أَذْلِيسْ إِقدّْسنْ يَاهُوذَا ١

يَاهُوذَا

١ يَاهُوذَا، أَمْسخَّارْ ن يَاسُوع لْمَاسِيحْ، ذ ؤُمَاسْ ن يَاعْقُوبْ.

إِ ڒڭْنُوسْ إِتّْوَاڒَاغَانْ، إِنِّي إِتّْوَاعِيزّنْ زِي أَربِّي، بَابَاثْنغْ، ذ إِنِّي إِتّْوَاحْضَانْ زِي يَاسُوع لْمَاسِيحْ. ٢ إِڒِي أَذْ غَارْومْ ثمَّارْنِي أَرّحْمثْ ذ ڒهْنَا ذ ثَايْرِي.

٣ أَ إِمْعِيزّنْ إِنُو، ؤُمِي شطَّارغْ مَاحنْذْ أَذْ أَومْ د-أَرِيغْ خْ ثُوذَارْثْ نّغْ إِمُوننْ، أَقَا ؤُفِيغْ بلِّي إِتّْخصَّا أَيِي أَذْ أَومْ د-أَرِيغْ س ؤُزِييَّارْ، حِيمَا أَذْ ثمّنْغمْ س جّهْذْ خْ لْ-إِيمَانْ إِ إِمّوْشنْ إِشْثْ ن ثْوَاڒَا إِ ڒبْذَا إِ إِمْقدَّاسنْ. ٤ مِينْزِي شَا ن إِوْذَانْ خْثُوتّْڒنْ غَارْ ذَاخڒْ، إِنِّي ثُوغَا إِتّْوَازمّمنْ إِ ڒْْحُوكْمْ-أَ قْبڒْ: أَقَا نِيثْنِي ذ إِعفَّاننْ، إِنِّي إِبدّْڒنْ أَرْضَا ن أَربِّي نّغْ ذڭْ إِجّْ ن نّْعِي ن ؤُفُوشّحْ، ؤُشَا نكَّارنْ أَينِّي ن سِيذِي أَربِّي ذ سِيذِيثْنغْ يَاسُوع لْمَاسِيحْ. ◘

٥ مَاشَا خْسغْ أَذْ كنِّيوْ سّْعقْڒغْ، أَقَا مَارَّا كنِّيوْ ثسّْنمْ مَانْ أَيَا مْلِيحْ، بلِّي أَربِّي، ؤُمِي إِفكّْ ڒْْڭنْسْ زِي ثمُّورْثْ ن مِيصْرَا، ثُوغَا إِسّْهلّكْ أَوَارْنِي مَانْ أَيَا إِنِّي وَارْ يُومِيننْ شَا. ◘ ٦ ؤُشَا لْمَالَاكَاثْ نِّي وَارْ حْضِينْثْ أَوقَّارْ نْسنْ أَمزْوَارُو، مَاشَا جِّينْثْ ثَازذِّيغْثْ نْسنْ، أَقَا نتَّا إِحْضَا خَاسنْ س سّْنَاسڒْ وَارْ إِتّْوِيڒِينْ سَاذُو ثَادْجسْثْ إِ ڒْْحُوكْمْ ن وَاسّْ أَمقّْرَانْ، ◘ ٧ أَمْ مَامّشْ سَاذُومْ ذ عَامُورَّا ذ ثْندَّامْ إِ ذ أَسْ د-إِنّْضنْ، مَانِي ڭِّينْ نِيثْنِي فَارْقْ-شّْغڒْ س وبْرِيذْ ذ إِجّنْ أَمْ ڭِّينْثْ ثِينَا س ثْنَاينْ ؤُ ضْفَارنْثْ دَّاثْ نّغْنِي، أَقَا تّْوَامَّارْسنْثْ ذ إِمذْيَا ن ثْمسِّي إِتّْذُومَانْ، تّْوَاحكْمنْثْ غَارْ شّْرعْ. ◘

٨ أَمنِّي عَاوذْ إِ غَا هلّْكنْ إِنَا، إِنِّي إِسّخْمَاجنْ دَّاثْ أَمْ د-تَّاذْفنْ ذِي ثِيرْجَا، إِنِّي إِمّنْضَارنْ صُّولْطَا ن إِجنْوَانْ ؤُشَا تّْشقَّافنْ ذڭْ ؤُعُودْجِي نّسْ.

