أَذْلِيسْ إِقدّْسنْ أَسَارْڭبْ 1

أَسَارْڭبْ

ثَامزْوَارُوثْ

1 أَسَارْڭَابْ ن يَاسُوع لْمَاسِيحْ إِ ذ أَسْ إِوْشَا أَربِّي، حِيمَا أَذْ إِسّْشنْ إِ إِمْسخَّارنْ نّسْ مِينْ إِتّْخصَّا أَذْ إِمْسَارْ ذغْيَا، ؤُشَا إِسَّارْڭبْ إِ-ث أَمْ ث إِسّكّْ س ؤُفُوسْ ن لْمَالَاكْ نّسْ إِ ؤُمْسخَّارْ نّسْ يُوحَانَّا. 2 وَانِيثَا إِشْهذْ خْ وَاوَاڒْ ن أَربِّي ؤُ زِي شّْهَاذثْ ن يَاسُوع لْمَاسِيحْ ؤُ زِي مَارَّا مِينْ إِژْرَا، 3 سّعْذْ ن ونِّي إِقَّارنْ ذ يِينِّي إِتّسْڒَانْ أَوَاڒنْ ن نُّوبُووَا-يَا ؤُ قِّيمنْ تّطّْفنْ ذِي مِينْ ذَايْسنْ يُورَانْ، مَاغَارْ أَقَا ڒْوقْثْ ثِيوضْ-د. ◘

4 يُوحَانَّا، إِ سبْعَا ن ثْمسْمُونِينْ ذِي أَسِييَا: أَذْ كِيذْومْ يِيڒِي أَرْضَا ذ ڒهْنَا زڭْ ونِّي إِدْجَانْ ذ ونِّي ثُوغَا ذ ونِّي د غَا يَاسنْ، ؤُڒَا زِي سبْعَا ن أَرُّوحَاثْ نِّي إِدْجَانْ زَّاثْ إِ ڒْعَارْشْ نّسْ، ◘ 5 ؤُ زِي يَاسُوع لْمَاسِيحْ، أَشهَّاذْ أَمْثِيقِّي، أَمنْزُو ن إِمتِّيننْ ذ أَمقّْرَانْ ن إِجدْجِيذنْ ن ثمُّورْثْ. إِ ونِّي ذ أَنغْ إِتّخْسنْ ؤُ ذ أَنغْ إِفكّنْ زِي دّْنُوبْ نّغْ س إِذَامّنْ نّسْ، ◘ 6 ذ ونِّي يَارّْ أَنغْ ذ إِشْثْ ن ثَاڭلْذَا ن إِكهَّاننْ غَارْ أَربِّي ذ بَابَاسْ، إِ نتَّا أَذْ غَارسْ يِيڒِي ؤُعُودْجِي ذ صُّولْطَا إِ ڒبْذَا قَاعْ. أَمِينْ! ◘

7 خْزَارْ، نتَّا أَذْ د-يَاسْ أَكْ-ذ إِسيْنُوثنْ، كُوڒْ ثِيطّْ أَذْ ث ثْژَارْ، ؤُڒَا ذ إِنِّي ث إِسّْنُوقّْبنْ. مَارَّا ثِيقبَّاڒْ ن ثمُّورْثْ أَذْ خَاسْ وْثنْثْ أَڭجْذُورْ. وَاهْ، أَمِينْ! ◘

8 نشّْ ذ أَلِيفْ ذ ثَاوْ، أَمزْوَارُو ذ ؤُنڭَّارُو، إِقَّارْ سِيذِي أَربِّي، ذ ونِّي إِدْجَانْ ذ ونِّي ثُوغَا ذ ونِّي د غَا يَاسنْ، أَمْزمَّارْ خْ كُوڒْشِي. ◘

