أَذْلِيسْ إِقدّْسنْ أَمزْوَارُو ٢

١ أَمُّو إِ تّْوَاكمّْڒنْ إِجنْوَانْ ذ ثمُّورْثْ ذ قَاعْ ڒْْعسْكَارْ نْسنْ. ◼ ٢ ذڭْ وَاسّْ وِيسّْ سبْعَا إِكمّڒْ أَربِّي ڒْْخذْمثْ نّسْ إِ إِڭَّا ؤُشَا يَاريّحْ ذڭْ وَاسّْ وِيسّْ سبْعَا زِي مَارَّا ڒْْخذْمثْ نّسْ إِ إِڭَّا. ◘ ٣ إِبَاركْ أَربِّي أَسّْ وِيسّْ سبْعَا ؤُشَا إِسّْقدّسْ إِ-ث، مِينْزِي ذَايسْ إِ يَاريّحْ زِي مَارَّا ڒْْخذْمثْ نّسْ، ڒْْخذْمثْ إِ د-إِخْڒقْ أَربِّي مَاحنْذْ أَذْ ت إِڭّْ أَمنِّي.

إِنَا ذ إِمزْرُوينْ ن وخْڒَاقْ ن ؤُجنَّا ذ ثمُّورْثْ ڒَْامِي د-تّْوَاخڒْقنْ.

ثَاخڒْقِيثْ ن أَذَامْ ذ ثمْغَارْثْ نّسْ

٤ ذڭْ وَاسّْ إِ إِڭَّا سِيذِي أَربِّي ثَامُّورْثْ ذ إِجنْوَانْ ٥ - قْبڒْ ثُوغِي ذِينْ مَارَّا شْبَارْقْ ذِي ثمُّورْثْ ؤُ قْبڒْ د-إِغْمِي وفْسُو ن ييَّارْ، مِينْزِي سِيذِي أَربِّي وَارْ إِجِّي أَنْژَارْ أَذْ إِوّثْ عَاذْ خْ ثمُّورْثْ - ؤُشَا وَارْ ثُوغِي ذِينْ أَذَامْ عَاذْ حِيمَا أَذْ إِخْذمْ ثَامُّورْثْ، ٦ ثْڭعّذْ-د ثَايُّوثْ زِي ثمُّورْثْ، ثسُّو مَارَّا ؤُذمْ ن ثمُّورْثْ.

٧ ؤُشَا إِكوّنْ سِيذِي أَربِّي أَذَامْ زِي ثْعجَّاجْثْ ن ؤُشَاڒْ ؤُشَا إِسُوضْ ڒعْوِينْ ن ثُوذَارْثْ ذڭْ ونْزَارنْ نّسْ. أَمُّو إِ إِذْوڒْ أَذَامْ ذ إِجّْ ن نّفْسْ إِدَّارْ. ◘

٨ خنِّي إِژُّو سِيذِي أَربِّي جّنّثْ ذِي عَاذْنْ، جِّيهثْ ن شَّارْقْ، ؤُشَا إِسَّارْسْ ذِينْ أَذَامْ إِ إِڭَّا. ◼ ٩ ؤُشَا إِسّغْمِي-د سِيذِي أَربِّي زِي ثمُّورْثْ كُوڒْ ثَاشجَّارْثْ، ثشْنَا إِ ڒْْخژْرَاثْ ؤُ ثْمِيژِيذْثْ إِ مَاشَّا، ؤُشَا إِسّغْمِي-د ڒَْا ذ ثَاشجَّارْثْ ن ثُوذَارْثْ ذِي ڒْْوسْطْ ن جّنّثْ ؤُڒَا ذ ثَاشجَّارْثْ ن ثُوسّْنَا ن ڒْْخَارْ ذ ڒْْغَارْ. ◘

