أَذْلِيسْ إِقدّْسنْ أَمزْوَارُو ١

أَمزْوَارُو

ثَاخڒْقِيثْ ن إِجنْوَانْ ذ ثمُّورْثْ

١ ذڭْ ؤُمزْوَارُو إِخْڒقْ-د أَربِّي إِجنْوَانْ ذ ثمُّورْثْ. ◘

٢ ثُوغَا ثَامُّورْثْ ثخْڒَا، أَمْ مَامّشْ وَارْ ت إِتّْحِيذِي حذْ ؤُ خْ وُوذمْ ن وَامَانْ إِهوْڒنْ ثَادْجسْثْ، ؤُ أَرُّوحْ ن أَربِّي ثُوغَا إِتّْرَاحْ إِتَّاسْ-د خْ وُوذمْ ن وَامَانْ.

٣ ؤُشَا إِنَّا أَربِّي: ”أَذْ ثِيڒِي ثْفَاوْثْ“، ؤُشَا ثُوسَا-د ثْفَاوْثْ! ◼ ٤ إِژْرَا أَربِّي بلِّي ثَافَاوْثْ ثصْبحْ ؤُشَا إِبْضَا أَربِّي جَارْ ثْفَاوْثْ ذ ثَادْجسْثْ. ٥ إِڒَاغَا أَربِّي ثَافَاوْثْ ’أَزِيڒْ‘ ؤُ ’ثَادْجسْثْ‘ إِڒَاغَا أَسْ ’دْجِيڒثْ‘. ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ أَمزْوَارُو.

٦ ؤُشَا إِنَّا أَربِّي: ”أَذْ ثِيڒِي إِشْثْ ن ڒْْقُوبّثْ ذِي ڒْْوسْطْ ن وَامَانْ، أَذْ ثبْضَا أَمَانْ خْ وَامَانْ!“ ◘ ٧ أَربِّي إِڭَّا ڒْْقُوبّثْ ن ؤُجنَّا ؤُشَا إِبْضَا أَمَانْ إِ إِدْجَانْ سْوَادَّايْ إِ ڒْْقُوبّثْ خْ وَامَانْ إِ إِدْجَانْ سنّجْ إِ ڒْْقُوبّثْ. ؤُشَا أَمُّو إِ ثمْسَارْ. ◘ ٨ إِڒَاغَا أَربِّي إِ ڒْْقُوبّثْ ’أَجنَّا‘. ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ثْنَاينْ.

٩ ؤُشَا إِنَّا أَربِّي: ”أَذْ مُوننْ وَامَانْ إِ إِدْجَانْ سْوَادَّايْ إِ ؤُجنَّا غَارْ إِجّْ ن ومْشَانْ مَاحنْذْ أَذْ د-إِبَانْ ڒْْبَارّْ!“ ؤُشَا أَمُّو إِ ثمْسَارْ. ◘ ١٠ إِڒَاغَا أَربِّي إِ ڒْْبَارّْ ’ثَامُّورْثْ‘ ؤُ أَمُونِي ن وَامَانْ إِڒَاغَا أَسْ ’ڒبْحُورْ‘. ؤُشَا إِژْرَا أَربِّي بلِّي مَانْ أَيَا إِصْبحْ. ◼

١١ ؤُشَا إِنَّا أَربِّي: ”أَذْ د-ثسّغْمِي ثمُّورْثْ أَغمُّويْ أَزِيزَا: أَفْسُو أَزِيزَا إِ إِزَارّْعنْ زَّارِيعثْ ذ ثْشجِّيرَا س فْرُوثَا إِ د إِتِّيشنْ فْرُوثَاثْ عْلَاحْسَابْ مَارْكَا نْسنْثْ س زَّارِيعثْ نْسنْثْ ذَايسْ خْ وُوذمْ ن ثمُّورْثْ!“ ؤُشَا أَمُّو إِ ثمْسَارْ. ١٢ ثسّغْمِي-د ثمُّورْثْ أَغمُّويْ أَزِيزَا: أَفْسُو أَزِيزَا إِ إِزَارّْعنْ زَّارِيعثْ عْلَاحْسَابْ مَارْكَا نّسْ ذ ثْشجِّيرَا إِ د إِتِّيشنْ ڒْْغِيدْجثْ عْلَاحْسَابْ مَارْكَا نْسنْثْ س زَّارِيعثْ نْسنْثْ ذَايسْ. ؤُشَا إِژْرَا أَربِّي بلِّي مَانْ أَيَا إِصْبحْ. ١٣ ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ثْڒَاثَا.

