1 بُولُوسْ، أَمحْبُوسْ ن يَاسُوع لْمَاسِيحْ، ذ ثَاوْمَاثْ ثِيمُوثِييُو، إِ فِيلِيمُونْ إِعِيزّنْ ونِّي ذ أَمْسخَّارْ أَكِيذْنغْ، ◼1:‏1 أَفسَّارْ - ثَانِيثَا ذ إِشْثْ ن ثبْرَاثْ إِ يُورِي رَّاسُولْ بُولُوسْ غَارْ ؤُمدُّوكّڒْ نّسْ فِيلِيمُونْ خْ إِجّْ ن ؤُحنْجِيرْ قَّارنْ أَسْ ’ؤُنِيسِيمُوسْ‘. ؤُنِيسِيمُوسْ ثُوغَا-ث قْبڒْ ذ إِسْمغْ ن فِيلِيمُونْ. يَارْوڒْ زِي فِيلِيمُونْ ؤُ أَوَارْنِي مَانْ أَيَا إِسّنْ إِ-ث رَّاسُولْ بُولُوسْ ذِي ڒحْبسْ، ؤُ إِذْوڒْ ؤُنِيسِيمُوسْ ذ ڒْمُومنْ (إِنّغْنِي قَّارنْ أَسْ ’وَانِيسَامُو‘). ؤُڒَا ذ فِيلِيمُونْ ثُوغَا إِذْوڒْ ذ ڒْمُومنْ خْ تّبْشِيرْ ن بُولُوسْ. ڒخُّو رَّاسُولْ بُولُوسْ إِسّكّْ-د ؤُنِيسِيمُوسْ غَارْ فِيلِيمُونْ حِيمَا أَذْ ذِينْ يِيڒِي وصْڒَاحْ جَارْ أَسنْ أَمْ وَاوْمَاثنْ ذِي يَاسُوع لْمَاسِيحْ.  ◘1:‏1 أَفا. 3‏:‏1؛ 4‏:‏1. 2 إِ ؤُتْشْمَاثْنغْ أَبْفِييَا إِعِيزّنْ، إِ أَرْخِيبُّوسْ، ونِّي ذ أَمْسخَّارْ أَكِيذْنغْ، ؤُ إِ ثْمسْمُونْثْ ذِي ثَادَّارْثْ نّشْ: ◘1:‏2 رُوم. 16‏:‏5؛ 1 كُور. 16‏:‏19؛ كُول. 4‏:‏15، 17. 3 أَرْضَا ذ ڒهْنَا أَذْ كِيذْومْ إِڒِينْ زِي أَربِّي، بَابَاثْنغْ، ؤُ زِي سِيذِيثْنغْ يَاسُوع لْمَاسِيحْ.

4 نشّْ تّْقَاذِيغْ أَربِّي إِنُو ڒبْذَا ؤُ تّْفكَّارغْ ذَايكْ ذِي ثْژَادْجِيثِينْ إِنُو، ◘1:‏4 1 تس. 1‏:‏2؛ 2 تس. 1‏:‏3. 5 خْزَارْ، عَاذْ زڭْ وَامِي نشّْ سْڒِيغْ خْ لْ-إِيمَانْ ذ ثَايْرِي نّشْ إِ ذَايكْ إِدْجَانْ زِي جِّيهثْ ن سِيذِيثْنغْ يَاسُوع ؤُ زِي جِّيهثْ ن مَارَّا إِمْقدَّاسنْ، 6 حِيمَا أَذْ ذِينْ يِيڒِي إِجّْ ن ؤُقَارِّي يُودْجْغنْ ن لْ-إِيمَانْ نّشْ أَڒْ غَا ثَاوْيذْ ڒْغِيدْجثْ ذِي ڒخْذَايمْ ؤُ ذِي ثُوسّْنَا ن مَارَّا ڒْخَارْ إِ غَارْومْ ذِي يَاسُوع لْمَاسِيحْ. 7 مَاغَارْ نشِّينْ أَقَا غَارْنغْ ڒفْرَاحثْ ثَامقّْرَانْثْ ذ ؤُفوّجْ، مِينْزِي زِي سِّيبّثْ ن ثَايْرِي نّشْ تّْوَاسَّاريّْحنْ ؤُڒَاونْ ن إِمْقدَّاسنْ.