أَضْهَارْ ن يَاسُوع لْمَاسِيحْ

9 نشّْ، يُوحَانَّا، ؤُمَاثْومْ ذ ؤُمْعَاشَارْ نْومْ ذِي ڒْمحْنثْ ؤُ ذِي صّْبَارْ نِّي إِدْجَانْ ذِي يَاسُوع، ثُوغَا أَيِي ذِي ثڭْزِيرْثْ قَّارنْ أَسْ بَاثْمُوسْ ذِي طّْوعْ ن وَاوَاڒْ ن أَربِّي ذ شّْهَاذثْ ن يَاسُوع لْمَاسِيحْ. 10 ؤُسِيغْ-د ذِي أَرُّوحْ ذڭْ وَاسّْ أَمزْوَارُو ن سِّيمَانَا ؤُشَا سْڒِيغْ أَوَارْنِي أَيِي إِشْثْ ن ثْمِيجَّا ثجْهذْ أَمْ ؤُسُوضِي ذڭْ ؤُيِيشّْ ن ؤُشَارِّي، ◼ ◘ 11 ثقَّارْ: ”مِينْ ثتّْوَاڒِيذْ، أَرِي ث ذڭْ إِجّْ ن وذْلِيسْ إِتّْوَانْضنْ، سّكّْ إِ-ت-إِ-د إِ سبْعَا ن ثْمسْمُونِينْ: غَارْ أَفَاسُوسْ، غَارْ سْمِيرْنَا، غَارْ بِيرْغَامُوسْ، غَارْ ثِييَاثِيرَا، غَارْ سَارْذِيسْ، غَارْ فِيلَاذِيلْفِييَا ؤُشَا غَارْ لَايُوذِيكِييَا.“

12 خنِّي نّْقڒْبغْ، حِيمَا أَذْ سّْنغْ وِي كِيذِي إِسَّاوَاڒنْ. أَڒَامِي نّْقڒْبغْ، ژْرِيغْ سبْعَا ن ڒقْنَاذڒْ ن وُورغْ. 13 ذِي ڒْوسْطْ ن ڒقْنَاذڒْ إِجّنْ أَمْ مِّيسْ ن بْنَاذمْ، ثُوغَا يَارْضْ أَپَالْطُو ن ؤُكهَّانْ ؤُ غَارسْ إِجّْ ن وبْيَاسْ ن وُورغْ خْ إِذْمَارنْ. ◘ 14 أَزدْجِيفْ نّسْ ذ ؤُشُووَّافْ نّسْ ثُوغَا أَثنْ ذ إِشمْڒَاڒنْ أَمْ ثَاضُوفْثْ، أَمْ وذْفڒْ، ؤُشَا ثِيطَّاوِينْ نّسْ أَمْ يِيحُوذَاقْ ن ثْمسِّي، ◘ 15 إِضَارنْ نّسْ أَمْ نّْحَاسْ زِي لُوبْنَانْ، إِحْمَانْ ذڭْ ؤُفَارَّانْ، ؤُ ڒْحسّْ نّسْ أَمْ ڒْحسّْ ن وَاطَّاسْ ن وَامَانْ. ◘ 16 ثُوغَا غَارسْ ذڭْ ؤُفُوسْ نّسْ أَفُوسِي سبْعَا ن يثْرَانْ ؤُشَا زڭْ ؤُقمُّومْ نّسْ إِتّفّغْ-د زَّايسْ لَانْسَا إِقْضعْ ؤُشَا أَغمْبُوبْ نّسْ أَمْ ثْفُوشْثْ س جّهْذْ نّسْ. ◘