١٤ ؤُشَا إِنَّا أَربِّي: ”أَذْ ذِينْ إِڒِينْثْ ثْفَاوِينْ ذِي ڒْْقُوبّثْ ن ؤُجنَّا حِيمَا أَذْ بْضَانْثْ جَارْ وَاسّْ ذ دْجِيڒثْ، أَذْ إِڒِينْثْ ذ ڒِْيمَارَاثْ، ذ وُوسَّانْ إِتّْوَاڭّنْ، ذ وُوسَّانْ، ذ إِسڭّْوُوسَا ◘ ١٥ ؤُشَا أَذْ إِڒِينْثْ ذ ثِيفَاوِينْ ذِي ڒْْقُوبّثْ ن ؤُجنَّا حِيمَا أَذْ وْشنْثْ ثَافَاوْثْ خْ ثمُّورْثْ!“ ؤُشَا أَمُّو إِ ثمْسَارْ. ◘ ١٦ إِڭَّا أَربِّي ثْنَاينْ ن ثِيفَاوِينْ مْغَارنْثْ، ثَافَاوْثْ ثَامقّْرَانْثْ، حِيمَا أَذْ ثحْكمْ خْ ؤُزِيڒْ، ؤُ ثَافَاوْثْ ثَامژْيَانْثْ حِيمَا أَذْ ثحْكمْ خْ دْجِيڒثْ، ؤُشَا ؤُڒَا ذ إِثْرَانْ. ١٧ إِسَّارْسْ إِ-ثنْثْ أَربِّي ذِي ڒْْقُوبّثْ ن ؤُجنَّا حِيمَا أَذْ وْشنْثْ ثَافَاوْثْ خْ ثمُّورْثْ ١٨ ؤُ حِيمَا أَذْ حكْمنْثْ خْ وَاسّْ ذ دْجِيڒثْ ؤُ حِيمَا أَذْ بْضَانْثْ جَارْ ثْفَاوْثْ ذ ثَادْجسْثْ. ؤُشَا إِژْرَا أَربِّي بلِّي مَانْ أَيَا إِصْبحْ. ١٩ ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ أَربْعَا.

٢٠ ؤُشَا إِنَّا أَربِّي: ”أَذْ د-سّفْينْ وَامَانْ س وَاطَّاسْ ن مَارَّا مِينْ ذِي إِدْجَا بُوحْبڒْ إِدَّارنْ ؤُشَا أَذْ ضْونْ إِجْضَاضْ سنّجْ إِ ثمُّورْثْ غَارْ مَانِي ثدْجَا ڒْْقُوبّثْ ن ؤُجنَّا!“ ◼ ٢١ إِخْڒقْ-د أَربِّي إِمُودَّارنْ إِمقّْرَاننْ ذِي ڒبْحَارْ ؤُ مَارَّا بُوحْبڒْ إِدَّارنْ إِتّنْهزَّانْ، إِنِّي زِي د-سّفْينْ وَامَانْ، عْلَاحْسَابْ مَارْكَا نْسنْ ؤُشَا مَارَّا إِجْضَاضْ س وَافْرِيونْ عْلَاحْسَابْ مَارْكَا نْسنْ. ؤُشَا إِژْرَا أَربِّي بلِّي مَانْ أَيَا إِصْبحْ.

٢٢ إِبَارْكْ إِ-ثنْ أَربِّي، إِنَّا: ”جّمْ-د ڒْْغِيدْجثْ، كْثَارمْ،عمَّارمْ أَمَانْ ن ڒبْحُورْ ؤُشَا أَذْ كْثَارنْ إِجْضَاضْ ذِي ثمُّورْثْ.“ ◘

٢٣ ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ خمْسَا.