١٠ إِفّغْ-د إِجّْ ن إِغْزَارْ زِي عَاذْنْ، حِيمَا أَذْ إِسُّووْ جّنّثْ ؤُ سّنِّي إِمّْسبْضَا خْ أَربْعَا ن إِزدْجِيفنْ إِ إِڭِّينْ ثِيسدْجْيَاوِينْ. ١١ إِسمْ ن يغْزَارْ أَمزْوَارُو ذ فِيشُونْ. نتَّا إِ إِنّْضنْ إِ مَارَّا ثَامُّورْثْ ن حَاوِيلَا مَانِي إِدْجَا وُورغْ. ١٢ ؤُرغْ ن ثمُّورْثْ نِّي إِصْبحْ. أَقَا ذِينْ أَسرْغَاغْ أَشمْڒَاڒْ قَّارنْ أَسْ ’بذُولَا‘، ذ وژْرُو ن ’ؤُنِيكْسْ‘. ١٣ إِسمْ ن إِغْزَارْ وِيسّْ ثْنَاينْ ذ جِيحُونْ إِ ثُوغَا إِنّْضنْ إِ مَارَّا ثَامُّورْثْ ن كُوشْ. ١٤ إِسمْ ن إِغْزَارْ وِيسّْ ثْڒَاثَا ذ حِيدَّاقِيلْ. نتَّا إِتَّازّڒْ غَارْ شَّارْقْ ن أَشُّورْ. ؤُ إِغْزَارْ وِيسّْ أَربْعَا ذ لْفُورَاطْ.

١٥ إِكْسِي سِيذِي أَربِّي أَذَامْ ؤُشَا إِسَّارْسْ إِ-ث ذِي جّنّثْ ن عَاذْنْ، حِيمَا أَذْ ت إِخْذمْ ؤُ أَذْ ت إِحْضَا. ١٦ سِيذِي أَربِّي إِوصَّا أَذَامْ، إِنَّا: ”زِي مَارَّا ثِيشجِّيرَا ن جّنّثْ أَذْ ثشّذْ مَاشَّا، ١٧ مَاشَا زِي ثْشجَّارْثْ ن ثُوسّْنَا ن ڒْْخَارْ ذ ڒْْغَارْ وَارْ تّتّذْ شَا زَّايسْ، مِينْزِي ذڭْ وَاسّْ إِ زَّايسْ غَا ثشّذْ، ڒْْموْثْ إِ غَا ثمّْثذْ!“

١٨ إِنَّا سِيذِي أَربِّي: ”وَارْ إِعدّڒْ أَذْ يِيڒِي أَذَامْ وحّْذسْ. أَذْ أَسْ ڭّغْ وِي ث غَا إِعَاوْننْ، أَمْ نتَّا قِيبَاتْشْ نّسْ.“

١٩ ثُوغَا سِيذِي أَربِّي إِڭَّا زڭْ ؤُشَاڒْ مَارَّا ڒْْمَاڒْ ن ڒخْڒَا ؤُ مَارَّا إِجْضَاضْ ن ؤُجنَّا، ؤُشَا إِنْذهْ إِ-ثنْ غَارْ أَذَامْ، حِيمَا أَذْ إِژَارْ مَامّشْ إِ ثنْ غَا إِسمَّا. مَامّشْ إِ غَا إِسمَّا أَذَامْ كُوڒْ نّفْسْ إِدَّارنْ ذ وَا ذ إِسمْ نّسْ. ٢٠ إِڭَّا أَذَامْ إِسْمَاونْ إِ مَارَّا ڒبْهَايمْ ذ يجْضَاضْ ن ؤُجنَّا ؤُ إِ مَارَّا ڒْْمَاڒْ ن ڒخْڒَا، مَاشَا إِ أَذَامْ وَارْ يُوفِي وِي ث غَا إِعَاوْننْ ذ وِي غَا يِيڒِينْ أَمْ نتَّا قِيبَاتْشْ نّسْ.