17 أَڒَامِي ث ژْرِيغْ، وْضِيغْ أَسْ غَارْ إِضَارنْ نّسْ أَخْمِي مُّوثغْ ؤُشَا نتَّا إِسَّارْسْ خَافِي أَفُوسْ نّسْ أَفُوسِي، إِنَّا: ”وَارْ تّڭّْوذْ شَا! أَقَا نشّْ ذ أَمزْوَارُو ذ ؤُنڭَّارُو، ◘ 18 نشّْ ذ ونِّي إِدَّارنْ، ؤُ نشّْ ثُوغَا مُّوثغْ، ؤُ خْزَارْ، أَقَا نشّْ ذ ونِّي إِدَّارنْ إِ ڒبْذَا قَاعْ! أَقَا غَارِي ثْسَارُوثْ ن ڒْموْثْ ذ ڒَاخَارْثْ. ◘ 19 س ؤُينِّي أَرِي مِينْ ثژْرِيذْ ؤُڒَا ذ ثِيمسْڒَايِينْ نِّي إِدْجَانْ ذ ثِيمسْڒَايِينْ نِّي إِ غَا إِمْسَارنْ أَوَارْنِي مَانْ أَيَا. 20 أَقَا سِّيرّْ ن سبْعَا ن إِثْرَانْ إِ ثژْرِيذْ ذڭْ ؤُفُوسْ إِنُو أَفُوسِي ؤُ سِّيرّْ ن سبْعَا ن ڒقْنَاذڒْ ن وُورغْ ذ وَا: سبْعَا ن إِثْرَانْ أَقَا أَثنْ ذ لْمَالَاكَاثْ ن سبْعَا ن ثْمسْمُونِينْ ؤُشَا سبْعَا ن ڒقْنَاذڒْ، أَقَا أَثنْ ذ سبْعَا ن ثْمسْمُونِينْ.“

◘1:3 1:‏3 أَسَا. 22‏:‏7، 10.

◘1:4 1:‏4 ؤُف. 3‏:‏14؛ أَسَا. 1‏:‏8؛ 4‏:‏8؛ 11‏:‏17؛ 16‏:‏5.

◘1:5 1:‏5 إِشا. 55‏:‏4؛ ڒخ. 20‏:‏28؛ 1 كُور. 15‏:‏20؛ كُول. 1‏:‏18؛ عبر. 9‏:‏12، 14؛ 1 بُط. 1‏:‏19؛ 1 يُوح. 1‏:‏7؛ أَسَا. 3‏:‏14؛ 5‏:‏9.

◘1:6 1:‏6 رُوم. 12‏:‏1؛ 1 بُط. 2‏:‏5، 9؛ أَسَا. 5‏:‏10.

◘1:7 1:‏7 دَان. 7‏:‏13؛ زَاك. 12‏:‏10؛ مت. 24‏:‏30؛ 25‏:‏31؛ يُوح. 19‏:‏37؛ ڒخ. 1‏:‏11؛ 1 تس. 1‏:‏10؛ 2 تس. 1‏:‏10؛ يَاه. 14.

◘1:8 1:‏8 إِشا. 41‏:‏4؛ 44‏:‏6؛ أَسَا. 21‏:‏6؛ 22‏:‏13.

◼1:10 1:‏10 ’ذڭْ وَاسّْ أَمزْوَارُو ن سِّيمَانَا‘ - أَقَا-ث ذڭْ وَاسّْ ن ؤُمنْسِي إِقدّْسنْ ن أَربِّي ؤُمِي تِّيذَارنْ ڒْمُومِينِينْ (ذِي مْكُوڒْ سِّيمَانَا) ڒْموْثْ ن يَاسُوع لْمَاسِيحْ ذِي ثْمسْمُونِينْ.

◘1:10 1:‏10 أَسَا. 4‏:‏2.

◘1:13 1:‏13 حِز. 1‏:‏26؛ دَان. 7‏:‏13؛ أَسَا. 14‏:‏14.

◘1:14 1:‏14 دَان. 7‏:‏9؛ أَسَا. 19‏:‏12.

◘1:15 1:‏15 أَسَا. 14‏:‏2.

◘1:16 1:‏16 إِشا. 49‏:‏2؛ أَفا. 6‏:‏17؛ عبر. 4‏:‏12؛ أَسَا. 2‏:‏16؛ 19‏:‏15.

◘1:17 1:‏17 إِشا. 41‏:‏4؛ 44‏:‏6؛ 48‏:‏12.

◘1:18 1:‏18 أَيُوبْ 12‏:‏14؛ إِشا. 22‏:‏22؛ رُوم. 6‏:‏9؛ أَسَا. 3‏:‏7؛ 20‏:‏1.