١ إِنَّا سِيذِي إِ أَبْرَامْ: ”فّغْ زِي ثمُّورْثْ نّشْ، زِي ثمُّورْثْ مَانِي د-ثْخڒْقذْ ؤُ زِي ثَادَّارْثْ ن بَابَاشْ، رُوحْ غَارْ ثمُّورْثْ إِ ذ أَشْ غَا سّشْنغْ. ◘12:‏1 ڒخ. 7‏:‏3؛ عبر. 11‏:‏8. ٢ أَذْ زَّايكْ د-سُّوفّْغغْ إِجّْ ن ڒْْڭنْسْ إِمْغَارْ، أَذْ شكْ بَارْكغْ ؤُ أَذْ سّمْغَارغْ إِسمْ نّشْ ؤُشَا إِڒِي ذ شكْ عَاوذْ ذ لْبَارَاكَا. ٣ أَذْ بَارْكغْ ونِّي شكْ إِ غَا إِبَارْكنْ ذ ونِّي شكْ إِ غَا إِنعْڒنْ، أَذْ ث نعْڒغْ. ذَايكْ إِ غَا تّْوَابَارْكنْثْ مَارَّا ڒَْادْجَاثْ ن ثمُّورْثْ.“ ◘12:‏3 أَمز. 18‏:‏18؛ 22‏:‏18؛ 26‏:‏4؛ ڒخ. 3‏:‏25؛ ڭال. 3‏:‏8.   *

٤ ؤُشَا إِرُوحْ أَبْرَامْ أَمْ مَامّشْ ذ أَسْ إِنَّا سِيذِي، ؤُشَا إِرُوحْ لُوثْ أَكِيذسْ. ثُوغَا أَبْرَامْ غَارسْ خمْسَا ؤُ-سبْعِينْ ن إِسڭّْوُوسَا ؤُمِي د-إِفّغْ زِي حَارَانْ. ٥ ؤُشَا إِنْذهْ أَبْرَامْ سَارَايْ ثَامْغَارْثْ نّسْ، ذ لُوطْ مِّيسْ ن ؤُمَاسْ، ذ مَارَّا أَڭْڒَا إِ يَاربْحنْ، ذ إِوْذَانْ ذ ڒْْمَاڒْ نِّي د-كسْبنْ ذِي حَارَانْ. فّْغنْ زِي حَارَانْ حِيمَا أَذْ رَاحنْ غَارْ ثمُّورْثْ ن كنْعَانْ ؤُشَا إِوْضنْ غَارْ ثمُّورْثْ ن كنْعَانْ. ◘12:‏5 ڒخ. 7‏:‏4. ٦ إِژْوَا أَبْرَامْ زِي ثمُّورْثْ نِّي غَارْ ومْشَانْ ن شَاكِيمْ أَڒْ ثَاشجَّارْثْ ن يِيڭّْ ن مُورَا. ذِي ڒْْوقْثْ نِّي ثُوغَا أَيْثْ ن كنْعَانْ زدّْغنْ ذِي ثمُّورْثْ. ◼12:‏6 ’شَاكِيمْ‘ - إِسمْ وَانِيثَا إِخْسْ أَذْ يِينِي ’ثَاغْرُوضْثْ‘ نِيغْ ’أَعْرُورْ‘. ’ثَاشجَّارْثْ ن يِيڭّْ‘ - نِيغْ ’إِبجِّي‘. إِسمْ نّسْ س ثْلَاثِينِيثْ ’بِيسْثَاشِيأَ ثربِينْثُوسْ‘، خْزَارْ أَمَاوَالْ أَمشْطُوحْ ن oمَارْ كرْذْجَا (424، 437).  ◘12:‏6 أَمز. 10‏:‏18، 19؛ 13‏:‏7. ٧ إِبَانْ-د سِيذِي إِ أَبْرَامْ، إِنَّا أَسْ: ”إِ زَّارِيعثْ نّشْ ؤُمِي إِ غَا وْشغْ ثَامُّورْثْ-أَ.“ ؤُشَا إِبْنَا ذِينْ إِجّْ ن ؤُعَالْطَارْ مِينْ خفْ إِسَّارْسْ ثَاغَارْصْثْ إِ سِيذِي، ونِّي ذ أَسْ د-إِبَاننْ. ◼12:‏7 ’أَعَالْطَارْ‘- نِيغْ ’ڒْْمذْبحْ‘.  ◘12:‏7 أَمز. 13‏:‏15؛ 15‏:‏18؛ 17‏:‏8؛ 24‏:‏7؛ 26‏:‏4؛ أَعَوذ. 34‏:‏4.

٨ خنِّي إِعْذُو سّنِّي غَارْ إِذُورَارْ إِ إِدْجَانْ خْ شَّارْقْ ن بَايْثْ-إِلْ ؤُشَا إِوْثَا ذِينِّي إِقِيضَانْ نّسْ، إِجَّا بَايْثْ-إِلْ خْ جِّيهثْ ن ڒْْغَارْبْ ؤُ عَايْ خْ شَّارْقْ. ذِينْ إِبْنَا إِجّْ ن ؤُعَالْطَارْ إِ سِيذِي ؤُشَا إِڒَاغَا إِسمْ ن سِيذِي. ◼12:‏8 ’بَايْثْ-إِلْ‘ - إِسمْ وَانِيثَا إِخْسْ أَذْ يِينِي ’ثَادَّارْثْ ن أَربِّي‘. ’عَايْ‘ - إِسمْ وَانِيثَا إِخْسْ أَذْ يِينِي ’ڒْْخَارْبثْ‘.

