أَذْلِيسْ إِقدّْسنْ إِڭَالَاطِييّنْ ٥

ثِيڒلِّي ذِي لْمَاسِيحْ

١ بدّمْ نِيشَانْ ذِي ثِيڒلِّي ثنِّي ؤُمِي ذ أَنغْ إِفكّْ لْمَاسِيحْ، ؤُشَا وَارْ تّْذكّْوِيڒمْ عَاوذْ، مَاحنْذْ أَذْ ثكْسِيمْ أَزَايْڒُو ن ثسْمُوغِي. ◘

٢ أَقَا أَيِي نشّْ بُولُوسْ أَذْ أَومْ إِنِيغْ، مَاڒَا ثتّْوَاخثْنمْ، لْمَاسِيحْ وَارْ كنِّيوْ إِنفّعْ ذڭْ وَالُو. ◘ ٣ عَاوذْ شهّْذغْ إِ مَارَّا بْنَاذمْ إِ غَا إِتّْوَاخثْننْ، أَقَا نتَّا س ؤُمَارْوَاسْ حِيمَا أَذْ إِڭّْ مَارَّا مِينْ إِدْجَانْ ذِي شَّارِيعَا. ٤ كنِّيوْ إِنِّي إِتّخْسنْ أَذْ تّْوَاسڭّْذمْ س شَّارِيعَا، أَقَا ثْذوْڒنْ ثَارْخُومْ زِي لْمَاسِيحْ، ؤُشَا زِي أَرْضَا إِ زِي د-ثوْضَامْ. ٥ مِينْزِي نشِّينْ نتّْرَاجَا أَسِيثمْ ن ثْسڭْذَا س أَرُّوحْ نِّي إِدْجَانْ زِي لْ-إِيمَانْ. ٦ مَاغَارْ ذِي يَاسُوع لْمَاسِيحْ، أَخْثَانْ نِيغْ بْڒَا أَخْثَانْ وَارْ إِسكّْوِي وَالُو، مَاشَا مْغِيرْ لْ-إِيمَانْ وَاهَا نِّي إِتّْوَاكمّْڒنْ س ثَايْرِي. ◘

٧ كنِّيوْ ثُوزّْڒمْ مْلِيحْ! وِي كنِّيوْ إِمنْعنْ أَڒَامِي وَارْ ثتّطِّيفمْ عَاذْ س ڒَْامَانْ ذِي ثِيذتّْ؟ ◘ ٨ طْوَاعْ-أَ نْومْ وَارْ إِدْجِي زڭْ ونِّي ذ أَومْ إِتّْڒَاغَانْ. ٩ شْوَايْثْ ن ونْثُونْ إِسّْممّْ مَارَّا ڒْْعجْنثْ ن وَارشْثِي. ◘ ١٠ نشّْ تِّيقّغْ ذَايْومْ ذِي سِيذِيثْنغْ، أَقَا وَارْ غَارْونْ ثِيڒِي نّيّثْ نّغْنِي. ؤُ ونِّي كنِّيوْ إِتّْسدَّاعنْ، أَقَا أَذْ يَارْبُو ڒْْحُوكْمْ، مَانْ ونْ مَا إِعْنَا نتَّا. ◘

١١ أَ أَيْثْمَا، مَاڒَا نشّْ تّْبَارّْحغْ كنِّيوْ عَاذْ س وخْثَانْ، مَايمِّي عَاذْ إِ غَا تّْوَامَارّْثغْ؟ مَا خنِّي ثتّْوَابطّڒْ ثَاعنْكْرِيفْثْ ن صَّالِيبْ؟ ◘ ١٢ معْلِيكْ قَاعْ تّخْسغْ، أَقَا إِنِّي إِتّخْسنْ أَذْ كنِّيوْ قسّنْ، أَذْ تّْوَاقسّنْ سِيمَانْثْ نْسنْ.◘