٩ مَاشَا ڒَْامِي ثُوغَا إِسَّاوَاڒْ مِيخَايِيلْ، أَزدْجِيفْ ن لْمَالَاكَاثْ، أَكْ-ذ إِبْڒِيسْ خْ أَرِّيمثْ ن مُوسَا، وَارْ خَاسْ إِحْكِيمْ س إِجّْ ن ڒْْحُوكْمْ إِتّْشقَّافنْ، مَاشَا إِنَّا: ”سِيذِي أَذْ شكْ إِخدْجصْ!“ ◘ ١٠ مَاشَا إِنَا تّْشقَّافنْ ذِي مَارَّا مِينْ وَارْ سِّيننْ، ؤُشَا س ثْمسْڒَايِينْ إِ غَارْ تّْوَاجبّْذنْ نِيثْنِي أَمْ إِمُودَّارنْ إِڭْنَاونْ عْلَاحْسَابْ طّْبِيعثْ نْسنْ، أَقَا أَردّْدْجنْ نِيثْنِي إِخفْ نْسنْ. ◼ ◘ ١١ ؤُشْثْ خَاسنْ، مِينْزِي نِيثْنِي ؤُيُورنْ أَبْرِيذْ ن قَايِينْ ؤُشَا ؤُمِي تّْمژْرنْ ذِي ڒْْمُونثْ ضْفَارنْ نِيثْنِي أَغكّْوِي ن بَالْعَامْ ؤُ تّْوَاهلْكنْ ذڭْ ؤُغوّغْ ن كُورَاخْ. ◘

١٢ إِنَا ذ إِنِّي إِسّْفطَّاحنْ إِخفْ نْسنْ س ؤُنشْوثْ نْسنْ، وَارْ تّْسضْحِينْ شَا أَذْغبَّانْ. أَقَا أَثنْ ذ إِسيْنُوثنْ بْڒَا أَنْژَارْ، تّْوَاعَارّْننْ زِي سَّا غَارْ ذِيهَا س ؤُسمِّيضْ، أَقَا أَثنْ ذ ثِيشجِّيرَا نِّي ذِي ثدْجَا ڒْْغِيدْجثْ نْسنْثْ ثْودَّارْ، أَقَا وَارْ ذَايْسنْثْ ثدْجِي بُو ڒْْغِيدْجثْ، مُّوثنْثْ وِيسّْ مَارْثَاينْ ؤُشَا تّْوَاقڒْعنْثْ زڭْ إِژوْرَانْ نْسنْثْ. ◘ ١٣ نِيثْنِي ذ ڒمْوَاجْ ن ڒبْحَارْ إِهَاجنْ، إِنِّي إِسُّوسُوفنْ إِكُوفَّانْ ن ڒفْضِيحثْ نْسنْ، أَقَا أَثنْ ذ إِثْرَانْ ودَّارنْ، إِنِّي ؤُمِي ثتّْوَاسّوْجذْ ثُوبَّارْشنْثْ ن ثَادْجسْثْ إِ ڒبْذَا. ◘

١٤ مَاشَا حَانُوخْ، ونِّي ذ وِيسّْ سبْعَا زِي أَذَامْ، إِنبَّا خَاسنْ، إِنَّا: ”خْزَارْ، سِيذِي أَذْ د-يَاسْ أَكْ-ذ ڒُْوڒُوفْ ن ڒُْوڒُوفْ ن إِمْقدَّاسنْ نّسْ، ◘ ١٥ حِيمَا أَذْ إِڭّْ ڒْْحُوكْمْ نّسْ خْ مَارَّا إِوْذَانْ زِي سِّيبّثْ ن مَارَّا ثِيمڭَّا ن يِينِّي إِڭِّينْ ثُوعفّْنَا، ؤُ زِي سِّيبّثْ ن وَاوَاڒنْ إِقسْحنْ إِ زِي سِّيوْڒنْ إِمذْنَابْ إِغشَّاشنْ.“ ◘

١٦ إِنَا تّْعكَّاسنْ، تّْشثْشَانْ خْ كُوڒْ دَّابْ ن سِّيبّثْ، أَمْ ڭُّورنْ غَارْ نّشْوَاثْ نْسنْ، أَقمُّومْ نْسنْ إِسَّاوَاڒْ س ثْمسْڒَايِينْ ثِيعفَّانِينْ أَڒْ طَّارْفْ، تّڭّنْ ثِيقدُّوحِينْ إِ إِوْذَانْ إِ ثِيزِي ن يِيخفْ نْسنْ. ◘

١٧ مَاشَا كنِّيوْ، أَ إِمْعِيزّنْ إِنُو،عقْڒمْ أَوَاڒنْ إِ إِزَّارْ سِّيوْڒنْ زَّايْسنْ رُّوسُولْ ن سِيذِيثْنغْ يَاسُوع لْمَاسِيحْ، ◼ ١٨ إِنِّي ذ أَومْ إِنَّانْ، أَقَا ذڭْ ؤُنڭَّارْ ن زّْمَانَاثْ أَذْ ذِينْ إِڒِينْ إِمسْثهْزَاينْ، إِنِّي إِ غَا إِضْفَارنْ ڒقْجَاهثْ عْلَاحْسَابْ نّشْوَاثْ نْسنْ. ◘ ١٩ أَقَا ذ يِينَا ذ إِنِّي إِفَارّْزنْ إِخفْ نْسنْ أَمْ إِوْذَانْ إِضفَّارنْ طّْبِيعثْ ن يِيخفْ نْسنْ، مِينْزِي وَارْ غَارْسنْ بُو أَرُّوحْ.