٢١ إِسّهْوَا-د سِيذِي أَربِّي إِجّْ ن يِيضصْ يُودْجغْ خْ أَذَامْ ؤُشَا إِطّصْ. خنِّي إِكْسِي إِشْثنْ زِي ثْغزْذِيسِينْ نّسْ ؤُشَا إِقّنْ أَمْشَانْ يَارزْمنْ نِّي س ويْسُومْ. ٢٢ يَارَّا سِيذِي أَربِّي ثَاغزْذِيسْثْ ثنِّي إِ إِكْسِي زِي أَذَامْ ذ ثَامْغَارْثْ ؤُشَا يِيوْيِي ت-إِ-د غَارْ أَذَامْ. ◘ ٢٣ خنِّي إِنَّا أَذَامْ: ”ثْوَاڒَا-يَا ثَانِيثَا أَقَا-ت ذ إِغسْ زڭْ إِغْسَانْ إِنُو ذ أَيْسُومْ زڭْ ويْسُومْ إِنُو. ثَانِيثَا أَذْ ثتّْوَاسمَّا ’ثَارْيَازْثْ‘، إِخْسْ أَذْ يِينِي ’ثَامْغَارْثْ‘، مِينْزِي نتَّاثْ ثتّْوَاكْسِي-د زڭْ ورْيَازْ.“ ◘ ٢٤ خْ ؤُيَا أَذْ إِسْمحْ ورْيَازْ ذِي بَابَاسْ ذ يمَّاسْ، أَذْ إِقّنْ غَارْ ثمْغَارْثْ نّسْ ؤُشَا أَذْ إِڒِينْ ذ إِشْثْ ن دَّاثْ. ◼ ◘ ٢٥ ثُوغَا-ثنْ س ثْنَاينْ إِذْسنْ ذ إِعَارْيَاننْ، أَذَامْ ذ ثمْغَارْثْ نّسْ، مَاشَا ثُوغَا وَارْ ذِينْ شَا ن ڒحْيَا جَارْ أَسنْ. ◘

◼٢:١ 2:‏1 ’قَاعْ ڒْْعسْكَارْ نْسنْ‘ - نِيغْ ’مَارَّا ڒْْعسْكَارْ نْسنْ‘.

◘٢:٢ 2:‏2 ؤُف. 20‏:‏11؛ 31‏:‏17؛ أَعَوذ. 5‏:‏14؛ عبر. 4‏:‏4.

◘٢:٧ 2:‏7 1 كُور. 15‏:‏45، 47.

◼٢:٨ 2:‏8 ’عَاذْنْ‘ - إِسمْ وَانِيثَا إِخْسْ أَذْ يِينِي ’مژْرِي‘. س ؤُينِّي ثُوغَا جّنّثْ عَاذْنْ ذ إِجّْ ن ومْشَانْ مَانِي إِزمَّارْ بْنَاذمْ أَذْ يَارّْ مژْرِي عْلَاحْسَابْ مِينْ إِخْسْ أَربِّي، وَارْ إِدْجِي عْلَاحْسَابْ مِينْ إِخْسْ بْنَاذمْ.

◘٢:٩ 2:‏9 أَسَا. 2‏:‏7.

◘٢:٢٢ 2:‏22 1 كُور. 11‏:‏8.

◘٢:٢٣ 2:‏23 مـَال. 2‏:‏14؛ أَفا. 5‏:‏30، 31.

◼٢:٢٤ 2:‏24 ’إِشْثْ ن دَّاثْ‘ - س ثْعِيبْرَانِيثْ ’إِجّْ ن ويْسُومْ‘. أَوَاڒنْ خْسنْ أَذْ إِنِينْ بلِّي أَرْيَازْ ذ ثمْغَارْثْ نّسْ أَقَا-ثنْ ذ إِجّْ ن بْنَاذمْ. مَانْ أَيَا ذ تِّيذثْ س مِينْزِي حَاوَّا ثفّغْ زڭْ أَرِّيمثْ ن أَذَامْ س ؤُفُوسْ ن أَربِّي.

◘٢:٢٤ 2:‏24 مت. 19‏:‏5، 6؛ مك. 10‏:‏8؛ أَفا. 5‏:‏31؛ 1 كُور. 6‏:‏16.

◘٢:٢٥ 2:‏25 أَمز. 3‏:‏7.