١٣ إِ ثِيڒلِّي ؤُمِي د-ثتّْوَاڒَاغَامْ كنِّيوْ، أَ أَيْثْمَا، مَاشَا وَارْ تّْقدْجْبمْ ثِيڒلِّي أَمْ لْفُورْصَا إِ ويْسُومْ، مَاشَا سخَّارمْ إِجّنْ إِ ونّغْنِي س ثَايْرِي. ◘ ١٤ مِينْزِي مَارَّا شَّارِيعَا ثْكمّڒْ س يِيجّْ ن وَاوَاڒْ، أَقَا س مَانْ أَيَا: ”أَذْ ثخْسذْ جَّارْ نّشْ أَمشْنَاوْ إِخفْ نّشْ.“ ◘ ١٥ مَاشَا مَاڒَا ثْزعّْفمْ ؤُ ثتّتّمْ إِجّنْ ونّغْنِي، خنِّي حْضَامْ إِخفْ نْومْ وَارْ ثتّتّمْ شَا أَيَاوْيَا قَاعْ. ◘

ثُوذَارْثْ س أَرُّوحْ إِقدّْسنْ

١٦ مَاشَا نشّْ أَذْ أَومْ إِنِيغْ: ؤُيُورمْ ذِي أَرُّوحْ، وَارْ تّْكمّْڒنْعمَّارْصْ نّشْوَاثْ ن ويْسُومْ. ◘ ١٧ مِينْزِي دَّاثْ يَارزُّو مِينْ إِدْجَانْ ضِيدّْ ن أَرُّوحْ، ؤُشَا أَرُّوحْ يَارزُّو مِينْ إِدْجَانْ ضِيدّْ ن ويْسُومْ. نِيثْنِي س ثْنَاينْ تّْبدَّانْ أَكْ-ذ وَايَاوْيَا، خْ ؤُينِّي وَارْ ثْزمَّارمْ أَذْ ثڭّمْ مِينْ ثخْسمْ. ◘ ١٨ مَاشَا مَاڒَا أَرُّوحْ إِنْذهْ إِ كنِّيوْ، وَارْ ثدْجِيمْ عَاذْ سَاذُو شَّارِيعَا.

١٩ ڒخْذَايمْ ن ويْسُومْ بَاننْثْ، أَقَا أَثنْثْ ذ زِّينَا ذ ڒخْمجْ ذ فَارْقْ-شّْغڒْ ◼ ◘ ٢٠ ذ ؤُعْبَاذْ إِ لْ-أَصْنَامْ ذ ثْسحَّارْثْ ذ ڒعْذَاوثْ ذ ؤُمْشبّشْ ذ ڒحْسذْ ذ ثفْقحْثْ ذ ؤُغوّغْ ذ ؤُبطُّو ذ ثْغُورِيوِينْ إِ د-إِتّفّْغنْ زڭْ وبْرِيذْ، ◼ ٢١ ذ ثُوسْمِي ذ ونْغَايْ ذ ؤُغلِّي ذ ڒفْسذْ ؤُڒَا ذ ثِيمسْڒَايِينْ نّغْنِيثْ أَمْ ثِينَا. إِنِّي إِتّْشغْڒنْ إِخفْ نْسنْ أَكْ-ذ ثْمسْڒَايِينْ-أَ، أَقَا إِزْوَارغْ نِّيغْ ث، ؤُ أَذْ ث إِنِيغْ عَاوذْ، أَقَا نِيثْنِي وَارْ وَارّْثنْ شَا ثَاڭلْذِيثْ ن أَربِّي. ◘

