١ خْسغْ أَذْ إِنِيغْ، مشْحَاڒْ مَا ذ أَوْرِيثْ أَقَا-ث عَاذْ ذ أَحنْجِيرْ، وَارْ ذِينْ بُو ڒْْفَارْقْ خْ ؤُمْسخَّارْ، وَاخَّا نتَّا ذ بَابْ ن مَارَّا نِيثْنِي. ٢ نتَّا إِدْجَا عَاذْ سَاذُو إِمحْذَاينْ ؤُ سَاذُو إِنِّي إِتّْسيَّارنْ ثَادَّارْثْ أَڒْ ڒْْوقْثْ إِ يڭَّا بَابَاسْ. ٣ أَمُّو عَاوذْ نشِّينْ، ؤُمِي ذ أَنغْ ثُوغَا عَاذْ ذ إِحنْجِيرنْ، ثُوغَا أَنغْ ذ إِسمْغَانْ سَاذُو صُّولْطَا ن لْفَارَايِيضْ ن دُّونشْثْ-أَ. ٤ مَاشَا ؤُمِي د-يِيوضْ ؤُعمَّارْ ن ڒْْوقْثْ، أَربِّي أَقَا إِسّكّْ-د مِّيسْ إِ يدْجَانْ زِي ثمْغَارْثْ ذ ونِّي إِدْجَانْ سَاذُو شَّارِيعَا، ◘4:‏4 أَمز. 49‏:‏10؛ دَان. 9‏:‏24؛ مت. 5‏:‏17. ٥ حِيمَا أَذْ إِفْذِي إِنِّي إِدْجَانْ سَاذُو شَّارِيعَا ؤُشَا خنِّي نشِّينْ أَذْ نطّفْ ڒفْضڒْ مَاحنْذْ أَذْ نتّْوَاقْبڒْ ذ مِّيسْ. ◼4:‏5 ’إِفْذِي‘ - خْزَارْ إِزهد. 78:35.  ◘4:‏5 يُوح. 1‏:‏12؛ ڭال. 3‏:‏26.

٦ مِينْزِي كنِّيوْ ثدْجَامْ ذ أَرَّاونْ، أَربِّي إِسّكّْ أَرُّوحْ ن مِّيسْ ذڭْ وُوڒَاونْ نْومْ، ونِّي إِتّْڒَاغَانْ: ’بَابَا، بَابَاثْنغْ!‘ ◘4:‏6 رُوم. 8‏:‏15. ٧ س ؤُينِّي وَارْ ثدْجِيمْ عَاذْ ذ إِمْسخَّارنْ، مَاشَا ذ أَرَّاونْ ؤُ مَاڒَا أَرَّاونْ إِ ثدْجَامْ، أَقَا كنِّيوْ عَاوذْ ذ إِوْرِيثنْ ن أَربِّي س يَاسُوع لْمَاسِيحْ. ٨ مَاشَا ذِي زّْمَانْ إِ وَارْ ثسِّينمْ شَا أَربِّي، ثُوغَا ثْعبّْذمْ إِنِّي وَارْ إِدْجِينْ س ثوَّا ذ إِربِّيثنْ. ◘4:‏8 1 كُور. 8‏:‏4. ٩ مَاشَا ڒخُّو، أَوَارْنِي ڒَْامِي ثسّْنمْ أَربِّي، عَاذْ حْسنْ أَربِّي يَارْڭبْ خَاومْ، أَقَا ثْعقْبمْ عَاوذْ غَارْ صُّولْطَا ن لْفَارَايِيضْ إِضعْفنْ إِزڒْضنْ ن دُّونشْثْ-أَ، ثخْسمْ عَاوذْ أَذْ أَسنْثْ ثمَّارْسمْ إِخفْ نْومْ أَمْ زڭْ وشْحَاڒْ ؤُيَا! ◘4:‏9 كُول. 2‏:‏20. ١٠ ثْحطَّامْ ؤُسَّانْ ذ إِيُورنْ ذ زّْمَانَاثْ ذ إِسڭّْوُوسَا. ◘4:‏10 رُوم. 14‏:‏5؛ كُول. 2‏:‏16. ١١ تّڭّْوذغْ خَاومْ أَقَا تَّامَارغْ جَارْ أَومْ خْ وَالُو.

