أَقَا وَارْ إِدْجِي عَاذْ س لْوَاعْذْ إِ إِبْرَاهِيمْ. مَاشَا أَربِّي أَقَا إِوْشَا أَسْ ث س لْوَاعْذْ. ◘3:‏18 رُوم. 4‏:‏14.

١٩ خنِّي إِ ؤُمِي ثْنفّعْ شَّارِيعَا؟ أَقَا ثتّْوَامَّارْنِي غَارْ لْوَاعْذْ خْ سِّيبّثْ ن دّْنُوبْ أَڒَامِي د-ثُوسَا زَّارِيعثْ ثنِّي ؤُمِي إِتّْوَاڭّْ لْوَاعْذْ. ؤُ س لْمَالَاكَاثْ ثمّوْشْ شَّارِيعَا ذڭْ ؤُفُوسْ ن إِجّْ ن لْوَاسِيثْ. ◘3:‏19 أَعَوذ. 5‏:‏5؛ يُوح. 1‏:‏17؛ 15‏:‏22؛ ڒخ. 7‏:‏38، 53؛ رُوم. 4‏:‏15؛ 5‏:‏20؛ 7‏:‏8. ٢٠ لْوَاسِيثْ وَارْ إِدْجِي ذ لْوَاسِيثْ ن إِجّنْ، مَاشَا أَربِّي ذ إِجّنْ.

٢١ مَا خنِّي شَّارِيعَا ضِيدّْ إِ لْوَاعْذْ ن أَربِّي؟عمَّارْصْ! مِينْزِي مَاڒَا ثُوغَا ثمّوْشْ إِشْثْ ن شَّارِيعَا ثْزمَّارْ أَذْ ثسّدَّارْ، ذ ثِيذتّْ ثُوغَا ثَاسڭْذَا س شَّارِيعَا. ٢٢ مَاشَا ثِيرَا إِقدّْسنْ بلّْعنْثْ خْ مَارَّا ذِي دّْنُوبْ، حِيمَا لْوَاعْذْ أَذْ إِمّوْشْ س لْ-إِيمَانْ ذِي يَاسُوع لْمَاسِيحْ إِ يِينِّي يُومْننْ. ◘3:‏22 رُوم. 3‏:‏9؛ 11‏:‏32.

٢٣ مَاشَا قْبڒْ مَا إِ د غَا يَاسْ لْ-إِيمَانْ، ثُوغَا أَنغْ نمّحْضَا ذِي شَّارِيعَا ؤُشَا إِتّْوَابلّعْ خَانغْ زِي لْ-إِيمَانْ، ونِّي ثُوغَا إِ غَا إِضْهَارنْ عَاذْ. ٢٤ س ؤُينِّي ثُوغَا شَّارِيعَا أَمْ ونِّي ذ أَنغْ إِتَّاربَّانْ أَڒْ لْمَاسِيحْ، حِيمَا أَذْ نتّْوَاسڭّذْ س لْ-إِيمَانْ. ◘3:‏24 مت. 5‏:‏17؛ ڒخ. 13‏:‏38؛ رُوم. 10‏:‏4. ٢٥ مَاشَا ڒخُّو، ؤُمِي د-يُوسَا لْ-إِيمَانْ، أَقَا وَارْ نقِّيمْ عَاذْ سَاذُو ونِّي إِتَّاربَّانْ.

٢٦ مِينْزِي مَارَّا كنِّيوْ ذ أَرَّاونْ ن أَربِّي س لْ-إِيمَانْ ن يَاسُوع لْمَاسِيحْ. ◘3:‏26 إِشا. 56‏:‏5؛ يُوح. 1‏:‏12؛ رُوم. 8‏:‏15؛ ڭال. 4‏:‏5. ٢٧ مِينْزِي مَارَّا إِنِّي إِتّْوَاسّْغضْصنْ ذِي لْمَاسِيحْ، أَقَا أَرْضنْ لْمَاسِيحْ. ◘3:‏27 رُوم. 6‏:‏3. ٢٨ خنِّي وَارْ ذِينْ ؤُذَايْ نِيغْ أَرَامِييْ، وَارْ ذِينْ عَاذْ إِسْمغْ نِيغْ أَحُورِّي، وَارْ ذِينْ عَاذْ أَرْيَازْ نِيغْ ثَامْغَارْثْ، مِينْزِي مَارَّا كنِّيوْ ذ إِجّنْ إِ ثدْجَامْ ذِي يَاسُوع لْمَاسِيحْ. ◘3:‏28 يُوح. 17‏:‏21. ٢٩ مَاڒَا كنِّيوْ ثدْجَامْ ن لْمَاسِيحْ، أَقَا كنِّيوْ ذ زَّارِيعثْ ن إِبْرَاهِيمْ ؤُشَا عْلَاحْسَابْ لْوَاعْذْ ذ إِوْرِيثنْ. ◘3:‏29 أَمز. 21‏:‏12؛ رُوم. 9‏:‏7؛ عبر. 11‏:‏18.