٩ أَوَارْنِي مَانْ أَيَا إِفْسِي أَبْرَامْ إِقِيضَانْ نّسْ، إِمُّوطِّي زڭْ ومْشَانْ غَارْ ومْشَانْ، غَارْ ثمُّورْثْ ن لْجَانُوبْ.

١٠ إِذْوڒْ ڒَْاژْ ذِي ثمُّورْثْ ؤُشَا إِكمّڒْ أَبْرَامْ خْ وبْرِيذْ نّسْ، إِهْوَا غَارْ مِيصْرَا، حِيمَا أَذْ إِزْذغْ ذِينْ أَمْ ؤُبَارَّانِي، مِينْزِي ثُوغَا ڒَْاژْ إِمْغَارْ ذِي ثمُّورْثْ. ١١ ڒَْامِي د-ثِيوضْ ڒْْوقْثْ نِّي ؤُمِي إِ غَا يُوذفْ غَارْ مِيصْرَا، إِنَّا إِ سَارَايْ، ثَامْغَارْثْ نّسْ: ”خْزَارْ، أَقَا سّْنغْ بلِّي شمْ ذ ثَامْغَارْثْ ذَايسْ أَژْرِي. ١٢ خْمِي شمْ إِ غَا ژَترنْ إِمِيصْرِييّنْ، زمَّارنْ أَذْ إِنِينْ: ’ثَا ذ ثَامْغَارْثْ نّسْ!‘، أَذْ أَيِي نْغنْ ؤُشَا أَذْ شمْ جّنْ ذِي ثُوذَارْثْ. ١٣ إِنِي، أَقَا شمْ ذ ؤُتْشْمَا، حِيمَا أَذْ أَيِي يِيڒِي ڒْْخِيرْ ذِي طّْوعْ نّمْ ؤُشَا أَذْ إِقِّيمْ ڒعْمَارْ إِنُو إِدَّارْ إِ شمْ.“ ◘12:‏13 أَمز. 20‏:‏12؛ 26‏:‏7.

١٤ إِمْسَارْ ؤُمِي يُوذفْ أَبْرَامْ غَارْ مِيصْرَا، ژْرِينْ إِمِيصْرِييّنْ بلِّي ثَامْغَارْثْ ثصْبحْ أَطَّاسْ. ١٥ ؤُڒَا ذ ڒْْحُوكَّامْ ن فِيرْعُونْ، أَجدْجِيذْ، ژْرِينْ ت ؤُشَا سّمْغَارنْ ت غَارْ فِيرْعُونْ ؤُشَا إِوْينْ ت غَارْ ثَادَّارْثْ ن فِيرْعُونْ. ١٦ ؤُشَا إِمْصُورفْ فِيرْعُونْ مْلِيهْ أَكْ-ذ أَبْرَامْ ذِي طّْوعْ نّسْ. أَمُّو إِ إِكْسِي ؤُدْجِي ذ إِفُونَاسنْ ذ ثْفُونَاسِينْ ذ يغْيَاڒْ ذ إِسمْغَانْ ذ ثِييَّا ذ ثغْيَاڒْ ذ إِڒغْمَانْ. ◼12:‏16 ’إِڒغْمَانْ‘ - إِڒغْمَانْ ذِي إِسْرَائِيل ؤُ ذِي ثمُّورَا نّغْنِي ذِي شَّارْقْ أَمڒْوَاسُو ذ إِڒغْمَانْ س يِيجّْ ن ثْڭعْرُورْثْ وَاهَا. ١٧ مَاشَا سِيذِي إِوْثَا فِيرْعُونْ ذ أَيْثْبَابْ ن ثَادَّارْثْ نّسْ س جّْرَايحْ مْغَارنْثْ ذِي ڒسْبَابْ ن سَارَايْ، ثَامْغَارْثْ ن أَبْرَامْ. ◘12:‏17 إِزهد. 105‏:‏14. ١٨ خنِّي فِيرْعُونْ إِڒَاغَا-د إِ أَبْرَامْ، إِنَّا أَسْ: ”مَانَاوَايَا إِ ذَايِي ثڭِّيذْ؟ مَاغَارْ وَارْ ذ أَيِي ثنِّيذْ بلِّي نتَّاثْ ذ ثَامْغَارْثْ نّشْ؟ ١٩ مَايمِّي ثنِّيذْ: ’نتَّاثْ ذ ؤُتْشْمَا!‘، أَڒَامِي ت ڭِّيغْ نشّْ ذ ثَامْغَارْثْ إِ يِيخفْ إِنُو؟ ڒخُّو خْزَارْ، أَقَا أَشْ ثَامْغَارْثْ نّشْ، كْسِي ت، ثْبعّْذذْ!“ ٢٠ يُومُورْ فِيرْعُونْ إِرْيَازنْ نّسْ خَاسْ ؤُشَا سّْقبّْضنْ ث أَكْ-ذ ثمْغَارْثْ نّسْ ؤُ أَكْ-ذ مَارَّا مِينْ ثُوغَا غَارسْ.