٢٠ مَاشَا كنِّيوْ، أَ إِمْعِيزّنْ إِنُو، تّْوَابْنَامْ زڭْ ؤُزدْجِيفْ ذِي لْ-إِيمَانْ نْومْ إِقدّْسنْ س أَرُّوحْ إِقدّْسنْ، أَمْ ثژَّادْجَامْ. ٢١ أجّْ أَنغْ أَذْ نحْضَا إِخفْ نّغْ ذِي ثَايْرِي ن أَربِّي أَمْ نتّْرَاجَا أَرّحْمثْ ن سِيذِيثْنغْ يَاسُوع لْمَاسِيحْ إِ ثُوذَارْثْ نّغْ إِتّْذُومَانْ. ٢٢ قڒْعمْ شَا زَّايْسنْ زِي ثْمسِّي. ٢٣ مَاڒَا ثُوبنْ نِيثْنِي، سشْنمْ أَسنْ أَرّحْمثْ، مَاشَا أَكْ-ذ ثِيڭّْوُوذِي، وَاهْ، عِيفّمْ عَاذْ زِي ثْشَامِيرْ إِ إِتّْوَاسّْخمْجنْ زڭْ ويْسُومْ.

٢٤ مَاشَا إِ نتَّا، ونِّي إِزمَّارنْ أَذْ أَنغْ إِحْضَا بْڒَا أَنقْڒَاضْ ؤُ بْڒَا ڒخْمجْ ؤُ ونِّي أَذْ أَنغْ يڭّْ أَذْ نْبدّْ نِيشَانْ بْڒَا ڒْْعِيبْ زَّاثْ إِ ؤُعُودْجِي نّسْ س ڒفْرَاحثْ ٢٥ - أَقَا نتَّا ذ أَربِّي وحّْذسْ، أَمْسنْجمْ نّغْ - أَقَا إِ نتَّا د-إِتَّاسْ ؤُسمْغَارْ ذ ڒْْعزّْ ذ شَّانْ ذ لْعَاضَامَا، أَمْ ڒخُّو أَمْ إِ ڒبْذَا قَاعْ. أَمِينْ. ◘

◘١:٤ 1:‏4 1 بُط. 2‏:‏8؛ 2 بُط. 2‏:‏1، 3.

◘١:٥ 1:‏5 ڒخْڒ. 14‏:‏29؛ 26‏:‏64، 65؛ إِزهد. 106‏:‏26؛ 1 كُور. 10‏:‏5؛ عبر. 3‏:‏17.

◘١:٦ 1:‏6 2 بُط. 2‏:‏4.

◘١:٧ 1:‏7 أَمز. 19‏:‏24؛ أَعَوذ. 29‏:‏22؛ إِشا. 13‏:‏19؛ إِرْم. 50‏:‏40؛ حِز. 16‏:‏49؛ حُوش. 11‏:‏8؛ عَام. 4‏:‏11؛ لك. 17‏:‏29؛ 2 بُط. 2‏:‏6.

◘١:٩ 1:‏9 دَان. 10‏:‏13؛ 12‏:‏1؛ زَاك. 3‏:‏2؛ 2 بُط. 2‏:‏11؛ أَسَا. 12‏:‏7.

◼١:١٠ 1:‏10 ’إِمُودَّارنْ‘ - نِيغْ ’لْحَايَاوَانَاثْ‘.

◘١:١٠ 1:‏10 2 بُط. 2‏:‏12.

◘١:١١ 1:‏11 أَمز. 4‏:‏8؛ ڒخْڒ. 16‏:‏1؛ 22‏:‏7، 21؛ 2 بُط. 2‏:‏15؛1 يُوح. 3‏:‏12.

◘١:١٢ 1:‏12 2 بُط. 2‏:‏13، 17.

◘١:١٣ 1:‏13 إِشا. 57‏:‏20.

◘١:١٤ 1:‏14 أَمز. 5‏:‏18؛ دَان. 7‏:‏10؛ ڒخ. 1‏:‏11؛ 1 تس. 1‏:‏10؛ 2 تس. 1‏:‏10؛ أَسَا. 1‏:‏7.

◘١:١٥ 1:‏15 مت. 12‏:‏36.

◘١:١٦ 1:‏16 2 بُط. 2‏:‏18.

◼١:١٧ 1:‏17 ’رُّوسُولْ‘ - نِيغْ ’إِمَازَاننْ‘.

◘١:١٨ 1:‏18 ڒخ. 20‏:‏29؛ 1 تِيم. 4‏:‏1؛ 2 تِيم. 3‏:‏1؛ 4‏:‏3؛ 2 بُط. 2‏:‏1؛ 3‏:‏3.

◘١:٢٥ 1:‏25 رُوم. 16‏:‏27؛ 1 تِيم. 1‏:‏17.