٢٢ مَاشَا ڒْْغِيدْجثْ ن أَرُّوحْ أَقَا-ت ذ ثَايْرِي ذ ڒفْرَاحثْ ذ ڒهْنَا ذ ڒضْرَافثْ ذ تَّاسِيعْ ن ڒْْخَاضَارْ ذ ثْشُونِي ذ لْ-إِيمَانْ ذ ثمْهِينْثْ ؤُڒَا ذ صّْبَارْ. ◘ ٢٣ شَّارِيعَا وَارْ ثدْجِي ضِيدّْ ن ثْمسْڒَايِينْ-أَ. ◘ ٢٤ مَاشَا إِنِّي إِدْجَانْ زِي لْمَاسِيحْ أَقَا صلّْبنْ أَيْسُومْ نْسنْ أَكْ-ذ مَارَّا شّهْوَاثْ ذ نّشْوَاثْ. ◘ ٢٥ أجّْ أَنغْ أَذْ ندَّارْ س أَرُّوحْ ؤُ أَذْ نْسلّمْ إِخفْ نّغْ إِ أَرُّوحْ. ٢٦ وَارْ ذ أَنغْ إِتّجِّي أَذْ نْوقَّارْ إِجّْ ونّغْنِي س نِّيفَاقْ، أَمْ نسّحْقَارَا إِجّنْ ونّغْنِي ؤُ نتَّاسمْ ؤُڒَا ذ إِجّنْ زڭْ ونّغْنِي.

◘٥:١ 5:‏1 إِشا. 9‏:‏3؛ يُوح. 8‏:‏32؛ رُوم. 6‏:‏18؛ 1 بُط. 2‏:‏16.

◘٥:٢ 5:‏2 ڒخ. 15‏:‏1.

◘٥:٦ 5:‏6 مت. 12‏:‏50؛ يُوح. 15‏:‏14؛ 1 كُور. 7‏:‏19؛ 2 كُور. 5‏:‏17؛ ڭال. 6‏:‏15؛ كُول. 3‏:‏11؛ 1 تس. 1‏:‏3.

◘٥:٧ 5:‏7 ڭال. 3‏:‏1.

◘٥:٩ 5:‏9 1 كُور. 5‏:‏6.

◘٥:١٠ 5:‏10 2 كُور. 2‏:‏3؛ 8‏:‏22.

◘٥:١١ 5:‏11 1 كُور. 1‏:‏23.

◘٥:١٢ 5:‏12 ياش. 7‏:‏25.

◘٥:١٣ 5:‏13 1 كُور. 8‏:‏9؛ 1 بُط. 2‏:‏16؛ يَاه. 4.

◘٥:١٤ 5:‏14 لَاوِي 19‏:‏18؛ مت. 22‏:‏39؛ مك. 12‏:‏31؛ رُوم. 13‏:‏8؛ يَاع. 2‏:‏8.

◘٥:١٥ 5:‏15 2 كُور. 12‏:‏20.

◘٥:١٦ 5:‏16 رُوم. 13‏:‏14؛ 1 بُط. 2‏:‏11.

◘٥:١٧ 5:‏17 رُوم. 7‏:‏15‏-‏26.

◼٥:١٩ 5:‏19 ’فَارْقْ-شّْغڒْ‘ - نِيغْ ’ڒقْبَاحثْ‘.

◘٥:١٩ 5:‏19 1 كُور. 3‏:‏3؛ يَاع. 3‏:‏14.

◼٥:٢٠ 5:‏20 ’أَمْشُوبّشْ‘ - نِيغْ ’لْخِيلَافْ‘ (لِيخَالَافَاثْ).

◘٥:٢١ 5:‏21 1 كُور. 6‏:‏10؛ أَفا. 5‏:‏5؛ كُول. 3‏:‏6؛ أَسَا. 22‏:‏15.

◘٥:٢٢ 5:‏22 أَفا. 5‏:‏9.

◘٥:٢٣ 5:‏23 1 تِيم. 1‏:‏9.

◘٥:٢٤ 5:‏24 رُوم. 6‏:‏6؛ 13‏:‏14؛ ڭال. 2‏:‏20؛ 1 بُط. 2‏:‏11.