١٢ أَ أَيْثْمَا، تّْزَاوَاڭغْ كنِّيوْ، إِڒِيمْ أَمْ نشّْ، مِينْزِي نشّْ أَمْ كنِّيوْ. كنِّيوْ وَارْ ذ أَيِي ثڭِّيمْ وَالُو مِينْ وَارْ إِحْڒِينْ. ١٣ أَقَا كنِّيوْ ثسّْنمْ بلِّي بَارّْحغْ أَومْ-د س ڒخْبَارْ أَصبْحَانْ ذڭْ ؤُمزْوَارُو س ثُوضْعفْثْ ن أَرِّيمثْ إِنُو. ١٤ كنِّيوْ وَارْ ثسّحْقَارمْ نِيغْ ثسّْطيّْحمْ زڭْ ؤُمَارّثْ ن أَرِّيمثْ إِنُو، مَاشَا ثْقبْڒمْ أَيِي أَمْ يِيجّْ ن لْمَالَاكْ ن أَربِّي ؤُ أَمْ يَاسُوع لْمَاسِيحْ. ◘4:‏14 مـَال. 2‏:‏7؛ مت. 10‏:‏40؛ يُوح. 13‏:‏20. ١٥ مَانِي ثْرُوحْ خنِّي لْبَارَاكَا نْومْ؟ مِينْزِي شهّْذغْ خَاومْ بلِّي، مَاڒَا ثُوغَا ثْزمَّارمْ، أَذْ ثْقڒْعمْ ثِيطَّاوِينْ نْومْ، حِيمَا أَذْ أَيِي ثنْثْ ثوْشمْ. ١٦ مَا ذوْڒغْ ذ ڒعْذُو نْومْ، مِينْزِي بَارّْحغْ كنِّيوْ س ثِيذتّْ؟ ١٧ نِيثْنِي شْضَارنْ أَطَّاسْ خَاومْ، مَاشَا وَارْ إِدْجِي أَمنِّي وَاهَا، مَاغَارْ خْسنْ أَذْ كنِّيوْ حبّْسنْ، حِيمَا كنِّيوْ أَذْ ثشْضَارمْ خَاسنْ. ◘4:‏17 رُوم. 10‏:‏2؛ 2 كُور. 11‏:‏12. ١٨ وَاهْ، مْلِيحْ أَذْ ثِيڒِيمْ ڒبْذَا ثْشطَّارمْ ذِي مِينْ إِدْجَانْ ذ أَصبْحَانْ، مَاشَا وَارْ إِدْجِي خْمِي كِيومْ إِ غَا حْضَارغْ وَاهَا. ١٩ أَ إِحنْجِيرنْ إِنُو، ثْوَاڒَا نّغْنِيثْ أَقَا أَيِي إِ كنِّيوْ أَمْ يِيشْثْ ن ثمْغَارْثْ ثنِّي إِكْسِينْ دّيْسثْ زَّايْومْ س ؤُنزْبَارْ ن ثَارْوَا، أَڒْ ذَايْومْ إِ غَا إِڒِينْثْ ثفْرَاسْ ن لْمَاسِيحْ. ◘4:‏19 1 كُور. 4‏:‏15؛ فلمن. 10؛ يَاع. 1‏:‏18. ٢٠ خْسغْ ڒخُّو أَذْ إِڒِيغْ أَكِيذْومْ ؤُشَا أَذْ بدّْڒغْ ثْمِيجَّا إِنُو، مِينْزِي أَقَا ؤُڭْنُوغْ زَّايْومْ.