٢٤ ؤُشَا إِنَّا أَربِّي: ”أجّْ ثمُّورْثْ أَذْ ثسُّوفّغْ مَارَّا مِينْ غَارسْ بُوحْبڒْ إِدَّارنْ عْلَاحْسَابْ مَارْكَا نّسْ: ڒبْهَايمْ ذ إِمُودَّارنْ نِّي إِتّْبُوعنْ ذ ڒْْمَاڒْ نْ ڒخْڒَا عْلَاحْسَابْ مَارْكَا نْسنْ!“ ؤُشَا أَمُّو إِ ثمْسَارْ. ◼ ٢٥ إِڭَّا أَربِّي ڒْْمَاڒْ ن ڒخْڒَا ن ثمُّورْثْ عْلَاحْسَابْ مَارْكَا نْسنْ، ؤُ ڒبْهَايمْ عْلَاحْسَابْ مَارْكَا نْسنْثْ ؤُ مَارَّا إِمُودَّارنْ نِّي إِتّْبُوعنْ خْ وُوذمْ ن ثمُّورْثْ عْلَاحْسَابْ مَارْكَا نْسنْ. ؤُشَا إِژْرَا أَربِّي بلِّي مَانْ أَيَا إِصْبحْ.

٢٦ ؤُشَا إِنَّا أَربِّي: ”أجّْ أَنغْ أَذْ نڭّْ أَذَامْ، بْنَاذمْ ذِي صِّيفثْ نّغْ، ذڭْ وَارْوَاسْ نّغْ، ؤُشَا أَذْ غَارسْ يِيڒِي جّهْذْ خْ إِسڒْمَانْ ن ڒبْحَارْ ؤُ خْ إِجْضَاضْ ن ؤُجنَّا ؤُ خْ ڒبْهَايمْ ؤُ خْ مَارَّا ثَامُّورْثْ ؤُ خْ مَارَّا إِمُودَّارنْ نِّي إِتّْبُوعنْ خْ ثمُّورْثْ!“ ◼ ٢٧ إِخْڒقْ-د أَربِّي أَذَامْ ذِي صِّيفثْ نّسْ. إِخْڒقْ إِ-ث-إِ-د ذِي صِّيفثْ ن أَربِّي، إِخْڒقْ إِ-ثنْ-د أَوْثمْ ذ ثوْثمْثْ. ◘

٢٨ إِبَارْكْ إِ-ثنْ أَربِّي ؤُشَا إِنَّا أَسنْ أَربِّي: ”جّمْ-د ڒْْغِيدْجثْ، كْثَارمْ،عمَّارمْ ثَامُّورْثْ ؤُشَا أَرّمْ ت سَاذُو ؤُفُوسْ نْومْ، حكْممْ خْ إِسڒْمَانْ ن ڒبْحَارْ ؤُ خْ إِجْضَاضْ ن ؤُجنَّا ؤُ خْ مَارَّا إِمُودَّارنْ نِّي إِتّْبُوعنْ خْ ثمُّورْثْ!“ ◘

٢٩ إِنَّا أَربِّي: ”خْزَارمْ، أَذْ أَومْ وْشغْ مَارَّا أَفْسُو أَزِيزَا إِ إِزَارّْعنْ زَّارِيعثْ خْ مَارَّا وُوذمْ ن ثمُّورْثْ ؤُڒَا ذ مَارَّا ثِيشجِّيرَا س ڒْْغِيدْجثْ غَارْسنْثْ نِّي إِزَارّْعنْ زَّارِيعثْ. مَانْ أَيَا أَذْ أَومْ يِيڒِي ذ مَاشَّا. ◼ ◘ ٣٠ ؤُ إِ مَارَّا ڒْْمَاڒْ ن ڒخْڒَا ن ثمُّورْثْ، ؤُ إِ مَارَّا إِجْضَاضْ ن ؤُجنَّا ؤُ إِ مَارَّا مِينْ إِتّْبُوعنْ خْ ثمُّورْثْ إِ ذِي إِدْجَا بُوحْبڒْ إِدَّارنْ، أَذْ أَسنْ يِيڒِي مَارَّا أَفْسُو أَزِيزَا ذ مَاشَّا إِ نِيثْنِي.“ ؤُشَا أَمُّو إِ ثمْسَارْ. ◘ ٣١ ؤُشَا إِژْرَا أَربِّي مَارَّا مِينْ إِڭَّا، ؤُ خْزَارْ، ثُوغَا إِصْبحْ أَطَّاسْ. ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ستَّا. ◘

◘١:١ 1:‏1 أَيُوبْ 38‏:‏4؛ إِزهد. 33‏:‏6؛ 89‏:‏12؛ 136‏:‏5؛ ڒخ. 14‏:‏15؛ 17‏:‏24؛ عبر. 11‏:‏3؛