8 س ؤُينِّي، وَاخَّا نشّْ غَارِي ثَارْيَاسْثْ أَطَّاسْ ذِي لْمَاسِيحْ حِيمَا أَذْ شكْ ؤُمُورغْ مِينْ إِشُووَّارنْ، 9 أَقَا نشّْ غَارِي حْسنْ، ذِي سِّيبّثْ ن ثَايْرِي، أَذْ زَّايكْ تَّارغْ. نشّْ بُولُوسْ، أَقَا أَيِي ذ أَوسَّارْ أَمْ مَامّشْ ثسّْنذْ، ؤُشَا ڒخُّو عَاوذْ ذ أَمحْبُوسْ ن يَاسُوع لْمَاسِيحْ، 10 نشّْ غَارِي إِشْثْ ن ثُوثْرَا زِي جِّيهثْ ن مِّي ؤُنِيسِيمُوسْ، ونِّي د-جِّيغْ ذِي سّْنَاسڒْ ذَا ذِي ڒحْبسْ. ◘1:‏10 1 كُور. 4‏:‏15. ڭال. 4‏:‏19؛ كُول. 4‏:‏9. 11 نتَّا ثُوغَا وَارْ شكْ إِنفّعْ زِيشْ، مَاشَا ڒخُّو أَقَا إِنفّعْ شكْ ذ نّشْ أَطَّاسْ. 12 نشّْ أَقَا أَرِّيغْ أَشْ ث-إِ-د غَاركْ، مَاشَا قْبڒْ إِ-ث أَمْ مِّي. 13 مَاغَارْ نشّْ مْڒِي ؤُفِيغْ إِڒِي أَقَا جِّيغْ ث ذَانِيثَا أَكِيذِي مَاحنْذْ أَذْ خَافِي إِسخَّارْ ذڭْ ومْشَانْ نّشْ مِينْ ذَا غَا كّغْ ذِي سّْنَاسڒْ خْ سِّيبّثْ ن لْ-إِنْجِيلْ. 14 مَاشَا نشّْ وَارْ خْسغْ شَا أَذْ ڭّغْ وَالُو بْڒَا مَا إِ غَا مْشَاوَارغْ أَكِيذكْ، حِيمَا ثْشُونِي إِ ثڭِّيذْ وَارْ ثتِّيڒِي س ؤُغِيڒْ، مَاشَا س ڒْخَاضَارْ. 15 مِينْزِي نِيشَانْ ثُوغَا إِمّْسبْضَا خَاكْ إِ ذْرُوسْ ن ڒْوقْثْ، حِيمَا أَذْ غَاركْ يِيڒِي عَاوذْ إِ ڒبْذَا، 16 زِي سَّا ذ ثْسَاونْثْ وَارْ إِدْجِي عَاذْ أَمْ ؤُمْسخَّارْ، مَاشَا أَمْ يِيجّنْ إِ إِدْجَانْ كْثَارْ زڭْ ؤُمْسخَّارْ، أَمْ وُومَا إِعِيزّنْ، إِ نشّْ بعْذَا، مَاهُو إِ شكْ، أَمْ ذِي دَّاثْ أَمْ ذِي سِيذِيثْنغْ!

17 مَاڒَا ثدْجِيذْ ذ أَمْعَاشَارْ أَكِيذِي ذِي لْ-إِيمَانْ، قبْڒْ إِ-ث أَمْ ونِّي نّشْ. 18 مَاڒَا نتَّا ثُوغَا إِضَّارِّي شكْ نِيغْ زعْمَا ذَايسْ أَمَارْوَاسْ، أڭّْ إِ-ث خَافِي! 19 نشّْ، بُولُوسْ، ؤُرِيغْ س ؤُفُوسْ إِنُو، أَقَا أَذْ ث خدْجْصغْ! مَاحنْذْ وَارْ قَّارغْ شَا، أَقَا ؤُڒَا ذ شكْ ثتُّورْسذْ أَيِي إِخفْ نّشْ. 20 وَاهْ، أَ ثَاوْمَاثْ إِنُو، أَقَا تّْوَاسَّاريّْحغْ زَّايكْ ذِي سِيذِيثْنغْ، سَاريّحْ ثَايْرِي إِنُو ذِي لْمَاسِيحْ.

21 نشّْ تِّيقّغْ أَذْ أَيِي ثسْڒِيذْ. ؤُرِيغْ أَشْ-د، ؤُشَا سّْنغْ أَقَا شكْ أَذْ ثڭّذْ مَاهُو مِينْ ذ أَشْ إِنِيغْ. 22 سوْجذْ أَيِي أَمْشَانْ مَانِي غَا سّنْسغْ، مِينْزِي سِّيثِيمغْ أَذْ غَارْومْ د-أَرزْفغْ س ثْژَادْجِيثْ نْومْ. ◘1:‏22 فِيل. 1‏:‏25.

23 إِبَافْرَاسْ، ونِّي أَكِيذِي ذَا ذِي ڒحْبسْ ذِي يَاسُوع لْمَاسِيحْ، أَقَا إِسدْجمْ خَاكْ س ڒهْنَا، ◘1:‏23 كُول. 1‏:‏7؛ 4‏:‏12. 24 ؤُڒَا ذ مَارْكُوسْ ذ أَرِيسْثَارْخُوسْ ذ ذِيمَاسْ ذ لُوكَا إِنِّي ذ أَيِي إِتِّيشنْ أَفُوسْ. ◘1:‏24 ڒخ. 12‏:‏12، 25؛ 15‏:‏37؛ كُول. 4‏:‏10؛ 2 تِيم. 4‏:‏11؛ 1 بُط. 5‏:‏13؛ ڒخ. 19‏:‏29؛ 20‏:‏4؛ 27‏:‏2؛ كُول. 4‏:‏10، 14؛ 2 تِيم. 4‏:‏10، 11.

25 أَرْضَا ن سِيذِيثْنغْ يَاسُوع لْمَاسِيحْ أَذْ يِيڒِي أَكْ-ذ بُوحْبڒْ نْومْ. أَمِينْ!