٢١ إِنِيمْ أَيِي، كنِّيوْ إِنِّي إِتّخْسنْ أَذْ ثِيڒِيمْ سَاذُو شَّارِيعَا، مَا وَارْ ثطِّيعمْ شَا شَّارِيعَا؟ ٢٢ مِينْزِي أَقَا ثُورَا بلِّي إِبْرَاهِيمْ ثُوغَا غَارسْ ثْنَاينْ ن إِحنْجِيرنْ، إِجّنْ ن ثَايَّا، ونّغْنِي ن ثْحُورّشْثْ. ◘4:‏22 أَمز. 16‏:‏2، 15؛ 21‏:‏2؛ ڒخ. 7‏:‏8؛ عبر. 11‏:‏11. ٢٣ ونِّي ن ثَايَّا أَقَا إِتّْوَاخْڒقْ-د عْلَاحْسَابْ دَّاثْ، مَاشَا ونِّي ن ثْحُورّشْثْ إِتّْوَاخْڒقْ-د عْلَاحْسَابْ لْوَاعْذْ. ◘4:‏23 يُوح. 8‏:‏39؛ رُوم. 9‏:‏7. ٢٤ ثِينَا ذ ثْنَاينْ ن إِمذْيَا ن ثْنَاينْ ن ڒْْعُوهُوذْ، إِجّنْ ن وذْرَارْ ن سِينَا، ونِّي إِ د-إِتَّارْونْ ثَاسْمُوغِي، أَقَا-ث هَاجَارْ. ٢٥ مِينْزِي هَاجَارْ ذ أَذْرَارْ ن سِينَا ذِي عَارَابِييَّا، ثنِّي يَاروْسنْ ذِي ؤُرْشَالِيمْ ن ڒخُّو، ثنِّي إِدْجَانْ ذِي ثسْمُوغِي أَكْ-ذ ثَارْوَا نّسْ. ◘4:‏25 ؤُف. 19، 20. ٢٦ مَاشَا ؤُرْشَالِيمْ ن سنّجْ ذ ثَاحُورّشْثْ، أَقَا-ت ذ يمَّاثْنغْ. ◘4:‏26 أَسَا. 21‏:‏2. ٢٧ مِينْزِي ثُورَا:

”فَارْحْ، ثنِّي وَارْ إِتِّيرْونْعمَّارْصْ!

ذُوقّزْ س ؤُسْڒِيوْڒوْ، سْغُويّْ س جّهْذْ،

أَ شمْ ثنِّي وَارْ إِسِّيننْ ڒوْجعْ ن ثَارْوَا،

مَاغَارْ ثَارْوَا ن ثنِّي ذِي سمْحنْ

ذ أَطَّاسْ خْ ثَارْوَا ن ثنِّي غَارْ إِدْجَا ورْيَازْ.“ ◘4:‏27 إِشا. 54‏:‏1

٢٨ مَاشَا نشِّينْ، أَ أَيْثْمَا، ذ ثَارْوَا ن لْوَاعْذْ أَمْ إِسْحَاقْ. ◘4:‏28 رُوم. 9‏:‏7، 8. ٢٩ مَاشَا أَمْ ذِي ڒْْوقْثْ نِّي وِي د-إِثْوَاخڒْقنْ عْلَاحْسَابْ دَّاثْ ثُوغَا إِمَارّثْ ونِّي د-إِتّْوَاخڒْقنْ عْلَاحْسَابْ أَرُّوحْ، أَمُّو عَاوذْ ڒخُّو. ◘4:‏29 أَمز. 21‏:‏9. ٣٠ مَاشَا مِينْ قَّارنْثْ ثِيرَا إِقدّْسنْ؟ ”نْضَارمْ بَارَّا ثَايَّا ذ مِّيسْ، مِينْزِي وَارْ إِتِّيڒِي مِّيسْ ن ثَايَّا ذ أَوْرِيثْ أَكْ-ذ مِّيسْ ن ثْحُورّشْثْ.“ ◘4:‏30 أَمز. 21‏:‏10. ٣١ س ؤُينِّي، أَ أَيْثْمَا، أَقَا وَارْ ندْجِي شَا ذ ثَارْوَا ن ثَايَّا، مَاشَا ثَارْوَا ن ثْحُورّشْثْ. ◼4:‏31 ’ثَارْوَا ن ثَايَّا‘ - إِخْسْ أَذْ يِينِي ’ثَارْوَا ن هَاجَارْ‘.