◼١:٣ 1:‏3 ’ثَافَاوْثْ‘ - أَقَا ذِينْ إِجّْ ن ڒْْفَارْقْ جَارْ ثْفَاوْثْ غَارْ إِجّْ ن ؤُغزْذِيسْ ؤُ ثْفُوشْثْ ذ إِثْرَانْ غَارْ إِجّْ ن ؤُغزْذِيسْ نّغْنِي. ثَافُوشْثْ ذ يثْرَانْ أَقَا-ثنْ أَربُّونْ ثَافَاوْثْ، مَاشَا وَارْ ڭِّينْ ثَافَاوْثْ س يِيخفْ نْسنْ. ثِيرَا إِقدّْسنْ قَّارنْثْ أَقَا أَربِّي ذ ثَافَاوْثْ، وَارْ ذَايسْ بُو ثَادْجسْثْ (خْزَارْ 1 يُوحْ. 1:5). س ؤُينِّي ثضْهَارْ-د ثْفَاوْثْ ذَانِيثَا مَاشَا وَارْ نقَّارْ أَقَا أَربِّي إِخْڒقْ-د ثَافَاوْثْ.

◘١:٦ 1:‏6 إِزهد. 33‏:‏6؛ 104‏:‏2؛ 136‏:‏5؛ أَوڒن. 8‏‏:‏28؛ إِشا. 42‏:‏5؛ إِرْم. 10‏:‏12؛ 51‏:‏15

◘١:٧ 1:‏7 إِزهد. 33‏:‏7؛ 136‏:‏6؛ أَوڒن. 8‏:‏24؛ إِزهد. 148‏:‏4.

◘١:٩ 1:‏9 أَيُوبْ 26‏:‏10؛ 38‏:‏8؛ إِزهد. 24‏:‏2؛ 136‏:‏6.

◼١:١٠ 1:‏10 ’ڒبْحُورْ‘ - نِيغْ ’إِلْ‘ ذ ’إِلَاونْ‘.

◘١:١٤ 1:‏14 إِزهد. 136‏:‏7.

◘١:١٥ 1:‏15 أَعَوذ. 4‏:‏19؛ إِرْم. 31‏:‏35

◼١:٢٠ 1:‏20 ’غَارْ مَانِي ثدْجْ ڒْْقُوبّثْ ن ؤُجنَّا‘ - س ثْعِيبْرَانِيثْ ’خْ وُوذْمَاونْ ن ڒْْقُوبّثْ ن ؤُجنَّا‘.

◘١:٢٢ 1:‏22 أَمز. 8‏:‏17.

◼١:٢٤ 1:‏24 ’إِمُودَّارنْ‘ - إِخْسْ أَذْ يِينِي ’لْحَايَاوَانَاثْ‘.

◼١:٢٦ 1:‏26 ’أَذْ غَارسْ يِيڒِي‘ - س ثْعِيبْرَانِيثْ ’أَذْ غَارْسنْ يِيڒِي‘، مِينْ إِخْسْ أَذْ يِينِي ’أَذْ يِيڒِي غَارْ إِوْذَانْ ...‘.

◘١:٢٧ 1:‏27 أَمز. 5‏:‏1؛ 9‏:‏6؛ 1 كُور. 11‏:‏7؛ أَفا. 4‏:‏24؛ كُول. 3‏:‏10.

◘١:٢٨ 1:‏28 أَمز. 8‏:‏17؛ 9‏:‏1، 2، 7.

◼١:٢٩ 1:‏29 ’ثَاشجَّارْثْ‘ - نِيغْ ’أَسكْلُو‘ (’إِسكْلَا‘) نِيغْ ’ثَادَّاڭْثْ‘ (’ثِيدَّاڭِينْ‘). أَفسَّارْ - بْنَاذمْ ثُوغَا إِتّتّْ أَيْسُومْ ذِي ڒْوقْثْ نِّي. أَوَارْنِي إِ طُّوفَانْ إِبْذَا بْنَاذمْ أَذْ يشّْ أَيْسُومْ (خْزَارْ أَمز. 9:2-4).

◘١:٢٩ 1:‏29 أَمز. 9‏:‏3؛ إِزهد. 104‏:‏14، 15.

◘١:٣٠ 1:‏30 إِزهد. 104‏:‏14.

◘١:٣١ 1:‏31 أَعَوذ. 32‏:‏4؛ مك. 7‏:‏37.